جودة :لا ما انا مش مكلف روحى وصارف نص مرتبى على الخروجة دى علشان تفضلى ساكتة وبتتأملى جمال خلق الله
زينة :مزاجى مش حلو والكلام اللى جوايا كئيب لو اتكلمت هنكد عليك
جودة :طيب ما تنكدى عليا مش احسن ما تبقى مضايقة لوحدك اهو اتكلمى معايا ويا ترتاحى بعدها يا نبقى مضايقين سوا بدل ما تبقى مضايقة لوحدك
زينة بابتسامة :انت اجدع ابن عم فى الدنيا
جودة :عارف ربنا يباركلكم فيا وميحرمكوش منى
زينة وهى بتضحك :اللهم امين
جودة :اديكى اخيرا ضحكتى اهو احكى بقى مالك يا زينة البنات
زينة :انا مضايقة يا جودة انا مضايقة اوى حاسة انى متلغبطة شاكة فى كل حاجة اعرفها عن نفسى
جودة :كل ده علشان خطوبتك اللى اتفسخت
زينة :وهى يعنى الخطوبة اتفسخت لوحدها ما هو اللى فسخها انت عارف هو فسخها ليه يا جودة
جودة :كل اللى اعرفه انكم مرتاحتوش سوا اظن ده سبب كافى الخطوبة تتفسخ علشانه
زينة :هو اللى مكنش مرتاح معايا عارف مكنش مرتاح معايا ليه
جودة :ليه
زينة :علشان بهزر كتير
جودة بصدمة :نعم
زينة :اه والله زى ما بقولك كده قالى انى بهزر كتير وواخدة الدنيا لعب ومش بتاعت مسئولية
جودة :انتى من بعد وفاة مرات عمى وانتى بقيتى مسئولة عن البيت وشغله وواخدة بالك من عمى ومن انس وفريدة وبتربيهم مع عمى يعنى بالنسبالهم انتى ام اكتر من كونك اخت كبيرة ده غير انك مقصرتيش فى دراستك ولا فى شغلك حاليا رغم مسئولية بيتكم اللى شايلاها
الواد ده بيتلكك وبيقول اى كلام على فكرة
زينة :لا هو فعلا شايفنى كده بنت خفيفة وبتهزر وعلى طول بتضحك وواخدة الدنيا لعب
جودة :وهو يعنى اللى بيخصب يورانيوم كمان قطع لسان اللى يقول عنك بنت خفيفة انتى لو خفيفة فده مش معناه ان عقلك خفيف لا معناه ان وجودك هو اللى خفيف فى حياة اللى حواليكى خفيفة على القلوب
زينة :هو مكنش شايف كده
جودة :وهو ده بيشوف اصلا ده اعمى البصر والبصيرة
هو علشان يحس انك انسانة مسئولة لازم تبقى مكشرة ونكدية فيكى ميتين الف حاجة يعرفوه انك بنت تقيلة ومسئولة ومفيش منك
زينة :مشافش الميتين الف حاجة دول مشافش غير عيوبى واختلافى عنه اعتبر اختلافى عنه عيب مع انى كنت بتعامل معاه ومع اختلافه عنى على انه حاجة طبيعية
جودة :انتى صح والمغفل ده بكرة يفهم غلطه لما يضيع عمره وهو بيدور على نسخة بالكربون منه وميلاقيش
زينة :هو محبنيش يا جودة محبنيش علشان كده مشافش مميزاتى ومتحملش عيوبى
جودة :وانتى...انتى حبتيه
زينة :لا
جودة :الحمد لله...قصدى يعنى انه الحمد لله انك محبتيهوش وهو مش بيحبك كده كان بعد الشر قلبك هيتكسر
زينة :الوجع مش وجع ان قلبى اتكسر الوجع وجع انى بقيت حاسة انى مستاهلش اتحب مفياش مميزات تتحب
جودة :انتى فيكى مميزات كتير تتحب انتى مميزات ماشية على رجلين اصلا واكبر ميزة فيكى هى ضحكك وهزارك وانك بتاخدى الامور ببساطة دمك الخفيف ده مخليكى خفيفة على قلوب اللى حواليكى واجدعها قلب هينخ ويقع فيكى على بوزه لانه مش هيكون شاف زيك قبل كده ولا هيلاقى زيك تانى بعد كده
زينة :مش كل اللى هيشوفنى هيحبنى بس من حقى ان اللى هيكون جوزى يحبنى يشوف مميزاتى من غير ما اشاورله عليها او افكره بيها ويتحمل عيوبى مش يعايرنى بيها فين المودة والرحمة اللى المفروض تكون بنا لما ابقى بسمع منه كلام زى الزفت وكل كلامه ليا انتقاد كأن مفياش حاجة واحدة حلوة حتى مميزاتى اللى انا بحبها بينتقدها وبيتكلم عنها كأنها عيوب فيكرهنى فيها وفى نفسى
جودة :انتى مطلبتيش منه يديكى فرصة تانية
زينة :فرصة تانية ليه علشان يشوفنى صح ويشوف مميزاتى ولا فرصة تانية علشان اغير نفسى يمكن اعجبه
الفرصة التانية دى هتبقى هدر وقت وطاقة على الفاضى لانى مش هغير جلدى هفضل زى ما انا مش عجباه فى داهية يروح يدور على اللى تعجبه بقى وميقرفنيش معاه
جودة :ولما انتى شايفة كده مضايقة ليه
زينة :علشان بسبب كل الكلام اللى قالهولى والسهولة اللى سابنى بيها بقيت شاكة فى نفسى شاكة فى مميزاتى يا ترى هى مميزات فعلا ولا هى عيوب زى ما هو كان شايفها
هو اللى حمار لانه محبنيش ولا انا اللى اساسا متحبش
جودة :لا طبعا هو اللى حمار ومغفل وواقع على دماغه وهو صغير كمان
ده مفكر انك علشان تكونى جد وقد المسئولية لازم تكونى كئيبة ورخمة وبتخافى تضحكى لوشك يشقق ولو ضحكتى وخدتى الدنيا ببساطة تبقى مش مسئولة ولعبية
بكرة يقع فى اللى تبقى كشرية ونكدية ويفكرها قد المسئولية ويكتشف انها بلح وانها مش هتتحمل المشاكل ولا المسئولية لا وكمان فوق كل ده هتنكد عليه وتقرفه فى عيشته الكئيب عدو الفرحة ده
عارفة ده مش عايم فى مية البطيخ بافكاره المتخلفة دى لا ده مية البطيخ بتجرى فى دمه كانو بيحطوله مية بطيخ يرضعها فى الببرونة وهو صغير لحد ما كبر وهو فى دمه كرات دم بيضا وحمرا ومية بطيخ
زينة وهى بتضحك :يا ابن الايه جبته منين الوصف الجامد ده
جودة بغرور مصطنع :عيب عليكى دى اقل حاجة عندى
طيب عايز اسألك سؤال
زينة :لا
جودة :لا مسألش طيب مش تسمعى السؤال
زينة :لا اجابة سؤالك مش انت هتسألنى هل ممكن اوافق انى ارجعله لو طلب نرجع انا اه حاليا شاكة فى حاجات كتير بس فى حاجة وحيدة متأكدة منها وهى ان انا وهو مننفعش بعض انا ووائل دونت ميكس وعلشان كده اجابة سؤالك هى لا
جودة :الله اكبر عليكى لا بجد الله اكبر عليكى انتى بتقرى افكارى ولا ايه
زينة بابتسامة :لا بقرء عيونك عيب عليك يا جادو ده احنا عشرة عمر بحاله
جودة بابتسامة :اهو انا مش مهون عليا اسم جدك الله يرحمه ده غير جادو اللى بتقوليها دى
زينة :بتحببك فى اسمك
جودة :بتحببنى فى الحياة...بصى ما يعدل المود الا الفود وكل مشكلة وليها اكلة قومى نروحلهم زمان الفيلم خلص ناخدهم ونروح ناكل
زينة وهى بتضحك :وانا اقول انا كنت مضايقة ليه اتارينى كنت جعانة
جودة وهو بيضحك :خلاص هاخد فيكى ثواب واكلك...مش ناوية تتغلبى على حكاية خوفك من السينما دى
زينة :انا مبخفش من السينما انا بخاف من الاماكن المقفولة الضلمة علشان كده مبحبش السينما ولا بيت الرعب فى الملاهى وبنام ونور اوضتى قايد
وبعدين مش انت دخلت اخواتنا سينما مخصوص علشان تعرف تستفرد بيا وتخلينى اتكلم معاك لانك عارف انى مش هدخلها
جودة :والله يا بنتى انا عامل الخروجة دى كلها علشانك علشان تخرجى وتتكلمى مش علشان اخواتى واخواتك يتفسحو ويغيرو جو ولا اى حاجة فى كل الحجج اللى قولتها دى
زينة بابتسامة :بجد عملت كده علشانى
جودة بابتسامة :وانا هعمل كده لاغلى منك يا زينة البنات احمد بيرن الفيلم خلص يلا نروحلهم
زينة :يلا
