Chill

21

Present Continuous Tense

"1 ... 2 ... 3 ... 4"

သင်တန်းသားတွေကို တဆင့်ချင်း အကပြနေသော Zylen။ ထိုအချိန် အနှောက်အယှက်ပေးတာ လုံးဝမကြိုက်မှန်းသိသော်လည်း အရဲကိုး၍ အနားတိုးကပ်သွားပြီး

"အခန်းမှာ မံမံ စောင့်နေပါတယ်"

အကြည့်တစ်ချက် ... အကြည့်တစ်ချက်ပဲ ရောက်လာသည်။

"Break မယ်"

ချက်ချင်းပြောပြီး တန်းလန်းကြီးထားကာ အရေးတကြီးထွက်သွားသော ဆရာသမားကို သင်တန်းသားများ ကြောင်အကာ ငေးကြည့်ရင်း ကျန်ခဲ့၏။ ရုံးခန်းကို ခပ်သွက်သွက်သွားနေသော ခြေလှမ်းကျဲကျဲတို့သည် အလျင်စလိုနိုင်စွာ။ အခန်းမှာစောင့်နေမည့် တမံဆီသို့ သူတတ်နိုင်သမျှ မြန်မြန်ရောက်ချင်နေပြီ။ ရင်တစ်ခြမ်းက နှလုံးခုန်သံ တဒိန်းဒိန်းသည် ချစ်ရသူဘာဖြစ်ခဲ့ပြီလဲ စိုးရိမ်လွန်စွာ။

ယသော်အလုပ်ကို လွန်စွာ အားပေးသဘောကျသော တမံက သော်အလုပ်လုပ်နေချိန်အတွင်း ဘယ်သောအခါမှ အနှောက်အယှက်မပေးတတ်။ အခုသူသင်တန်းပြနေမှန်းသိသိလျက် အခန်းမှာစောင့်နေကြောင်း အသိပေးလိုက်ခြင်းသည် ယသော်ကို အမြန်ရောက်လာစေချင်မှန်း သိနားလည်လိုက်သည်။

"မံမံ"

အခန်းတံခါးဆွဲဖွင့်ပြီး တောင်းတောင်းတတ သူခေါ်လိုက်တော့ ဆိုဖာမှာ ထိုင်နေသည့် တမံသည် ထလာပြီး သူ့ရင်ခွင်ထဲ တိုးဝှေ့ဖက်တွယ်လာ၏။ ကိုယ်လုံးကို ကျစ်ကျစ်ပါအောင်ပြန်ပွေ့ဖက်၍ ကျောပြင်ကိုပွတ်သပ်ပေးမိသည်။

ယသော်ရင်ဘတ်ပေါ် စိုရွှဲသွားအောင် တမံငိုနေတာကို အချိန်ခဏကြာအောင် သည်းခံစောင့်နေရသည်။ ဂနာမငြိမ်ဖြစ်နေသည့် စိတ်အလျင်တို့သည် တမံပခုံးကိုပဲ တင်းတင်းဆုပ်ကိုင်ညှစ်ထားလျက်။ သွေးတွေက ပွက်ပွက်ဆူနေပြီ။

ဘယ်သူကများ မံမံကို ငိုရအောင် လုပ်ခဲ့သလဲ။

တမံ စိတ်ပြေလျော့တဲ့အထိ ငိုပြီးသွားမှ ပြောပြသလောက် သိရတော့မည်။ ထိုအချိန်ကို သူ သည်းခံကြိတ်မှိတ်စောင့်နေသည်။ သိချင်နေသော ကွက်လပ်တစ်ခုက သူချစ်ရသောသူကို ငိုရအောင် လုပ်သည့် တရားခံကိုပဲ။