رواية : و إن جابة الطاري بقول كان يهمني و مازال .

٦٠

اللهم صلِ و سلم على نبينا محمد
—
سُلطان - اخر الليل
بالكاد لقي سيارة توصله للبيت بعد ما سحب عليه طَـلال و الكل مشغول يدق عليهم محد يرد

ترجَل من السيارة بتعب وثقله و حمله و حتى شنطه ملابسه رماها كلها على جنبه الايمن بيتفادى الألم الناجم عن حروقه اللي من الدرجة الثانية واللي امتدت على كامل جانبه الأيسر الى فكه ... شوهته بالكامل الا انه محظوظ كون وجهه تلقى حروق بسيطه و اللي بيزول اثرها مع الوقت

الشارع كان هادي و على غير العادة والناس برا بيوتهم و هذا اللي خلاه يتسأل و فضوله يزداد بكثره
دق الجرس مرتين بما ان مفتاح الباب مو معه لكن من اصواتهم العالية بداخل كان واضح ما حتى قادرين يسمعونه

ضرب الباب بيده بس ما طول على حاله بما ان طَـلال مر من جنبه بسيارته و فتح البوابة ودخل منها و سُلطان من وراه

سُلطان للأمانة اختبص وتلخبط هالفوضى ما عمره شافها ابداً ولا وعى الا على سُعود اللي وصل حده  وصفق باب المدخل الرئيسي بقوته لين خلاه يرج رج وراه وهو يدف فَـايزة و البنات لداخل من صياحهم

طَـلال بلع ريقه بصعوبة ... شكل اللي فايته كثير
نزل من سيارته مرعوب من عمه السَـالم فوق ان جُمـانة و اريَـاف طالعين من البيت دون علمهم الا انه ما توقع ان الكل بيكونون برا ... شلون اجل بيخليهم بينزلون من سيارته و يشوفونهم ؟

هيله زوجة سَـالم تهلل وجهها ما امداها تحرش السَالم على جُمـانة الا و جتها برجولها و زي ما توقعت نزلت من سيارة طَـلال بثقه ولا كانت منتبهه ان ابوها قدامها

كلها ثواني و صارخت بقوة من نقابها انفك و عبايتها تبهذلت من شد السَالم لها ولشعرها الطويل اللي انتثر قدامهم
ضربها بقوته ولا كأنها بنته : فضحتينا بين العربان ، طالعه لي بأنصاف الليالي ما حتى علمتي احد وين هايته بهالشوارع ما ترحميني من كلام الناس !! .

صفقها بقوته لين رمت جسمها على الارض بتكابر ... تبي تفك نفسها منه اما اريَـاف جلست بالسيارة ترجف ما تبي حتى سليمان ابوها يلمحها ويجيها الاخس والالعن من جُمـانة و مع ذلك ما طاوعها قلبها و نزلت تسحب جُمـانة من يدينه

ما فكهم احد منه غير طَـلال اللي اخذهم ورا ظهره بيحميهم
السَالم شد على عقاله اللي بيده : ااابببععدد لا اعود عليك ما تعلمني وين كانت هاللي ما تستحي ! .

طَـلال أمرها بخشونه توقف و تدخل داخل ، كان عقله يفكر بعذر ينقذهم فيه
و بلحظتها بالفعل اريَـاف سحبت جُمانـة مع عضيدها و جرت فيها للمدخل و عيونهم على هيله وهي تضحك بشماته لافه شيلتها على وجهها : انشهد انك مثل امك عَليـاء بنت شوارع لكن سَالم اقدى بفعلته وعلمك من انتِ بنته .