للقدر والنصيب كلمة اخرى

75

#للنصيب_والقدر_كلمة_اخرى

ح75
انا بدهشة ... شنو اديرو هنا
هبة .. بنزفوكم
انا ومازالت علامات الدهشة عليا
انا.. شنوووووو
اصالة .. بنزفوكم
انا .. ببطنك هذي انتي وسماح يستر الله
هنادي .. هههههه هذا جزاتنا
انا.. والله ماشاءالله كلكم
دفيت انوار من حضن احمد
انا.. ياسرك وانتي من بدري ضاميته حتى سلام ماسلمتي عليا
انوار .. من كثر ماني فرحانة بيه وبي رجعته لحضنك
انا.. اهو قلتيها بروحك لحضني
وسيم شد مراتك على راجلي
وسيم .. مع احمد ماعندي مرا
انوار .. سلم راجلي يارب اللي مايعرف ايبعيني
انا.. استلموني عاد 
عبدالله .. حمدلله على السلامة
انا واحمد .. الله يسلمكم يارب
وليد .. هيا ناخذو الصورة وبنطلعو كلهم يستنو
انا ... همست لاحمد عندك علم
احمد.. هههه تخطيطي ياقلبي
وخذينا صورة زي لاعبين الكورة من عددنا اللي زاد انا واحمد واصالة واسامة وسند وسماح وانوار ووسيم واقفين
وهبة ووليد وعبدالله وخالدة وهشام ووجدان مقمعزين تحت وصورتنا الممرضة وعلى وجهها علامة الاستغراب
وطلعنا من المصحة وانا عيوني دمعو من الفرحة لقيت عرم سيارات كانها زفة صح ولا اخرى سيارة وليد مزينة بورد طبيعي
انا.. احمد حتى هذي من تخطيطك
احمد.. لا الحق فكرة الشباب
انا.. ربي يحفظنا لبعض يارب ومايفرق بينا شئ ويدوم الود بينا
سند ووليد وعبدالله وهشام واسامة ووسيم  ... امين يارب
وركبنا في سيارة وليد انا واحمد من الخلف زي اي عرسان والضحكة مافارقتش فمي وهبة ووليد من قدام وكل واحد ومرته في سيارة ومعاها سيارة لولد عم احمد عصام ومعاه ضنا عمه الاخرين وسيارة فيها سالم ولد خالة احمد وفعلا كانت زفة تبيب وطلق رصاص ووصلنا للحوش وطول الطريق احمد ماسيب ايدي واول ما وصلنا للحوش لاقونا بالزغاريد ومن ضمة لحضن وبين بكا ودموع فرح برجعت احمد وكأن  الروح والحياة رجعت للكل وكان الحوش معبي وقدمو الضيافة وحطو الغذاء وتغذو الناس  واول الناس بدا يروح وحتى عمامي حجزو على طيارة العشية ولهذا توكل وفضى الحوش علينا لا مفضاش واجد قروبنا كله قاعد وكامل مش ناقص من فترة طويلة واخرا زاد الحمدلله اللي ربي جمعنا برفقة طيبة ادوووم للعمر وبين ضحك وحكي همس لي احمد
احمد.. امتى بيروحو طولوووو
انا.. عيب حبيبي وبعدين اصابتك قاعدة جديدة
احمد.. اصابتي في كتفي راه مش مكان ثاني
انا.. خزي صايع
احمد.. صايع مع حلالي
هبة ..سمعونا فيش تحكو
احمد.. اسرار
سند.. شكلهم اضايقو منا
عمتو غالية ..اللي مضايق هو اللي يمشي ياولدي هذا حوشكم ماحد يطلعكم منه
احمد.. واو يايمي نحنا ماقلنا شئ
انوار ... من اللي يبي قهوة ومن اللي يبي كابتشينو
هبة وهنادي صبو يعاونو فيها
ونحن قعدنا نهدرزو
انا بصوت واطي بدون ماحد ينتبه.. سند نبيك في موضوع
سند.. تفضلي
انا.. مش تو ومانبيش احمد يعلم بيه
سند.. الحق مانقدر نوعدك لكن على حسب شنو اللي بتقوليه
انا..تمام
احمد.. شنو تحكي انت ومرتي
سند .. اسرار
نحن ...هههههه
هبة .. الحمدلله لقيت من ياخذ حقي
وهما يشربو في القهوة والكابتشينو حولت فنجاني وصبيت
انا.. اسمعو ياغواليا بنقول حاجة
الكل التفت ليا وركزو معاي
انا.. نحن طول عمرنا مع بعض سند وعبدالله واحمد وهشام وهنادي وهبة واصالة وعلاقتنا ليها سنين وسنين وصارت اشياء قوت العلاقة بينا واشياء باعدت بينا لكن لان حبينا بعض باخلاص رجعنا لبعض بغض النظر عما صار بينا والمصايب توريك الحبايب وتزوجنا وجاني يوم خفت ان الاشخاص الجدد علينا ممكن يباعدو بينا لكن الحمدلله اسامة ووليد وخالدة وسماح ووجدان  زدتو عددنا وتمينا احلى قروب والشدة اللي صارت ليا انا واحمد ورتنا كم نحن محظوظين لان مع بعض حبيت نشكركم من كل قلبي وربي مايفرق بينا يارب
الجميع ..امين
عبدالله .. نحن مادرنا شئ لان لو احمد مكانا راه دار زينا واكثر
انا..ربي مايذوقكم اللي مرينا بيه
واستاذنو كل واحد مشى هو ومرته بيرقدو باطمنان اكثر وراحة اكبر بعد ان اطمنو علينا
وقعدنا نحن عيلة عمي محمود وبابا ووسيم وانوار
عمتو .. باركو لانوار ووسيم
نحن .. الف مبارك
عمو محمود .. شنو خير
عمتو .. انوار بتولي ام
نحن فرحنا كلنا وباركنا ليهم وطبعا انوار تحشمت ماتخيلتش عمتو تفقشها هكي
احمد همس .. الفال لينا حبيبي
انا .. امين يارب
احمد بضحكة .. لو قعدنا هنا ماضني
انا باستعباط .. كيف يعني
احمد.. نركبو لحوشنا وتو نفهمك
انا.. حتى انا اشتقت لحوشي من يوم اللي صار ماركبتش ليه الا مرة وحدة بس احمد.. اه حوشنا كنك نوارتي ضاربتيها استعباط
انا.. هي نوض هما فرحانين بانوار
وصبينا انا واحمد لحوشنا وما انتبهوش لينا او دارو روحوهم مش منتبهين واول ماخشينا لقيته مضموم وريحته حلوة
انا.. الله قديش ليا على حوشي
احمد.. حوشك بس
انا ضميته وهمست ليه
انا.. اصلا بلاك كيف بيكون عندي حوش
زاد ضمني احمد وخشينا للدار وطلعنا فيها شوق الايام والبعد والحرمان والانفصال وبعد فترة وانا ساندة راسي على صدره 
احمد.. انا بلاك مافيش روح  بلاك قلب مافيشي حياة
انا.. الحياة اصلا انت مش فيها ماتنعاش
احمد.. قلت ليك اني نحبك
انا..اه قلت لي لكن انا مانحبكش
احمد.. هههه شنو امنا 
انا..نموت فيك
احمد.. عطشان نحس في روحي مازالت
انا.. انوض نجيبلك عصير فرش
احمد.. عطشان منك انتي بنروى منك انتي مع اني عارف مهما نشرب مستحيل نروى وووو........
ورقدنا مع الصبح ومانندرو على شئ راقدين مع بعض في حضن بعض وفي حوشنا ومافيش حد بعيد على حد ونضنا على دقة الباب
احمد.. حبيبي نوضي الباب يدق
انا..عنديش جهد حبيبي
احمد.. تعبتي معاي امبارح
انا.. تعبك ياقلبي راحة واحلى تعب اللي يكون منك
احمد.. هههه الدق وقف
انا.. اكيد زيزي اللي ادق لانها لو انوار مستحيل تبطل دق نين نفتحو
احمد.. وليش مش امي او امك
انا.. مستحيل يتحشمو يدقن علينا من غير اتصال
اهي انوار تتصل
احمد.. خليها تو تفصل
انا.. اهي بعتت رسالة
احمد .. خيرها
انا.. قالت انزلو يبو يفطرو مع بعض
حبيبي هيا انوضو لان لينا هلبة ما اجتمعنا مع بعض اكيد باتي وعمو مشتاقين للمتنا هذي
احمد.. بس نركبو  طول للحوش  انا مازالت عطشان
انا..هههه  حاضر
هيا نوض خش للحمام مابين وتيت الدبش بيش اندوشلك وندوش انا على طول ودوشت لاحمد عشان مازال مايقدرش بروحه وبعدها دوشت انا
انا.. الحمدلله ان خش علينا الخريف والجو تقلب
احمد .. عليش وانتي ماتحبيش الشتاء
انا.. عشان نغطي اللي صاير
احمد.. هههههه ماحد يلومني
انا .. ياروحي انت
ونزلنا ولقينا ماما وانوار وعمتو يجهزو في الفطور وشوي وخشت علينا هبة
انا.. صبح يافتاح
هبة .. شنو نروح امنا
ماما.. هيا اللي تركب لحوشها وانت اللي تقعدي
هبة .. تسلمي ياعميمة
انا..استغربت بس
هبة .. وليد عنده شغل بدري وبيطول فقلت ليه يجبني نفطر معاكم ونقضي النهار
احمد.. شكله شغل مهم
هبة .. مش مهم بس متراكم هوينا الشهر اللي فات ماحد لهى بحاجة وتو لهذا مضغوط
احمد بضيق .. الله غالب وربي يعاونهم
هبة .. مااضايقش روحك يااحميدة والله لو سند او عبدالله راه دار هكي واكثر
انا
جيت ضميته قدام عمتو وماما لاول مرة بدون حشم لاني حسيته محتاج لحضني
احمد
لما ضمتني فعلا كنت محتاج لحضنها بس استغربت انها حضنتني قدام امي وعمتي حواء هبة وانوار ماندورش فيهم لكن الحلو واللي يضحك بدل مانحن اللي نتحشمو عمتي وامي هنا اللي طلعن
انا.. نحبك واجد ومعاش اضايق روحك
احمد.. وانا نموت فيك ونعشقك عشق
هبة .. الزف تحشمو امهاتكم تحشمو وانتم لا
انوار .. هيا نرفعو نحطو الفطور على الطاولة اللي برا هدوووم هايمين مش حاسين بينا
انا.. ياعشقي انت معاش اضايق روحك علي فات وهو اختبار من ربي لينا
احمد.. ونعم بالله ودرس نتعلمو منه لو نحن مقصرين في حقه
ومازال احمد حاضني وحاط راسه على راسي
انا.. ههههه حبيبي نحن مش في حوشنا
باعد عليا احمد وباسني على خدودي
احمد.. معاك ننسى الدنيا كلها
وطلع احمد وانا قعدت انجهز مع انوار وهبة مع تلقيحهن
عمتو .. خفو على نوارتي حتى هيا كانت غايبة زي احمد
هبة .. تحبيها ياعميمة واجد كنتك الباردة هذي
عمتو خبطت هبة على راسها .. ماحد يقول على كنتي باردة وحضنتني هذي نوارتي نوارة القلب هذي
انوار .. وانا يا امي
عمتو .. عاد انتي قرعتك عند باتك ماتبقيش طماعة خلي لنوارة شوي
انا بدموع .. ربي يحفظك لي يارب
احمد .. وعليش الدموع بس
انا نمسح في دموعي .. بروحهن ينزعلن
احمد.. معاش نبي نشوفهن نوارتي
انا .. حاضر
انوار .. هيا الفطور واتي ويستنو فيكم
وطلعنا وفطرنا وجونا زي العادة يهبل وفي ضحكة حلوة في عيون بابا وماما وعمتو وعمو ضحكة فرح غابت عن عيونهم فترة لكن في نظرة في عيون احمد مافهمتهاش
احمد.. يا باتي قولي الحاج محمد اللي لاقاني كلمته
عمو .. ايه كلمته وقالي مطر انه يسافر لتونس بيرفع امه للعلاج واول مايروح حيجي
بابا .. شفته بالك مستحق حاجة
عمو .. قلت ليه لكن ماخلاني نساعده بحاجة اصلا هو فلوس المصحة لدفعهن لاحمد مباش ياخذهن بكل
بابا .. ربي يحفظه قليل في وقتنا هذا زيه
انا.. ويشفيله امه يارب
الكل .. امين يارب
ضمت زيزي حوسة الفطور وشوي نداني احمد
انا.. نعم ياقلبي
احمد.. هيا حبيبي نبيك
انا.. به اركب انت وانا نحاول كيف نركب بدون لفت انتباه
احمد.. هههه تقول نسرقو
انا.. مش هكي لكن عاد مش كل حاجة عيني عينك
احمد.. به ماتعطليش
وانا مشيت شور هبة وانوار وعمتو وماما لان بابا وعمو ووسيم طلعو يشربو في قهوة برا في الجنان 
ماما.. نوضي نوارتي شوفي احمد ركب
هبة .. على اساس هيا مش عارفة انه راكب
انا.. هبة بطلي وعطيتها نظرة هيا عارفتها
اني راكبة ياماما
وركبت لحبيبي وقلبي ولقيته متكي على السرير جيته وضميته زين
احمد.. طولتي ياقلبي
انا.. دقايق ياحبي
احمد.. الدقايق واجد عندي
وبدا يبوس فيا في كل مكان ووووووووو
وتحت في حديث داير
هبة .. عماتي بنقوللكم احمد مافتح معاكم شئ
ماما.. زي شنو
هبة .. علي اللي صار معاه لان احمد مش من النوع اللي يسيب حقه هكي
انوار .. انا حاسة انه الهدوء الذي يسبق العاصفة
عمتو .. اصلا سؤاله على الحاج محمد عشان يبي يوريه المكان اللي لقاه فيه
ماما.. يستر الله
هبة .. ماتخافيش عميمة لان سند ووليد وعبدالله وهشام واسامة ووسيم مش حيخلو احمد بروحه لو فكر في حاجة
انوار .. يستر الله ومايدير حاجة اضره
هبة .. وليد قالي انهم تو مركحين لان احمد مايطلعش من الحوش نين يصح ولما بيصح مش حيخلوه بروحه
ماما وعمتو .. ربي يحفظهم يارب 
هبة .. راكم تحكو حاجة لعبير
انوار .. عليش نحسها تعرف خير
هبة .. لا يا نانا متنسيش انها هيا معرضة لانهيار عصبي وهالمرة قال الدكتور حيكون قوي ويستر الله عليها واذا قلنا لها تبدا مشغولة على احمد
ماما .. ديمة خلوهم مشغولين ببعضهم احسن
عمتو .. بالذات الايام هاذي مرايفين واجد على بعضهم على الاقل يلهو مع بعض وينسى احمد اللي يفكر فيه
وعندنا
احمد.. قوليلي حبيبي شنو قصة شنطة الفلوس اللي على الكنبة
انا.. هذين لما لقو سيارتك قلت ليهم اكيد تو يتصلو يطلبو فلوس خلونا نجمعو السيولة بيش تكون واتية طبعا الفلوس هذين فلوسي اللي داستهن والفلوس اللي انت مخليهن هنا وفي حوشنا الثاني وحتى بابا وعمو جمعو السيولة اللي عندهم في الحوش ومع ان الشباب عرضو كلهم لكن بابا وعمو رفضو وقالو ليهم لو طلبو اكثر من اللي عندهم تو يقولولهم وحتى لميت الذهب اللي عنده كله وقلت ليهم يبعوه غير عمو قال نشوفهم قبل
احمد .. حضني زين ربي يخليك لي يارب ومايحرمني منك
انا .. امين يارب
حبيبي بنقولك
احمد .. نعم
انا.. ربي يقول داو مرضاكم بالصدقات وانا الحق نبي نتصدق من الفلوس هذين
احمد .. ماتشاوريش حبيبتي في حاجة زي هذي لربي
انا .. وخاطري نمشي عمرة
احمد.. بعد العيد ان شاءالله نمشو شنو رايك
انا.. ياريت وناخذو معانا ماما وعمتو
احمد.. حاضر ياقلبي لكن موسى ومحمد مع من يقعدو
انا.. نخلوهن مع انوار
احمد .. تمام بكل مش حكينا واجد هكي
انا.. هي ننزلو
احمد .. اي نزول مازالت انا وباسني على .... بوسة طويلة وهادية وحنونة وبعدها ووووووو
وقعدنا هكي اليوم كله يجن نسوان ورجالة ننزلو شوي وبعدها نركبو ومرات واجدة مانديرو في شئ لكن المهم اننا نقعدو في حضن بعض وكاننا خايفين نتفارقو من جديد وفي الليل ونحن مكسدين مع البنات
انا.. بكرة اكدو رمضان كل سنة وانتم طيبين
البنات .. نحن وانتي
هنادي .. شنو تنسيقكم لرمضان مع الماشي والجاي
انا.. كل يوم بندير نوعين موالح كمية كبيرة وانوار لانها بتجي يوم ايه ويوم لا قالت تو اندير نوع مع ان ماضني مع الوحم تو بيبدا فيها ويتعبها لكن قالت حتى ماقدرت بتشري وهكي يكون عندي ثلاث انواع
هبة .. وانا يومي مني نوع لاني نفطر مع هل وليد وبندير ليهم كل يوم نوع من عندي وانزيد الكمية ونجيبه معاي بما ان بنجو كل يوم
هنادي .. حتى انا
اصالة .. حتى انا
انا .. ولا وحدة فيكن حتجيب حاجة شنو
هبة واصالة انتن طول الوقت فمكن على الوطا وين الجهد اللي بديرن بيه كمية كبيرة وزيدك معاها خالدة اللي حاصلة بعبودي وقالت كله منا بسبب انه ايد تشد والاخرى ترفع عودناه على الرفع
وسماح اللي بين يوم وليلة نسمعو بيها بتجيب  هو غير تجو تهدرزو وتجهزو قهوة او العصير خير وبركة
اصلا انا وماما وعمتو اتفقنا مع مرا ادير لنا كل يوم نوعين موالح مع الاثنين اللي بنديرهن مع اللي بتجيبه انوار هكي خمس انواع والله كفاية ولو استحقينا حاجة نقوللكن
هبة .. والحلو
انا.. بابا عدو للحلواني اللي نتعاملو معاه وحجزنا في بكلاوة وشعبيات وكنافة وقطايف
هنادي .. به تمام منسقين اموركم كلها
انا.. اه
اصالة .. امنا نحن جايين نمدو وجهنا وخلاص
انا.. لا ياحناتي اولا انتن جايات تهدرزن علينا وتعبو علينا الحوش وثانيا عشان احمد مايكسدش بروحه وثالثا بيش تغطن عليا لما نركب لراجلي
هبة .. ههههه خزي تحشمي
انوار .. حلوة تغطن عليا تقول علاقة
انا.. يامعفنات عارفاته راجلي لكن عيني عينك بايخة راه ومش معناها لما نركب انا وراجلي يبقى في شئ مرات يسدنا ان نحن في حضن بعض وتو هيا سلام بنركب لراجلي بغمزة 
هنادي .. عيني عينك روحو
انا.. هذا حوشكم بيا والله بلاي
اصالة .. عدي ياقلبي اللي شفتوه مش شوية عدو طفو نار شوقكم وبكرة صيام مافي شئ لبعد المغرب تقدرو اديروه هههههه ونحن بنجو بعد التراويح باذن الله
انا.. ربي مايحرمني منكن ياعز وخيات ليا
وركبت لحبيبي وكلي شوق ليه وهو اكثر شوق ليا وقضينا ليلتنا من احلى الليالي ونضنا دوشنا ونزلنا اتسحرنا وصلينا جماعة كلنا بابا وماما وعمو وعمتو ومحمد وموسى واحمد وانا
وركبنا رقدنا وانا في حضن احمد بس لبست روب مستور
ومشن ايام رمضان حلوة الحوش يتعبى بعد التراويح واحمد وعمووبابا  يمشو  يصلو في الجامع ويروح احمد كله شوق ليا وبعدها ننزل نستقبل الناس انا وصحباتي لا وخياتي لان كلمة صحباتي تنقص من قدرهن وانوار تجينا كل يوم بعد ماتفطر عند عربها ورغم وحمها الواعر وماتقدر ادير شئ معاه الا ان عمتها تبيها تفطر معاهم وماتخليش فيها ادير حاجة رغم ان انوار تحاول بس عمتها ماتخليش فيها الحق حنينة واجد على نانا  وثالث يوم رمضان ونحن نجهزو للفطور اتصل بينا اسامة  وقال لينا ان اصالة جابت بنوتة وطرنا طبعا من الفرحة ليها وسمتها سما على اخت اسامة الصغيرة اللي توفت وفرح واجد اسامة لما قالت ليه اصالة بنسميها سما وطبعا فرحتنا كلنا بيها كبيرة لكن انا في قلبي غصة كبيرة على جنيني كنهدا راه تو ليه شهرين وراني قاعدة نستنى فيه والحمدلله على كل شئ واحمد حس بيا ولما روحنا حاول يهديني ويريح بالي في الوقت اللي هو اصلا يبي من يهون عليه وبعدها بيومين سماح جابت بنوتة حتى هيا وسمتها  ارين  وطبعا الفرح كبير بيهن الاثنين ودرنا اسبوع اصالة هو الاول وبعدها سماح وبعد عشرة ايام فضت حتى الزحمة من عندنا الا على الخفيف وانا تما احمد يطلع ولما نتصل بيه يكشخ عليا وانا نتصل خايفة عليه وقلبي مايهنيش فيا وحتى قعد يروح موخر قبل الفجر بشوي
ومرة اتصلت بيه قبل المغرب