رواية : و إن جابة الطاري بقول كان يهمني و مازال .

٨٠+

لا اله الا انت سبحانك اني كنت من الظالمين
—
رِحـاب - اليوم التالي - الفجر بالبيت
خلصت صلاة و ضميرها مأنبها ... ما كان لازم تصارخ على انفَـال

مفروض حلت الموضوع بهدوء ولا انها تخليها تطلع من البيت بهالوقت و هالشكل ، حاولت تتصل عليها اكثر من مرة لكن جوالها مغلق

رِحـاب خافت ان سَعـد رجع ياخذه منها او يحبسها من جديد ، ارسلت لها بقلة حيلة رسالة مختصرة تعتذر فيها و تطلب من انفَـال تتصل عليها اول ما تقرأ رسالتها لأنها تبي تتطمن لا اكثر و قفلت جوالها على دخله جُمـانة عليها

رِحـاب كانت عابسة بوضوح و سألتها : انفَـال ردت خبر قالت شيء ؟ .
جُمـانة فتحت الثلاجة و بدت تشوف وش تجهز لهم من فطور : والله عقب اللي صار البارح ما ظنتي تلقاها منك ولا من اختها اشبك يا رِحـاب ! .
رِحـاب مسكت راسها و هي حيل مستنكرة اللي سوته : والله ما ادري وش جاني ما كان قصدي انا يدوب طلعت غرفتي ابغى افك عبايتي الا و اسمع صراخ تحت و انزل القى انفَـال تتضارب مع الهَنـوف و تمد يدها عليها .
جُمـانة تنهدت و هي تغسل الخضار : انفَـال غلطانة مهما كان الموضوع ما يوصل لمدت يد و تمنع الهَنـوف من انها ترجع بيتها ، زين من سُعـود كلم ابوها بالمجلس و تعذر منه و باس راسه لجل الهَنـوف ترجع و قالها رضاوتها اللي تبي .
رِحـاب هزت يدها : لا يا جوجو مهما كان لا تقولين عن انفَـال كذا محد يدري وش صار لها او وش بينها و بين اختها عشان تبكي عليها و تصارخ ما تبيها ترجع ... ما تنلام والله اخوك مجننها البنت خرجت عن طورها و هي امس طول العزيمة ما كان فيها شيء .
جُمـانة لفت عليها متنرفزة شوي : و الله انا و هي ما سلمنا امها الله يهديها طول امس تحرج عليها بوسط الضيوف يعطونها نصايح للحمل محد رحمها الا اريَـاف شالتها يروحون يسولفون بعيد عنهم و انا الناس عيونها علي يوم عمتي سَمـاح تسولف عن ولدها طَـلال .
رِحـاب قربت منها : تهقين صدق بيخطبون له ؟ امس امه كانت تلمح تبي له وحده تقوم فيه هي و عمي فَهـد قدهم كبار سن و قلبها متقطع عليه عشانه وحيدها .
جُمـانة تنهدت من جديد : والله عاد بكيفها هي و ولدها ادرى فيه لا تجي تفتح هالمواضيع بوجودي على اساس تحرجني تحسب اني بقوم من وسط الحريم اقولها انا بقوم فيه يا عمة زوجوني اياه .

رِحـاب خذت الخضار منها بتقطعها عشان يجهزون الفطور لأبوها : ياختي والله مو راحمني غير طَـلال شدخله بيننا حركات امه مره مالها داعي و الحريم لسانهم ما يرحم سمعتيهم امس يحشون فيها كيف تجرأت تنطق و ولدها مقعد و ما يقدر يقوم بنفسه .
جُمـانة نزلت الصحن و هي تضحك : هذا قدامك بس والله انهم يبغونه ما غير يعيبون بالولد قدام الضيوف ولا جاء الصدق تلقينهم يدقون على امه يقولون لها عندنا فلانه و علانه ان كان ودك تخطبين ... الناس ما همها الا فلوسه فكري فيها الوحدة تتزوجه تبلع ما وراه و قدامه و طَـلال ما يقدر يقول لها شيء و بفلوسه تجيب له ممرض يقوم فيه بدالها و هي تنبسط بحياتها ، انتِ على نياتك يا رِحـاب و صدقتي ما تعرفين عن علومهم الحريم و اكبر مثال جارتهم ام عَـواطف طول الليلة تذم بطَـلال عند باقي الجارات عشان يشيلون عيونهم عنه و يوم انتهت العزيمة مسكت عمتي سمَـاح و قالت لها بنتي عَـواطف ما عندها مشكلة تشيل طَـلال بعيونها .
رِحَـاب شهقت : امانة !! ، و احنا يا غافلين لكم الله ... يا حياتي بس يا طَـلال والله انه ينرحم الله يكتب له النصيب السنع يارب ولا يحوجه لأحد .
جُمـانة رتبت الخبز بالصحن و هي تعطيه لها : امين يارب ، هاك ودي الفطور لأبوك و انزلي افطري معي اذا تبين .
رِحـاب خذته منها و هي تتفقده : اجل صحي اريَـاف و ليَـان معك يصلون الفجر و تفقدي ليَـان مخصوص امس مسكينة تركناها بلا عشى ولا تفقدناها رحنا نمنا على طول .
جُمـانة هزت لها راسها و طلعت بتشوف لهم