قوم بينا نخرج نتغدى بره قالتها وهي بتشده من ايده
مالك :ندى الله يهديكي اقعدى نتكلم انتي مكسلة تعملي اكل انتي اترفدتي من شغلك النهاردة واكيد مش هطلب منك تعمللنا اكل يعني
بس اتعاملي مع اللي حصل ومتنكريهوش بالطريقة دى
انا كده هقلق عليكي
ندى :تقلق ليه ربنا ميجيب قلق
كمان انا كده بتعامل معاه
انت متجوزني من اربع شهور ولسه مفهمتش السيستم طيب يا سيدى افهمك
انا كل ما تحصل حاجة تضايقني او توجعني وتخليني زاهدة في الحياة كده ومخنوقة بتمسك بالحياة اكتر وبعمل حاجة تحسسني انى عايشة
مالك :تتمسكي بالحياة ازاي وبتعملي ايه يحسسك انك عايشة ؟!!
ندى :يعني بقوي نفسي وافكر نفسي انه كله بيعدى وان ربنا معايا ومش هيسبني بالنسبة بقي لبعمل ايه دي فبعمل كتير
يعني مثلا وانا في اعدادى صاحبتي بعدت عني وصاحبت ناس تانية غيرى رجعت البيت انا بقا بكيت في حضن سلمى اختي وحكتلها سلمي هدتني وقالتلي ان صاحبتي اللي خسرانة ومسيرها تندم وقالت عني كلام حلو وقعدنا نفتكر انا وهي مواقف لينا سوا وضحكنا حضنت سلمى انا تاني وقلتلها اني بحبها والحمد لله انها موجودة وبعدها نسيت صاحبتي دى ولا كانها موجودة واتعرفت علي ناس تانية
لما بابا او ماما بيقولي حاجة تضايقني بفكر نفسي انهم مش قصدهم يضايقونى وبيحبونى واعمل حاجة بحبها اكل بقي اخرج اجيب لنفسي شيكولاتة وارجع اتعامل معاهم عادى
فاكر في مرة وانا وانت مخطوبين انا غلطت وزعلتك مني كنت متضايقة من نفسي اوى فكرت بقي ان الاحسن اعمل حاجة علشان اصالحك بيها واحسسك انك مهم عندى نزلت بقي عملت ميدالية فضة عليها اسمك وجبتلك ساعة كنت عارفة انها عاجباك واستاذنت بابا وجبتهالك وانت في الشغل علشان المفاجاة تخليك تصالحني وتنسي ضيقك مني وحاجات تانية كتير بقي شبه كده
مالك :ايه مفيش حاجة بتوجعك وتخليكي تنهارى تكتئبي تحسي انك مش قادرة من التعب وتخليكي تبكي
ندى :لا طبعا في انا ياما بكيت ونمت علشان اهرب من الواقع واتوجعت وحسيت ان قلبي هيقف من كتر الوجع
بس انا لما بقع بحاول تاني واقوم مبفضلش واقعة
يعني تعبت بارتاح وبعدين برجع احاول تاني مبستسلمش
بحزن وباخد وقتي في الحزن بس مبديلوش وقت اكتر من اللي يستاهله علشان ميخسرنيش كتير ويحولني لانسانة عاجزة الدنيا مبتقفش ومفيش حاجة بتفضل علي حالها
غلطت بحاول اصلح غلطي اتغلط في حقي بحاول اخد حقي
مالك :ودلوقتي انتي بتحاولي تعملي ايه
ندى :بحاول مشيلش نفسي ذنب مش ذنبي
انا مقصرتش في شغلي هما كانو عايزين يخفضو العمالة وسابو الناس الاقدم لما لقو ان كفائتنا واحدة تقريبا
مش ذنبي ان في ناس اشتغلت قبلي في نفس القسم اللي اشتغلت فيه في الشركة ولا ذنبهم ان انا اترفدت وهما فضلو انا مش حاقدة عليهم ولا متضايقة منهم بالعكس ربنا يوفقهم
انا بس متضايقة علشان نفسي وعلشان كده ههون علي نفسي واخرج اتغدى بره اكل اكل بحبه في مكان بحبه مع انسان بحبه ونتكلم عني وعنك وانسي اللي حصل وافتكر انك جنبي وان ربنا معايا ومش هيسبني
وبعدين افكر بقي هعمل ايه هدور على شغل تاني فين
ها هنخرج نتغدى بره
مالك :وهندخل السينما كمان 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
