للقدر والنصيب كلمة اخرى

29

#للنصيب_والقدر_كلمة_اخرى

ح29
احمد
ركبت لداري ونحس في روحي مش تمام بكل وانفكر في شكلها وفي يوسف قديش ربي يحبه قلب ابيض وحلاوة روح وبساطة وذوق وشكل سمح وست بيت الله يا يوسف قديش حاسدك ونلوم في قلبي كيف فاق تو وين كان راقد نوارتي كابرة على يديا ليش قلبي ماخطرلاش يتحرك غير لما مشت لغيري ااااااااااه يارب شنو ندير 
انا
غيرت دبشي وقعدت نفكر في فرحتي اليوم ونشوف في السبتات والمكياج لفت انتباهي لان من احسن الماركات اللي نسمع عليها والكاب بروحه مرصع كله بفصوص زي الالماس حاجة فخيمة وعلى خشت هبة
هبة .. عجبنك حاجاتهم
انا..تصدقي ياهبة صح نعرف ان يوسف حالة بوه المادية مرتاحة لكن ماتخيلتهاش هكي
هبة ..حتى انا لكن مرة سئلت فتحي قالي حالته المادية مرتاحة واجد وسبحان الله ربي عطاك على قيس نيتك لانك عمرك ماتفكري في المادة ومع ذلك لما تبي تشري حاجة تجيك على قيس نيتك مهما كان سعرها كان قبل احمد مش منقص عليك شئ انتي وانوار وتو اهو جاك راجل ماديا زي احمد
انا..بتنهيدة ومش عارفة ليش الحمدلله
بس تعرفي هوبي  انا اهم حاجة عندي راحة البال والاحترام
هبة ..ربي يهنيك حبيبة
لكن شفتي اللقطة الحلوة عارفينك مش متحجبة ماجابوش عباية بدالها جابولك كاب
انا..اه ماتوقعتهنش مركزات معاي واجد ماهو لما كنت نمشي مرات مع عمتو غالية لمناسبتهم نلبس في كاب
هبة ..حتى انتي مرات يوسف
انا..هوبي بنقولك حاجة شغلتني
هبة ..ان شاءالله خير
انا..والله ماني عارفة
هبة ..قولي شغلتيني
انا..نحس في يوسف كانه عنده ماضي لكن ليش ماحكاش ليا عليه
هبة ..شنو اللي خلاك تقولي هكي
انا ..حكيت ليها كلام امال وعمتي سميحة لما حكولي على السوابيت والذهب
هبة ..اه بس عادي مرات ماعنداش وجيج في البنات
انا.. هذا لو تحكي على حد عمره فوق الثلاثين لكن يوسف امديد احمد يعني اكبر مني بسنة يعني عمره21 يعني وين بيكون مسكر على الزواج فهمتي كلامي
هبة ..صح كلام يبي تفكير لكن لو عنده ماضي ليش ماحكاش
انا ..نش عارفة شنو اسبابه
هبة ..به اسئليه
انا..كان ماحكى هو معاش نبي نعرف لو سئلته
هبة ..اللي يريحك حبيبة بالك يستنى في الوقت المناسب
انا..بالك
هيا نطلعو نبي نشوف احمد
هبة ..هيا
انا..روحو الشباب بنطلع بالبيجامة كنهدا
هبة ..اه روحو بعد ماضمو معانا الحوسة
انا..سلمهم يارب غلاي ووخييني اللي ماجابتهم ماما وحتى انتن ربي يحفظكن لي يارب
هبة ..ويحفظك لنا يارب ويعطيك على قيس نيتك البيضاء
انا..امين يارب
وطلعنا ولقيت اصالة وهنادي  وانوار يهدرزن وماما ركبت وعمتو روحت واحمد قاعد مانزلش خذيت فوني ورنيت عليه ماردش مرة واثنين استغربت جبت قيلاتي وركبت ليه وحدة وحدة لكن ماوصلت لداره الا انا خلاص رغم انه مرات بكرة نحولهن لكن مازال الركبة بيهن اتعب فيا
احمد..نعم خشي
انا توقعتها انوار الحاجة الوحيدة اللي ماتخيلاتهاش تكون نوارة
انا
خشيت للدار لقيته متمدد على السرير وقاعد بدبشه مش مغيره وحتى فونه احذاه واستغربت ليش ماردش عليا
انا.. وينك لتو وماغيرتش دبشك وانرن عليك ماتردش وبصوت طبعا داهش كاني كنت نهرول وحتى عيوني مرقرقات بالدموع
احمد صبى طول وجاني وحطني على السرير ومدلي امية
احمد.. شن ركبك انتي هنا والدروج واجدات مش شوية
انا.. ماهو طولت مانزلت وانشغلت عليك احمد..به توقعيني رقدت
انا..عارفاتك تروح للحوش الثاني لكن ماترقدش هنا
احمد.. لا بنرقد هنا اليوم ومانيش طالع وحلو منظري حوش معبي بنات ونا راقد في دار المعيشة او المربوعة
انا..به براحتك بس ليش ماغيرتش دبشك وليش مارديتيش على فونك
احمد..تصدقي كان نقولك ما نتبهتش ليه وماغيرتش دبشي لاني نحس في روحي تاعب تمددت على السرير وشكلي زي اللي غفيت
انا.. اه امنا ياقلبي غير دبشك وارقد وارتاح ونحكو بكرة
احمد.. ماركبتي فوق الا ان الموضوع مهم
انا.. لا والله بس استغربت انك مارديتش عليا انشغلت
احمد،.به براحتك
ونحس في روحي لاول مرة مانبيش نعرف شنو اللي بتحكيه لان حاسس شور يوسف وانا حاليا ماعنديش طاقة نهائيا نسمع حاجة عليه ونخاف نضعف  
انا..به ببنزل ياقلبي هي تصبح على خير
احمد..وين وين
انا..بننزل خلاص انخليك
احمد..لا تو انزلك انا
انا
وحسيت قلبي فرح بس مش عارفة ليش لان مش اول مرة يطبني 
انا.. هي تريحني من القيلات
ونزلني احمد لكن نسمع في صوت قلبه قوي
احمد
اول مرة قلبي يحشمني دارلي العار ويقعد يدق هكي بشكل واضح
نزلني احمد وركب وفعلا رقد فوق من اول مرة نقلنا فيها داره فوق بعد الحادث اللي تعرضت ليه وهدرزنا مع البنات وبعدها حكيت مع يوسف وبعدها رقدنا البنات رقدن تعبانات من مجهود اليوم مع ان عمتو غالية قالت نجيبو عاملات البنات مابنش قالو خليهن للفرح
ومشيت للمراجعة وحولي الدكتور القيلات وقالي حاول اول اسبوعين ماتركبيش دروج واجد ونقدر انرد للتمرين المشي على السير الكهربائي والدراجة بس مانقعدش عليها واجد وبعد اسبوع جو هل هبة لاهل هنادي  وطلبو هنادي  رسمي لفتحي واتفقو على الفاتحة بعد فرحي وحتى هيا الفرح بيكون الصيف الجاي يعني لما بتخش اخر سنة جامعة وفرحنا لها واجد
وعدن الايام ونحن نجهزو ومرة للسوق يرفعنا احمد ومرة يرفعنا فتحي وهو مش واجد اللي مازالي لانه معظمه جبته وانا نجهز للفاتحة لانك لما تبدي منسقة امورك ومسجلة كل شئ تلقي كل حاجة ساهلة
وطبعا الفيلو عدى احمد ثلاثة ايام لتركيا جابه ليا زي ماوصفته ليه وماحد يعرف شكله الا احمد بس وجابلي معاه حاجاته كلهن وحجزتلي في الكوافيرة هنادي هدية منها  والحناية  حجزتلي فيها اصالة  وهدية منها وهبة مدتلي فلوس والشباب حتى هما جابلي كل واحد فلوس الا هشام جابلي خاتم واسوارة ذهب
وجاء اسبوع الفرح