اية :اول ما بصيت فى عيونه وهو باصصلى حسيت ان قلبى هيخرج من ضلوعى من كتر ما بيدق يسرعة وبصوت عالى بقيت خايفة يسمعه
دارين :ليه قلبك ده ولا سماعة دى جى فى فرح
بسمة :بس يا دارين كملى يا اية وبعدين
اية :ولما مسك ايدى حسيت برعشة غريبة كده كأنى اتكهربت لما مسكت ايده
دارين :ده على اساس انك مسكتى سلك عريان صح
بسمة :سلك عريان يمسك الصهاينة وينشف دمهم يا رب ولو انهم معندهمش دم ينشفه
ايه يا دارين ما كفاية فصلان بقى
دارين وهى بتضحك :احلى حاجة انك مبيهونش عليكى تدعى عليا قد ايه انتى صاحبة جدعة
بسمة :لا انا بحب ادعى على الصهاينة على الفاضى والمليان ربنا ينتقم منهم
وبعدين انتى عارفة انا مبحبش ادعى عليكى ولا على حد بحبه
بس لو مبطلتيش فصلان هدعى عليكى عادى بسبب رخامتك دى
سيبك منها يا اية وكملى
اية :ومش هترخمى يا دارين
دارين :هحاول
اية :دارين
دارين :خلاص هسكت كملى
اية :بعدها لقيته بيقولى انتى كويسة يا اية ولهجته كان فيها خوف عليا واهتمام ويمكن حب و...
دارين قاطعتها :لا مش قادرة الأوفر ده ميتسكتش عليه
انتى ليه محسسانى انه جابلك ورد وقالك سعيدة يا هانم وعمل فيها عمر الشريف وراح ماسك ايدك يبوسها
واحد شافك بتتكعبلى على السلم وبتقعى هيعمل ايه هيجيب فشار ويقعد يتفرج عليكى وانتى واقعة
ما طبيعى يمد ايده يقومك
واكيد مش هيقولك احسن كويس انك وقعتى
الطبيعى بتاع البشر انه هيقولك انتى كويسة دى حاجة بديهية يعنى قلبتيه فيلم هندى ليه
اية :الله مش بحكيلكم احساسى
دارين :ده انتى اوفر انتى واحساسك
يا اية مش كده حرام عليكى هتجلطينى
اية :انتى اللى مش رومانسية وناشفة
دارين :لا انتى اللى اوفر واحساسك طرى ولا اللى مسقياه فى شاى بلبن
اللى بتعمليه ده غلط ومحدش هيدفع تمن الغلط ده غيرك
اية :وهو انا عملت ايه غلط شوفتينى روحت قولتله ولا خدت اى خطوة ناحيته
دارين :انا عايزاكى تاخدى خطوات ناحية نفسك احمى نفسك واحمى قلبك يا اية مشاعرك غالية خافى عليها اكتر من كده
اية :المشاعر مش بأيدينا وبعدين ما يمكن فى الأخر يحصل اللى بتمناه
دارين :هتوقفى مشاعرك على احتمال مجرد احتمال يا عالم يحصل ولا يحصل واحد من مية احتمال غيره
بسمة :انتى علشان بتفكرى بعقلك مش فاهماها يا دارين
دارين :ما هو احنا المفروض نفكر بعقولنا
ربنا خلقنا العقل علشان نفكر بيه وخلق القلب علشان نحس بيه
هى بقى لاغية عقلها ومبتفكرش وماشية ورا احساسها ويا خوفى لإحساسها يلبسها فى حيط فى الأخر
اية :لا انا متفائلة وحاسة ان احساسى هيقعدنى فى الكوشة فى الأخر
هقعد ناحية اليمين بفستان ابيض
ولا ناحية الشمال هى العروسة بتقعد على اليمين ولا على الشمال
دارين :بتقعد على قلبى تفطسنى يا بنتى حرام عليكى هتجلطينى
طيب بلاش تقتنعى بكلامى بس فكرى فيه ولو لعشر ثوانى بس حسسينى انك سامعانى
اية :انا مش سامعة غير صوت دقات قلبى وهى بتقول دوم دوم عمرو دوم دوم عمرو
دارين :هو سعد باشا الله يرحمه قالها مفيش فايدة
انا بحارب طواحين الهوا
اية :ايوه انا حبى قوى محدش يقدر يحاربه
دارين :لا ان جيتى للحق اللى هيبقى قوى هو الخازوق اللى هتاخديه فى الأخر
انا اراه قادم من بعيد بنفس سرعة غبائك والله
بسمة :خلاص يا دارين مش كده فى ايه
دارين :خلاص انا هخرس خالص انا نصحتها كتير وهى حرة
تصدقى بالله يا رب اطلع غلط يا رب انتى والأفلام الهندى تطلعو صح وانا اطلع غلط
اية :قصدك انا والحب الحقيقى الحب الذى لا يموت
دارين :كده انا اللى هموت من افورتك
بس ماشى يا رب انتى والحب الذى لا يموت اللى هيجلطنى ده تطلعو صح
بسمة :يا رب اللهم امين وربنا ياخد كل الصهاينة على التلات الجاى بالكتير
دارين :اللهم امين
نغير الموضوع بقى هو خلص كده ولا غنيتو ورقصتو زى الاستعراضات الهندى بعد ما قالك انتى كويسة
اية :لا محصلش حاجة قولتله انا كويسة وقالى طيب الحمد لله وخلاص
دارين :نغير الموضوع بجا نغير الموضوع بالله عليكم
بسمة :دكتورة نيفين قالت ان عندنا كويز المحاضرة الجاية
دارين :دكتورة نيفين كويزات بتتغذى على الكويزات
امتى بقى نتخرج ونخلص منها ومن كويزاتها
انا بقيت بحلم بكوابيس بتيجى تعملى فيها كويز ليا لوحدى ومبعرفش احل ربتلى الرعب الله يسامحها
