ادم :انتى بتعملى ايه
دينا :مفيش جوعت وانا بذاكر فقمت اشوف حاجة اكولها
ادم :هتاكلى فراخ ومكرونة بشاميل الساعة اتناشر بالليل
دينا :لأ طبعا هعمل سلطة كمان جنبهم
ادم بتريقة :ودى بقي هتعمليها علشان الدايت
دينا :لا دايت ايه وانا بتاعت دايت برضه لا علشان انا بحبها على الاكل
مروان :دينا انتى هتاكلى
دينا :اه يا مروان
مروان :طب سخنيلي انا كمان هاكل معاكى
ادم :انت كمان هتتعشى مكرونة بشاميل وفراخ
مروان :اه عادى
ادم وهو بياخد تفاحة وبيخرج من المطبخ :لا انتو اكيد مجانين
دينا :اخوك هيتعشي بتفاحة ده انا بحلى بيها بعد الاكل
مروان :كنت عايز اخد رايك فى حاجة
دينا وهى بتقطع السلطة :حاجة ايه
مروان :عندنا بحث فى الكلية المفروض ان كل تلاتة يعملوه مع بعض بس انا واصحابى اربعة ومازن ومالك تؤام وميفترقوش عن بعض ومحمد مبيعرفش يتعامل مع ناس ميعرفهمش
دينا :وبالتالى المفروض انت اللى تشوف اتنين تانين يعملو معاك البحث
مروان :اه وانا مش عايز وبعدين اصلا هما هيفضلو يسألونى يعملو ايه ويطلبو اساعدهم وفى الاخر تقريبا انا اللى هعملهم البحث
دينا :يعنى هتعمل بحث ليهم وبحث ليك مع مجموعتك لا والله فى شرع مين ده
بص بقى متبقاش الكورة كورتك ويقولولك مش هتلعب معانا
مروان :مش فاهم يعنى ايه
دينا :يعنى متبقاش انت اللى هتخلصلهم البحث وهما يدبسوك فى انك تعمل بحث تانى مع ناس تانية
لو مش هتعرف تلعب معاهم يبقى بوظ اللعب
مروان :ابوظ اللعب
دينا :اه بوظ اللعب يعنى يتعبو ويخلصو بحثهم بقا كمجموعة ناجحة ومتماسكة من غيرك
او يتعبو ويقولو للدكتور انكم هتعملو انتو الاربعة
انما الاستقطاع ده حرام وهيحولك من غير ما تحس لعبده مشاوير الشلة بتاعتكم
مروان :يعنى ايه عبده مشاوير
دينا :يعنى مرمطون الشلة اللى بيعمل كل حاجة ومبيقولش لا
مروان :بس انا لما قولت لادم قالى انت تقدر تتعامل مع ناس جديدة ومحمد لا ومازن ومالك تؤام ودايما مع بعض وانت تقدر تخلص بحثك مع مجموعتك وتساعدهم فى بحثهم حاولت افهمه ان مش دى المشكلة المشكلة انى حاسس
دينا :حاسس انهم اتخلو عنك
مروان :بالظبط انا مش مستخسر اساعدهم والله انا بس مضايق انهم عايزين يسيبونى
دينا وهى بتاكل :مش علشان تقدر يبقي لازم تعمل
زى مقولتلك كلمة حاضر على كل حاجة هتحولك لعبده مشاوير وهتخليهم يجو عليك وميعملوش لزعلك اعتبار
على الاقل يكلمو الدكتور وانت معاهم وتحاولو تقنعو متبقاش اسهل حاجة يقولوها كده انت برا عنا وروح شوفلك اتنين اعمل معاهم البحث
لو حاولتو ومنفعش ببقي خلاص على الاقل عملو اللى عليهم وحاولو علشانك
وتبقي مساعدتك ليهم بحق انهم صحابك وان محمد ميقدرش يتعامل مع ناس ميعرفهاش ومازن ومالك مبيحبوش يبعدو عن بعض فتبقي انت قدرتهم
انما اللى هما عايزينه ده اسمه استقطاع انت فاهمنى
مروان وهو بياكل :فاهمك وخلاص انا مش هخليهم يستقطعونى انا مش عبده مشاوير الشلة ولو ملعبتش يبقى هبوظ اللعب متبقاش الكورة كورتى وملعبش معاهم بيها
دينا :ايوه هو ده عاش يا معلم
بص فى فرق بين انك تكون طيب وانك تكون ضعيف خليك طيب بس مش ضعيف لان اللى هيبقو مستعدين يستغلو ضعفك كتير اوى انا مش بتكلم عن صحابك انا بتكلم عموما مش كل الناس فى الدنيا كويسين فى ناس وحشة علشان كده حرص ولا تخون وثقتك الكاملة ميخدهاش الا اللى يستحقها بس
مروان :معاكى حق انا هقوم انام
دينا :وانا للاسف مضطرة ارجع اذاكر يلا هانت اهى كلها سنة ونص واخلص
مروان :مضايقة وانتى فاضلك سنة ونص وانا اللى فاضلى تلت سنين ونص اعمل ايه اولع فى نفسي بقى
دينا :يخربيت الحقد اللى جايبكم ورا يبنى وانا مولودة فى سنة تالتة ما كنت فى سنة اولى زيك فى يوم وتعبت وشقيت واتحملت لحد ما الحمد لله ربنا كرمنى وبقيت فى تالتة اهو
مروان وهو بيضحك :قصة كفاح ما شاء الله
دينا وهى بتضحك :طبعا يبنى انت مستقل ببنت عمك ولا ايه
مروان :وانا اقدر برضه يلا تصبحى على خير
دينا :وانت من اهل الخير
