شيماء :انتى بتعملى ايه
سيرين :بركب التوكتوك هو انتى حاجزة لناس انزل يعنى
شيماء :لا انا لوحدى
سيرين :يبقى خلاص اطلع لو سمحت على المدرسة الثانوى
بعد عشر دقايق
شيماء :انتى بتعملى ايه
سيرين :يا بنتى هو انتى متعرفيش غير السؤال ده هكون بعمل ايه بدفع فلوس التوكتوك
شيماء :ايوه دفعتى النص ليه
سيرين :احنا اتنين وركبناه سوا طبيعى ادفع النص
لو كنا تلاتة كنت دفعت التلت انما احنا اتنين
شيماء بحزن :مش هينفع نبقى تلاتة بوزنى ده مش هيبقالها مكان
سيرين :كده احسن انا مبحبش الزحمة
شيماء :ايه
سيرين وهى بتمدلها ايديها :سيرين
شيماء باستغراب :نعم
سيرين :اسمى سيرين مش هتحطى ايدك فى ايدى شكلى بقى وحش وانا مدا ايدى على الفاضى كده
يا بنتى سلمى ده السلام لله يعنى
شيماء وهى بتحط ايديها فى ايد سيرين :وانا شيماء
سيرين بابتسامة :تشرفنا يا شيماء انتى فى سنة كام
شيماء :تالتة ثانوى
سيرين :يا محاسن الصدف وانا كمان
شيماء :انتى معانا فى تالتة ازاى انا معرفكيش
سيرين :لا دى حكاية طويلة ابقى احكيهالك بعدين الطابور خلص وللاسف هنطلع فصولنا انتى علمى صح
شيماء :اه انا علمى علوم
سيرين :وانا ادبى باين عليا الادب صح...المفروض انى بهزر والمفروض تضحكى لو من باب المجاملة حتى لو دمى تقيل
شيماء :لا والله بالعكس انتى دمك خفيف جدا انا بس اللى مش متعودة
سيرين :مش متعودة ان حد يهزر معاكى
شيماء :مش متعودة ان حد يتكلم معايا اصلا
سيرين :ليه يعنى...انا ده فصلى بكرة اشوفك ونكمل كلام ماشى
شيماء :ان شاء الله
تانى يوم
سيرين :بقالى كتير مستنياكى دى مواعيد دى
شيماء :مكنتش اعرف انك هتستنينى
سيرين :مش انا امبارح قولتلك نتقابل بكرة علشان نكمل كلامنا
شيماء :اه بس انا فكرتك بتقولى كده وخلاص
سيرين :انا مبقولش كلام وخلاص مادام قولت حاجة يبقى انا قصداها الانسان بيتربط من لسانه يا شيماء
شيماء :معاكى حق اسفة علشان استنتينى كتير
سيرين :ولا يهمك كده الحمد لله هيفوتنا الطابور تعالى نشوف توكتوك نركبه طيب
شيماء :انتى مبتحبيش الطابور
سيرين :انا مبحبش المدرسة بالطابور بالفصول بالتخت اللى فى الفصول
هانت كلها اسبوع ولا اتنين ونقعد فى البيت تالتة ثانوى مبتحضرش غير فى الاول بس وبعد كده بينفضو السنة اللى فاتت بلا فخر انا كنت من اوائل الناس اللى نفضو وبطلو يحضرو
شيماء :انتى كنتى فى تالتة ثانوى السنة اللى فاتت
سيرين :اه
شيماء :بتعيدى السنة
سيرين :مدخلتش الامتحانات من اصله
شيماء :ليه خوفتى
سيرين :لا لست انا هذا الشخص
شيماء :اومال مدخلتيش الامتحانات ليه
سيرين :عملت حادثة قبل الامتحانات باسبوع واحد وفضلت بقى فى المستشفى اعمل عمليات ويركبولى شرايح ومسامير وجبس وليلة كبيرة فضلت تلت اربع شهور مبخرجش من البيت وعلشان كده ملحقتش حتى امتحانات الدور التانى
شيماء :انا اسفة
سيرين :بتتاسفى ليه هو انتى سواق العربية اللى خبطنى وانا بعدى الشارع كمان انا بقيت كويسة دلوقتى حتى جلسات العلاج الطبيعى خلصتها ومبقتش محتاجاها بقيت زى الحصان يعنى
شيماء :الحمد لله...برضه دفعتى نص الفلوس
سيرين :وانا كل يوم هقولك اننا اتنين وطبيعى ادفع النص
شيماء :انا اتخن منك وطبيعى ادفع التلتين وانتى التلت
سيرين :ليه داخلة باسمين فى الجمعية
انا وانتى اتنين طبيعى ادفع النص
الحمد لله الطابور خلص وفاتنا يلا علشان نطلع معاهم واشوفك بكرة متتأخريش عليا
شيماء :ها
سيرين :هو ايه اللى ها متنحليش بكرة متتأخريش عليا هو انا مبحبش الطابور بس برضه انا بكره الانتظار مبحبش استنى
شيماء :خلاص مش هتأخر عليكى بكرة باذن الله
سيرين :ولا ليه بكرة احنا نتقابل فى الفسحة هستناكى هنا قدام فصلى وننزل الحوش سوا
شيماء :ماشى
فى الفسحة
سيرين :بصى يا ستى انا بنت وحيدة على تلت ولاد الحمد لله هما دخلو جيش وانا لا
سيد وسعد وسليم وبابا وماما علشان يكملو امبراطورية السين دى سمونى سيرين كان ممكن يسمونى سمية ولا سارة ولا حتى سمر بس لا امى شعشعت فى دماغها تسمينى سيرين الاسم لبنانى باين او تركى كان عندها امل اخد شكلهم بس للاسف خدت الاسم بس
شيماء :لا انا عندى اخين اكبر منى محمد واحمد واختين اصغر منى ملك ومريم انا اللى فى النص
سيرين :لا انا اخر العنقود مسك الختام فى بيتنا
