للقدر والنصيب كلمة اخرى

74

#للنصيب_والقدر_كلمة_اخرى

ح74
احمد... شنوووووووو
انا ...سامحني حبيبي زلقت
احمد.. حاول انه بيوقف جيته وقمعزته وقعدت حذاه
فهميني كيف غيبوبة
انا..تو نفهمك حبيبي غير اهدا بس
انا لما تعرضت للحادث الدكتور منع علي اي توتر وفي نفس اليوم اللي روحت فيه واتصلت انت بيا وطلقتني ودمعت عيني وهسترت ومعاش نندري على روحي الا وانا راقدة مش قادرة نوض  نسمع فيهم ونحس بيهم لكن مش قادرة نفتح عيوني ونرد عليهم وكل مرة حد يجي يحكي حذاي نين قبل ثلاثة ايام فقت وقعدت نعيط وقعدت انقوللهم ان احمد هنا وفعلا طلعت انت هنا زي ماقلبي حس بيك لكن هما فتشو مالقوكش لكن المكان الوحيد اللي ماقدروش يفتشو فيه العناية وبعد ثلاثة ايام ونحن طالعين من المصحة اتصل بينا الراجل اللي اسعفك وهذي الحكاية كلها وانا اهو قدامك مافيا شئ
احمد.. وهو يبكي سامحيني حبيبي سامحيني والله هددوني بقتلك وشفت تهدديهم الاول شنو دارو فيك
انا.. مسحت دموعه وبضحكة  مسماحتك لاني مازعلتش منك اصلا والمهم انك رجعت لي بس شنو صار فيك
احمد...وهو حاضني
ضغطت على روحي بيش نكمل شغلي بدري ونروح ليك وبعدها انا مروح تكيت خذيت ليك شوكلاطات ولما قريب نوصل للحوش وقف عليا شاب قعد يحكي معاي مانندري على شئ سوى اني حسيت بحاجة كانه بخ اميه في وجهي ومافطنت بشي الا وانا مكتف وفمي مسكر ومعاي راجل يحرس فيا بسلاح وبعدها جاني واحد ملتم وقعد يقولي طلقها نطلقك واستغربت لان عادتا اللي يخطفو يبو فلوس او حاجات اخرى لكن هذا لا يبي نطلقك فقلت ليه نموت ولانطلقها وكمل احمد وهو يحكي ليا الاحداث اللي صارت كلهن معاه وكيف هرب
احمد.. بعد ماطلقتك خفت عليا الحراسة وحتى الراجل اللي يحرس فيا يغيب واجد وقعدت بالشوي نفك في روحي نين يوم لقيت روحي مفكوك وقدرت نهرب لكن مانسحابش روحي اني في مزرعة معبية رجالة بسلاحهم ومانندري على شئ الا ورصاصة ضربتني في كتفي وقعدت نهرب منهم لكن شكلي نزفت واجد معاش نندري على روحي نين انتي احذاي وكاني كنت في كابوس وفقت منه لولا فطنت اني في المصحة
انا.. ياقلبي مريت بهذا كله
احمد.. مايجي شئ قدام تفكيري فيك لاني ماهمتني روحي زي ماهميتني انتي
انا.. والله انا الشهر عدى بلاك كانه دهر
احمد.. وانتي كل يوم فيه في المصحة بعد الحادث وانا نبي نموت عليك
انا..بعيد السو عليك وخلينا ننسو اللي صار معانا لانه كلهن تفاكير من ربي لان اكيد مقصرين في حقه ويبنا نرجعو ليه
احمد.. الحمدلله على كل شئ
واول حاجة اديريها  ترجعي زي قبل
انا.. انت طالما معاي اكيد حنرجع احسن من الاول وحتى انت لازم ترجع زي قبل حتى عضلات بطنك اختفت
احمد.. حضني زييين بنرقد حبيبي
انا جيت بنصبي من حذاه وبنرقد على السرير المخصص للمرافق بيش مانضايقاش لكن ماطلقنيش قالي ارقدي معاي وانا زي اللي ماصدقت على طول حضنته ورقدنا وكانا لينا سنين مش راقدين
في حوشنا
تجهز العيلة كلها لحفلة كبيرة بعد مايطلع احمد وينور الحوش فالتجهيزات على قدم وساق والشباب كلهم رقدو تقول ليهم عام مش راقدين
هبة ..هههه كان تخشو للمربوعة تشوفهم كيف راقدين
انوار.. ياروحي عليهم
هنادي .. حتى هما ليهم شهر نومهم مش نوم اللي يرقدو فيه كانو
اصالة .. اليوم اكيد كل واحد فيهم راقد وفي قلبه فرحة
سماح .. اليوم فرحتين طلعت عبير ولقيت احمد
هبة .. قديش ربي يحبهم هما الاثنين
ماما .. هيا بنياتي ارقدن رجالتكن من بدري رقدو ياروحي عليهم
عمتو ..حتى انتن تعبتن معانا وبالذات انتي يا اصالة وسماح لانهن كانن في فترة حملهن الاخير 
اصالة ..عيب ياعمتي نحن هل طول عمرنا
سماح ..في الضراء قبل السراء ياعمتي
ماما ..ربي يخليكم لبعض ومايفرق بينكم ويحفظلكم حتى رجالتكم اللي غراب علينا زي وليد واسامة وسماح وخفنا انهم يبعدوكم علينا لكن لانكن كويسات ربي طيحكن في الكويسين وحتى هما تمو قطعة منا
انوار ..بالذات بعد وقفتهم هذي ماتتنسى ليهم وياروحي عليهم حتى حواشينهم يمشولهم على شان يغيرو دبشهم بس
هبة .. خلاص ياعميماتي نحن من يومنا عيلة
هنادي ..حتى من هشام بالرغم من اللي داره ماقصرش معانا وماقدرش يسيب اصحابه
ماما.. والله فرحت بيه حتى لما جاء سلم عليا وبكاء وهو يتأسف
عمتو .. مافيش انسان فينا مايغلط لكن المهم ان الواحد يعرف غلطه
انوار ..هي نرقدو بكرة ورانا شغل واجد واكيد الاول اول حيجو حتى عمامي بيجو اخرى
ورقدو بعد شهر من المعاناة والعذاب والهم اللي سيطر علينا كلنا رقدو وهما مرتاحين ومطمنين لكن كان في من عقله مشغول بشئ ويبي يدور على من اللي دار في احمد ومرته هكي
وثاني يوم جت الشرطة وطلعت من الجناح وهما يحققو معاه وجاني سند وقعدت نحكي معاه برا نين هما يكملو
انا.. سند خيرك مش راقد كويس شكلك
مع ان اهو حمودي روح
سند.. لا رقدت غير مش قادر نرقد براحة وانا مش عارف شنو اللي صار مع احمد ومنو وراه وليش
انا.. كيف ماهو احمد حكى كل شئ
سند.. عبير مش ملاحظة حاجة غريبة
انا.. شنو
سند.. انهم عارفين احمد كويس وعارفين حالته المادية لكن لاطلبو فلوس ولا حتى حاجة مادية لكن اللي طلبوه انه ينفصل عليك معقولة مش غريب الموضوع
انا.. فعلا حتى احمد امفكر فيه الموضوع هذا لانه قال بمجرد ما طلقني قال ان الحراسة خفت عليه وان في الشخص اللي كان ملثم وجه  ويحكي معاه معاش جاه
سند.. اه تعرفي مش قادر نرقد كويس
انا.. هونها تو كل حاجة مع الوقت تبان وخلينا تو بفرحة رجعته وخطرها حتى الدكتور قال بكرة يطلع ان شاءالله طبعا مع عرم نصايح هههه
سند.. به الحمدلله
انا.. سند بنطلب منك طلب
سند .. تفضلي
انا.. ممكن تطلع تشري لبسة لاحمد لان دبشه كله حيطلع عليه اخيه لانه راق واجد وانت عارف كيف هو يحب يهتم بروحه
سند.. حاضر هذي بس
انا.. وكان حصلت كيف في الليل بعد مايكمل وقت الزيارة تجيب حلاق ليه لان شعره ولحيته بكل ولان اكيد بكرة العيلة كلها ملتمة
سند.. حاضر وربي يحفظكم لبعض على قد ماتفكرو في بعض
انا.. كيف
سند .. لان احمد امس كلمني وقالي نقول لهبة تطلع تجيبلك لبسة حلوة بيش تلبسيها لما يطلع من المصحة عشان دبشك كله وسع عليك واجد ومش حلو تما
انا.. ربي يخليه ليا يارب
ونحن قاعدين نستنو في الشرطة تطلع جتنا بنوتة حلوة وشكلها طيوبة وجسمها متناسق ومحجبة 
البنت.. السلام عليكم
انا وسند .. وعليك السلام
سند .. اهلين وجدان كيف حالك
انا.. باستغراب سند منين يعرفعها
انا.. عرفنا ياسند
وجدان .. انا خطيبت هشام
انابضحكة ونسيت كل شئ داره هشام فيا
انا.. اهلين بيك والف مبارك ماشاءالله عليك طلع هشام عنده ذوق وسلمت عليها من جديد
وجدان .. يعني سامحتيه
انابدهشة من انها تعلم بكل شئ .. انا...سامحته بعد اللي صار لاحمد عرفت الدنيا ماتستاهل حد ينزعل منه مهما دار
وبعدين قالولي انه في محنتنا  ماقصرش معانا
سند.. والله فرحتيني عبورة ربي يكملك بعقلك
انا.. وين هشام
وجدان .. قاعد في السيارة وخايف انكم تردوه
انا.. لا حبيبة مسامحاته وبعدين عشان عنده ذوق هكي كيف مانسامحاش ههههه
وجدان.. ههههه بس احمد
انا.. احمد ولايهمك خليه عليا
وجدان .. ياريت
انا.. امتى الفرح
وجدان .. نين يرضى احمد وانتي 
انا باستغراب .. كيف
وجدان .. انا هشام خاطبني ليه ثمان شهور وبعد اربعة شهور من خطوبتنا حكالي كل شئ وقالي اني لازم نصبر معاه لانه مايقدرش بطلع فرحه ورفقة عمره مش معاه وانا قلت ليه بنصبر معاك وحاولت من قبل نوصل فيكم لكن ماعرفتش كيف
انا.. خلاص حبيبة ولايهمك
وخشينا على احمد بعد ماطلعت الشرطة وحسينا بضيق احمد وقعدت انا وسند نغيرو في جوه وبعدها فتحت الموضوع لان وجدان برا قاعدة
انا... حبيبي
احمد.. ياعيونه
سند .. احم احم  حتى المرا كارهتني من لما حملت راعونا عاد
انا واحمد ..ربي يسهل ليها على خير
احمد.. شنو حبيبي بتقولي كنتي
انا.. هشام يبي يجي
احمد.. شنو
سند .. والله يا احمد جانا واعتذر منا ووقف معانا من لما انتشر خبر اختطافك وماسيبنا
انا.. سامحته حبيبي من قلبي
احمد.. بالبساطة هذي
انا... بعد اللي صارلنا مافي حاجة تستاهل ان واحد يقعد شايل في قلبه على حد وبعدين نحن عشرة عمر ومن فينا مايغلط نحن سامحنا يوسف
احمد.. غلبتيني ياقلبي
سند.. تصدق انه خاطب من ثمان شهور وقايل لخطيبته مستحيل يطلع فرح ونحن مش معاه وهي حاولت توصل فينا لكن ماعرفتش بدون ماهشام يعلم
احمد.. وين شفتوها خطيبته
انا طلعت ناديت عليها واحمد ارتبك
وجدان .. السلام عليكم
احمد.. وعليكم السلام
وجدان .. الف حمدلله على السلامة
احمد .. الله يسلمك يارب
انا.. شنو رايك يا احمد هشام طلع عنده ذوق هالمصدي صح
احمد.. ههههه انقنه عنده ذوق
انا.. وجدان عدي كلميه هشام
احمد.. هو وين
سند .. في السيارة يستنى
وجدان .. تو نكلمه
وشوي جت هيا وهشام وتغمرو بعضهم وقعد هشام يبكي وجاء سلم عليا واستسمح مني
انا.. سامحتك عشان طلع عندك ذوق بس
احمد.. حتى انا
هشام بضحكة .. لهدرجة
سند ..احمد ربك ان ربي عطاك وجدان كنهدا ماشفت هالضحكة في وجوهم
هشام بحب .. ربي يخليها ليا وانا اصلا مش عارف شنو اللي صارلي وخلاني درت هكي
انا .. خلاص هشام اللي فات مات وبالعكس بسبب اللي درته انت تزوجت احمد ومعاه عايشة اجمل ايام عمري
هشام ووجدان .. ربي يدوم عليكم
سند .. عاد حدد الفرح هذا العذر وانتهيت منه
انا .. بعد بكرة كان تبثت رؤية الهلال بيكون اول يوم رمضان كل سنة وانتم طيبين عجلو وحددوه بعد العيد بيش نحصلو فرح نهيجو فيه
احمد وسند ووجدان وهشام .. نحن وانتي ان شاءالله
هشام .. ان شاءالله
وبعدها  بدت الزيارة طلع سند وهشام روح بوجدان 
ومشى يوم زي اي يوم جابتلي  هبة اللبسة بس احمد ماخلانيش نشوفها لبكرة واصر على اني مانشوفهاش وسند جاب اللبسة وجاب الحلاق  وحلق احمد وطلع يجنن كالعادة حتى مع الضعف والارهاق اللي هو فيه واخيرا قعدت انا وياه بروحنا
احمد.. حبيبي انتي مضايقة
انا.. عليش
احمد.. لانك من لما حكى سند على سماح  وانتي نحس فيك مش تمام
انا .. لا بالعكس مافي شئ يتهئ ليك بس
احمد. كرني شوره وقالي تعالي وحضني وانا قعدت نبكي خطر عليا جنيني اللي يادوب يكبر في رحمي وانحرمت منه
احمد.. خلاص حبي ربي يعوضنا خير والعمر قدامنا طالما نحن بخير
انا.. ونعم بالله والحمدلله على كل حال
ورقدنا وانا في حضنه وثاني يوم نضنا ومر الدكتور وعطانا اذن الخروج
حسيت بان المصحة فيها حركة عن غير عادة وخش علينا عمو محمود ومد حاجة لاحمد وطلع وقال بنلحق على الضيوف اكيد الحوش معبي
انا بضيق .. احمد في حاجة مش فاهمتها وانت عارف شنو
احمد.. اصبري شوي تو تعرفي
انا.. باه هي تعال نساعدك في اللدوش عشان نغيرو دبشنا ونطلعو لحوشنا
احمد .. هي
وخشيت دوشت لاحمد وساعدته في اللبس وكانت اللبسة اللي قلت لسند يجيبها ليه وهي سروال ابيض جينز وقميص ابيض بنفس درجة السروال وعليه جاكيت خفيف سماوي فاتح وطالع زي القمر
احمد.. تعرفي اني مرايف عليك واجد
انا بدلع .. امممم واضح
احمد باستغراب ... شنو اممممم
انا.. امس الوقت كله قضيته على الفون
احمد.. تو تعرفي ليش هي غيري والبسي وخشيت غيرت ولقيته فستان يهبل باللون الابيض من الشيفون الواسع وحزام رقيق من نفس لون الفستان وكمام طوال وواسعات ممسكوات باسوارة زي من نهاية الكم شكله يشبه الفيلو غير بديكور فستان وطلع عليا يجنن ودرت ميك اب خفيف ولميت شعري بكعكة وزينتها بطوق من الورود لقيته مع الفستان ودرت قصتي على جنب وطلعت على احمد
احمد.. ياروح قلبي حتى وانت بالضعف هذا طالعة تهبلي
انا.. منظري زي العروسة
جاء احمد ضمني ليه
احمد.. ومن قال انك مش عروسة اليوم
وفتح علبة فيها طاقم ذهب لبسه ليا بشكل قلب بخراصه وخاتمه واسوارته ومعاها دبلة جديدة وحلو شكلها لاني مكنتش لابسة دبلتي في الحادث حولوها ليا ومن الحادث للغيبوبة لرجعت احمد ماتفكرتهاش
احمد .. كل سنة ونحن مع بعض كل سنة وانتي في قلبي وانتي عمري وحياتي متاخرة جت
انا.. وانت معاي وفي حضني وفي قلبي يارب
سلمك جياب  ياروح قلبي هذا اللي جابه لك عمو محمود
احمد.. اه ماتنسيش ان كنا منفصلين بالجسد والذهب لثبات اني رديتك لي
انا.. حضنته ياروح قلبي
احمد.. هيا البسي الكاب وهيا نطلعو الشناطي تو يجي سند يرفعهن
وطلعنا من الجناح
انا بدهشة ....