للقدر والنصيب كلمة اخرى

79

#للنصيب_والقدر_كلمة_اخرى

ح79
ومشن الايام ننزل نجامل في الناس ومانطولش لاني تميت نتعب بسرعة ومقضية معظم الوقت في جناحي حتى جيت بنلهي روحي بشغل عجينة السيراميك ماقدرتش فقعدت مقضيتها قراية روايات وقصص وكتب علمية وتاريخ وكل يومين بابا وعمو يجيبو لي  كتاب ومرة جيت بننزل نسمع انوار وماما وعمتو يحكو لفت انتباهي الحديث قعدت نسمع فيهن 
انوار .. اما هي ماتتحشم بكل ثقة تعزم فينا على عيد ميلادها وقالت راجلها دايره لها كبيرة
ماما.. منو هذي
انوار .. علياء
عمتو .. ونست اللي دارته وصار فيها وفينا من جرايرها
ونزلت انا وخشيت عليهن
انا.. وليش ماتمشو
عمتو.. كيف بنيتي
انا.. الموضوع اللي صار بيني وبينها انتهى وعدى على حاله وهي تو مرات راجل
عمتو .. بس
انا.. كان تعزيني عدي انتي ونانا وحتى كان عزمت ماما عدن
عمتو .. يستر الله
وركبت زي المعتاد لعشي اللي كان مليان بضحكاتي انا واحمد وتو مليان غير بدموعي حضنت تشيرت حبيبي بعد ماقلبت في فوني وانا نتفرج بين صورنا اللي تجمعنا مع بعض وفيديواتنا المليانة ضحك ورقدت
احمد
كنت كل ليلة لازم نمشي نشوفها قبل هو بدون حضنها صعب اني نرقد لابال مانشوفهاش حتى لما مشت للعمرة كانت عمتي حواء تفتحلي فيديو كل ليلة بيش نشوفها بيش نطمن مع انه كل مافيها كان تعبان بس الله غالب عليا بعدها صعب وهي تلبس في بيجامتي وتشيرتاتي وترقد بيهن وانا مكرتني خذت دبشها كله ماخلت ليا شئ الا روب ناسياته في الحمام ناخذ فيه ونضم فيه ونرقد لان ريحتها مازالت فيه كل مانخش للحمام (حشاكم) نتفرج على فرشتها وعلى شامبوتها ولوشن جسمها ونحط منه على ايدي ونرقد لكن اللي محيرني هيا عارفتني ماليا حد في الدنيا الا هيا وعارفتني حنرجع ليها وقريب اخرى لكن ليش هيا تاعبة هكي  حتى علياء تسهوك عليا مرة تلاقيت انا وياها بنروح بامي وانوار  قالت لما مشت بتحمد لامي على مروحاتها من العمرة قالت انها مانزلتش ليهم بكل وان امي قالت تاعبة مازالت من السفرة رغم ان ليها هداك الوقت مروحة قريب عشرة ايام  بدت  تشغل فيا فلهذا لازم انتحرك بسرعة بيش نقدر نكون قريب منها
وجاء يوم جديد قلوب موجوعة عقول مهمومة ونفوس تعبانة وعيون حقودة مليانة غل وحسد
انا .. يادوب قدرت نصبي للحمام ودوشت بالغصب قلت بالك نصحصح لكن ماصار شئ خذيت فوني ورنيت على ماما لاني مش قادرة ننزل
انا.. ماما اركبيلي تاعبة بكل
ماما .. هيا هي
عمتو .. كنك ياحواء
ماما.. كلمتني نوارة تو قالت تاعبة
اتصلي بمحمود وقوليله يجي وردي بالك تتصلي بعمر لانه مع احمد قال عندهم شغل
عمتو .. به
ماما .. خيرك يابنيتي
انا.. ماما نحس في روحي مش قادرة نتحرك حتى درت دوش بالغصب نسحاب روحي ننشط كما زدت تعبت
ماما.. لاباس عليك ياروحي اهو عمتك تكلم في عمك
انا.. به
ماما .. هيا انساعدك في اللبس ولبست وشاح ولفيته كويس بيش ماينفكش مني وكانت اول مرة نطلع بالحجاب
وجاء عمو محمود وطبني ونزلني وركبني السيارة لاني معاش قدرت انتحرك ومشينا للمصحة وخششوني على الدكتورة وبعد الكشف طلبت تحاليل ودرناهن واستنينا نين طلعت النتايج
الدكتورة .. هيا حامل وليها شهر وثلاث اسابيع لكن جسمها ضعيف بكل ومرات يرفض الحمل من ضعفه
عمو .. والحل
الدكتورة .. اولا لازم نركبو ليها تغذية وثانيا لازم تمشي على نظام اكل معين
انا بصوت يادوب يطلع .. بس مانبيش نبات هنا
الدكتورة .. بس لازم من التغذية كنهدا تخسري جنينك
انا.. به نجي كل يوم المهم مانباتش هنا
الدكتورة .. مع انه حيكون تعب عليكم لكن اللي يريحك
وطلعت الدكتورة وطلع وراها عمو وماما
ماما.. في فمك حكي يادكتورة
الدكتورة .. هو مانبيش نخوفكم لكن جسمها ضعيف ومش مهئ للحمل حاليا بكل
عمو .. يادكتورة هي نفسيتها تاعبة صاير خصام بينها وبين راجلها لكن لو يصير حاجة لجنينها تموت فيها المرة هذي
الدكتورة .. سبق ليها الحمل من قبل
ماما.. حتى هو شهر وضربتها سيارة واجهضت
الدكتورة .. لازم تمشي على النظام الغذائي اللي بنكتبه ليها والتغذية حاليا تبي يوميا اثنين
عمو .. باذن الله اللي تقولي عليه حنفذوه
الدكتورة .. ان شاءالله
وركبولي تغذية والثانية وروحت للحوش
عند بابا واحمد وسند 
بابا .. متاكد يا احمد ان هذي المزرعة اللي كنت فيها
احمد.. ايه متاكد كل التاكيد صح كنت مشوش لما نجري لكن في امارات مانسيتهنش
سند.. تمام هكي نبلغو الافندي سليم وهو يعرف لنا المزرعة لمن
احمد .. تمام بس بدون مايدير شئ يعرفها بس لمن
سند .. تم اصلا هو قال نساعدكم لكن مش حندير حاجة لما نكونو متفقين  على كل خطوة
بابا .. تمام امنا هي انروحو نحس في قلبي مش مرتاح
احمد.. حتى انا نحس في قلبي ينغز فيا لكن قلت ممكن عشان اذكرت اللي صار معاي لكن قاعدة النغزة 
وجاء بابا وقعد يعارك ليش ماقلناش ليه
عمو .. ماهو انت كنت مع احمد ولو قلنالك مش حتقدر تشد روحك واحمد حيعرف وانت عارف اذا احمد عرف شنو حيدير  فينا وتقريبا انت عارف نوارة لو حلفت انها تنفذ
بابا .. هذا الهم اني عارفها كويس
به ليش ركبتوها فوق
ماما .. سكرت راسها قالت نبي نرقد في داري
عمتو .. مشتاقة البنت لراجلها والله ظلم هو يشوف فيها وهي محرومة منه
حرام والله الظلم ماقال بيه
بابا .. ربي اللي عالم باحمد شنو فيه
عمو .. غير كان تحكي بس ياعمر وتريحنا
بابا .. مانقدرش وعدت احمد زي ماوعدت نوارة
وركب بابا فوق يطمن عليا ولقى احذاي هبة ونانا وجاء حضني وقعدت نبكي
انا.. مرايفة عليه يابابا مشتاقة ليه نبي نشوفه حتى من بعيد يابابا ارفعني نشوفه بس
بابا .. هدي روحك وحاضر مايصير غير خاطرك طيب
انا.. امتى
بابا .. ارتاحي بس ونرفعك
انا.. اه وصبيت انا تمام
بابا ..ههههه هيا نوضي
لبست وحطيت وشاحي بمساعدة هبة ونانا
بابا .. استني شوي هبة وين وليد
هبة .. اكيد في الحوش عمي
بابا ..اتصلي بيه واعطيه ليا
هبة .. هاك ياعمي
بابا.. ايوة وليد بنقولك تعالي نبي سيارتك وخوذ سيارتي  وسكر بابا
انا.. عليش يابابا
بابا .. مانبيش احمد يعرف اني جبتك وسيارتي حيعرفها لكن وليد مش حيركز عليه واجد وخصوصا مظلمة
انا.. به
وجاء وليد وفعلا مشينا في سيارة وليد ورفعني بابا لمشروع احمد وقالي انه اليوم النهار كله بيقضيه فيه لان يصبو قاعدين وخايفين من اي شئ ووصلنا وانا قلبي بيطلع مني وشفته من بعيد رايح ذابل حتى هو وشوي وجاء من مكان قريب عبيت منه عيوني وكم تمنيت نفتح باب السيارة ونجيه نجري ونرتمي  في حضنه ونقوله قديش تاعبة حياتي بلاك ونقوله اني وجنيني  محتاجينه وبنقوله انا مريضة وتاعبة وصحتي مش حترجع الا بيك لكن اكتفيت بدمعة نزلت حارة وساخنة نين حسيتها حرقتني
انا.. هيا يا بابا والله لاتسامح من كان السبب
وروح بيا بابا وخشيت رقدت وانا فرحانة شوي فرحانة اني شفته بعيني مش الايام اللي فاتن انشوف فيه غير صور او فيديوات في فوني
نضت في الليل موخر وحسيت بعطر احمد قوي في الدار وكانه كان فيها تو وطلعت نتحرك مش قادرة نمشي بسرعة لاني تاعبة والدكتورة منعت عليا
لكن مالقيت شئ رجعت لجناحي وتوضيت وصليت وقريت قران ودعيت لربي نين رقدت في مكاني
وجاء الصبح وعتني هبة وخششتني للحمام (حشاكم) وساعدتني في دبشي وقالت انها هيا اللي بترفعني للمصحة ومعاها وليد
انا.. شنو ان شاءالله وليد يعلم
هبة .. لا كيف تساحبيني نقدر نستغنى عليك بسهولة نين نقول لوليد
انا.. امنا من اللي بيرفعنا للمصحة
هبة .. وليد بس فاهم انك عندك ضعف بسبب بعد احمد
انا بتنهيدة .. قولي بعد روحي عليا
هبة .. ربي يرجعكم لبعض
انا.. امين بس كيف بدون اذن احمد مانقدرش نطلع الا مع بابا او عمو او وسيم بدون اذنه لانه وعطيني الاذن من زمان لكن وليد لازم نشاوره
هبة .. ماتخافيش عمي عمر كلم احمد على اساس اني عندي مراجعة وبنجهز حاجات للبيبي
انا.. به الحمدلله الواحد على الهم اللي فيه مش ناقص ملائكة تلعنه 
وطبعا نزلت وفطرت غصبن عني لاني في الاخير بنحافظ على جنيني وطلعنا للمصحة وركبولي التغذية ووليد طلع نين نتصلو بيه
انا..هبة نبهتيه انه مايقولش لاحمد
هبة .. ايه حبيبة نبهته
انا.. تمام
هبة .. حاولي ترقدي نين تكمل التغذية
انا .. به وفعلا رقدت
عند احمد
عبدالله .. نحن جاينك اليوم بناخذو اذنك
احمد .. ان شاءالله خير في شنو
هشام .. بنمرو على عبير نطمنو عليها وبانها مازالت على ذمتك نحن مانقدروش منغير علمك
احمد.. ولا يوم حتكون من غير ذمتي
عبدالله .. امنا عليش مسيبها والله حالها يقطع القلب
هشام .. والله كل يوم وجدان تحكي كيف رايحة ذابلة من بعادك عليها
احمد.. والله ليا ظروفي
عبدالله .. احكي ظروفك بالك نساعدوك نحن مش خوت
سند .. احكي يا احمد ريحنا
طبعا سند دار روحه مايعلمش عشان مايضايقوش هشام وعبدالله
احمد.. والله ماني عارف نبدا امنين
عبدالله .. ابدا منين تبدا المهم تحكي وتريحنا
وحكى لهم احمد على الرسائل وعلى التهديد اللي يجيه وكيف وقفن الرسائل بمجرد ما انا مشيت لحوش اهلي
هشام .. غريبة لكن بمجرد ماروحت عبير لحوش بوها وقفن الرسائل
عبدالله .. وكأن اللي داير فيكم هذا مش يبي فلوس يبي انك وعبير تتفرقو
زعمك يوسف مش وراء الموضوع
احمد.. لا لا ومتاكد ان مش يوسف اولا الراجل تزوج وعدى حاله وثانيا دورت وراء يوسف مالقيت شئ حتى الافندي سليم مالقاش وراه حاجة
سند .. غريبة الحق
هشام .. ها تعطينا الاذن
احمد .. اكيد وعندكم شك اني نقول لا
وديرو بالكم عليها وغيروله جو
عبدالله .. مرايف عليها يا احمد
احمد بحرقة وتنهيدة كبيرة ..كلمة مرايف شوي خاطري نمشي انضمها ونفتح قلبي ونحطها جواه من كثر ما اشتقت ليها
سند .. ربي ينهي هالموضوع بسرعة وترجعو لبعض
احمد .. امين يارب
عبدالله .. هيا امنا خلينا نطلعو
وطلعو الثلاثة ومعاهم عقل وقلب احمد
  عندنا
روحت انا وهبة وخشيت للحوش اتكيت شوي وبعدين ركبت فوق نين يجهزولي الغذاء وشوي ورن فوني ولقيته عبدالله
انا.. السلام عليكم
عبدالله .. وعليكم السلام
انا.. به اللي تفكرتو عندكم اخت تسئلو عليها معقولة من مرواحتي من العمرة منشوفش خلقت واحد فيكم تاخذو في نسوانكم بدون ماتخشو تشوفوني 
عبدالله .. والله ديمة في بالنا ونسئلو عليك في مراتتنا
انا.. خيرك تحكي بصفة الجماعة
عبدالله .. ماهو انا معاي سند وهشام وتو جايين شور حوشكم بنتغدو معاك بدون مراتتنا اجازة
انا.. تانسو وتشرفو نوقض ماما وعمتو والله عارفين ودايرين احسابهم
عبدالله .. ماتعبيش روحك عندهم علم
انا.. تمام هي نستنى فيكم
اتصلت بهبة ركبتلي بيش تساعدني في لبس دبشي
هبة .. غريبة جايتهم
انا.. نحس فيها عادي يبو يطمنو عليا واكيد نين كلمو احمد قبل بيش يجو
هبة .. ان شاءالله خير
لبست فستان من الشيفون ومبطن وكم لونه بيج ومنقط بدوائر كبيرة لونها ازرق ملكي  وعند الخصر حزام رقيق ازرق ملكي ولبست عليه وشاح لونه بيج
هبة .. بسم الله ماشاءالله مع وجهك الدابل وجسمك الضاعف لكن طالعة تهبلي
انا.. عشان تحبيني ديمة تشوفي فيا حلوة
هبة .. والله مانجامل
انا .. هيا نزليني قبل مايشوفك وانتي تنزلي فيا ينفجعو
هبة .. والحمدلله ان المجمع دارته فوق كان دارته في كفك راه قعد باين
انا.. الحمدلله
ونزلت بالشوي بمساعدة هبة ليا طبعا وشوي من نزلتي لقوني مقمعزة
عبدالله وسند وهشام .. عبورة شنو هذا