رواية : و إن جابة الطاري بقول كان يهمني و مازال .

٥

البيت
كلهم اتموا على صمتهم محد يبي يجادل

الجدة ما عجبها الكلام وناظرت فيهم : ما به من الصغر زوجوهم وخلوها تعدي على خير .
صالحة عرفت ان كلام الناس بقلبها وتبي تزوجهم عشان البنات : إن كان هالـزواج عشان نسكت الناس و نقولهم اننا سترنا على البنات فماني راضيه آل بدر ما فيهم العيب وربي شاهد وكل شي موجود و واضح والرجاجيل ما وقفوا يجون يخطبون بناتنا الكل يشهد ان فيهم الخير والسنع ، هالناس ما فيه بقلوبهم إلا الغيرة .
وضحى شربت من قهوتها ونزلت التمر وطالعت فيهم : ادري تبون تبدون بالبنات وخاصه ليـان لكني والله ما افرط فيها وحالها من حال سلطان واعتبرها بنتي ولا بزوجها الا برضاها ماله الداعي تشيل هَمّ امها و ابوها الله يغفر لهم .
الجدة عصبت من جاء طاري زوجة ولدها و نفضت ثوبها : لا تجيبون سيرتها في بيتي قد علمته انها ما بتجيب الا العار على روسنا و ما بترضى الا بالفضيحه لنا هالحاسدة .
هاله حزت بخاطرها : لا تذكرون سيرتها وهي ميته والميت لا تجوز عليه إلا الرحمه .
سمـاح حبت تلطف الجو وبدت تغير مواضيع وتسولف مع هيله

محد ينكر انه شي صغير بدا كل شي ولولا الله ثم الجـد متعب وزوجته زهراء كان بيتهم مشتت الحين والكل يتكلم عنهم ويشمت لكنه خلص اموره بهدوء تام و محد يعرف عن اللي صار إلا قله قليله من ضمنهم الجيران اللي كانوا حاضرين كل شي بتفاصيله في ذيك الليلة قبل سنوات و اللي ذكرها راح ينعاد قريب

—
بالشارع
العم سليمان وقف و نزل البنات كلهم بالشارع لجل يرتبهم

رجع رحاب ورا اخر شي مع ارياف وخلى انفال قدام وليان وجمانه والهنوف لوحدهم بالوسط
كمل طريقه والكل ساكت نزلهم وراح يكمل اشغاله
الهنوف التفتت عليهم بنص الشارع : اسمعوا الخطة كتالي عشان ما نطول كل ثنتين مع بعض ياخذون اللي يبغونـ..انفال! .
انفال بعدت عنهم بعصبية للحين متنرفزة : انا بروح لوحدي ما ابغى احد .
ليـان طالعتهم : انا بروح وحدي كمان بس بلحقها بدون ما تحس كملوا الباقي مع بعض .
وبكذا تفرقوا والثلاث الباقين راحوا اقرب محل يشترون اكسسوارات تناسبهم
—
في البيت - فترة اخر المغرب
طلال رجـع توه من طلعته وجاب للعيال اللي طلبوه ... نزل الاكياس بعجلة و هو مستغرب من الظلام : ليه مظلمين البيت كذا ؟ افتحوا الانوار شوي .
سعد ابتسم له و هو ياخذ الاكياس من يده : تعال اجلس هالفيلم حريقة توه نازل .
سعود جلس قريـب منهم وبدأ يوزع على كل واحد قهوته ... سُلطان استلم حقته وهز مناف بجمبه : مَناف خذ قم صحصح .
رد عليه بهمهمات مو مفهومه وجاء بياخذها بس انكبت عليه وفز من مكانه
يزيد هز راسه وحذف المناديل عليه : صدق انك حمار و اثول بعد .
مسح وجهه بعصبيه وطلع من بيت الشعر عشان يغسل وجهه وثوبه برا

ما حس الا بجواله يهتز .. فيه غيرها اللي ماخذه عقله ؟
فتح سنابها شافها مصورته وهو يغسل وجهه بحوشهم .. لف بيطالع بشباك غرفتها اللي مقابلته بالدور الثاني و لقيها تأشر له ولافه نفسها بجلال صلاة ما فيه شي باين غير عيونها ويدينها
ابتسم بكل حُب وقاطعه اشعارها "عسى ما شر وش صار ليه ملابسك كذا ؟ "
مَناف رد عليها " ولا شي بس اغسل وجهي .. ما اشتقتِ لي ؟ "