لؤى :كل ده تأخير بقالى كتير ملطوع مستنيكى
شمس وهى بتركب العربية :على ما لبست كمان انا حرة مش عاجبك اركب عربيتك او حتى اطلب اوبر او تاكسى
لؤى :هو انتى لو مرمتيش دبش هيجرالك حاجة اطلعى طيب علشان منتأخرش على الشغل
شمس :ماشى صباح الخير
لؤى :صباح الورد يا ستى خدى افطرى
شمس :هو انت ليه بتجيب معاك سندويتشات وكأنك طالع رحلة ولا رايح المدرسة ما تفطر فى البيت ولا حتى فى الشغل
لؤى :انا بجيب معايا سندويتشات علشان نفطر سوا انا وانتى بابا الله يرحمه كان دايما بيقولى اللى بيحب حد بياكل معاه
شمس :تمام يبقى انا مش هاكل معاك
لؤى :وتضيعى على نفسك سندويتشات البطاطس المهروسة والجبنة البراميلى
شمس :هى الجبنة بالفلفل
لؤى :بالفلفل وحراقة جدا
شمس وهى بتاخد منه السندويتش :انا هاخده علشان جعانة وعلشان انت عارف انى بحب الجبنة البراميلى بالفلفل
لوى وهو بيضحك وبياكل :عارف اومال انا جايبها ليه
تعرفى بابا وماما مكنوش بياكلو غير مع بعض ولو مهما بابا اتاخر كانت بتستناه كانت ممكن تأكلنا احنا وتستناه هى علشان ياكلو سوا مش فاكر انى عمرى شوفت واحد فيهم بياكل من غير التانى بعد ما مات ماما فضلت شهور كتير بتاكل اللى يخليها تقف على رجليها بس ودلوقتى لما بقول على اكل انه حلو دايما بترد عليا وتقولى من بعد ابوك مفيش حاجة حلوة ولا حتى الاكل
شمس :ربنا يرحمه وحشك صح
لؤى :اوى معتقدش انى هيجى عليا يوم ويبطل يوحشنى هيفضل بيوحشنى لحد ما اروحله
شمس :بعد الشر عليك..ااا ..هات سندويتش بطاطس
لؤى بابتسامة :خدى لازم تغلوشى على اى كلمة كويسة تقوليها كده بس برضه فرحت
بعد شهر
لؤى :كل سنة وانتى طيبة
شمس :عيد ميلادى النهاردة
لؤى :لا بكرة بس علشان ابقى اول حد يقولك ويجبلك هدية ايه مش هتفتحيها
شمس بابتسامة :ده برفانى المفضل جبته ازاى
لؤى :معرفش اسمه طبعا ومرضيتش اسأل مامتك علشان انتى متعرفيش وروحت محلات كتير وفضلت اشم فى برفانات كتيييير لحد ما وصلتله اخيرا
شمس :تعبت
لؤى بابتسامة :تعبك راحة يا شمسى
شمس :متقوليش شمسى دى
لؤى :ليه
شمس :مببقاش مرتاحة لما بتقولها بتوتر
لؤى :علشان انا قاصدها وهى طالعة من قلبى انتى شمسى انتى الشمس اللى انا بدور فى فلكها زى ما الكواكب بتدور فى فلك الشمس وبتلف حواليها
شمس :يا لؤى ارجوك افهمنى انا لا عايزة اضايقك ولا اسمعك كلام انت مش عايز تسمعه بس اللى فى دماغك ده مش هينفع انا اكبر منك بسنتين ونص
لؤى :مش فى دماغى يا شمسى فى قلبى وليه مينفعش وايه يعنى اكبر منى بسنتين ونص ولا بعشر سنين حتى مش مهم المهم انى بحبك وعايزك ومش شايف غيرك
السن مش عائق بابا كان اكبر من ماما بعشرين سنة يعنى تقريبا يخلفها وعادى حبو بعض واتجوزو
شمس :زمانهم غير زمانا
لؤى :زمانا احلى واسهل امى جدتى مكنتش موافقة وجدى بس اللى كان موافق انما انا وانتى امى وامك موافقين ومعتقدش باباكى ممكن يرفض
شمس :بقالى عشر شهور مشوفتوش لا انا ولا امى مشغول بقى بمراته وولاده انا مش عايزة اتجوز يا لؤى فكرك انا ليه لحد دلوقتى متجوزتش ولا حتى اتخطبت لانى مش عايزة لا هكون زى امى ولا هتجوز واحد زى ابويا
لؤى :انا مش زيه يا شمس ومش ممكن اعمل فيكى اللى هو عمله فى مامتك
شمس :مش مصدقاك ومش ممكن اصدقك علشان خاطرى يا لؤى مش عايزة اتكلم فى الموضوع ده علشان فعلا بيضايقنى وبيوجعنى
