كريمة :عملتلكم كريم كراميل يستاهل بؤكم يا بنات
فاطمة :احلى حاجة انك دايما محسسانا اننا لسه صغيرين مكملناش العشرين سنة
صفاء :الوحيدة اللى بتحسسنى انى لسه صغيرة كل حاجة حواليا بتحسسنى انى خلاص كبرت وبقيت من القواعد من النساء
كريمة :قواعد من النساء ايه بس وانتى لسه مجبتيش الاربعين
صفاء :هتمهم كمان كام شهر
كريمة :وفيها ايه مانا تمتهم وعادى
فاطمة :انا مخنوقة قولت مش هتكلم علشان مضايقكوش بس مش قادرة هيجرالى حاجة لو متكلمتش
كريمة :قولى يا حبيبتى فيه ايه
فاطمة :حاسة انى مبعملش حاجة صح فى حياتى المستشفى رغم كل تعبى فيها ونبطشيات وايام ممكن تعدى عليا منامش غير ساعتين تلاتة وبرضه مفيش تقدير ومحسسنى انى مقصرة وفى البيت عبدالله والولاد محسسنى انى مقصرة اومال انا بعمل ايه فى حياتى بقى لما انا فى بيتى مقصرة وفى شغلى مقصرة ده انا يوم ما انام خمس ست ساعات بقول عن نفسي نمت كتير مبعملش اى حاجة لنفسي كل وقتى ومجهودى يا للبيت يا للمستشفى انا لو مقصرة فانا مقصرة فى حق نفسي اللى مش فاكرة اخر مرة كانت مبسوطة امتى ومحدش مقدر كله مش شايف غير نفسه واللى هو عايزه وبس انا تعبت وهما محسسنى انى تعبى على الفاضى
كريمة :حبيبتى حتى لو هما مش مقدرين ربنا مقدر تعبك وهيجازيكى خير عنه وانك رغم كلامهم اللى يضايق ده مكملة وبتحاولى تعملى اللى عليكى كدكتورة وكزوجة وكأم فربنا شايف ده ومش هيضيع تعبك
صفاء :ايوه انا حسا انى زوجة انى ام بس مش حسا انى ست وفى الاخر اللى اتحديت اهلى واتجوزته اللى عاملة نفسي خدامة ليه ولولاده اللى سبت علشانه شغلى ومستقبلى بيخونى جوزى المحترم اللى عنده خمسة واربعين سنة اللى عنده بنت كلها ستنين ولا تلاتة وتتجوز بيخونى وعلى النت بيخونى مع واحدة متجوزة على النت بيقولها كلام حلو مش فاكرة اخر مرة سمعته منه امتى وبيقولها كلام تانى زبالة مش عارفة ازاى ناسي ان ربنا شايفه وهو بيقولها كده ازاى ناسينى ومش خايف اعرف ازاى مش خايف يتردلنا فى بنت من بناتنا مش خايف كريم ولا هيثم يشوفو اللى هو كاتبه ده ولا يتفرجو على الصور والفيديوهات اللى القذرة اللى بيكلمها بعتهاله
كريمة :عيطى يا صفاء متمسكيش دموعك كده
صفاء وهى بتعيط :يا ريتنى ماسكة نفسي انا عيطت كتير يا كريمة وهو كمان عيط وقالى مش هيعمل كده تانى وانها لحظة شيطان وانا سامحته مع انى عارفة انه بيكدب شوفت فى عينيه كدبه وانه هيفضل يعمل كده لحد ما اموت من قهرتى على نفسي سامحته علشان ولادى سامحته علشان بحبه سامحته علشان طول عمرى بسامحه لما خلاص مبقتش قادرة انى مسامحوش كان عندك حق يا كريمة هو انانى واهلى كمان كان عندهم حق انه صايع ولعبى وميقدرش يفتح بيت ويبقى مسئول عن زوجة واولاد يا ريتنى سمعت كلامكم ملعون الحب اللى خلانى عملت فى نفسي كده
كريمة وهى بتحضنها :اهدى يا حبيبتى اهدى هيجرالك حاجة ولادك عايزينك ولادك محتاجينك ولادك ملهمش غيرك
صفاء وهى بتعيط :انا اللى عملت فيهم كده لما اتجوزت طفل مش ممكن يكبر ويبقى راجل وهيعيش ويموت وهو مش بيفكر غير فى نفسه غلطت ومش عارفة اصلح غلطى لو اتطلقنا هنعمل ايه من غيره
كريمة :هو مبيعملكوش حاجة يا صفاء هو مجرد عبء عليكى ومينفعش اب لولادكم هيعلمهم ايه هيطلعهم زيه
بس مش لازم طلاق بس لازم تتغيرى خليه يشيل معاكى المسئولية انتى شايلة مسئولية خمس ولاد لوحدك ليه وكمان مسئولية البيت وحتى طلبات البيت انتى اللى بتجبيها والفواتير انتى اللى بتدفعيها ده لازم يتغير البيه لازم يفهم انه زوج واب ومسئول عنكم
متعديش اللى حصل بالساهل خدى موقف وحسسيه انك ممكن تسيبيه اوهميه بكده انتى نسيتى انك مراته يا صفاء بتتعاملى معاه على اساس انك امه بتسامحيه وبتهتمى بكل حاجة تخصه كأم مش كزوجة اسلوبك ده غلط ولازم يتغير انتى مراته مش امه
صفاء وهى بتمسح دموعها :هحاول ولو انى حسا انى معنديش حتى طاقة احاول بس هحاول لاننا مش هينفع نكمل كده مش هتحمل والله هطب ساكتة من القهرة
فاطمة وهى بطبطب عليها :بعد الشر عليكى يا حبيبتى وانا اللى كنت مفكرة انى مخنوقة ومشاكلى كبيرة ربنا يهون عليكى يا رب
صفاء :وعليكى يا فاطمة انا قاعدة فى البيت وحسا بالتعب مبالك بيكى وانتى بيت وولاد وكمان شغل ودكتورة وشغلك صعب ربنا يعينك
كريمة :ما خلاص يا اختى انتى وهيا كفاية نكد وكلو الكريم كراميل اللى عملته علشانكم
