رواية : و إن جابة الطاري بقول كان يهمني و مازال .

٤٤

اللهم صلِ و سلم على نبينا محمد
—
اريَـاف - صلاة العشاء
قامت تقطع البصل وساكته تسمع لهواش انفَـال و جمانـة ... مضغوطين بالمرة كل شوي واحد من الرجال يدق الباب عليهم يبي الساعة ما تجي تسع و نص الا و العشى جاهز و للحين ما سوو شي غير السلطات والاشياء الإضافية اللي هم في غنى عنها مجرد يضيعون وقتهم

الهَنـوف دخلت عليهم ومكياجها محتاس من الحر : هاه كم باقي لا تقولون ما طبختوا شي مامعنا الا ساعة ! .
رِحـاب جلست على الكرسي بجمب الفرن تتنهد : بنطلب من مطعم و نحضره على اساس احنا سويناه بس المطاعم كلها مشغولة و اغلبها مقفل ولا فيه توصيل و تو حجزت بس نبي حد يروح يجيب العشى .
اريَـاف غطت قدر الايدام و لفت عليهم تناظر بأنفال و جمانة : اذا كان ببالكم شيء فطلعوه من الحين بدال ما تتهامسون عند اذني .
جمانـة شمرت اكمام فستانها بحماس : احتزمممييي ، بس ابي وحده كفو تغامر بأكلم سواقنا يوصلنا و نروح نجيبه عاد تخيلوا اكتشفت سَعـد نقل كفالته لناس ثانين و انا احسبه سفره برا المملكة .
الهَنـوف قفلت باب المطبخ عشان محد يسمعهم : يونس والله ما توقعت زين كلميه الحين بس ترا لازم حد عاقل معكم مو تروحون كذا .

رِحـاب فتحت عيونها بصدمة من الهَنـوف تأشر لها اذا هي بكامل قواها العقلية او لا : الحين الهنوف الخوافه تعزز لهم يطلعون من ورا اهالينا ؟ انتي تدرين لو سَعـد اخوها درى انها طالعه مع السواق بيفجرنا ؟ .
انفَـال غسلت يدها من بعد ما قطعت البقدونس : و هي الصادقة شايفه وضعنا يسمح ؟ جينا نكلم العيال و نشبت لنا عمتي هيله تهاوش تقول ماله داعي انتوا اطبخوا و فوقها المطاعم ما توصل لو طلبنا زين رِحـاب لقت مطعم بيجهز لنا العشى بس مشكلته ما عندهم توصيل ... خل بس اروح اجيب عباياتنا معد معنا وقت .
الهَنـوف وقفتها : جمانـة و اريَاف اللي بيروحون انتِ خليك خوفي تفضحينا .

جمانـة رفعت يدها تؤيد كلام الهَنـوف اما رِحـاب وقفت بتروح تجيب عباياتهم والباقي بيقعدون يحضرون ويجهزون كل شي .

-
سَعد - بعد صلاة العشاء
قـام من وسطهم ضايق خلقه على طاري انفَـال بلسـان يَزيـد ... يا كثر الخطاب اللي جوها و يا كثر ما هو بنفسه يستقبلهم ... مو غصب يحبها نفس ما هي تحبه

ناشبته طول طفولته لين كبروا و تغطوا عن بعض و الحين مر من عند قسم الحريم يسمع صوتها ... وقحة كعادتها الله اعلم طالعة على مين

مرت الخدامة من جنبه و هي تنادي طَـلال و طالعه من المطبخ توها تلقى فرصة توصل كلام اريَـاف لهم بعد ما مسكتها فَـايزة عشان تغسل الفناجيل

عدلت حجابها وكلمته سريع من عند الباب لما طلع لها : هذا ماما ارياف في قول روح جيب عشا عشان في يعطي ضيوف اكل .
طَـلال عقد حواجبة بإستفهام : شلون ؟ الحين جدي بيدخل المعازيم ليه ما طبختوا ! .
هزت اكتافها له بمعنى انها ما تدري و مشت بترجع لداخل ... حرفياً اعتفست ملامحه و توتر ، خاف ان ابوه سمعه