يحيى :الو
بسملة :الو مين معايا
يحيى :مين معاكى
بسملة :ايوه مين حضرتك
يحيى :مش عارفة صوتى انا مش عارف ابطل تفكير فيكى ودماغى مش مبطلة زن بسببك وانتى مش عارفة صوتى ومش فارقلك لدرجة انك بس مسحتى رقمى مفكرتيش تعمليلى بلوك انما انا ولا على بالك انا مش فى دماغك مع انك على طول فى دماغى ومش عارف اعمل ايه علشان اشيلك من دماغى قوليلى اعمل ايه علشان اشيلك من دماغى يا بسملة
بسملة :
يحيى :ساكتة ليك معندكيش رد ولا مكسوفة تقوليلى مش عايزاك
ما كان من الاول يا بنت الناس كان بلاها من الاول واهو كنت هفضل حر نفسى ودماغى على وضعها وبالى رايق
استفدتى ايه انتى كده وقعتى واحد جديد فيكى معقول تكونى بالحقارة دى
يا ريتنى ما جيت كلمتك وطلبت منك رقم والدك يا ريتنى ما شوفتك انا ندمان انى عرفتك
تانى يوم
بسملة :الو
يحيى :برضه معملتيش لرقمى بلوك
بسملة :انت متصل علشان تقولى اعمل لرقمك بلوك
يحيى :لا انا متصل علشان اقولك متزعليش من كلامى امبارح
بسملة :انت متقصدوش
يحيى :مش فكرة اقصده ولا لا الفكرة انى مكنش المفروض اقوله ولا كان المفروض اكلمك وخلاص انا مش هكلمك تانى
بسملة :عرفت هتشلنى من دماغك ازاى
يحيى :والله دى مشكلتى مش مشكلتك
بسملة :انت كلمتنى ليه كان ممكن تبعت رسالة
يحيى :اللى عملته فى مكالمة هصلحه برضه فى مكالمة وانا مش جبان علشان ابعتلك رسالة وخلاص واستخبى ورا تليفونى وانا ببعتها كمان انا مبخفش من المواجهة بعكس ناس
بسملة :انت متأكد انك متصل تصلح اللى عملته مش تزوده
يحيى :اه خلاص انا هقفل خلى بالك من نفسك وانا مالى انا تخلى بالك من نفسك ولا لا يووووه بقى قصدى سلام
بسملة بسرعة :استنى يا يحيى متقفلش انا عايزة اشوفك
يحيى :ايه
بسملة :عايزة اشوفك يا يحيى ارجوك انا محتاجة اتكلم معاك
يحيى :هو انا...
بسملة قاطعته :ارجوك يا يحيى توافق
يحيى :ماشى موافق
تانى يوم
فى مطعم
بسملة :المكان اللى بدءت منه الحكاية
يحيى :وانتى جاية تنهى الحكاية فيه مكفاكيش تنهيها فى الموبايل
بسملة :انا مش جاية علشان انهى الحكاية هنا
يحيى :اومال انتى جاية ليه
بسملة :انا جاية علشان اجاوب سؤالك اللى متوقعتش انك هتسألهولى عمرك
يحيى :سؤال ايه ده
بسملة :انا عملت اللى عملته ليه نهيت موضوعنا وهو لسه بيبدء ليه
يحيى :لا هو الحقيقة انتى نهتيه من قبل ما يبدء اصلا اوعى تكونى مفكرة انه هيبدء بكلامى معاكى الرجالة اللى بجد لما بتبدء موضوع بتبدأه مع اهلك يبقى اهلى واهلك على علم باللى بيحصل وموافقين كمان
وقتها الموضوع يبدء وقتها يبقى فى موضوع من اصله وقتها لما تهب منك وتيجى تنهى الموضوع يبقى من حقى امنعك يبقالك كبير ارجعله مش ابقى مش من حقى حتى اسأل لانى اساسا مليش عليكى حقوق
بسملة :انت مسألتش علشان كرامتك مسمحتلكش
يحيى :لا مش علشان كرامتى
بسملة :يبقى علشان انا مش فرقالك
يحيى :علشان مليش صفة اسأل بيها يا بسملة اسألك بصفتى مين
بسملة :بصفتك...بصفتك
يحيى :مليش صفة مليش حقوق عليكى عادى جدا تسيبينى فى اى لحظة ومن غير ما حتى تقولى اسباب عادى تسيبينى او تفركشى معايا مش انتو بتقولو عليها كده برضه فركشة
بسملة :احنا مين
يحيى :انتو اللى بتصاحبو مش لما بتسيبو بعض بتقولو فركشنا
بسملة :انا مبصاحبش يا يحيى واللى بنا مكنش صحوبية
يحيى :اومال كان ايه اللى بنا ده اسمه ايه احنا كنا بنعمل ايه
بسملة :احنا كنا بنتعرف على بعض علشان لو ارتاحنا وحسينا بتوافق نتخطب
يحيى :طيب وليه نتخطب بقى ما نتجوز على طول مادام ارتاحنا وفيه توافق
هنتخطب ليه
الناس بتتخطب علشان تعرف بعض يا بسملة بيتخطبو ولو حصل ارتياح وكان فيه توافق بيتجوزو
انتى فاهمة غلط
اللى فى دماغك ده يخلينى اخطب وانا بكلمك ومش من حقك تلومينى انتى ملكيش عندى حاجة يخليكى لما تنهى الموضوع ملقيش صفة اسألك بيها ليه ميخليش فيه كبير عندك او عندى نرجعله لو حصل مشكلة
يخلينا لما تحصل مشكلة منحاولش نحلها على ايه الفرهدة والتعب ما نسيب بعض اسهل
اللى انتى بتقوليه ده حرام وفى حالة بنات تانية قلة ادب وفى حالتك انتى هبل انتى مش فاهمة انتى لو كنتى وقعتى فى حد غيرى كان ممكن يعمل ايه فيكى او يشوفك ازاى
بسملة :ولما انت شايف ان ده حرام وقلة ادب وهبل وافقت ليه
يحيى :
بسملة :ايه كنت بتتسلى بتضيع وقتك
يحيى :انا مش عيل علشان اتسلى ببنات الناس انا عندى اخوات بنات واخاف عليهم وابويا مربانيش على ان بنات الناس لعبة انا كنت بادء الموضوع جد انتى اللى خلتيه ياخد شكل تانى
بسملة :والشكل التانى ده انت شايفه حرام وقلة ادب وهبل قبلت بيه ليه
يحيى :
بسملة :رد يا يحيى وافقت ليه مش شايف ان الرجالة اللى بجد مترضاش بده والبنات اللى تعمل كده يبقى ياما معندهاش دين ياما معندهاش ادب وفى حالتى تبقى معندهاش عقل
انت بقى يا راجل ياللى عندك دين وعندك اخلاق وادب وعندك عقل وافقت ليه
يحيى :
بسملة :ساكت ليه رد وافقت ليه
يحيى بانفعال :علشانك وافقت علشانك علشان مقدرتش اقولك لا خوفت اقولها واتقدم رسمى ترفضينى قولت نتكلم فترة تعرفينى فيها زى ما انتى عايزة وبعدها اعمل الصح اتقدملك ونتخطب ونتجوز علاقتنا حرام بس زينت لنفسى الحرام وقولت انا ناوى خير انا مش بلعب بيكى انا عايز اتجوزك عايزك فى حلال ربنا لو النهاردة حرام بكرة يبقى حلال
وربنا طبعا مباركش والموضوع مكملش يبارك ازاى فى حاجة حرام حتى لو نيتى خير نيتى الحلوة هتخلى الحرام حلال يعنى
مرفضتش لانى مقدرتش يا بسملة ارتاحتى لما سمعتى ردى
بسملة :انت شايفنى انسانة وحشة خلتك تعمل حاجة حرام
يحيى :ده اللى فهمتيه من كلامى لا يا بسملة انا مش شايفك وحشة انا شايفك حلوة انا شايفك احلى بنت فى الدنيا انا شايف فيكى شريكة حياتى قصدى كنت...كنت شايف فيكى شريكة حياتى وعلشان كده وافقت وغلطت وادينى بدفع تمن غلطى
بسملة :انا غلطة فى حياتك يا يحيى
يحيى :انتى ليه محسسانى انى اللى سيبتك وبعدت عنك انتى اللى نهيتى اللى بنا من قبل ما حتى يبقاله وصف ويبقى ليا مكانة فى حياتك
كمان من ساعة ما جيت وانا اللى بتكلم مع ان المفروض انى جيت علشان انتى عايزة تتكلمى وتجاوبى سؤالى ليه عملتى كده
بسملة :لنفس السبب اللى علشانه مخلتكش تتقدملى رسمى قبل ما اعرفك وتعرفنى بتعلم من غلطات وتجارب ناس تانية
فاكر يا يحيى انا قولتلك ايه لما وقفتنى علشان تطلب منى رقم والدى
يحيى :قولتيلى انك قبل ما اتقدم محتاجة تعرفى عنى شوية حاجات وانا كمان اعرف عنك حاجات علشان لو متفقناش الموضوع يخلص من غير ما تبقى خطوبة وتتحسب عليكى وعليا
بسملة :وقتها انا طلبت منك ده علشان كان ليا واحدة صاحبتى اتخطبت وخطيبها مش مناسب ليها خالص حاولت تفسخ الخطوبة واهلها مرضيوش علشان بالنسبالهم الخطوبة زى الجواز عند المسيحيين مفيهوش طلاق لا الخطوبة فيها فسخ ولا الجواز فيه طلاق قالتلى فى مرة وهى بتكلمنى عنه انها لو كانت بس اتكلمت معاه وعرفته قبل ما تتخطبله مكنتش هتوافق عليه
وقتها قررت اتعلم من غلطها موافقش اتخطب لحد غريب بالنسبالى ومعرفش عنه حاجة انت مش متخيل هى حياتها معاه تعيسة ازاى وكل شوية تحصل بينهم مشاكل وتروح عند اهلها اللى مش عارفين يحلو المشاكل دى وشكلها هترسى على طلاق او هتكمل فى حياة كلها مشاكل شايفة انهم سببها لانهم مرضيوش يسيبوها تفسخ الخطوبة خافو من كلام الناس وهى الناس مش هتتكلم وهى كل شوية رايحالهم غضبانة
مش كان فسخ الخطوبة ارحم
عارف ليه انا طلبت منك متحكيش لحد عنى وانا مش هحكى لحد عنك
يحيى :قولتيلى علشان محدش يأثر على قرار اى حد فينا
بسملة :عارف ليه قولتلك كده
اخويا خطب بنت صاحبة ماما
ماما شكرتله فيها واختى الكبيرة كمان اى اعتراض كان عنده عليها هما كانو بيقولو انه مش مهم وان بعد الجواز هتتغير وفضلو يكلموه عن مميزاتها وقد ايه هى مناسبة ليه
خطبها وبعد تلت شهور فسخ الخطوبة بطل يسمع كلام ماما واختى وندم انه سمع كلامهم ومصدقش احساسه ومقتنعش بكلام عقله
علشان كده طلبت منك متحكيش لحد يكرهك فيا او حتى يمدحلك فيا كنت عايزاك تشوفنى بنفسك بعيونك وبقلبك وبعقلك انت وانا كمان عملت كده ومحكتش لحد
يحيى :وقولتيلى اننا مش محتاجين نتجمل او نخبى اى حاجة عن نفسنا كل واحد فينا يتصرف على طبيعته احسن ومش من حق اى حد فينا يحكم على التانى لو مش مناسبين لبعض فده مش معناه ان حد فينا وحش او غلط كل الحكاية اننا مننفعش سوا والافضل كل واحد فينا يدور على المناسب ليه
علشان تجربة مر بيها حد تعرفيه وانتى اتعلمتى من تجربته
بسملة :اه واحدة جارتى هى وجوزها فى الخطوبة كانو بيطلعو الحلو اللى فيهم ويخبو الوحش لحد ما اتجوزو اتصدمو طبعا ببعض بعد الجواز ولولا ان عندهم عيال كان زمانهم مطلقين واساسا هو بيخونها وهى متحملة علشان العيال
يحيى :ويا ترى بقى سيبتينى ليه كنتى بتتعلمى من تجربة مين
بسملة :واحدة صاحبتى هى اللى افكارها شجعتنى على انى اتعرف عليك قبل ما تتقدملى رسمى هى كانت شايفة انها مش هتتخطب غير عن حب فكانت بتصاحب مش زيى بكلمك فى الموبايل بس لا هى كانت بتصاحب وبتخرج وكده يعنى
اتخطبت فعلا عن حب بس بعد الخطوبة بقى بيعاملها زى الزفت وفى مشكلة بينهم عايرها وقالها ده انا كنت ماشى معاكى بدل ما تحمدى ربنا انى اتنازلت وخطبتك وبرغم كل القرف اللى عمله فيها بعد الخطوبة واتفاقاته مع اهلها اللى محققش نصها هى مكملة معاه علشان بتحبه وعلشان اهلها لما بتشتكى بيقولولها مجايبك اشربى بقى
يحيى :خوفتى يجى يوم واعايرك
بسملة :اه وخوفت حبى ليك لو حبيتك يمنعنى ابعد عنك ويجبرنى اكمل معاك حتى لو مكنتش مناسب خوفت لو حصل بينا مشاكل اهلى يقولو مجايبك اشربى خوفت اهلك يرفضونى او يعاملونى وحش لما يعرفو انى كنت اعرفك قبل ما تتقدملى خوفت اهلى يتصدمو فيا لما يعرفو انى كنت بكلمك من وراهم
خوفت تكون استحليتها ومش ناوى تتقدم رسمى خوفت تكون شايفنى بنت مش كويسة لانك لما طلبت منى رقم والدى علشان تتقدملى طلبت منك نتكلم الاول علشان نعرف بعض
دى غلطات وقع فيها ناس اعرفهم خوفت اغلط زيهم وقولت اتعلم من تجاربهم
يحيى :تتعلمى من تجاربهم فمتخوضيش اى تجارب صح تخافى تغلطى فتروحى تعيشى فى صندوق بقى
مين اللى فهمك انك مش من حقك تغلطى ما تغلطى وتتعلمى من غلطك فى حاجات هتتعلميها من تجارب الناس وفى حاجات هتتعلميها من تجاربك غلطات هتعمليها بنفسك وهتصلحيها وهتتعلمى منها
مين قالك ان اللى حصل لغيرك لازم يحصلك مين قالك انى زى الناس التانية وهعمل فيكى اللى هما عملوه
انتى عارفة انى قبل ما اطلب منك رقم والدك فضلت تلت شهور كل ما اشوفك فى المطعم هنا اتبسط اليوم اللى بشوفك فيه بحسه يوم حلو ودايما بتحصلى فيه حاجات جميلة بتفائل لما بشوفك بقيت باجى اتغدى هنا فى البريك بتاع شغلى كل يوم علشان لما تيجى فى اى يوم بعد الجامعة انتى واصحابك اشوفك
ما صدقت اجمد قلبى يوم ما جيتى لوحدك من غيرهم وجيت اتكلمت معاكى وطلبت رقم والدك
ومع انك من وقتها بطلتى تيجى هنا علشان متشوفينيش وقولتى كفاية اننا بنتكلم فى الموبايل
الا انى فضلت باجى كل يوم وافتكرك لما كنت بشوفك هنا واتخيل اليوم اللى هنيجى فيه سوا ونقعد على ترابيزة واحدة مش انا على ترابيزة لوحدى وانتى على ترابيزة مع اصحابك
اتمنيت تجمعنا ترابيزة واحدة يجمعنا طريق واحد ونتشارك حياة واحدة
وعلشان كده قبلت بحاجة انا عارف ومتأكد انها حرام علشان خوفت تضيعى منى وبرضه ضيعتى منى ما اهو انا ابقى غبى لو فكرت انى هاخدك غصب عن ربنا مش هاخدك غير برضاه ولانى غضبته ضيعتى منى ما انتى مش هتبقى ليا غير برضاه ولو عملت ايه ولو اتشقلبت كده وهو مش كاتب انك تبقى ليا يبقى مش هتبقى ليا
انا غلطت وادينى دفعت تمن غلطى
بسملة :ودفعت تمن غلطك ايه
يحيى :ربنا عالم بقى دى حاجة بينى وبين ربى
بسملة :انت عمرك ما عبرتلى عن مشاعرك عمرك ما حسستنى انى مهمة عندك حتى لما قولتلك مش هينفع نفضل بنتكلم قولتلى زى ما تحبى كأنى مش فارقالك
يحيى :مرضيتش اعبر عن مشاعرى علشان مبقاش بحاول أاثر عليكى كمان صعب اتعامل معاكى بمشاعرى وانتى بتتعاملى معايا بعقلك وبتشوفى اذا كان ينفع اتقدملك ونتخطب ولا لا
والاهم انى محستش ان ده من حقى ولما قولتيلى مش هنتكلم تانى محستش انى من حقى اقولك لا او اقولك ليه
اكتشفت انى مش بس عملت حاجة حرام تغضب ربنا لا كمان حطيت نفسى فى وضع مليش عليكى فيه اى حقوق
بسملة :وكلمتنى تانى ليه
يحيى :قولتلك حاجة بينى وبين ربى
بسملة :انا عايزة اعرف
يحيى :لما جيتى قولتيلى مش هينفع نتكلم تانى بعد ما كان بقالنا شهرين بنتكلم قولت عادى شهرين بنتكلم وقبلها تلت شهور مركز معاكى من بعيد مش فترة طويلة تتنسى بس معرفتش انسى اسبوعين عدو اهم وانا مببطلش تفكير فيكى وعايزك تطلعى من دماغى ومش عارف اطلعك وفى لحظة غضب وضعف كلمتك ولقيت انك مش فاكرة صوتى انا مش فاكر غيرك وانتى مش فاكرة صوتى
بسملة :كنت فكراه واصلا ممسحتش رقمك ولا عملتلك بلوك معرفتش مقدرتش اعمل كده
مع انى قولت زيك شهرين يتنسو اومال الناس اللى بيبقى بينهم سنين يعملو ايه
كل يوم كنت بمنع نفسى اكلمك لانى مش عارفة اقولك ايه ومستنياك تكلمنى ومش عارفة هتكلمنى ليه ولا عارفة هرد عليك بايه
لما كلمتنى اول امبارح مع انك كان صوتك مضايق وغضبان منى الا انى كنت مبسوطة وانا سامعاه
يحيى :مبسوطة وانتى سامعاه ولا مبسوطة انى لسه بفكر فيكى
بسملة :الاتنين وكنت هكلمك انا امبارح بس مكنتش عارفة اكلمك اقولك ايه اجاوب سؤالك ليه عملت كده اعتذرلك وخلاص بس انت كلمتنى ولقتنى من غير ما احس بطلب منك اقابلك كنت خايفة ترفض بس انت وافقت انت وافقت علشان انا اترجيتك توافق
يحيى :وافقت علشان اعرف عايزانى فى ايه وعلشان برغم كل حاجة مقدرتش اضيع فرصة انى اشوفك ولو لمرة اخيرة
بسملة :هو لازم تكون الاخيرة
يحيى :مش هنبقى اصحاب اكيد وانا مش هغضب ربنا تانى
بسملة :احنا مكناش حتى بنخرج سوا انت معرضتش وانا مكنتش هوافق كنا بنغضب ربنا فى ايه
يحيى :كلامنا كان حرام حتى لو فى حدود حتى لو مفيهوش مشاعر حتى لو مبنخرجش افهمى بقى اللى حصل ده مينفعش ولو مع حد غيرى انتى كان ممكن تبقى فى مصيبة وعلشان انتى غلطتى ومش بس علشان كل اللى قولتيه ونهيتى الموضوع علشانه زودى فوق كل ده الاهم ان ده حرام
حرام مكنش ينفع نكمل فيه ولا ينفع نعيده من تانى
بسملة :انا مش عايزة اكمل فى حاجة حرام ولا عايزة نعيده من تانى
يحيى :اومال انتى عايزة ايه
بسملة :انا مش عايزاك تشلنى من دماغك يا يحيى
يحيى :يعنى ايه
بسملة :يعنى انت لسه عايز رقم بابا
يحيى :فى الحالة دى انا مضطر اشيلك من دماغى
بسملة :ليه بس انا والله اسفة على كل حاجة وحشة حسيتها بسببى واتعلمت من غلطى وهتعلم اكتر واكتر معاك وعلى ايدك ادينى فرصة تانية ادى لحكايتنا فرصة كمان
يحيى بابتسامة :مضطر اشيلك من دماغى واحطك فى قلبى
بسملة وهى بتضحك :وقعت قلبى حرام عليك بس تصدق حلوة كريتيف منك دى
يحيى وهو بيضحك :هاتى رقم والدك بسرعة علشان مش عارف اتنفس
واتخطبنا واتجوزنا ويحيى مبقاش بيقولى غير يا بوسى ده اسم الدلع بتاعى اهلى واصحابى مبيندهونيش غير بيه ويحيى كان نفسه يندهلى بيه هو كمان بس قالى انه معملش كده لانه كان حاسس ان ده مش من حقه زى حاجات كتير اوى مكنش بيعملها او بيقولها لانه مكنش حاسس انها من حقه بس خلاص بقت من حقه بقى من حقه كل حاجة
كان زمانى حصلتلى مصايب كتير لو كنت وقعت فى حد غير يحيى بس ربنا ستر وموقعتش فى حد يستغل قلة معرفتى بدينى وهبلى وافكارى الغلط
من كلامى مع يحيى ولما قريت فى الدين وشوفت فيديوهات لقيت انى كلامى مع يحيى كان حرام حتى لو كلامنا بحدود وحتى لو مبخرجش معاه وحتى لو بطلت اروح المطعم اللى هو شافنى فيه علشان مشوفوش لانى متعودتش اقابل حد من ورا اهلى كان اولى بيا اعرف وافهم انى لا ينفع اقابل حد من وراهم ولا حتى اكلم حد من وراهم
عرفت كمان انى كنت فتنة ليحيى يمكن علشان كده اتعاقب ببعدى عنه بعدى اللى هو مكنش عارف يتحمله ومكنش عارف هيعمل ايه فى مشاعره واحلامه اللى مكنش حتى قالى عنهم لانه استحرم كان مفكر انه كده بيعمل ذنب صغير انه بس بيتكلم معايا ميعرفش ان الذنب الصغير بيجيب ذنب كبير بعد كده
وانه مكنش ينفع يوافق ولا حتى علشانى لانه فى الاول وفى الاخر مش هياخدنى غير لو ربنا كاتبله انه ياخدنى مش هياخدنى غير برضا ربنا مهما عمل لو ربنا مش كاتب انى اكون نصيبه يبقى عمرى ما هكون نصيبه
ولو معملش اى حاجة بس ربنا كاتب انى اكون نصيبه يبقى هكون نصيبه
فى الحياة مش هتاخدو غير اللى ربنا كاتبلكم انكم تاخدو مهما عملتهم ومش هيحصلكم غير اللى ربنا رايد انه يحصلكم مهما حاولتم
فعيشو حياتكم بتحاولو تعملو الصح اللى يرضى ربنا علشان متخسروش اخرتكم وتكسبو دنيتكم او حتى تخسرو الاتنين
خليكم فاكرين احلامكم مش هتبقى حقيقة غير لو ربنا كاتب انها تتحقق مش هتتحقق غير برضا ربنا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يزره زائر ولم يذكره ذاكر
