وريث آل نصران

مساء الخير ❤
قبل الاقتباس بس تنويه صغير قولته قبل كده كتير بس معلش علشان اللي بينسى
أنا لما انقطعت عن الكتابة بعد وفاة والدي الله يرحمه، اغلب الناس قالولي نزلي لو مرة في الشهر، بلغت اني مش هقدر انزل بانتظام، للظروف اللي بمر فيها والكل أصر، قولت خلاص يا جماعة هنزل بس مفيش مواعيد محددة، لما اقدر هنزل، واللي مضايقه الوضع ينتظر مشكورًا انتهاء العمل، ده كلام البداية اللي الكل وافق عليه.

أنا معنديش مشكلة حد ينسى الكلام ده لو هينساه باحترام، لكن عندي مشكلة مع الوقاحة والشتيمة، عندي مشكلة مع اللي بيقل أدبه، وبيبقى منتظر الكاتب يعتذر منه، أنا الشهر ونص اللي فاتو كنت بخلص تسليمات الكلية، وامتحنت، ويادوب لسه مخلصة من يومين، وكنت بعمل حاجة تانية كمان مهمة جدا ليا، أكتر من حاجة قطعوا وقت كبير، مكنتش بعرف أفتح حتى اتفرج على فيديو، أنا مدتش ميعاد وخلفته، أنا من البداية وضحت ظروفي اللي متفقين عليها.

فـ ياجماعة تاني وباحترام، الرواية فاضل فيها 4 فصول بالكتير 5، اللي مش مستحمل اني ممكن مقدرش اكتب يستناها كاملة، الرواية دخلة على 3 سنين علشان هي سلسلة مكونة من 3 أجزاء فصولها طويلة، زيها زي مسلسلات بتتابعوها بتستمر أكتر من سنة، فبلاش كومنتات من نوعية أنا بدأتها وأنا في أولى ابتدائي خلصتها وأنا في أولى ثانوي دي، علشان أنا والله قايلة من الأول إن دي سلسلة 3 أجزاء مش قصة قصيرة 15 فصل، شكرا لأي حد سأل عني واهتم يعرف أنا غايبة ليه، وبعتذرلهم عن التأخير، وأي حد غلط فهو بيعبر عن بيئته فقط لا غير ❤

تنويه تاني أحداث الاقتباس ده قبل خطف عيسى وشاكر يعني فلاش باك، ومع تنزيل الفصل هينزل ملخص للي فات علشان اللي نسي.

ده ألاقتباس اللي كان هينزل إمبارح بس فاطمة قافلة فنزلتهولكوا أنا.

#الأدمن

أسيبكم مع الاقتباس

_ احنا جايين علشان نتكلم.
قال "نصران" هذا ولم تهدأ الجالسة بل تضاعف انفعالها وهي تخبره:
يا عمو أنا مش جاية علشان اتكلم، أنا طلبت من حضرتك طلب، وحضرتك وعدتني قبل ما اجي هنا، إنك هتسمع طلبي وتنفذه.

فكرر طلبها قاصدًا أن يصل إلى ابنه كل حرف:
يعني أنتِ طلبك ابعد "عيسى" عنك.

وكما توقع تماما لم ينتظر ابنه بالخارج أكثر، بل اقتحم غرفة المكتب عليهما ضاربًا بكل تعليمات والده عرض الحائط، ومعترضًا بضجر:
مراهق أنا بقى، جاية تشتكيه لأبوه علشان بيضايقك في الفصل.

أثارت سخريته من حديثها غضبها فقررت ألا تبقى ثانية اخرى، فقط أبلغت والده باحترام:
أنا ماشية يا عمو.

فاعترض ابنه طريقها هادرًا بانفعال:
علاقتك بيه هتتقطع.
وردت هي بإصرار:
ملكش دعوة بيا، أنا حرة، ياريت تعقل وتفهم ده.

وكان إصراره مضاعف وهو يلقي على مسامعها:
لا أنا هفضل مجنون، وعلاقتك بيه هتتقطع يا "ملك".

تحركت لتغادر، بعد أن طفح كيلها منه، وأصمته والده قبل أن يتفوه بحرف اخر:
إياك تنطق بكلمة تاني.

توجهت نحو الخارج، وجمدها مكانها ما وقعت عليه عيناها، ترى " قسمت" أمامها، وخلفها تلك التي لا تعرف عنها شيء، كانت تطالع قسمت بانزعاج شديد، وقبل أن تتخطاها سمعتها تقول:
هو مش أنتوا اتطلقتوا، ولا هو أنتوا عندكم طقس في العيلة بتزوروا طليقكم من وقت للتاني.

_ لا عندنا طقس إننا منبصش لرجالة مش معبرانا.

هكذا ردت عليها "ملك" بضيق، قبل أن تستدير، وتجده قادم، فأكملت خطواتها لتغادر من هنا، رغم سماعها ندائه، وقبل أن يلحق بها، اعترضت "قسمت" طريقه ومن خلفها "چنا" التي سمعت "قسمت" تقول:
البتاعة اللي أنت جايبها تشتغل معانا في الجاليري دي هتمشي.

أشارت "چنا" على نفسها وهي تسألها بغضب:
أنا بتاعة، ده أنتِ اللي مبتفهميش حاجة.
ثم سألت الواقف أمامها:
هو مش أنت قايلي إن أنا مكانك، وإن أي حاجة في الشغل يا "عيسى" اتكلم فيها.

واحتد الشجار، و"قسمت" تصرخ في وجهها:
بتاع إيه أصلا أنتِ تتكلمي في الشغل
ثم طالعته وتابعت:
وأنت كمان قافل تليفونك ليه، يعني هو علشان نعرف نوصلك لازم نجيلك لحد هنا... "چنا" هتمشي.

هتف بنفاذ صبر:
لا "چنا" هتفضل.
وحاول الفصل بينهما ناطقًا بانزعاج:
ووسعوا أنتوا الاتنين من سكتي بقى.

لحق بملك على البوابة، والتي تعمدت أن تتباطأ حتى تسمع أغلب ما يدور، حاول إيقافها، فاستدارت تحدثه بغضب:
إياك تكلم معايا، هو أنت حد مسلطك عليا؟

_ اسمعيني يا "ملك".
ولم تستجب بل صاحت باستنكار:
أسمع إيه، ده بقى في " چنا" كمان، ولسه عايزني اسمع تاني، وليك عين تكلمني.

تمسك بمرفقها، رغم كل اعتراضاتها، ولم يجعلها تصمت سوى صوت "قسمت" التي أتت من الخلف تقول:
ممكن يا "عيسى" خمس دقايق بس تحل الموضوع، علشان أنا عندي مشاوير ولازم أمشي، ولو مش فاضي بقى دلوقتي خالص، أنا همشي ونتقابل في مكاننا.

طالعته "ملك" وقد كانت قاب قوسين أو أدنى من الفتك به، ولم تسمع سوى أنه همس بسبة نابية، قبل أن يحملها، ويتجه بها إلى مرسم شقيقه، ضاربًا بكل اعتراضاتها عرض الحائط، احتجزها داخله وأغلق الباب، أمام نظرات "قسمت" المذهولة، خرج، ليعود ويصب كامل غضبه على الاثنتين "قسمت" و"چنا" ولكن عنف "ملك" في الدق على بوابة المرسم، التي يغلقها بيده ويقف أمامها، ومحاولاتها في الفتح، جعلته يلقي على مسامعهما:
روحوا.

ويدخل لهذه التي تركها في الداخل، تحت نظرات ضيفته المفاجأة، والتي لم يعجبها الوضع برمته مطلقًا.