انا حبيبة عبدالله خريجة كلية تجارة بابا اتوفي وانا عندى ستاشر سنة بعدها عمي اللي اتولي امورنا انا واخواتي انا اكبر اخواتي وفي غيرى بنتين وولد بعد بابا باربع سنين عمى كمان اتوفي وانا كنت لسه بدرس واخويا الولد اصغر واحد فينا لسه في اعدادى وميقدرش يتحمل المسئولية الصراحة محتجناش نشيلها عبدالرحمن ابن عمى شال مسئوليتنا زى عمى واكتر كمان طول عمره اخويا الكبير ومقصرش معانا في حاجة
بس عبدالرحمن مكنش معتبر نفسه اخونا الكبير او بمعني اوضح مكنش معتبر نفسه اخويا الكبير هو اكبر منى بعشر سنين بعد ما اتخرجت من الكلية علي طول عبدالرحمن طلب ايدى انا اتصدمت لانى فعلا شايفاه اخويا الكبير بس ماما مسمعتليش وقالتلي ابن عمك شايلنا ومراعي مصالحنا احنا ملناش راجل غيره في الدنيا
حاولت اقنعها معرفتش ومع اصرارها وافقت
خصوصا انى مفيش في حياتى حد بحبه او حاجة
المشكلة انى فعلا شايفة عبدالرحمن اخويا الكبير
احساسي بيه متغيرش
تمن شهور مخطوبين ومحستش تجاهه اي حاجة غير انه اخويا
عمل حادثة والحمد لله ربنا نجاه انا كنت خايفة عليه
بس خايفة اخسر اخويا الكبير مش خايفة اخسر خطيبي
اللي المفروض كمان كام شهر هيبقى جوزى
انا شخصية رومانسية وكان نفسي اتجوز عن حب
مش متخيلة انى اتجوز انسان شايفاه وبتعامل معاه علي اساس انه اخويا الكبير
قريت مشكلة علي جروب عالفيسبوك صاحبة المشكلة كانت بتحكي عن مشكلتها وبتقول :
انا كنت بحب واحد معايا في الجامعة كان اكبر من بسنتين كنا بنحب بعض اول سنتين ليا في الجامعة وبعدين هو اتخرج وانا داخلة تالت سنة واتفق معايا انه هياخد سنة يجهز فيها نفسه علشان يقدر يتقدملي وانا في اخر سنة وقد كان فعلا كان بيشتغل بس هو ظروفه المادية كانت وحشة شوية يدوب كان بيشتغل علشان يجيب حق الشبكة وبعدين كان ناوى علي سنتين خطوبة يجيب فيهم الشقة انا بقي اتقدملي ابن خالي كان بيحبني وكنت عارفة انه بيحبني بس الصراحة عمرى محبيته بس هو كان ماديا احسن بكتير من الانسان اللي بحبه المهم انا بقي احترت بينهم وجات واحدة صاحبتي قالتلي انه الحب مبيفتحش بيوت وخدى اللي بيحبك مش اللي بتحبيه ترتاحى وانا اقتنعت ووافقت علي ابن خالي واللي كنت بحبه لما عرف سافر
جه يوم الخطوبة شافني وانا بتخطب لحد غيره وبعدها عرفت انه سافر من غير ميقولي حاجة حتي العتاب استخسره فيا معاه حق بصراحة انا اللي طلعت مستاهلش
المهم انا وابن خالي اتجوزنا وهو كان بيحبني اوى وبيعمل علشانى كتير بس انا مقدرتش احبه ومقدرتش انسا اللي كنت بحبه قبله وبقيت حسا ان هو السبب في فراقنا فكنت بتخانق معاه كتير كمان انا كنت حسا انى اتفضلت عليه لما اتجوزته وسبت اللي بحبه علشانه هو في الاول كان بيستحملني علشان بيحبني بس مع الوقت مبقاش قادر قسوتي في التعامل معاه وعدم اهتمامي بيه وتقديرى ليه ولحبه حول حبه الكبير ليا لكره اكبر وطلقني هو اللي سابني مستحملش يعيش معايا اكتر من كده وانا خسرت لا حافظت علي الانسان اللي بحبه ولا حافظت علي الانسان اللي بيحبني خسرت الاتنين وخسرت نفسي انا تعبت لدرجة انى دلوقتي بتعالج عند دكتورة نفسية انا عارفة اني مستاهلش بس بالله عليكم ادعولي ربنا يخفف عني ويرحمني لانى تعبت والله العظيم تعبت
