للقدر والنصيب كلمة اخرى

10

#للنصيب_والقدر_كلمة_اخرى

ح10
نعم احمد
احمد ...تعالي ترا اشرحيلي هذي تو لما جيت نراجع فيها حسيت روحي مش فاهمها
انا ...سحبتك رقدت  ماتوقعتكش تراجع قاعد
احمد ...ماجانيش نوم الحق فقلت خليني نراجع خير بيش يثبت الشرح
انا ...هات جاي نشرحه لك
وشرحت لاحمد وخشيت رقدت ونضنا ثاني يوم مالقيتش احمد وخشيت على قروب الفايبر وبلغتهم اننا بنمشو لحوش هشام وهبة لقيتها كاتبة طالما تطلعي عادي معناها بكرة عندي القراية
وعبدالله وهنادي  كتبو معناها نحن اللي بعده
وانا كتبت واللي بعده سند  عشان نرضو الجميع واتفقنا
انا ...عميمة احمد وين ماشفتاش غريبة طالع بدري
عمتوغالية ...والله مانعلم بنيتي وصاني على دواك وطلع
انا .. وين انوار ياعميمة
عمتو غالية .. ماسك عليها عمك محمود من الصبح يراجع ليها لان قاللها القراية الصبح بدري افضل تخيلي منوضها من الساعة8
انا... احسن مادارلها مع انه ماينخاف عليها لكن الشهادة ضروري من الشد
خليني امنا نخش نصبح عليهم ونسئله على احمد
خشيت على عمو محمود وانوار
صباح الخير ياعميمي صباح الخير انوار
عمو محمود ...صباح النور بنيتي كيف حالك اليوم
انا ...الحمدلله بخير
عميمي بنقولك احمد طلع بدري اليوم ماقالكش وين ماشي
عمو محمود ...والله مانعلم لكن هو اللي وعاني وقالي نبي فلوس استغربت لانه عمره ماطلب مني خدمته كويسة ورصيده في المصرف تمام
انا ... بالك ماعنداش بس حاليا نين يسحب
عمو محمود ... لا المبلغ اللي خذاه كبير  قال نبي زيادة علي اللي عندي  نين نلقى من يسحبلي من المصرف ونردهن لك
انا ..كم ياعمو 
عمو محمود... عشرة الالاف
انا... بالك صفقة او حاجة ان شاءالله خير
وخشيت داري وصبحت على يوسف وقعدت نقرا وجيت بنعاون عمتو غالية في الغذاء هزبتني وطلعت
سمعت صوت سيارة خشت للصور بس مش صوت سيارة احمد العالية قلت ممكن حد جاي لعمو محمود مادورتش
دق باب داري
انا...خش
احمد...السلام عليكم  نوارتي  خذيتي دواك
انا...وعليكم السلام  ايه خذيته
وينك من صبح ربي ادور
احمد ...تعالي تو نوريك فيش كنت اندير
طلعت معاه للصور لقيت سيارة جديدة وتهبل ومش عالية موديلها كان كيا لكن شكلها حلو
انا ...احمد سيارة من هذي
احمد ...سيارتي ينعن جد سيارة من
انا...بدهشة مبارك مبااااااارك وان شاءالله تبيدها ولاتبيدك يارب بس شنو خطرها عليك
احمد.. انتي السبب ياحلوة اصلا مانندريش على وضعك هذا لامتى بيقعد واكيد عمك محمود مش ديمة حيعطيني سيارته وياخذ سيارتي فاختصرت الموضوع وقلت نطلع نشري سيارة صغيرة ولما نرفعك نمشي بيها ولما بروحي نطلع بسيارتي
طلع عمو محمود ...مبارك يا ولدي تبيدها بالهنا واحسن مادرت
اه معناها الفلوس خذيتهن على خاطرها
احمد ...الله يبارك فيك ياباتي اه خذيتهن عشان المصرف منزالين رواتب اكيد بيكونن زحمة واللي عندي في الحوش مش حيوفن حق السيارة
عمو محمود ...طالما شريتها على خاطر نوارتنا  امنا احسبهن هدية مني معاش نبيهن الفلوس
وطلعت عمتو غالية وباركت لاحمد
وقالت انتو اضحكو يسلف منك ويردلك فيهن وماهن كلهن لاحمد
عمو محمود ... عشان يعرف قيمة القرش ويحس بيه
انا ...صح كلام عمو
وطبعا طلعت انوار ودرات شو شوي وبعدها خششها عمو محمود عشان تقرا
وتغذينا ومشينا العصر لحوش هشام  ولقينا هنادي وعبدالله قدامنا وشوي جت هبة و اصالة وسند  
وسلمنا على عمتي رابحة وهدرزنا عليه شوي طبعا هشام  عنده خوات واجد ومتزوجات كلهن وكل يوم تجي وحدة تبات عند هلها وتقيم بالحوش وامها وعنده ثلاث خوت كبار واجد في العمر لانهم الاولين لان الكبير عنده ولد اكبر حتى من هشام
طبعا دارو جو على السيارة ونبو الزردة ووعدهم احمد بعد الامتحانات بزردة شواء
هشام 
بعد ماروحو اتكيت نبي نرقد لكن النوم ماجانيش على مانغمض عيوني نتفكر كيف احمد مهتم بعبير وكيف معدل منبه على خاطر دواها وكيف طبها لما جاء بيركبو درجات اللي قدام الباب والله لما جو بيروح نحس في نار راكبة فيا ومعرفتش شنو السبب مع ان احمد اللي يدير فيه مش جديد علينا وواخذين عليه لانه علاقتهم اقوى من علاقاتنا كلنا وقررت نحكي لعبدالله  علي انحس بيه نبي نرتاح
طبعا عبدالله وهشام  قراب واجد لبعض واصالة وهنادي واحمدوسند  وانا وهبة
صح نحن قروب مع بعضنا لكن كل اثنين فينا علاقتهم اقوى واقرب لبعض
ومشن الايام لعند اول يوم امتحانات