سمر :قولى صحيح يا يوسف هو انت اتجوزتنى ليه
يوسف وهو بيضحك :بيقولو لو عايز تبطل تحب بنت اتجوزها
سمر بابتسامة صفرا :انت كده حققت الكوميديا يعنى
ما تجاوب سؤالى من غير روشنة
يوسف :طيب انتى بتسألى ليه شايفة انك مفكيش ميزة اتجوزك علشانها وعلشان كده بتسألينى يعنى
سمر :لا مسمحلكش انا كلى مميزات انا عيبى الوحيد انى مفياش عيوب اصلا
يوسف وهو بيضحك :يا سمر عيب عليكى ده اللى ربى خير من اللى اشترى وانتى متربية قدام عينى
يعنى انا عارفك اكتر من نفسك بمميزاتك بعيوبك بسلطاتك ببابا غنوجك
سمر وهى بتضحك :مش شطارة منك انا اللى مبعرفش اكون غامضة مبعرفش اعمل فيها كاريزما وخصوصا معاك تقولش مهكرنى
يوسف بابتسامة :لا وانتى الصادقة بحبك
من يوم يومى وانا بحبك
سمر :واتجوزتنى علشان بتحبنى
يوسف :لا اتجوزتك علشان اعيش معاكى وعلشانك
علشان كل ما بفكر فى مستقبلى بلاقيكى معايا فيه
علشان انتى استثناء كل قواعدى
سمر :لا معلش وضح علشان حاسة انى هحب كلامك وهفرح بيه يعنى ايه انا استثناء كل قواعدك
يوسف :يعنى كل القواعد اللى انا حاططها لنفسى كل الطباع اللى اعرفها عن روحى
بتتبدل معاكى بتتغير علشانك
يعنى مثلا لما كانت الظروف بتخليكى تيجى عندنا لوحدك وطبعا مينفعش ترجعى لوحدك وانا دايما بكون اول حد يعرض انه يوصلك فى اخواتى وان حد قال هروح انا اقول لا انا اصلى كده كده نازل رايح مشوار
وقتها كل مرة كنا بنتمشى ولا مرة ركبتك توكتوك مثلا وتلاقيكى فكرتينى بخيل
سمر :اعذر ذكائى المحدود بس انا موصليش الهدف من اللى حكيته انت كده كسرت قواعدك فى ايه
يوسف :انا مبحبش المشى فى العادى
بس حبيته معاكى علشان بعرف اتكلم معاكى واسمعك علشان بيخلى الوقت اللى بقضيه معاكى يطول
انا كمان شخص مبيفتكرش اوى كلام اللى حواليه بس انا بفتكر كل كلامك
سمر :كل كلامى
يوسف :كل كلامك حتى ايفيهات الافلام اللى بتقوليها لما بتصادف واشوف الفيلم اللى هى فيه بفتكرك وانتى بتقولى الايفيه وابتسم زى الأهبل
وده مش انا
انا لا بفتكر كل كلام حد ولا ببتسم زى الأهبل لما افتكر كلام حد
ده مش انا فى العادى ده انا معاكى انتى بس
انا كمان مش شخص بيحب التجمعات اوى بس اى تجمع بشك مجرد شك انك هتكونى فيه بروحه ومقدرش افوته مينفعش افوت ولو مجرد احتمال لفرصة انى اشوفك
سمر :بس فى التجمعات دى احنا كلامنا بيبقى قليل اوى يكاد يكون معدوم
يوسف :مكنش مهم عندى اتكلم معاكى كفاية انى اشوفك
وطبعا مش محتاج اقولك انى مش شخص عامل كده فى العادى وعمرى ما تخيلت انى ابقى عامل كده فى حياتى
بس بقيت بسببك وعلشانك بقيت
سمر :انت بتقول كلام كبير وكتير ورومانسى جدا حاسة انى هولد ولادة مبكرة من كتر ما انا متفاجئة بكلامك انا بحاول استوعبه من كتر ما انا حاسة انه كتير عليا
يوسف :انتى مفيش حاجة فى الدنيا تكتر عليكى لا كلامى كتير عليكى ولا انا نفسى كتير عليكى
اكمل طيب ولا تعبتى ونرجع
سمر :لا متعبتش الدكتورة وصتنى امشى كتير علشان الولادة تبقى اسهل
بس تكمل هو انت لسه مخلصتش
يوسف :مخلصتش ولا قربت اخلص حتى
سمر :يبقى كمل
يوسف :فاكر مرة واحد صاحبى كان بيحكيلى عن بنت بيحبها كان بيقولى انه مبيحسش انه بيضحك غير لما بيشوفها بتضحك ضحكته بتترسم على وشها هى مش على وشه
سمر :كلامه اثر فيك
يوسف :لا بالعكس هريته سف وقتها
بس الدنيا دوارة عدت الايام وبقيت مكانه
سمر :بتشوف ضحكتك بتترسم على وشى بتحس انك بتضحك لما انا بضحك
يوسف :عديت المرحلة دى بشوف قلبى قدامى لما بشوفك
ضحكتك ضحكتى ووجعك وجعى
كأنى باصص فى مرايا وانتى قدامى بشوفنى لما بشوفك
سمر :ولما اموت اوفر دوز مشاعر من كتر كلامك الحلو هترتاح يعنى
يوسف وهو بيضحك :بعد الشر عليكى وعليا
سمر :عليك
يوسف :ايوه طبعا انتى مفكراه هيبقى شر ليكى لوحدك ولا ايه
سمر :علشان ولادنا اللى فى بطنى
يوسف :لا مش علشانهم انا كده من قبلهم علشانك انتى انا مقدرش ولا عايز اعيش من غيرك انا بحب الدنيا لانك فيها
طيب نغير الكلام عن مشاعرى ونتكلم عنك
انتى وافقتى عليا ليه علشان حبيتك علشان اختارتك
سمر :لا علشان بصدقك بصدق كلامك لو قولتلى ان الفستان اللى انا لابساه ده مش ازرق ولونه اصفر هصدقك واشوفله طرحة اوف وايت البسها عليه
فى حاجتين اكتشفتهم عن نفسى خلونى اوافق عليك
يوسف :حاجتين ايه دول
سمر :اولا انى مبصدقش حد بسهولة خالص وان اللى بصدقهم ناس قليلة اوى
ثانيا انك من الناس القليلة دى انا بصدقك
يوسف :بتصدقينى فى كلامى عن نفسى يعنى
سمر :فى كلامك عن نفسك او عنى او عن اى حد
انا بصدق اى حاجة انت بتقولها
يوسف :ليه يعنى ايه سبب ده
سمر :انك حريص فى كلامك انك متكدبش فى حرف واحد مهما كان بسيط
يعنى مثلا لو قولتلى انك فطرت فول وطعمية وبعدين افتكرت انك فطرت فول بس انت بتقولى لا انا اتلغبطت ده انا فطرت فول بس
انت مبتكدبش فى الحاجات الصغيرة العادية اللى ممكن تبان تافهة ومتستاهلش توضيح او تصحيح وبالتالى مبتكدبش فى الحاجات الكبيرة اللى ممكن الكدب فيها ينجى او على الاقل يجنبك وجع دماغ
يوسف :انتى شايفة ان اللى يكدب فى الحاجات الصغيرة يكدب فى الحاجات الكبيرة
سمر :ايوه طبعا
يوسف :يعنى انتى وافقتى تتجوزينى علشان بتصدقينى
سمر :مش بس علشان كده علشان انت فيك حاجات كتير من اللى كنت اتمناها فى شريك حياتى
انت بتصلى بتعامل اهلك كويس وبار بيهم عندك اخلاق انسان مسئول وشكلك مقبول جدا جدا جدا بالنسبالى
هو اينعم انت اطول منى وبحس وانا ماشية جمبك كأنى أربعة سنتى وقعو بالغلط منك بس هنعمل ايه انا اللى قصيرة خلقة ربنا هنعترض
وحتى عيوبك انا اعرف اغلبها ولما فكرت لقتنى ممكن جدا اتعايش معاها واتحملها ودى بالنسبالى كانت ميزة كبيرة عن انى اقبل بحد معرفوش يا عالم هعرف اتعايش مع عيوبه واتحملها ولا لا
والاهم من كل ده انك اختارتنى
وانا كان فارقالى اوى حتة انى اتجوز حد مختارنى دى
يوسف :انا مختارتكيش قلبى اللى حبك انتى اختيار ربنا ليا
سمر بابتسامة :انت امتى حبتنى
يوسف :مش عارف امتى حبيتك يمكن من خمس سنين ويمكن من عشرة ويمكن من يوم ما اتولدتى
مقدرش اقولك حبيتك امتى لانى معرفش بس ممكن اقولك امتى اكتشفت انى بحبك امتى فهمت ان كل تصرفاتى معاكى ومشاعرى تجاهك حب
انتى عارفة ان انا وزياد ابن عمى اصحاب جدا من صغرنا
زياد فى يوم كان بيحكيلى عن بنت هو بيحبها وقالى انى اعرفها وانها من العيلة وفضل يتكلم عن قد ايه هى جميلة ومرحة ومفيش فى اخلاقها وكل ما هو يتكلم اقول لنفسى اكيد بيتكلم عنك يعنى بيحبك لقتنى مخنوق مش عارف اتنفس وحاسس انى عايز امسك زياد ارزعه علقة او اعمله عاهة مستديمة فى وشه بس الحمد لله قبل ما اتهور واعمل اى حاجة من كل ده ضغطت عليه يقولى مين هى لحد ما قالى سارة بنت عمنا
النار اللى جوايا انطفت لما عرفت ان كلامه مش عنك
ونصحته يستنى كام شهر لحد ما نتخرج ويشتغل وبعدها يروح يتقدملها انما دلوقتى لو عمل كده هيتقاله لا او انه لسه بدرى على الاقل لما يتخرج ويشتغل
بعد ما خلصت كلامى معاه فكرت هو انا ليه اتضايقت من فكرة ان يكون كلامه عليكى
سمر :وليه خدت كلامه على انه ليا مع انه قالك ان البنت اللى بيحبها انت تعرفها وهى من العيلة وهو ابن عمك يعنى اكيد بيتكلم عن عيلة باباك وانا بنت خالتك يعنى من عيلة مامتك فاكيد كلامه مش عنى
يوسف :وهو بيتكلم عن البنت اللى بيحبها وبيشكر فيها مكنش بيجى فى دماغى غيرك كأن مفيش بنت غيرك تستاهل تتمدح ويتقال عنها كلام حلو
ونسيت انك من عيلة امى مش ابويا ونسيت ان زياد ميعرفكيش ولا ليه تعامل قد كده معاكى لدرجة انه يحبك ويعرف يوصفك بالشكل اللى كان بيوصف بيه البنت اللى بيحبها اللى هى سارة
بالعقل هى اكيد مش انتى بس ما انا مكنتش بفكر بعقلى اكتشفت انى بفكر بقلبى فطبعا تفكيرى كان مش منطقى
اكتشفت انى شايفك احلى واحسن بنت فى الدنيا وانى هيجرالى حاجة لو لقيت ان فى حد غيرى شايفك كده
اكتشفت انى بحبك وان مش زياد بس اللى هيستنى يتخرج ويشتغل علشان يتقدم للبنت اللى بيحبها
سمر :انت خدت الموضوع جد اوى على طول كده تتقدم
يوسف :ايوه طبعا انا راجل والراجل طبيعى دى تكون البداية لما يلاقي بنت يحبها
سمر :يتقدملها
يوسف :يتجوزها
يخليها بتاعته شرعا وقانونا يحبها برضا ربنا ورضا اهلها
سمر :وافرض كنت رفضت
يوسف :كنت هتقدم تانى
سمر :وافرض اصريت على رفضى وقولت مش شايفاك اكتر من ابن خالتى وانك زى اخويا
يوسف :مش عارف كان ممكن اعمل ايه وقتها مفكرتش فى الاحتمال ده
مفكرتش اصلا انا بحبك واللى بيحب مبيفكرش
قلبه بيخليه متشعبط فى احبال الامل ويمنع عقله انه يفكر ان حبال الامل دى ممكن تكون دايبة ومفيش منها رجا او انها احبال وهم هتتلف حوالين رقبته وتخنقه
سمر :ولما اللى بيحب مبيفكرش اومال بيعمل ايه
يوسف :بيفرح انا كنت حاسس انى فرحان اوى لما اكتشفت انى بحبك افتكر ذكرياتنا سوا وافرح اشوفك واتكلم معاكى وافرح احلم بمستقبل انتى شريكتى فيه وافرح
اللى بيحب بيحلم وبيدعى ربنا يفرحه بتحقيق حلمه
يمكن علشان كده لما بيترفض حبه بتتحول كل احلامه الوردية دى لكابوس
كابوس بيعيشه كل يوم ومش عارف يصحى منه
بيتصدم صدمة عمره ويمكن يحس ان حياته وقفت او خلاص انتهت لانه قلبه مبيخليهوش يفكر فى احتمال الرفض ده قلبه بيمنعه يحسبها بالعقل والمنطق ويحط احتمال ان كل الاحلام دى ممكن متتحققش وتفضل مجرد احلام مش اكتر
سمر :بيتهيألى حتى لو حط احتمال انه يترفض هو وحبه وتفضل احلامه مجرد احلام مش اكتر او حتى تتحول لكابوس مش عارف يصحى منه
لو فكر ان كل ده ممكن يحصل ده مش هيقلل من صدمته او وجع قلبه وتعب روحه لما يحصل
انك تفكر فى احتمال حاجة وانه يحصل وتعيشه حاجة تانية
التفكير عمره ما هيقلل من وجعك
يوسف :يمكن معاكى حق
وعموما الحمد لله انا احلامى مبقتش كابوس واتحولت لواقع عايشه بكل تفاصيله
سمر :حاجة اتفاجأت بيها بعد جوازنا هى انك بتتكلم معايا كتير
الفكرة اللى كنت مكوناها عنك هى انك شخص هادى كلامك مش كتير اوى
يوسف :انا كده مع اى حد غيرك قولتلك انتى استثنائى بقى
حاسس انى مصدقت تسألينى عن مشاعرى عايز اتكلم واتكلم واتكلم كتير اوى
سمر :وانا عايزة اسمعك
يوسف :عارفة فى اول جوازنا انا خدت وقت طويل على ما عرفت اصدق انك بقيتى معايا دايما وانى اقدر اعمل واقول اى حاجة عايز اقولها او اعملها
حسيت ان الجواز ده نعمة كبيرة اوى من ربنا للى بيحب وفرحة كبيرة اوى للى بيحب
اكيد مكنتش هبقى فرحان والدنيا مش سايعانى كده لو كنت اتجوزت واحدة غيرك او كنت متجوزك بعقلى واختارتك بعقلى
الحب حاجة تانية برضو
حاجة كده متتوصفش
سمر :احنا مش خارجين علشان اتمشى لا احنا خارجين علشان اتفاجئ بيك وبكلامك بس
انت طلعت رومانسى وبتحبنى اوى انا عارفة انك بتحبنى بس متخيلتش انك بتحبنى للدرجة دى او بالشكل ده
متخيلتش ان فى حد بيحب حد بالشكل ده اصلا
يوسف :ولا انا
انا بكتشف نفسى معاكى بتعرف عليا
انا معاكى غير
اقولك حاجة طيب عمرى ما قولتهالك ولا قولتها لأى حد
سمر :قول
يوسف :فى بداية جوازنا لما كنتى بتقولى يا حبيبى مكنتش بسمع اى حاجة بتقوليها بعدها يعنى مثلا لما كنتى بتقوليلى حبيبى متنساش تجيب نسكافية ولانشون بالزيتون وفينو وانت راجع
انا مكنتش بسمع غير كلمة حبيبى حتى لو تلاحظى كنت بقولك قولتى ايه فانتى كنتى بتكررى طلباتك تانى من غير ما تقولى حبيبى الحمد لله يعنى لانك لو قولتيها تانى مكنتش هسمع غيرها تانى
انا فضلت وقت طويل على الحال ده على ما اتعودت اسمعها منك وبقيت بسمع اللى بيتقال بعدها عادى
سمر :هو انا خدت بالى انك بتخلينى اكرر كلامى كتير بس قولت لنفسى انك مبتبقاش مركز فى كلامى او بالك مشغول
مجاش فى دماغى خالص التبرير الرومانسى الجميل اللى قولته ده
ومهما فكرت مكنش هيجى فى دماغى انا مصدقة كلامك علشان انا بصدقك
بس مش مصدقة ان فى حد زيك كده فى الدنيا
اللى هو عايزة امسك ايدك علشان اتأكد انك قدامى وبتقولى الكلام ده فعلا وانى منمتش وانا بتفرج على فيلم رومانسى وبكمله لروحى فى الحلم
يوسف وهو بيمسك ايديها :كده اتأكدتى انك مبتحلميش
سمر بابتسامة:اه وبينى وبينك انت وكلامك احلى من اى حلم ممكن احلمه
انا اسفة علشان كنت مفكراك بتخلينى اعيد كلامى لانك مش مركز معايا وان كلامى مش مهم وان الاهتمام مبيطلبش وكده
يوسف :انا مفيش اهم عندى منك انتى وكلامك
سمر :متحسسنيش بالذنب اكتر من كده بقى
خلاص والله انا اسفة ان بعض الظن إثم
شايفين يا حبايب قلبى ماما بعتذر لبابا ازاى عايزاكم تعرفو ان ده الصح ان اللى يغلط يقول غلطت ويعتذر
يوسف وهو بيضحك :انتى يتربى عيالنا من وهما فى بطنك يا سمر حلو الحماس ده
سمر :مش حماس كنت شوفت فيديو كان فيه دكتور بيقول ان البيبى وهو فى بطن مامته بيكون سامع كل حاجة برا وعلشان كده يفضل انه الام تكلمه علشان يحفظ صوتها ويحبه
وعلشان كده انا بكلمهم دايما وبقولهم اد ايه انا بحبهم ومستنياهم على نار واد ايه هحاول اكون ام كويسة ليهم
عارف كمان بقيت بقرء ورد القرءان بتاعى بصوت عالى علشان يسمعونى
وبغنيلهم كمان ولو ان صوتى مش حلو بس عايزاهم يحبونى ويحبو صوتى
يوسف بابتسامة :انتى كل حاجة فيكى حلوة يا سمر
انتى هتبقى ام جميلة
سمر بابتسامة :يا رب يا يوسف يا رب
عارف عندى صحاب كتير اوى بيشتكو من معاملة امهاتهم ليهم
فى منهم اللى كانت بتكره نفسها من كتر ما هى حاسة ان امها بتكرهها
كانو بيعيطو وهما بيحكولى قلبى كان بيوجعنى اوى عليهم
كان بيبقى نفسى اروح لامهاتهم واقولهم ليه كده ليه تحسسو بناتكم بكده هما ميستاهلوش منكم كده لو مش هتعرفو تحبوهم وتحببوهم فى نفسهم بتخلفوهم ليه
ومن وقتها قررت انى هكون ام حنينة ام ولادها يعيطو فى حضنها لما يزعلو من حاجة مش ام ولادها يعيطو فى حضن اصحابهم من افعالها القاسية معاهم
مش هتحمل لحظة واحدة يشكو فيها فى حبى ليهم او فى انهم يستاهلو الحب
يوسف :انا متأكد انك مستحيل تحسسيهم بكده ولو للحظة واحدة ومتأكد انك هتكونى نعمة فى حياتهم بيحمدو ربنا عليها
بس تعالى هنا انتى كل كلامك عنهم وعن حبك ليهم
ايه ابوهم الغلبان اللى بيحبك ده ملوش من حبك جانب ملوش فى قلبك مكان
سمر :طبعا لا انا بحبك انت عارف انى بحبك
يوسف :امتى بدءتى تحبينى او يعنى امتى بدءتى تحسى بحاجة حلوة بتكبر فى قلبك ليا
سمر :فاكر يوم فرحنا لما جيت تاخدنى من الكوافير
يوسف :الا فاكر
