اووووووسامة📢
كان مصر نكتب حكاية تانية سوا اصله حب الموضوع اووووى بعد حكاية "المفروض "😂
وقد كان وكتبت الحكاية
حكاية "كان فيه وخلص "مجهود مشترك بينى وبينه اتناقشنا فى الافكار والاحداث اللى فيها والاسماء بتاعت الابطال هو اللى مختارها كلها 👏👏
بس الحكاية انا اللى كتباها والاسم بتاعها انا اللى كتباه اه الواحد يقول اللى ليه واللى عليه😂😂😂
اسامة السبب ان الحكاية دى اتكتبت والسبب انى انزل حكاية النهاردة مع انى نزلت يوم الاتنين حكاية "اعز اصحاب "بس انا مقدرش اخلص حكاية ومنزلهاش ليكم تقروها وعلشان كمان اسامة يعرف رايكم فى افكاره وكده
اول مرة اكتب حكاية مش من خيالى لوحدى واتناقش مع حد فيها قبل ما اكتبها اتمنى الحكاية تعجبكم وتحبوها وتستفادو منها 😍
#حكايات_منار
حكاية " كان فيه وخلص "
سندس :ايوه يا حبيبى لا مش هينفع حكاية نتقابل بره دى ..ما احنا بنشوف بعض فى الدروس.. والله يا حبيبى ما هتنفع حكاية نتقابل دى طبعا بحبك ..
كريم بغضب :مين ده اللى بتحبيه يا هانم مين ده اللى مستغفلانا وبتكلميه انطقى
سندس بخوف :كريم انا..انا
كريم وهو بيضربها :انتى ايه انتى زبالة ومترتيبش انا هكسر عضمك مش هخلى فيكى حتة سليمة علشان تعرفى بعد كده تستغفلينا ازاى
سندس وهى بتعيط :يا كريم حرام عليك يا كريم ارحمنى بقى
امل وهى بتحوش عنها :انت بتضربها ليه
كريم وهو بيحاول ياخدها منها علشان يكمل ضرب فيها :الزبالة بتكلم واحد وبتقوله بحبك ورافضة تقابلو ليه ياختى متقابليه بالمرة ما انتى خلاص عيارك فلت
امل :وانت برضه تضربها ليه انت مش ارتبطت وحبيت وفضلت سنين بتكلمها من ورا بابا بس احنا كنا بنسمعك
بتزعقلها على غلط انت عملته قدامها يا قدوتنا يا اخونا الكبير
كريم :اضربها واكسر عضمها كمان
امل :وانا بقى اللى هقفلك يا كريم وهقول لبابا ان ابنه المحترم بيمد ايده على اخته الصغيرة
كريم :انا بربيها
امل :قصدك بتدمرها وبتكرهها فيك بص شوف خايفة منك وبتترعش ازاى امشى يا كريم قولتلك مش هسيبك تضربها
كريم بغضب :لو عرفت انك لسه بتكلمى الواطى ده هقطع رجلك سامعانى يا سندس وابقي شوفى هتشوفيه تانى ولا تكلميه ازاى
امل وهى بتحضنها وبطبطب عليها :اهدى يا حبيبتى خلاص خرج اهدى يا سندس وبطلى عياط
سندس :هيض..هيضربنى تانى يا امل ..كريم هيضربنى تانى
امل :لا يا حبيبتى متخافيش انا مستحيل اسيبه يضربك بس انا زعلانة منك يا سندس كده برضه تعملى حاجة زى دى انتى مش عارفة انه حرام
سندس :والله برفض اقابله وبشوفه فى الدروس بس وكلامنا فى الموبايل وعمرنا مكنا لوحدنا خالص
امل :كلامكم سوا حرام يا سندس مش عايزاكى تخافى من كريم ولا حتى بابا انا عايزاكى تخافى من ربنا تفتكرى ربنا راضى عن كلامك معاه ده
سندس :لا بس..بس انا بحبه
امل :حبيبتى انتى لسه ستاشر سنة صغيرة اوى على انك تحبي وتفهمى يعنى ايه حب صدقينى دى مجرد مشاعر مراهقة وهتكتشفى كده بنفسك لما تكبرى
سندس :انتى جربتى تحبي وانتى قدى
امل :جربت وعلشان كده بقولك انها مشاعر مراهقة مش اكتر
سندس :حبيتى واحد زميلك فى الدرس زيى
امل وهى بتضحك :لا حبيت المدرس بتاعى فضلت تلت سنين ثانوى بحبه مع نفسي
سندس :وبعدين حصل ايه قولتيله
امل :اقول لمين ده كان متجوز ومراته كانت حامل وانا فى تالتة ثانوى باين
سندس :امال عملتى ايه
امل :معملتش حاجة دخلت الكلية ومع الوقت مبقتش بفكر فيه اكتشفت انه زى ما بقولك كان مجرد حب مراهقة اهبل
سندس :بس انا حبى لزياد مش حب مراهقة اهبل
امل :انا كنت مفكرة كده برضه لما كنت بحب المدرس بتاعى ولما كبرت بنفسي اكتشفت انها مجرد مراهقة انتى كمان هتكتشفى كده بنفسك
كمان يا سندس سواء حب حقيقي او لا كلامك معاه حرام وبابا لو عرف هتفقدى ثقته فيكى ومش هيسيبك تتكلمى معاه طبعا وكمان مش هيثق فيكى تانى ابدا انتى عايزة تخسرى ثقة بابا فيكى يستاهل يعنى هو تغضبي ربنا علشانه وتفقدى ثقة بابا فيكى
سندس :لا طبعا بس..
امل قاطعتها :مبسش انتى لازم تقطعى علاقتك بيه يا سندس دى الحاجة الصح الوحيدة اللى ممكن تعمليها اى حاجة تانية هتعمليها هتبقي غلط انا بثق فيكى بلاش تخسرى ثقتى انا كمان
سندس :حاضر يا امل حاضر
