Chill

27

Peresent Continuous Tense

"မ ရေ့ မောင်လာ ပြီ"

အခန်းထဲအသံကျယ်ကျယ်ပေးပြီး ဝင်လာသော PRO Entertainment အနာဂတ်မဏ္ဍိုင်။ မှန်အထူလေးထောင့်စာကြည့်မျက်မှန်ကြီးတပ် အကျအနအလုပ်လုပ်နေသော CEOမမ ဒေါ်တင်မီမီကိုသည် မျက်မှန်ကို ချွတ်ပစ်လိုက်ပြီး နေရာကထလာ၏။

"ကြွပါ ကြွပါ၊ ကျွန်မ အစ်ကို့ကို အခေါ်တော်လွှတ်ထားတာ ဘယ်နညအိပ်ပြီးမှ အခစားဝင်နိုင်တာလဲ"

"မ ကတော့ မောင့်ကို မြင်တာနဲ့ ခနဲ့ပြီ"

နှစ်ယောက်ထိုင် ဆိုဖာခုံမှာ လက်ကြီးဆန့်ကားပြီး ပေါင်ချိတ်ထိုင်လိုက်သည့် ခိုင်မြဲနှောင်လည်ဂုတ်ကို တင်မီမီကိုက ဗြန်းခနဲ ရိုက်ချပစ်လိုက်၏။

"အ! မ ရေ့ မောင် ဗိုက်အောင့်နေတာနော်၊ မ ကြိမ်ရိုက်ခေါ်နေလို့ မောင် ရောက်လာတာ"

အရိုက်ခံလိုက်ရတဲ့လည်ဂုတ်ကို ပွတ်သပ်ပြီး ဗိုက်ကို ဖိနှိပ်ရင်း မဲ့ရှုံ့ရှုံ့ပြောလာသော တူတော်မောင်ကို ကြည့်၍ တင်မီမီကိုက စိတ်မပျော့သွား။ ထိပ်ဆုံးခုံမှာ ခြေချိတ်ဝင်ထိုင်ပြီး

"မူရာမာယာမများစမ်းနဲ့ ခိုင်မြဲနှောင်၊ အဲ့ဒီ့အကွက်တွေကို မမကြီးရှေ့မှာသာ ထုတ်သုံး၊ ငါ့ကိုလာမသုံးနဲ့၊ နင့်ထက်အသက်တစ်နှစ် နှစ်နှစ်ကြီးတဲ့ မမတွေမဟုတ်ဘူး၊ မရိုမသေ မခန့်လေးစားနဲ့ နင်အဲ့လိုတွေ ပေါ့ပျက်ပျက်နိုင်လွန်းလို့ သုံးလင်ကွာငါနဲ့နင့်ကို အတင်းစကားတွေဖြစ်နေရတာ၊ အရင်ဆုံး အဲ့ဒီ့ မ နဲ့ မောင် အခေါ်အဝေါ်ကို ပြင်စမ်း"

"ဒေါ်လေးကလည်း"

"ဒေါ်လေးလို့လည်းမခေါ်စမ်းနဲ့၊ ငါ့အသက်ရှိရင်းစွဲထက် ပိုအိုဇာတယ်လို့ခံစားရတယ်၊ နင်နဲ့သာ ဒေါ်လေးအဖြစ် ဝါကြီးနေတာ၊ နင့်ဒေါ်လေးက အလက်ကြီးရှိသေးတယ်၊ အချိန်အားနေရင် နောက်ထပ် ယောက်ျား သုံးယောက်လောက် အေးဆေးထပ်ယူလို့ရတယ်"

အဲ့လိုပြောနေတဲ့ ဒေါ်လေးက လာမဲ့နှစ်မှာ ၄၂နှစ်ပြည့်တော့မှာ။

"မ လို့ခေါ်တော့လည်း မဟုတ်ရဘူး၊ ဒေါ်လေးကျပြန်တော့လည်း မကြိုက်ဘူး၊ CEOဒေါ်တင်မီမီကိုက ဘယ်လိုခေါ်စေချင်နေတာလဲ၊ ဧကန္တ ကိုယ့်တူဆီကပါ CEOလို့ အခေါ်ခံချင်နေတာ မဟုတ်ပါဘူးနော်"