للقدر والنصيب كلمة اخرى

44

ح44
ونزلن هبة وماما وجتني ماما حضنتني وخفت انها تحكي قدام احمد لكن الحمدلله ضمتني ليها وقالتلي مايصير غير اللي تبيه وبكرة بوك مروح تو نقوله يمشي لبو يوسف ويقوله خشينا بمعروف نطلعو بمعروف
احمد ..شنووووووو
ماما ..ايه خلاص بنتي معاش تبيه وانتهى الموضوع ياسرها اربع ايام مانشفت دمعة على خذها
احمد ..اكيد عمتي عرفتي حاجة قوليلي ماتخلينيش كيف الاطرش في الزفة
ماما .. لا مافي شئ لكن وجعتني بنتي وعليش بنجبرها على راجل هيا تشوف في حياتها مش حتتهنى معاه
احمد .. والله يوسف كويس
قلت الكلمة هذي لكن في قلبي سعادة بس ماعرفتش شنو سببها ومعقولة بنكون سعيد على حساب نكد نوارتي
انا..معاش تفكر في الموضوع يا حمودي
الحياة نصيب وانا نصيبي مش معاه وان شاءالله ربي يكون رايدلي الخير من اللي صارلي
احمد .. عشان اللي داره هشام 
انا نبي نعرف بيش يطمن قلبي عليها ومانبيهاش تظلم روحها وتندم مع اني ايه معاش نبيها ترجعله وايه انا فرحان انها هنا وكل ما نخش الحوش نلقاها قاعدة صح حزينة بس نقدر انسيها حزنها وهمها حتى هي نوارة قلبي اللي ماتخيلتش روحي نحبها لدرجة هذي الا لما اتزوجت وسيبتني ايه نحبها لان الاسبوع اللي قضاته معاه وانا ماشفتهاش فيه كنت بنموت على كل لحظة تمر ونحس فيها لغيري عرفت ان حياتي بلاها ولاشئ ولما رجعت ولقيتها مريضة وحتى لما كانت معاه مش مهم عندي المهم كنت اني نشوف فيها ونعبي في عيني منها وحتى وهيا في حضن راجل ثاني المهم عندي انها تكون سعيدة ومعاش بنكذب على روحي قطع عليا صوت افكاري نوارتي وهيا ترد على سؤالي 
انا ..هشام  كان السبب اني شفت حقيقة يوسف انه شكاك وانا نعيش مع اي نوع من البشر الا الشكاك
احمد..غيرة هذي مش شك
انا .. لا يا احمد الغيرة مش هكي
الغيرة تجي لحبيبك وتسئله وانت حامق وانت راقيلك وتقوله ليش درت فيا هكي ليش دسيت عليا وتستنى هو يبرر ليك ويحكيلك واذا ماصدقتاش اتقوله بيش حبيبك بيدير المستحيل عشان يبرد نار غيرتك ويخليك تصدقه لكن هو جاني وماتاكد  ان في حاجة بيني وبين هشام  واني لولا فلوسه ماكنتش وافقت عليه ونسى اني لما حبيته ماعرفتش هو ولد من اصلا
احمد ..تحبيه
انا..نكذب كان نقول مانحباش لكن نموت ومانرجع ليه
انوار وماما وهبة واحمد ..بعيد السو
ماما..ومافي حد يابنيتي يرجعك ليه هني بالك وارتاحي
انا..ربي يخليك لي
وركبت ماما لدارها وعارفتها حتقضي الليل كله وهي تبكي على بختي
وقمعزت بحدا هبة واحمد وانوار وقعدنا نتفرجو لكن انا مرة مرة نلقى عقلي سرح ودمعات ينزلن على خذي عارفتهم منتبهين ليا لكن دارو روحو ماشافونيش واريح انهم ماكلمونيش لاني نبي نبكي نين ينشفن دموعي بيش معاش ينزلن
انوار ..انديرلكم عصير او كابتشينو
احمد وانا ..كابتشينو
هبة .. عصير
انوار ..خلاص تمام
وجبتلنا انوار وقعدنا نشربو وخشينا للدار انا وهبة وقعدنا نهدرزو وقعدت تحكيلي على شاب جايها ويبي يتقدم رسمي وهي مرتاحة ليه واللي مطمنها انه مش بتاع علاقات ومايبهينش وقاللها انهم يتعرفو رسمي في الخطوبة
احمد
خشت نوارتي وهبة لدارهم وانوار ركبت لدارها وقعدت بروحي وتفكيري في نوارتي كيف نسعدها كيف نطلعها من الجو اللي فيه وموضوع انفصالها مش حنقدر نتكلم فيه عشان اليوم اللي يجي ونعترف ليها بحبي مايقولوش اني كنت وراء سبب انفصالها مع اني لو سعادتها معاه مستحيل نوقف ضدها لاني بالدرجة الاولى الاهم سعادة نوارتي قبل سعادتي وحاوالت نرقد لكن ماقدرتش وخطر عليا ان في حاجة ثانية بين نوارتي ويوسف وداستها عليا لكن مانيش محاول نعرفها نين هي تجي وتقولها ليا لان طالما نوارة دستها عليا اكيد عندها سبب حيقنعني لما نسمعه 
انا
وقعدت هبة معاي اليومين ويوسف يجي ومابيتش نطلع ليه وجاني خالد اخ يوسف وامل وطلعت ليهم وماخليتهمش يحكو حاجة على موضوع اني نرجع وبابا جاء وحكتله ماما وعدى لعمي علي وقاله خشينا بالمعروف نطلعو بالمعروف بنتي خلاص معاش تبي ترجع وعمي علي حاول يقنع بابا وقاله ان هذوم صغار نحن نمشو وراهم بابا قاله والله بنتي ونعرفها عقلها كبير وكان ماعارفة روحها انها مش حتكون مرتاحة معاه راه ماسيبتش حوشها من البداية ونحن مانبو شئ منه بنبعث اختها تلم دبشها بس وحاجاتها واللي ليكم يخلوه ليكم وعمي علي كان مش هاين عليه نتفارقو لكن هذا نصيبنا
وفعلا عدن انوار وهبة وهنادي واصالة  جابن دبشي وبتاتي اللي رفعته معاي ومشى فتحي واحمد لان بابا وعمو صعبت عليهم ماقدروش يمشو وماما وعميمة دارو مناحة في الحوش ونا مسكرة داري مابيتش نطلع منها ونبكي وبس ووصيت انوار انها تفتح شنطة ذهبي وتحول منها الفلوس والذهب اللي جابه ليا يوسف وتجيبلي ذهبي بس وحتى الدبش سميت ليها لابسات جابهن ليا يوسف تخليهن ماتجيبهنش ليا
ورجعو طبعا قلت ليهم ركبوه فوق مانبيش نشوفه في الوقت الحالي دبشي وحطوه في دار في جناح الضيوف ويوسف مابطلش رن عليا نين سكرت هاتفي ويبعتلي في رسائل على الفايبر يجني اشعار لكن مافتحتهنش ومانبيش نفتحهن
ومشن ايام وجن ايام وانا تميت زي الخيال رغم اني ناكل لكن وكال قدام اهلي بس لكن خلاص نحس في روحي بتطلع ويوسف ماخلا واحد مابعته ليا وانا سكرت راسي لدرجة قلت لبابا يحرش فيه عمي علي انه معاش يبعتلي حد خلاص واحسن حاجة يجبلي ورقتي وينهي هالسريب ومشى الشهر الثاني وجاء مراجعتي ورفعني بابا وشافني الدكتور وقالي حالي باهي وان ضلعي آلتم  لكن لازم نستمر في المحافظة على روحي حتى شهر اخر  والدكتور طلب من بابا يخلينا بروحنا
الدكتور ..معليش بنسئل كنك ضعفتي هكي
انا..انا ماكنتش سمينة
الدكتور ..عارف لكن تو رايحة زي الخيال جلد على عظم
انا .. ممكن من التعب وممكن من الراحة مش متعودة اني ماندير شئ
الدكتور ..اه سامحيني على الفضول سامحتي زوجك
انا.. لا بننفصلو
الدكتور ..لاحول ولاقوة الا بالله
انا ..دكتور بس اهلي مايعلموش انه هو سبب اللي انا فيه
الدكتور .. ربي يعوضك خير وخليني نكتبلك فيتامينات ومقويات لان شكلك ضعيف بكل
وطلعت على بابا وسئلني خيره الدكتور وقلت له استغرب ضعفي وبيعرف السبب وعطاني فيتامينات ومقويات
وروحنا للحوش ولما خشيت لقيت ماما تبكي هيا وانوار انفجعت
انا وبابا ..خيركم شنو في
ماما ..مافي شئ ومسحت دموعها
انا ..تكلمي انوار
انوار .. يوسف كان هنا
انا.. خيره قاللكم حاجة ولاشنو
انوار ..جاء وجاب معاه الشنطة هذي وقال هذا حق عبير عليا وان شاءالله اليوم بنطلع انطلقها
انا..نزلت عليا الكلمة زي النار غرست في قلبي زي السهم لكن درت روحي عادي
وقلت الحمدلله ماطولش عليا واجد وخشيت لداري وجيت شور الشنطة لكن مانبيش نفتحها ولاخاطري نفتحها وناديت على انوار وخذيت منها فونها لاني مازالت قافلة فوني
واتصلت بهبة
انا..هوبي 
هبة ..شنو مراجعتك امورها تمام
انا..اه الحمدلله وحكيت ليها شنو صار مع الدكتور
هبة ..باه فيه الخير شاغلتيه
انا..واه لما روحت من المراجعة وحكيت ليها اللي صار
هبة ..تبيني نجيك
انا..ياريت
هبة ..هي سكري نكلم فتحي ولاباتي يجيبني  وسكرت وتمددت ورقدت بدون مانغير حتى دبشي وجاء احمد وحكوله كل شئ
وخش عليا الدار لقاني راقدة بدبشي غطاني وسكر عليا الباب
وساعة وكانت هبة جاية ولما لقتني راقدة مابتش تنوضني لانها كانت بتبات عندي ماتبيش تخليني الليلة بروحي وحمدت ربي واجد ان عندي صاحبة زيها
وطبعا لما نضت لقيت روحي مريضة ومريضة واجد ممكن متعبتني على خاطر ان جسمي ضعيف وغيرت دبشي وطلعت لقيت هبة واحمد وانوار وعميمة وعمو وماما وبابا وجيت حضنت هبة وقلت ليها من امتى جيتي
هبة ..من بدري جيت لكن لقيتك راقدة خليتك
انا.. اه نقني رقدت ما نندري على روحي
وسلمت على عمو وعميمة وقمعزت بينهم وقعدت نهدرز معاهم عادي واحمد يشبحلي بنظرات مافهمتهنش وحطت ماما وانوار وهبة العشاء وانا نشوف فيه تقول نار بنبلعها في جوفي ودرت روحي ناكل
بابا..نوارة جبتلك الفيتامينات اللي كتبهن الدكتور والمقويات مالقيتهنش سمالي الصيدلي اسم صيدالية نلقاهن عنده ولما مشيت ليها لقيتها مسكرة قلت بكرة  نشوفها
انا ..به
احمد ..مقويات شنو ياعمي
بابا ..الدكتور لما شاف جسمها ولقاها ضاعفة واجد عطاها مقويات وفتيامينات وانا لقيت الفيتامينات وبكرة نجيبلها المقويات
احمد..عطيني اسم الصيدلية وانا تو نجيبها لها بكرة
وتعشينا ولمو العشاء وروح عمو وعميمة وقعدنا انا واحمد وانوار نهدرزو وبابا وماما ركبو لدارهم وكل مانشوف فيهم كل مايوجعوني وكيف هما يفكرو فيا وعلى قد ما بنحاول اندير روحي كويسة على خاطرهم لكن هما حاسين بيا وحاسين بوجعي
انا ..انوار بالله حبيبة الشنطة اللي في داري ارفعيها لدار بابا وماما يدسوها عندهم
انوار ..به  وعدت لداري وطلعت بالشنطة انوار ... ماتبيش تشوفي شنو فيها نوارتي
انا.. مش لازم لما يتم الطلاق رسمي تو نشوفها
وركبت انوار بالشنطة وسمعت احمد يتكلم بحرقة ولما سمعت الكلمة اللي قالها عرفت احمد ليش شكله هكي من لما جاء ليش بابا وماما وعمو وعميمة متغششين
احمد.. نوارتي يوسف طلقك خلاص
انا .. التفت لاحمد ومانندريش شنو اللي صار فيا شنو اللي تخلط عليا ومانندريش على روحي الا وانا في المصحة ومركبين ليا تغذية وبحتت فيهم جتني ماما
ماما ..ماتخافيش بنيتي هبوط بس صارلك والدكتور ركبلك تغذية
انا .. نبي نروح مانبيش نقعد هنا مانبيشي يسمع انه يوم طلقني خشيت للمصحة
احمد..اسسس نوارتي على خاطري والله مش هيعلم من حيقوله
انا ..نبي نروح
بابا .. به كملي التغذية بس ونحن نروحو بيك غير كمليها
انا.. به ودموع في عيوني
هبة .. تبكي ليش
انا .. انا ماتخيلتش يصير فيا هكي
احمد .. لو بترجعي مازال تقدري راه
انا..ابدا
ماما .. امنا عليش تبكي
انا..على حالي كيف نكون من الضعف نين نوصل للمستشفى
احمد ..مش ضعف نوارتي اللي انتي فيه هذا وجع والم وحيجه يوم ويوقف صدقيني انتي قوية غير كل حاجة تاخذ وقتها
انا ..اه فعلا كل شئ ياخذ وقته وانا مش حنطول
وكملت التغذية وروحت وركبت لدار بابا وماما وانا ساندتني هبة وبابا وماما واحمد وانوار مابوش يركبو معاي لانهم عارفيني بنمشي للشنطة
وخشينا للدار فتحت هبة الشنطة ولقيت فيها ورقة قبل مانشوف اللي جواها
حبيبتي عبورة ...