غادة :طيب ما تخش تكتبلها عبرنا يا مدمرنا او ما تحن يا جن😉
امير :وافرضى مرديتش
غادة :قولها ما ترد يا قرد😂😂
امير :علشان تعملى بلوك ويبقى ده اقل واجب يعنى
غادة :اهو على الاقل تبقى عملت حاجة مش احسن ما انت بتكراش عليها وخلاص كده البت هتتجوز وتخلف وانت قاعد جمبى زى خيبيتها كده
امير :انا زى خيبيتها يا حلوفة انتى
غادة :ايوه زى خيبيتها وهى شكلها هتتجوز وتخلف وانت دافنلى نفسك فى شغلك ومع اهلك وصحابك وبتكلمنى كل يوم وخلاص على كده وتولع حياتك العاطفية اكتر ما هى والعة
امير :وكونى بكلمك كل يوم ده ملفتش نظرك لحاجة
غادة :حاجة زى ايه
امير :شوفى انتى
غادة :اننا اصحاب جامدين جدا✌💪
امير :ايوه طبعا برافو عليكى عارفة يا غادة انتى اسمك الحقيقى ذكاء بكلمك بالامانة ده اقل وصف يليق بعبقريتك😂
غادة :شكرا ما انا عارفة بس انا مبحبش اتكلم عن نفسى كتير الجامد مبيحكيش عن جمدانه يا ابنى😎
امير :هروح اعمل لنفسى عصير وارجعلك
غادة :لو جعان كل احسن
امير :لا مش جعان هبطت فجاة بس
غادة :كل ده علشان الحلوفة اللى مش حاسة بيك
امير :اه
غادة :ما هو الغلط غلطك برضه يا امير انا بشتمها علشان احنا اصحاب انما البت متستاهلش الصراحة ذنبها ايه هى ما انت اللى مقولتلهاش هتشم على ضهر ايديها هى ولا هتضرب الودع
امير :لا تحس يا غادة تركز كده وتفكر هتعرفنى تشغل مخها اللى صدا من قلة الاستخدام ده
غادة :انت بتلمحلها يعنى
امير :بلمحلها بس هى بقرة مش فاهم كان عقلى فين لما المهزق قلبى حبها
غادة :هى وحشة متتحبش يعنى
امير :لا هى حلوة اوى وتتعشق مش بس تتحب محدش غيرها يتحب اصلا
غادة :اومال مضايق انك بتحبها ليه
امير :انا مش مضايق انى بحبها انا مضايق انها مش حاسة بيا
الحب من طرف واحد ده عذاب لعنة وبتحل على قلب الواحد
لعنة بتحول دماغك لساحة معركة من الاسئلة
غادة :اسئلة زى ايه
امير :زى هى ليه مبتحبنيش عايزة ايه مش فيا شكلى مش حلو طبعى مش عاجبها اعمل ايه طيب اروح اكسر دماغها اللى مش بتفكر فيا دى ولا اترجاها تحبنى ولا ابعد عنها خالص واروح لحالى طيب ابعد عنها ازاى وهى بقت حالى ومحتالى
غادة :على فكرة انت تتحب انا مش فاهمة هى ازاى مش شايفة كل ده معرفش ممكن تكون عايزة ايه مش فيك هتعوز ايه اكتر من اللى انت بتقوله عنها وحاسة تجاهها ده
بس اللى اعرفه انها لو خسرت حبك هتبقى خسرت حاجة متتعوضش لان حبك ده ميتعوضش لانك كلك على بعضك متتعوضش يا امير
امير :انتى شايفة كده
غادة :انا متأكدة من كده
امير :قوليلى صحيح هو انتى لو مكانها تعملى ايه لو مثلا يعنى جيت اقولك انا او اى راجل فى الدنيا يعنى بس افترضى انى جيت قولتلك انى بحبك وانك احلى حاجة حصلتلى فى حياتى هتعملى ايه هيبقى ايه رد فعلك
غادة :مش عارفة بس غالبا هموت من الفرحة 😂اللى هو اخيرا حد حبنى ومطلعتش قلقاسة ولا حاجة
امير :هو انتى عمر ما حد قالك انه بيحبك قبل كده
غادة :اول سنة ليا فى الكلية كان فى ولد بيقف فى سوبر ماركت على اول شارعنا وقفنى مرة يقولى انه معجب بيا وسألنى بروح دروس فين علشان هيغير دروسه ويروح لنفس المدرسين اللى بروحلهم وكان مستغرب انه مبيشوفنيش عند اى مدرس من اللى بيروحلهم
طبعا فهمته انى اكبر منه بتلت سنين وانى خلصت ثانوى ودخلت الجامعة وعلشان كده هو مبيشوفنيش فى اى درس بيروحه وبكده خسرت الشخص الوحيد اللى حبنى واكراش عليا فى حياتى
امير :فصلتينى ضحك يعنى طلع اندر ايدج😂😂
غادة :اندر ايدج جدا 😂
امير :بس معقول محدش غير العيل ده قالك انه معجب بيكى او بيحبك
غادة :لا انا مبتعاملش مع ولاد فى الكلية انت عارف
امير :طيب فى قرايبك فى جيرانك
غادة :بيعتبرونى زيك صاحبهم وانا بعتبرهم زى ما بعتبرك
امير :نعم يا اختى بتعتبريهم زيى😒😠
غادة :لا انت اقرب وعلاقتى بيك اقوى بس قصدى انهم مش اكتر من قرايبى وكلهم عندى زى بعض
امير :يعنى انتى مبتفكريش فى الحب مش عايزة تتحبى
غادة :مبفكرش لا مش حاسة انى محتاجاه دلوقتى انا كل اللى عايزاه انى اتخرج واشتغل
امير :حياتك مش ناقصها الحب
غادة :يمكن يكون ناقصها مش عارفة
بس انا حاسة ان حياتى كده تمام كليتى واهلى واصحابى وانت وتمام اوى كده معنديش فراغ الحب يملاه
امير :مش لازم تحبى علشان تملى فراغ هو انتى مفكرانى حبيتها علشان املا فراغ فى حياتى
غادة :اومال حبيتها ليه
امير :علشان هى عرفت تاخد مكان فى قلبى اللى معرفتش انه موجود غير لما دقلها
وعرفت تاخد مكان فى عقلى اللى عمره ما انشغل ببنت وكان شايفكم كلكم زى بعض وبقى مبيفكرش غير فيها
وعرفت تخلى عيونى متنزلش من عليها مجرد ما تشوفها
وعرفت تاخد مكان فى حياتى رغم زحمة حياتى
عرفت تحتل مكانة فى كل ده وجبرتنى احبها هو بمزاجى اختار اللى انا فيه ده
غادة :هو الحب اجبار مش اختيار
امير :الحب قدر
غادة :يعنى هى قدرك
امير :اه ويا خوفى لمكونش انا قدرها
غادة :هتكرهها لو بقت لغيرك
امير :هكره نفسى يا غادة هكره حياتى اللى مبقتش شريكة ليا فيها هكره قلبى اللى حبها بس مش هعرف اكرهها
غادة :طيب ما تعرفها كل ده حاول تقرب منها هتفضل تحبها من بعيد لبعيد كده
امير :المصيبة انى مش بعيد المصيبة انى قربت يا ريتنى فضلت بعيد يا ريتنى ما قربت يا ريتنى ما حبيتها
غادة :قريب وهى مش شايفة حبك ده كله انت بتحب واحدة عامية ولا ايه
امير :هى عامية عنى ومش شايفانى وانا اعمى عن كل بنات الدنيا ما عدا هى ومش شايف غيرها
غادة :طيب ما تبعتلى لينك الاكونت بتاعها احاول انا اقرب منها اصاحبها والمحلها بحبك يعنى
امير :لا وانتى الشهادة لله لماحة يا غادة وبتلقطيها وهى طايرة😁😂
غادة :ما قولت ما بحبش اتكلم عن نفسى كتير بقى😎
ابعتلى بس لينك الفيس بتاعها وانا هظبطك
امير :لا معلش شايلك للتقيلة
غادة :براحتك انت الخسران
المهم انا هقفل علشان عندى محاضرات من بدرى بكرة
تصبح على خير
امير :وانتى من اهله
