الفصل الرابع والثلاثون (أعطاها ظهره)
#رواية_وريث_آل_نصران (الجزء الثالث)
صباح الخير، اعتقد كلنا في فترة امتحانات ربنا يوفقنا جميعا يارب، وأنا والله بمتحن زيكم بالظبط... لسه مخلصة العملي وهبدأ نظري السبت الجاي، أنتم لما بتقرأوا الفصل بيكون ده وقت فاضي، وأنا بحاول أي وقت فاضي الأيام دي استغله علشان أكتب فيه وبرضو بيجي عليا، كلنا مضغوطين فرجاء من أصحاب التعليقات السلبية أنا مش بمزاجي والله، وبتشوفوا في الأجازة بنكون في مواعيدنا بالظبط ازاي.... ياريت منضغطش بعض وشكرا لكل الناس اللي قدرت واللي مقدرتش برضو على دماغي، الفصل طويل تعويضا عن التأخير، واتمنى تدعولي علشان الامتحانات.
بسم الله الرحمن الرحيم
أحمق هو من ظن أن ردود أفعاله سريعة مع كل الصدمات، فأحيانا بعض الصدمات تصيبك بالشلل وتنجح ببراعة في جعلك عاجز عن المواجهة.
صرح "نصران" ولم يخش شيء، حيث سدد لمنصور التهمة بقوله:
دم مراتي اللي على إيدك يا أشر الخلق.
تهمة جعلت وجه منصور يبهت وهو يدفعها عن نفسه بارتباك:
أنا مش فاهم كلامك.
ابتسم "نصران" وأعطاه الرد قائلا:
لا أنت فاهم وبتلاوع... ما تخليها على المكشوف أحسن يا "منصور".
طالعه " منصور" ببغض وهو يهتف بتبجح:
طب طالما على المكشوف بقى فأنت ملكش حق.
كلمات ضحك "نصران" عاليا عليها وهو يرد عليها بسؤال:
ليه مليش حق؟
لم يستح "منصور" لذلك قال ما شاء وكأن القتل أسهل من شرب الماء:
مراتك ماتت في وقت كنا لسه بيننا فيه مشاكل، مكناش لسه بقينا على الحياد وقررنا إن أي دم هيقف، يعني حتى لو أنا ليا يد في موتها زي ما أنت بتقول وأنا بقولك محصلش فهيبقى ده في وقت كنا فيه مع بعض في حرب، وطالما كانت العداوة ساعتها لسه باقي منها يبقى كل شيء مباح.
هز "نصران" رأسه مؤكدا على حديث الجالس أمامه:
فعلا كان كل شيء مباح، مباح لدرجة إنكم ساعتها بعتوا اللي يقتلوني وفداني أعز صاحب ليا.
كلمات فتحت عليه بوابة من الذكريات وكأنه عاد الآن إلى فترة شبابه، يسير جوار صديق عمره إلى وجهتهما حيث اعتادا الجلوس، لا يتذكر حديثهما يتذكر فقط الأعيرة النارية التي كثرت فجأة من حولهم، كانت المقصود واحد بعينه، كان المقصود "نصران"، لم يظهر من ضرب عليهما، وأخطأ في تصويبه أيضا؛ مما أدى إلى أن تكون الضحية هي صديق المقصود وليس هو.
فاق " نصران" من شروده قائلا بتهكم:
فاكر أبو "عز" يا منصور ولا نسيته... الراجل اللي راح بدالي، ولا ده كمان هتنكره؟
_ بتقلب في القديم ليه يا نصران؟... ما يمكن أي حد من اللي كانوا معاديين أبوك هو اللي ضرب عليكوا نار ليلتها
السخرية والتهكم هي المسيطرة على نصران وأكمل "منصور":
وبرضو هرجع وأقولك ده كله كان قبل ما نصفي كل حاجة خالص، و ميبقاش فيه غير الهدنة اللي أنا وأنت اتفقنا عليها علشان نوقف الدم والخراب اللي كان داير بين أهالينا، ويفضى كل واحد فينا لمصالحه، ولا أنت جاي بقى عايز تفتح المواضيع دي تاني؟... اللي أنت عايز تفتحه ده بيبقى أخره خسارة، عليك قبل عليا.
أنت تقرأ
وريث آل نصران
Actionحينما يحاسبنا على الذنب أهل الذنب أنفسهم! قد كان يطمح في حياة هادئة، شاب اقتحم الحياة وفتح ذراعيه لها فلم يجد نفسه إلا شريد لا يعرف أين الطريق و أصبح لا يردد سوى: تائه، حائر، سئمت... بأي ذنب أنا قُتِلت؟ أما هي فكانت ترضى بالقليل، أمنيتها الوحيدة أ...
