للقدر والنصيب كلمة اخرى

54

#للنصيب_والقدر_كلمة_اخرى

ح54
مشن الايام وجاء عرس اصالة وطلعت تهبل والفيلو طلع عليها احلى مني بهلبة وهي شعرها  قصير هلبة ومالبستش طرحة لانها بتخش هيا واسامة مع بعض ونحن قالت لينا نلبسو ازرق ملكي بيش تبان بينا لان الفيلو ابيض لونه وانا طبعا جبته معاي من تركيا وكان طوله محير وكله دانتيل ونفخة بسيطة ونص كم وطلقت شعري ومادرت فيه شئ ولبست عليه كندرة حمراء واكسسورات بنفس اللون ولما خشت هيا واسامة لبسنا كلنا كابتنا وعبياتنا وبعدها طلع خذينا راحتنا وبعدها رجع اسامة غيرو الدبل وكلو التورتة ودارو جو ورقصو مع بعض وبعدها طلعت ونحن عاد درنا مناحة ومشينا لصبحيتها وبعدها خشينا طول في فاتحتنا انا واحمد والتخطيط مخطط من قبل وكل شئ جابه جاهز مايبنيش نتعب في شئ وجو عمامي وخوالي من طرابلس وخالي الكبير مش عاجبه الموضوع لانه قبل يبني لولده لكن بابا قاله نصيب وبعدين احمد تعرفه وكابرة معاه لكن ولدك تعرفه من بعيد لبعيد واللي نعرفوه خير من اللي مانعرفوه  وطبعا عزومة الرجالة والتلبيسة كلها في يوم واحد وانا من اول مانضت مشيت للكوافيرة عشان نحني حنة ايديا خليجية بسبب احمد مايحبش ريحة الحنة ومشن معاي  هبة واصالة لانها اجلت سفرتها على خاطر فاتحتي وعرس عبدالله وطبعا دارتلي تسريحة حلوة ولبست فستان عريان  لاول مرة الصدر بتاعه بشكل قلب ومرصع كله ومنفوخ من القماش الواقف مع ثنيات من تحت واجد وطويل من الخلف وقصير من قدام للركبه  ولونه ازرق كحلي  ولبست عليه طاقم فضة وكندرة فضية وطلعت حلوة بيه واصالة مكيجت مكياج عربي لانها بتلبس عربي بحكم انه يوم اسبوعها وبعدها بتغير فستان وقررنا انها اديره عندنا بما ان هلها كلهم حاضرين وطبعا الفاتحة في الصالة وهبة لبست فستان حلو طويل ولونه احمر اما انوار وهنادي شورهن الاشراف على العاملات والاهتمام بالتفاصيل لان احمد مايبي حد يتعب معاه كملت كل شئ
هبة واصالة  ..بسم الله طالعة تهبلي
هبة ..هههه اول مرة تلبسي في كوافيرة انا..عيونكم حلوات  وحتى انتن حلوات طالعات
صح اول مرة نلبس في كوافيرة عشان مانبيش نتعب فتحي ونبيش احمد يشوفني الا في الصالة 
هبة .. شنو شعورك اللي تحسي فيه
انا..مشاعر متلخبطة توتر على خوف من اللي جاي
اصالة .. خوف شنو وانتي بتتزوجي احمد اللي كبرتي وعشتي معاه وعارفك قبل حتى ماتتكلمي
انا.. اهو الواحد مايعرفش شنو بيصير لقدام اهو زمان لما اتزوجت يوسف نسحابه اول واخر بختي
هبة .. الحمد لله انك بختك بتختميه بخاتمة حلوة في احن واطيب من قلب احمد
انا.. اكيد لا
هبة .. خلاص امنا
اهو فتحي جي يرن عليا
لبستني هبة كابي ولبست اصالة كابها ونحن ركبنا مع فتحي واصالة جاها راجلها وهبة ركبت معاي من الخلف لانها قالت لفتحي اني متوترة بتهديني
هبة .. ابصر شعور احمد لما يشوفك اول مرة بالعريان لكن اكيد عارف ماهو هو اللي بعث على القفطان  هو انا شفتك بيه واول مرة تلبسي عريان ومتت امنا هو شنو بيصير فيه بالذات مع اللون الداكن وجسمك الابيض 
انا.. هبة سكري فمك يسمع فينا فتحي
هبة.. فتحي لاهي في السواقة وبعدين المسجل عالي
انا..احمد مايعلمش انه ليا لما خذيته اتفقت مع انوار تختار زوز فساتين وشيرت ليها عليه واحمد جابه على اساس لانوار وانا واحد ثاني جابه ليا مش هذا
هبة .. وشنو خلاك تختاري هذا
انا..  كان احمد ديمة نشوف فيه يتفرج عليه ومعلم حتى الصفحة وولما اختاراته انوار قال اه اختارته انوار  فشبحت لاحمد قلتله قبل تبيني نختاره احمد قالي قبل فانا درت روحي عبيطة وقلت ماهو تعرفني مانحبش العريان رد احمد بحزن شوي عارفك لكن قلت بالك تغيري
هبة ..اطلع حق ربي وتقولي مش عارفة شنو شعوري اهو على خاطرة بتلبسي عريان وتقولي شعوري ملخبط
انا.. مش هكي اولا انتي عارفة احمد وعارفة علاقتي بيه ومش قادرة نحدد انا شنو نبيه كزوجي او لا
هبة .. مازال عبورتي بيش تتاكدي بعدين لما تصيرو في حوش واحد ويسكر عليكم باب مع الوقت تو يتغير كل شئ وخصوصا انه ماصار شئ بينك وبين يوسف فلما تجربي الشئ هذا مع احمد صدقيني كل شئ يتغير
انا.. ان شاءالله وشديت ايد هبة حطيتها على قلبي
هبة ..اوه هذا كله
انا ..ماهو قربنا نوصلو
وصلت للصالة وخشيت للاستقبال وطبعا جني البنات وشافني وفرحن وشوي سمعنا زغاريد والعاب نارية وجو عرفت ان الفاتحة انقرت وخلاص تميت رسمي زوجة احمد وخشيت للصالة والفرقة دايرة جو يهبل وشوي وخش احمد لابس سروال جينز ابيض وقميص ابيض مبين تفاصيل عضلاته وعليه جاكة قهوية وكندرة قهوية منظره يهبل ومع لحيته السودا المرسومة وشعره اللي طوله لنهاية رقبته ونعومته يهبل ياربي طالع وهو خاش شاد في ايده  محمد وموسى وداير بيهم جو نين ماركزش عليا ولما وصلني وهو بيركب من الدرجات وقف جامد نين جاته هبة
هبة .. احمد اركب خيرك وقفت ونخصاته 
وانا كنت مصبية ميته ضحك على احمد
احمد.. فطنت بنخصة هبة وبضحكتها احمد
قديش بنفسر شعوري هذيك اللحظة الفستان اللي طالعة فيه قمر واخرى اول مرة نشوفها بعريان يعني على خاطري دارت هكي لما عرفت اني نبيها تختاره هي قبل وبعدين ركزت في الضحكة الله قديش زايدتها حلاوة قديش طالعة من القلب ليا واجد ماشفت الضحكة هذي وانتبهت لروحي على نخصة هبة وركبت وسلمت عليها بالخد وحبيت على راسها
احمد..مبارك يامرتي ليا
انا.. ضحكت من جدي احمد يفترش في الكلام ا
الله يبارك فيك ياراجلي عليا
احمد.. ضحكت وفطنت لروحي
مبارك علينا نوارتي
انا.. الله يبارك فيك خيرك احمد متوتر هكي
احمد..ههههه  كنت خاش بعقلي وبكل ثقة شفتك وشفت ضحكتك كاني اول مرة انشوفك مش مصدق انك مرتي وبحلال ربي وراح كل شئ العقل والثقة 
انا.. نضحك وبس وشوي جتنا المصورة
وصورتنا صور حلوات وقلبي كانن دقاته يسمع فيهن احمد
احمد.. نوارتي قلبك واصل لوداني راه
انا.. متوترة على فرحانة على ملخبطة
احمد.. انسي كل شئ وفكري فينا بس
وصورنا مع العيلة وطبعا ماخلاش الموضوع من دموع ماما وعمتو وبعدها جابو الدبل. طبعا الدبل اختيار احمد لاني عارفة ذوقه وفعلا حلوات وجابلي ثلاثة فضة ولباسية  وسوليتير وجابلي طاقم حلو ذهب يهبل انيق وبسيط ولما احمد يلبس فيا في السلسلة كنت نحس بلمسات ايديه حاجة غريبة وشعور غريب وجابولنا التورتة ووكلني ووكلته والفرقة الجو اللي دايرته يخليك ترقصي من غير شئ شيرت لهبة
انا.. هوبي نبي نرقص الفرقة دايرة جو يهبل ديرلي جو بتاع كرينا نرقصو
هبة .. ههههه انديرو موسيقى رومانسية
انا.. اي رومانسية يافرخة  نبيها على الفرقة
هبة نزلتني انا واحمد وفي البداية دايرة روحي متحشمة وقعد يحرك فيا احمد وبعدها شوي وانطلقت وليا وووووين مارقصت واحمد فاتح فمه رسمي جاته انوار وقعدت ترقص معانا وسكرت فم احمد
انوار .. خيرك يااحمد مقضيها فتحان فم
احمد.. نوارتي بتهبلني واضني بناخذها طول مانبش مستني عرس
انوار ..هههه  اول مرة تشوفها ترقص
احمد.. اه
وجاء شدني
احمد ..خلاص نوارتي بتهبليني هكي راه
وركبنا على المسرح وقمعزت
  احمد.. اني بنطلع واكيد الشباب يستنو
طلع احمد وتلقاه طول سند
سند .. شنو احميدة خيرك هكي
احمد.. نوارتي يا سند مافهمتش
سند.. شنو شغلتني
احمد.. تهبل الفرخة طالعة واول مرة تلبس عر.... تعيب يا راجل
سند.. هههه بتغير عليها مني
احمد.. مش غيرة مع اني نغار عليها موت لكن هيا تو مرتي معاش نقدر نحكي تفاصيل
سند.. ايوة ياعم مرتي من قدك عاد
به احكي بدون تفاصيل
احمد.. متغيرة بكل لابسة فستان ولاعمري تخيلتها انها تلبسه لكن عرفت ان خاطري فيه لبساته ليا ودارت جو وحدة فرحانة واجد ومش تمثيل  حسيت بيها وحسيت بقلبها اللي كان داير حفلة جو لدرجة سمعت نبضه
سند.. غريب امركم
احمد.. اسكت يا راجل عبدالله والشباب جايين
ونحن عندنا في الصالة حطو العشاء والبنات برضو دارو جو يهبل وبالذات اصالة بعد ماحولت العربي  وبعدها بدت تفض وروحنا حوشنا معبي باقاربنا من طرابلس وجتني بنت عمي
اسماء.. تعرفي طلعتي احلى من فرحك الاول
انا.. تسلمي بضيق بس مزعلتش لان سومة قلبها ابيض اصلا بنات عمامي حنينات مش زي بنات خوالي مسمومات 
اسماء..سامحيني ماقصدي نضايقك بس الاول في شئ مش تمام
انا.. كيف باستغراب 
اسماء.. الاول لو نحن مش عارفين انك تبيه كلنا قلنا انك مغصوبة عليه مش زي اليوم الفرحة في عيونك والبسمة مافارقت فمك لدرجة انتي حلوة والبسمة حلاتك زيادة
انا.. ممكن لاني كنت حاسة انه مش نصيبي كانت في حاجة طول الوقت تقولي هكي على خشت بنت خالي الحقودة
غزلان .. سبحان الله بنات تو مش لاقيات عرسان وانتي ماشاءالله مطلقة وحصلتي عريس شكل وفلوس وحتى الفاتحة دارها تقول عرس امنا العرس شنو بيدير
انا.. حسيت بغصة وقلت اكيد هلبة ناس تقول فيها الكلمة هذي
اسماء.. عيب غزلان شنو تقولي وبعدين من مايحبش عبورة والله لو تطلق مية مرة ديمة بتلقى راجل ياخذها هي قلبها حلو
غزلان .. كنهدا ليش اطلقت في الاول
انا.. دمعت عيني نصيب وقدر من عند ربي نحن نختارو شئ ونتمنوه لكن ربي مقسم النصيب والاقدار له الكلمة الاخيرة في حياتنا والحمدلله
ومسحت اسماء دمعتي
اسماء.. ماتعدليش عليها بنت خالك وعارفتيها من يومك حتى في الاول جت ونكدت عليك
انا.. عادي ما ادوري شئ على خشت هنادي
هنادي .. عبورة يدور فيك احمد وقالك تعالي في المربوعة الخارجية
انا.. ابتسمت لاشعوريا به
اسماء.. ايوه خليك بيه مبتسمة ديمة
وطلعت لاحمد طبعا كنت مغيرة  دبشي ولابسة  توتة حلوة لون سروالها وردي مخربش برصاصي وضابط وعليها تيشرت مخصر لتحت المؤخرة  لونه وردي وفيه برنوص  جايبها ليا احمد وخشيت على احمد واول ماخشيت لقيته مصبي بطريقة كانه يبي يحضني وانا ماصدقت جيته طول وخشيت بين ايديه وضمني زين قريب عصرني وقعدت نبكي احمد حس بدمعتي على تيشرته بعد وجهي من على صدره 
احمد.كنك نوارتي عليش الدموع
انا.. ممكن من الفرحة
احمد.. لا الفرحة نبيها ضحكة مانبيهاش دمعة 
انا.. تحبني احمد
احمد.. رجع ضمني وانت شنو تقولي
انا.. ماتردش على سؤالي بسؤال
احمد.. به انا نسئلك قبل بعدين نجاوبك
انا.. اسئل وهذا كله ونحن واقفين وواخذني لحضنه زي اللي خايف نسيبه
احمد.. نوارتي نحس فيك في الصالة فرحانة من قلبك ولبست الفستان العريان على خاطري واللي عجبني وراه اضايقت لما عرفت انوار خذاته
انا.. انا قلت ليها ادير هكي قدامك كيف بيقعد مفاجأة امنا
احمد..واحلى مفاجأة بس ردي عليا اليوم اللي شفته مش تمثيل  صح الاحساس اللي وصلني صح
انا.. اه وانا هالمرة ضميته وبقوة انا حسيت بفرحة كبيرة جو قلبي صح في البداية حسيت بلخبطة لكن لما خشيت عليا ارتحت ولما لبستني الدبلة كنت سعيدة ايه سعيدة واجد ولما رقصت كانت  من فرحتي بيك
احمد
وهي تحكي انا قلبي كان يبي يوقف واكيد هي تسمع فيه وهو يدلف جو
انا
وكنت نحكي وانا راسي على صدر احمد نسمع في صوت نبض قلبه قوي
احمد ... نحبك نوارتي ونموت فيك نحبك نحبك وكان خاطري نقولها من قبل لكن حبيت كل شئ يكون بالحلال خير
وطبس عليا وباسني بوسة خفيفة على خذي
احمد.. نوارتي خلاص انا معاش نتحمل راه راعي مشاعري ومعاش نبي نشوف دمعة فهمتي عليا
انا.. حاضر هي تصبح على خير
احمد.. وانت من اهلي يا اهلي
ضحكت وطلعت وقعدت نهدرز مع البنات لان اقاربنا بيروحو ثاني يوم  وقالو يالا نجهزو لعرسكم وطبعا ماما وبابا قاللهم لما بيجو على عرسي يديرو حسابهم انه الاسبوع اللي بعده عرس انوار بيش يديرو حساب القعدة
طبعا ماحكيتش  ليكم على بنات عم احمد وبنات خالاته جن وزعميتهن بيديرن جو شين لكن انوار وهنادي واصالة وهبة وعمتو كانو لهن بالمرصاد ماخلوهنش يوصلني وينكدن عليا وبالذات لما قعدن البنات يحكن شنو دارت ليهن بعد ماروحنا وانا ميتة ضحك على المواقف وطبعا جاء السبت وخشينا لاسبوع عرس عبدالله