وريث آل نصران

الفصل العاشر (هل هذا صرع؟)

الفصل العاشر (هل هذا صرع؟)
#رواية_وريث_آل_نصران (الجزء الثالث)
بسم الله الرحمن الرحيم

قبل الفصل شكرا حقيقي لكل الناس على كل الدعم والكلام الحلو اللي كان على الفصل اللي فات شكرا ليكم من هنا لبكرا... أنا الكلام فرق معايا جدا وحقيقي بحبكم أوي ♥♥♥♥
يلا نبدأ 🌸

ابقِ هنا حتى ولو قولت ارحلي
محال أقصدها وأنتِ تعلمي.
ابقِ هنا حتى ولو صار الزمان معذبا
ابقِ هنا حتى ولو ضاق المكان بما رحب
ابقِ هنا ياروح تمنحني السلام
بعد حروب مزقتني وأنتِ تعرفي..
هنا تعني قلبي... حتى ولو قولت ارحلي..
ألقي السلام على فؤاد به لن ترحلي..
مهما حييت لن ترحلي... ابقِ هنا..

توقع ذلك من البداية، توقع تدهور صحة والده والآن يرى صحة توقعه حيث أن الصرخة التي صدرت عن زوجة والده نبهته هو و "طاهر" فخرجا سريعا من غرفهم ليجدوا والدهم في حالة إغماء، كان العرق الغزير بادي على وجهه و "سهام" تصرخ خائفة وتحاول بكل جهدها إفاقته، لم ينتظر "طاهر" هرع إلى هاتفه وطلب من الطبيب أن يأتي مسرعا وطمأنه بأنه هنا في المشفى وسيكون عنده خلال دقائق ملقيا بتعليماته التي نصح "طاهر" بتنفيذها حتى يأتي...بالفعل صدق الطبيب وأتى سريعا، وانتظر الجميع حتى خرج وتحدث بانفعال:
ايه يا كابتن "طاهر" اللي بيحصل ده؟... اللي أنا شايفه قدامي ده بيقول إن الحاج مش منتظم بأي حاجة من اللي احنا قايلينها.

أسرعت "سهام" تدافع بدموع:
لا والله أنا بعمله كل اللي حضرتك بتقول عليه، وبديله الدوا بانتظام، ومقللة خالص في كل الحاجات اللي قولت عليها... بس هو فعلا اليومين اللي فاتوا لغبط شوية.

_ نوديه المستشفى طيب؟
قال "عيسى" هذا بقلق يقتله و"ملك" و"رفيدة" يقفا في الخلف تحاول الأولى تهدئة الأخيرة حيث تبكي بخوف على والدها.
جاء رد الطبيب مطمئن حيث قال:
الحمد لله المرة دي عدت، يا جماعة برجوكم نلتزم، في حد هنا بيدخن؟

الاثنان لديهما هذه العادة السيئة فصرح "طاهر" باستغراب:
أيوه أنا وعيسى بنشرب سجاير... بس محدش فينا بيشرب جنب بابا

نبه عليهما الطبيب بتحذير:
طب أرجوكم ده ميحصلش جنب الحاج خالص، حتى لو بالغلط، وبالنسبة للأكل هيبقى أكل صحي وده مدام سهام عارفاه ومتابعاه معايا من الأول مينفعش خالص المسبك وغيره...
هزت "سهام" رأسها مسرعة وهي تقول بلهفة اتحدت مع دموعها:
حاضر... حاضر والله هعمل ده

_ واخر حاجة بقى وأهم حاجة، الحاج لازم نبعد عنه أي ضغط نفسي، ابعدوا عنه المشاكل والتوتر بكل الطرق، لازم نفسيته تكون كويسة لأن الضغط بيأثر عليه بصورة سلبية... جنبوه كل الحاجات دي.
رمق "عيسى" زوجة والده بانزعاج أثناء حديث الطبيب الذي ختم:
سيبوه دلوقتي يرتاح شوية وإن شاء الله خير، وأنا رقمي مع الكابتن طاهر لو في أي حاجة يكلمني.