رواية : و إن جابة الطاري بقول كان يهمني و مازال .

١

ليَـان - اواخر الظهر - احدى المخيمات بالمنتزهات الجبلية بمنطقة الجنوب الساحرة
رشات المطر الخـفيفة و الجـو الزين ولمة العايلة الحلوة كان تو الناس ينصبون خيامهم وينزلون العـفش لجل يفرشون ويجلـسون
عدلـت عبايتها ونقابها بعد م نزلت من السيارة اللي يشوفها عارف انها مو طايقه حد ولا حتى نفسها تلفتت حولها تناظر كان واضح نصهم راحو يتمشون ، تعدت خيمة الرجال وراحـت ع جهه الحريم اللي م كان فيها غير جمانه وعمتها وضحى و رحاب ، سلمت عليهم ووقفت تناظر

وضحى بخفوت : صح النـوم عساك ارتحتي ي بنتي ؟ .
ليـان ابتسمت لها : صح بدنك ي عمة إلا ليه باقي م نصبتوا خيمتنا ؟ خوفي المطر يهَطل علينا وحنا باقي .
رحاب التفتت لها : شوفت عينك محد فينا يعرف وجدتي و انفال راحو يتمشون وعمتي سماح وهيله يكلمون هناك وباقي البنات مع سعود ويزيد باقي يجون .
جمانه بذهول : اما يزيد رجع يجيبهم؟ وينه سعد؟ .
وضحى تنهدت و هزت اكتافها ونزلت يدينها تجيب الدِلال عشان تحطهم ع الجمر : يقول بيتأخر م بيلحق علينا الا قبيل المغرب وبيجيب سلطان معه ، خل انادي مناف ينصبها لنا وتساعدونه .
ليـان كشرت وجهها بقرف : انفداك ي عمة نادي طلال ولا احد من عماني الا مناف وجهه النكد بيقعد يمنها علينا فكينا
جمانه استانست ع طاري طلال بس سكتت شوي وقالت بقهر : فكينا من مضارباتك معه انا و رحاب مشغولين لو مره تكرمي وساعدي .
نفضت يدينها رحاب ودقت عليه يجيي يساعدهم...
—
هَـاله - بيت الجد مِتعب
بخرت المكان سريع سريع وقفلت الستاير و الغرف وشغلت القران بالمطبخ ورفعت صوته وطلعت تشوف لبنتها واللي معها... للأمانه هي من النوع الححاار واللي يستعجل فتحت الباب بقوتها ورفعت العبايه ع راسها : وقطيعه ان شاء الله ! احد يتمكيج لي وحنا رايحين بوسط البر !!
ارياف رفعت عيونها وغطت وجهها بانزعاج : يمّـه علامك لحد يسمعك بر وبالجنوب ؟ تراه مخيـم مخيـم بوسط الجبال ما غير يهفنا الهوا .
هالـه رفعت صوتها : قومي بس قومي وانتِ هنوف روحي نادي صالحه وساعدي خالتك فايزه بالاكياس هالجوال ما بينفعك .
الهنوف عدلت شعرها وربطته وحطت الشيله ع راسها : ي عمه اصبري لا سعود ولا يزيد جو ماله داعي الاستعجال الله يهديك ! .
هاله حطت يدينها ع راسها وقعدت تطبطب عليه بالخفيف : ااهه ااه منكم بس قوموا تفقدوا البيت قبل لا نروح معد بقى شي ويجون .

البنات هزوا روسهم ورتبوا الغرفه وطلعوا .
—
مِتعب - المخيم
قـام الجـد من مكانه عُقِب ما احتد النقاش بين احفادة و اصواتهم تهز المكان وباين مين هم هالأثنين م ينجمعون مع بعض بنفس المكان نهائي ... ضرب بعكازة الأرض وهو مصدع بالحيلل ولا هو رايـق لهم ويناظر لمناف وليـان وكِلـه غَضب !

مِتعب عقد حواجبه بعصبية : علامكم منكدين جوي ؟ هذا حنا طالعين نغير جو ونعين من الله خير ماله داعي الصراخ وقله الحـيا ما تستحون الناس كلهم يناظرونا ؟ .
طلال لَف بوجهه وعيونه م تفارق جواله : امسحها بوجهي هالمرة يا جد .
تنهـد الجـد منهم مو ناقص ضغطه يرتفع بسببهم وراح جلس بعيد عنهم
شبك يدينه العـم فهد بتوتر ولف على اخوانه : وينهم البـاقين مو قلت لكم خلونا ناخذهم مره وحده ؟ ولا من كثرنا السيارات معد كفت ولازم على دفعات ؟ .
حمد ضحك ومسك الفنجال لجل يصبون له : معليك وانا اخوك خليناهم مع سعود و يزيد بياخذون كم غرض من السوق ويجون كلهم .