انا يونس عندى واحد وتلاتين سنة
ابويا مات وانا صغير اوى تقريبا موعاش عليه مش فاكر اي ذكرى ليا معاه
انا اصغر اخواتى عندى اخت اكبر منى باربع سنين ودى متجوزة ومخلفة تلت ولاد واخ اكبر منى بسنة ونص وده متجوز بعد قصة حب كبيرة بينه وبين بنت خالتنا
هما كبرو علي حبهم لبعض انا مش رومانسي اوى فمش فاهم اوى اللي بينهم واشمعنى هى اختارته واشمعنى هو اختارها ومبقاش عايز غيرها بس حتى لو مش فاهم فاللى بينهم حلو اوى وهما مبسوطين اخويا عنده ولد وبنت
انا بقي اتجوزت من اربع سنين
اتجوزت جواز تقليدى بصراحة مكنش فارق بالنسبالى حكاية تقليدى ولا عن حب دى اصلي يعنى لو محبتهاش قبل الجواز هحبها بعده مش هتبقي مراتى وحتى لو محصلش بينا حب فين المشكلة يعنى مش فاهم هنعيش سوا زى كل الناس ما هى عايشة
بعد تمن شهور من جوازى بسارة مراتى
سمعت امى بتكلم فاطمة اختى وبتعيط وهى بتحكيلها عن مواقف بينها وبين سارة وان سارة بتعاملها وحش طول مانا مش موجود وانها مش عايزة تقولي علشان ميحصلش مشاكل
وانا لسه متجوز جديد مكملتش سنة
انا من غير ما امى تحس خرجت وطلعت شقتى للهانم اللي فوق
يونس بصوت عالى : سارة ساااااااارة
سارة :ايوه يا يونس فيه ايه بتنده بالطريقة دى ليه
يونس بغضب :بصي يا بنت الناس انا امى مربتنيش وكبرتنى وضيعت شبابها واحلي سنين عمرها عليا انا واخواتى ورفصت تتجوز بعد ابويا علشان متجبلناش جوز ام
علشان اجى انا في الاخر اجبلها واحدة زيك متساويش الضفر اللي هى بترميه فى الزبالة تعاملها وحش وتضايقها
سارة :يونس انت ازاي بتكلمنى كده
يونس :لا انا مش بكلمك انا بهددك يا سارة
قسما بالله لو ما اتعدلتى مع امى واتقيتى ربنا فيها وشلتيها فوق راسك مهيكون كلام بس ولا تهديد لا هيبقي تنفيذ وعند مأزون
الا امى يا سارة انا بقولك اهو الا امى دى منطقة خطر بلاش تحاولى تتعديها لان صدقينى محدش هيندم غيرك
سارة :هى طنط اشتكتلك منى انا معملتش حاجة تضايقها والله
يونس :متحلفيش بالله كدب
كمان انا امى مشتكتش منك عارفة ليه علشان امى ست اصيلة ومحترمة وطيبة مش عايزة تخرب عليكى بيتك
بيتك اللي انتى بتهدميه بايدك بعمايلك دى
انا امى متتعاملش كده يا سارة مش علشان بس هى امى
لا لانها كمان متستاهلش امى مهياش حما عقربة ومنكدة عليكى حياتك
وسواء كانت معاملتك ليها دى بسبب اللي بتسمعيه من اهلك ولا اصحابك عن معاملة حمواتهم ليهم فانتى اتاثرتى بقي
ولا حتى انتى شيطانك راكبك ومصر يخليكى تخربي بيتك
لما متشليش امى في عيونك
فانا بقولك ان انا امى مش زى اي حد
والله العظيم انا مهحذرك تانى لو عرفت انك متعادلتيش مع امى هرجعك لاهلك بقي يربوكى من جديد هما
لانك ساعتها هتبقي متلزمنيش انتى فاهمة
سارة :فاهمة
وسبتها ونزلت وانا عفاريت الدنيا بتتنطط فى وشى
رجعت بالليل متاخر وهى فضلت تتاسف وتحاول تجر ناعم وانا قولتها ان انا مش هقبل اسفها غير لما اشوف نتيجته عملى غير كده كلامها مش فارق معايا في حاجة
عدى تلت شهور كانت هى بتحاول تقرب من امى وتصلح اللي عملته بس الغريب انها كانت كل مرة بتروح عند اهلها بترجع متغيرة لما ركزت لقيت ان اللي مالى دماغها بالتخاريف دى امها هى اللي بتقويها علي امى
هى حماتى صعبة انا عارف بس قلت مش مهم هى المهم بنتها مدام كويسة خلاص بس واضح انى طلعت غلطان وان امها هتاثر عليها
صلحت غلطى وطلقتها لما بالصدفة تانى سمعت امى بتكلم اختى وبرضه بتشتكيلها منها
امى مش راضية تقولي علشان متخربش عليها
وهى امها عمالة تملا دماغها بكلام غلط ومخلياها بتخرب علي نفسها
انا حمدت ربنا اننا كنا لسه مخلفناش كان الموضوع بقي اصعب لو في اطفال بينا
عدى تلت سنين كنت انا رافض فيهم اتجوز تانى
خايف اتنيل اختار غلط تانى ومكنتش حاسس انى فى اي حد اعرفه مناسب
امى كانت بتكلمنى فى الموضوع كتيييير
فانا لما زهقت من كلامنا وزهقت من انى فعلا معرفش حد مناسب فكرت مانا كده كده مسيرى هتجوز تانى اكيد مش هعيش لوحدى طول عمرى يعنى
وبدل مانا بدور علي واحدة كويسة وتعامل امى حلو
مخلي امى هى الي تختار واحدة تكون بتحبها وبتقدرها
واهى مش فارقة هى تختار انا اختار كله زى بعضه
قلتلها تختار هى اللي تشوفها مناسبة
كلمتنى عن بنت صاحبتها اسمها فريدة
مطلقة برضه اتجوزت سنتين ونص وبعدين اتطلقت
لان جوزها اتجوز عليها من وراها فهى لما عرفت اتطلقت منه
مهتمتش اوى بالتفاصيل دى
سالت امى عن فريدة نفسها هى بتحبها
قالتلي انها بتحبها جدا وان لولا انها كانت محجوزة لابن عمها ده ومخطوباله من وهى في تاني سنة في الكلية
كان زمانها مجوزهالى انا وقعدت تشكر في فريدة واخلاقها وفي اهلها انا قلتلها انى موافق نتقدملها
واتقدمتلها فعلا وقعدت معاها واتكلمنا بس متكلمناش كتير
وبعد تلت ايام هى قالت انها موافقة وانا كمان وافقت
واتخطبنا شهرين وبعدين كتبنا الكتاب
واتفقنا ان الجواز هيكون كمان شهر
فريدة :بما اننا مش هنعمل فرح لان انا وانت سبق وعملنا افراح قبل كده
ايه رايك نعمل سيشن
يونس :سيشن
فريدة :اه سيشن نتصور انا وانت صور حلوة نخلد بيها اليوم
يونس :شكلك بتحبى الصور
فريدة :اه جدا بس كمان عايزة حاجة تحسسنى اننا هنتجوز
يونس :طيب احنا ممكن نسافر اسبوع في اى مكان يعجبك
فريدة :حلوة الفكرة دى انا مرضيتش اقترحها علشان مكنتش عارفة انت ناوى تاخد قد ايه اجازة من شغلك
يبقي خلاص بلاها السيشن ونسافر
يونس :لا نعمل الاتنين واهو كده تحسي اكتر اننا هنتجوز
فريدة :كده بقت جرعة احساس مركزة
قشطا موافقة نعمل الاتنين تحب نسافر فين
يونس :اختارى انتى
فريدة :انا اي مكان فيه بحر هيعجبنى كمان ده اقتراحك يبقي انت اللى تختار المكان
يونس :ايه رايك نروح شرم الشيخ
فريدة :حلوة جدا خلاص نروح شرم الشيخ
