Chill

2

"ဟယ် Kyleက ရောက်တော့မယ်?"

အသံပြဲကြီးသည် မမကြူဆီကဖြစ်၏။ အင်္ကျီလဲပြီးကြယ်သီးတပ်ပေးနေသော ရဲရဲနှင့်တမံတို့၏အကြည့်သည် မမကြူဘက် ဒိုင်းခနဲရောက်လာသည်။ မမကြူသည် ဖုန်းကိုကိုင်ထားလျက် အဟောင်းသားဖြစ်နေသော ပါးစပ်ကို ပြန်မစေ့နိုင်ဘဲ တမံတို့ကို မျက်လုံးပြူးမျက်ဆံပြူးပြပြီး တစ်ဖက်က Kyleကို ဘာပြန်ပြောရမလဲ မေးငေါ့မေးနေ၏။

တမံသည် ခေါင်းခါရမ်းပြပြီး ရင်ဘတ်အပေါ်ကြယ်သီးနှစ်လုံးလောက် တပ်ဖို့ကျန်နေသေးတာကို ပြီးအောင် အတပ်မခံတော့ဘဲ အပေါ်ထပ်ကုတ်ကို ဆွဲယူကာ ရဲရဲကို ထွက်ခွာရန်အချက်ပြသည်။

"ဟိုလေ ... ဟယ်လို ဟယ်လို ဖုန်းက ဘာမှမကြားရပါ့လား ဟယ်လို ဟယ်လို ကြားလား ကြားလား ခိုင်လ် ကြားလားကြားလား မမတော့မကြားပါ မကြားဘူး မကြားဘူး ဒါပဲ ဒါပဲ"

မမကြူသည် အရူးကွက်နင်းကာ ဖုန်းချပစ်လိုက်၏။

"ဘယ်လိုလုပ်ကြမလဲ ဘယ်လိုလုပ်ကြမလဲ ခိုင်လ်ရောက်နေပြီတဲ့"

ပရိသတ်ပီပီ ခိုင်လ်နှင့်ကောင်းမွန်သော ဆက်ဆံရေးသာရှိလိုပြီး မျက်နှာမပျက်ချင်သော မမကြူသည် အသည်းအသန်ပျာယာခတ်နေပြီဖြစ်၏။ ခိုင်လ်တစ်မျိုးထင်သွားမှာကို ကြောက်နေသည်။ တမံကလည်းတစ်မျိုး ပညာပြနေသည်။ တစ်ယောက်ကလည်း ကိုယ့်မင်းသား၊ တစ်ယောက်ကလည်း ကိုယ့်အိုင်ဒေါဖြစ်နေတော့ နှစ်ယောက်အဆင်ပြေစေချင်တာပဲဖြစ်ချင်သည်။

တမံကိုစိတ်လျှော့စေချင်သလို Kyleကိုဒုက္ခမများစေချင်ပါ။ အခု Potatos FM အထောင်းခံနေရတာကို မြင်တွေ့ကြားသိနေရသည်လေ။ ထို့ကြောင့် Potatosရဲ့ အဓိကမဏ္ဍိုင် ခိုင်လ်ကိုယ်တိုင်ရောက်လာတာ။ သူတို့ဘက်က တမံစိတ်ကျေနပ်အောင် လိုက်လျောတောင်းပန်ဖို့ရည်ရွယ်ထားတာဖြစ်ရမည်။ ထို့ကြောင့် မံကိုလည်း အလျှော့ပေးလိုက်စေချင်သည်။

"မံရယ် တွေ့ပေးလိုက်ပါဟယ်၊ တစ်ဖက်က ခေါင်းငုံ့လာပြီပဲ"

"သူတွေ့ချင်တိုင်း လွယ်လွယ်ကူကူ မတွေ့ပေးနိုင်ဘူး မမကြူ၊ သူမသိပါဘူးလို့ပြောခဲ့တဲ့ တိမ်တမံက ဘယ်လောက်ဖမ်းရခက်လဲ သိစေရမယ်"