يوسف :ولاء دى مودة بنت خالتى مودة دى ولاء بنت عمى
مودة :مش محتاج لفقرة التعارف دى شوفنا بعض فى خطوبات وافراح اخواتك فمتبقاش شلحف كده
يوسف وهو بيمسكها من قفاها :انا شلحف يا مودة
مودة وهى بتضحك بسماجة :قطع لسان اللى يقول كده عليك يا جو ده انت ابو المفهومية
ولاء بحرج :معلش هو يعنى ايه شحلف دى
مودة وهى بتضحك :انتى مالك خواجاية فى نفسك ليه كده شحلف ايه بس اسمها شلحف وشلحف يا ستى تقدرى تقولى كده معناها مبيفهمش غبى يعنى
يوسف :مش قولتلك مو الشخص المناسب للى انتى عايزاه
ولاء باستغراب :مين مو
مودة وهى بتضحك :بلا فخر او غرور مو دى انا البيه من حبه فى محمد صلاح بيقولى مو وكمان علشان تبقى على وزن جو اللى بقولهاله
يوسف :وانتى تطولى اناديكى باسم محمد صلاح ده كده تكريم ليكى
ولاء :تكرمها فتقولها مو طيب قولها مرمر ميمو ميمى حتى اى دلع يليق ببنت
يوسف وهو بيضحك :وهى مودة يليق عليها اللى قولتيه ده لا هى مو
مودة :ده انت سمج مش عرفتنا ببعض اتكل بقى وزق عجلك
يوسف :ازق عجلى تشكرى يا زوق ده ربنا نجده خطيبك والله...هخلع انا علشان شغلى اشوفكم كمان تلت اسابيع
مودة :خلى بالك من نفسك يا جو
يوسف :وانتى كمان يا مو
ولاء بابتسامة :تروح وتيجى بالسلامة يا يوسف
يوسف :الله يسلمك يا ولاء..مودة توصلى ولاء لحد البيت تدخل العمارة كده قدام عينيكى
مودة :عيب عليك يا جو من غير ما تقول الحق انت بس شغلك...هاتى موبايلك
ولاء باستغراب :ليه
مودة وهى بتضحك :هاخده واطلع اجرى ايه يا ولاء هسجلك رقمى ولا انتى خدتيه من يوسف
ولاء وهى بتديها الموبايل :لا مخدتوش
مودة :ادينى رنيت عليا من عندك..ده رقمى سجليه انا عاملة الواتس بيه كمان والفيس بقى تقدرى تجيبينى من الاصدقاء عند يوسف او اقولك هبعتلك لينك صفحتى على الواتس اسهل..انا جعانة انتى مش جعانة تتغدى معايا
ولاء :نتغدى هو مش يوسف قالك انا عايزة ايه
مودة :قالى اه بس هو انتى مفكرانى هجيب سبورة واشرحلك عليها وفى الاخر اديكى ملخصات تذاكرى منها
ولاء :اومال انتى هتعملى ايه بالظبط
مودة :هكون هعمل ايه يعنى هتكلم معاكى هخرج معاكى كده يعنى لا انتى بسكوتة اوى فى نفسك وفعلا محتاجة تنشفى على نفسك شوية
ولاء :ايوه ما اهو انا فعلا عايزة انشف اعمل ايه علشان انشف اشيل حديد
مودة :انتى كده هتربى عضلات يا ولاء زى الواد جو
ولاء :طيب اعمل ايه اشرب سجاير
مودة وهى بتضحك :لا انتى كده هتنحرفى مش هتنشفى الموضوع ابسط من كده انتى محتاجة تغيرى شوية كلامك وتصرفاتك وافعالك
ولاء :كل ده
مودة :اه هو اصلا انتى عايزة تتغيرى ليه
ولاء :كل اللى حواليا بيتريقو على رقتى الزايدة فقررت انى مبقاش رقيقة اوى كده
مودة :صحيح الناس دى مبيعجبهاش العجب ولا بيسيبو حد فى حاله اهو انا برضه مش عاجبهم اسلوبى وبيتريقو عليا وبيقولو بنت بالشكل بس انما بالطبع راجل واخرتها خطيبى سابنى للسبب ده
ولاء :شافك واحد صاحبه
مودة :مش بالظبط بس مقدرش يتحمل طريقة تعاملى واسلوب كلامى بعد خطوبتنا بتمن شهور لقيته مرة واحدة بيقولى انه مش قادر يتحملنى ومش هيقدر يكمل معايا
ولاء :وانتى قولتيله ايه
مودة :قولتله كل شئ قسمة ونصيب واتفسخت خطوبتنا
ولاء :بالسهولة دى حتى مقولتيلوش انك هتتغيرى علشانه
مودة :كرامتى مسمحتليش اقوله كده خصوصا انه مش بيشتكى من طبع فيا لا هو فضل ساكت طول شهور الخطوبة ولما اتكلم قالى انه هيسبنى مكنش ينفع اتمسك بيه فى وقت هو بيبعنى فيه بالشكل ده
ولاء :يعنى لو كان من الاول نبهك ان اسلوب تعاملك معاه غلط كنتى هتتغيرى
مودة :اه كنت هحاول علشانه خصوصا لو كان اتكلم معايا باسلوب هادى ومحسسنيش انه بينظر عليا
ولاء :يعنى ايه بينظر عليكى
مودة :يعنى بينتقدنى وخلاص مش بينصحنى لمصلحتى
ولاء :كنتى هتتغيرى علشان يحبك
مودة :لا لانه لو حبنى بعد ما اتغيرت يبقى هو كده مبيحبنيش هو بيحب التغيير اللى حصلى كمان انا مهما اتغيرت مش هتحول يعنى هفضل زى ما انا بس بتعديلات بسيطة لان الطبع بيغلب التطبع
ولاء :زعلتى انه سابك
مودة :الصراحة زعلت لان اولا كنت بدأت اتعلق بيه ثانيا كلنا بنتمنى نلاقى حد يقبل بينا ويحبنا زى ما احنا معروف طبعا ان محدش كامل وكلنا فينا عيوب ودايما محتاجين نشتغل على نفسنا بس برضه هتفضل امنية من امنياتنا اننا نلاقى حد يحبنا زى ما احنا كده ولما ده مبيحصلش لا بالعكس يحصل عكسه ونتساب علشان عيب فينا وقتها طبيعى نحس بحزن وخذلان
ثالثا بقى يا ست الكل انا عشرية جدا باخد على الناس بسرعة فطبيعى ميكنش سهل عليا انسى تمن شهور كان هو فيهم جزء من حياتى
انا عشرية لدرجة انى بحكيلك حكايتى دى ولا كأننا اصحاب عمر فى حين ان دى اول مرة نتكلم انا وانتى لوحدنا مش غامضة خالص انا للاسف
ولاء وهى بتضحك :دى حاجة حلوة انتى كده طيبة
مودة وهى بتضحك :لا وانتى الصادقة انا كده مهزقة..انا هنزل اجيب سندويتشات تيجى معايا ولا تخليكى فى العربية
ولاء :طيب ما ناكل فى المطعم
مودة :لا مبحبش اكل وسط ناس معرفهاش هجيب سندويتشات ونطلع على
الكورنيش ناكلها ونضرب حمص الشام
ولاء بابتسامة :موافقة انا بحب حمص الشام اوى
مودة :تمام هتيجى معايا نجيب السندويتشات ولا تقوليلى عايزة ايه وانا اجيبهولك
ولاء :لا هاجى معاكى
