فجر :بابا معلش عيد اللى انت قولته تانى
عبدالله :مالك ابن عمك سليم الله يرحمه متقدملك وانا اديته معاد يجى كمان يومين
فجر :اديته ميعاد من غير ما تاخد رايى
عبدالله :مالك شاب كويس كمان هو انا بقولك وافقت تتخطبو ده انا بقولك اديته ميعاد يجى وتتكلمو فيه
فجر :وده هتكلم معاه فى ايه
عبدالله :فى كل اللى انتى عايزاه يا حبيبتى
فجر :بابا هو انت ليه شايف مالك شاب كويس
عبدالله :عمك سليم الله يرحمه كان صاحبى وعارف تربيته كويس مالك كمان سيرته حلوة بين الناس حبيبة قلبى لو جه وقعدتى معاه ومرتحتيش خلاص الموضوع هيبقى منتهى
فجر وهى بتبوس ايده :ربنا يباركلى فى عمرك يا حبيبى وميحرمنيش منك
بعد يومين
مالك :اخبارك ايه يا فجر
فجر :فجر عادى كده فجر وبس
مالك وهو بيضحك :لا فجر بالمكسرات ما طبيعى اقولك يا فجر يعنى انا اكبر منك واحنا متربين سوا
فجر :بقالنا سنين ملناش تعامل مع بعض
مالك :علشان كبرنا وبقي مينفعش
فجر :ويا ترى انت اتغيرت عن زمان
مالك :وهو انا كنت ايه زمان
فجر :يعنى لسه عنيد وصوتك من دماغك واللى مبيسمعش كلامك بتضربه ولو بنت بتجيبها من شعرها
مالك :ميبقاش قلبك اسود بقى كنت عيل يعنى ويا ستى حقك عليا علشان كنت بجيبك من شعرك
فجر :انا نسيت اصلا ومش فى دماغى انا بس بسال علشان اشوف اتغيرت ولا لا
مالك وهو بيضحك :لا واضح انك نسيتى ومش فى دماغك ده انتى ناقص تولعى فيا من كتر ما انتى مش طيقانى
وعموما اكيد اتغيرت لانى كبرت عدى سنين ومحدش بيفضل على حاله يا فجر انا اتغيرت وانتى كمان اتغيرتى
فجر :وانت اتغيرت فى ايه
مالك :مش عارف دى حاجة تكتشفيها انتى من تعاملك معايا زى ما انا مش هعرف انتى اتغيرتى في ايه غير من تعاملى معاكى اجابة اى حد فينا عن نفسه لا هتكون حيادية ولا موضوعية يا هنجمل نفسنا يا هنخسف بيها الارض نسيب المواقف والوقت يعرفونا على بعض احسن صح
فجر بابتسامة :معاك حق انت اتغيرت مالك اللى كنت اعرفه مكنش ممكن يقول الكلام ده
مالك :مالك اللى كنتى تعرفيه وبتتعاملى معاه كان عيل يا فجر انما اللى قدامك ده راجل
ها بقى اقتنعتى وهتدينا فرصة نتخطب ونعرف كل واحد فينا اتغير فى ايه
فجر :اكيد مش هاخد قرار بسرعة كده محتاجة وقت افكر فى كلامك واستخير كمان
مالك :خدى كل الوقت اللى انتى محتاجاه وانا مستنيكى
فجر :بقيت زوق ولسانك حلو
مالك بابتسامة :مقولنا محدش بيفضل على حاله بقى
فكرت فى كلامه واستخرت كمان محستش بفرحة وراحة بس محستش بخوف وانقباض وعلشان كده وافقت
واتخطبنا انا مش بس اتعرفت على مالك لما اتخطبنا انا اتعرفت على فجر جديدة عليا احنا مبنعرفش نفسنا غير لما نتحط فى مواقف ونشوف ردود افعالنا وممكن جدا نبقي زينا زى اللى حوالينا متفاجئين بردود الافعال دى
مالك كان بيتعامل معايا حلو طريقته كانت كويسة جدا معايا انا اللى مش فاهمة ليه كنت بعامله باسلوب بارد شوية مببينش فرحة جامدة بيه مببينش لهفة عليه مببينش زعل او ضيق لو عمل حاجة غلط او تضايق دايما ببينله انه مش فارقلى مع انه فارقلى مبعاملوش وحش بس فى نفس الوقت معاملتى ليه مطمنوش متخليهوش يعرف جوايا ايه تخليه دايما حاسس انه عادى بالنسبالى مع انه مش عادى بالنسبالى ولا حاجة
فضلنا على الحال ده ست شهور وقررت من بعدهم انى هعامله كويس او هحاول قررت انى مش هخبى عنه اللى جوايا هحاول اطلعهوله هو يستاهل جبت ازازة برفان ليه هدية انا عارفة انه بيحب البرفانات كنت عايزة اعمل حاجة حلوة تفرحه حاجة ابينله انه فارقلى لانه بجد فارقلى
جالنا البيت وخرجتله وقولت هبقى ادخل اجبله الهدية وانا داخلة اجبله حاجة يشربها هحطها على الصينية
