سليم :سحر بكلمك بقالى كتير انتى سمعانى
سحر :عيد اللى انت قولته تانى
سليم :مسمعتيهوش
سحر :لا سمعته وعلشان كده عايزاك تعيده تانى
سليم :نعم
سحر :عيد كلامك تانى يا سليم
سليم :احنا مش هينفع نكمل مع بعض
سحر :ليه بقى
سليم :علشان غصب عنى حبيت غيرك
سحر :لا مسمهاش غصب عنى حبيت غيرك اسمها انا واطى ووقت ما كنت مرتبط بيكى كنت على علاقة بواحدة تانية لدرجة انى حبيتها ما انت اكيد منمتش قومت لقيت نفسك بتحبها اكيد حصل مواقف بينكم
اسمها انا ندل وكداب ومش قد ولا وعد من اللى وعدتهملك
اسمها انتى مغفلة وغبية علشان مسمعتيش لكل اللى حذروكى منى وقولتى هتغيرينى والحقيقة ان انا اللى هغيرك هخليكى ضعيفة بعد ما كنتى قوية هتدوس على قلبك برجلى واسيبك هدوس على كرامتك بالجذمة وانا بقولك ان كل اللى عملتيه علشانى ميلزمنيش وانتى نفسك متلزمنيش
معلش ممكن تقولها بالصيغة دى
سليم :سحر انتى اتجننتى
سحر :طيب على الاقل قولها تانى قولى هسيبك ومبقتيش تلزمينى قولها يا سليم علشان لما توحشنى لما افتكرك وقلبى يوجعنى علشانك افتكرك وانت بتقول كده فكرهك لانك تتكره يا سليم انت متتحبش انت تتكره وبس انا اللى كنت غبية واستاهل اللى انت عملته فيا ده
سليم :انا مش واطى اوى كده انا جه عليا وقت حبيتك فيه
سحر :انت اوطى من كده كمان انت عمرك ما حبتنى يا سليم انت مبتعرفش تحب علشان تحبنى انا او غيرى انت بتبدل فينا زى ما بتغير بدلك او لا زى ما بتغير جذمك ملناش قيمة عندك واحنا بغباءنا بنديلك قيمة انت متستحقهاش وبنغلى الرخيص
عموما زى ما قولتلك انا استاهل اللى انت عملته فيا
وانت انا بتمنالك حياة قاسية زى قلبك مضلمة زى روحك اتمنالك حياة صعبة تستحقها عن جدارة لانك متستاهلش تحصلك اى حاجة حلوة فى حياتك
سليم :انتى ازاى..
سحر :انا ماشية ومش عايزة اشوف وشك تانى انت اسوء حاجة حصلتلى فى حياتى
فريدة :بس مالك مش زى سليم اللى حكتيلى عنه يا سحر
سحر :فريدة تحت حجابى فى شعر تحت شعرى بقى فى دماغ جوا دماغى فى عقل ارجوكى احترمى عقلى ده ومتقوليش كلام اهبل مالك ده نسخة من سليم واخر حكايتك معاه هيبقى زى اخر حكايتى الفرق بينك وبينى انك هتترجيه ميسبكيش لانك مش هتتحملى يبعد عنك لانك واحدة لاغية عقلها ومشاعرها بس اللى بتتحكم فيها
فريدة :ما انتى بقالك سنتين ومنستيهوش ولسه بتحبيه
سحر :انا بكرهه مش بحبه بس لسه متجاوزتش حكايتى معاه بالكامل بس انا بحاول انتى بقى مش هتحاولى لو ده حصل انتى هتعيشى طول عمرك على ذكرى واحد ندل ميستاهلش تضيعى يوم واحد من عمرك علشانه
الحكاية لسه فى اولها وانا علشان كده بنصحك يا فريدة ابعدى عنه انتى لما تحبيه هتحبيه بجد من كل قلبك انما هو عمره ما هيحبك لانه مبيعرفش يحب بتاع البنات ملوش امان ومبيتغيرش صدقينى لو اتغير مش هيتغير علشانك لو مكنش عايز يتغير علشان نفسه يبقى مش هيتغير انتى اللى هتتغيرى انتى اللى هتكرهى نفسك وحياتك بسببه
بتاع البنات ميتحبش بتاع البنات يتكره بس تبعدى عنه كأنه جربة مش تقربى منه وتسمحيله يدخل حياتك
فريدة :ماشى ولو انه وسيم وكل البنات عينها عليه
سحر :علشان مغفلين لو شكله حلو فقلبه مش حلو قلبه مقلب زبالة فى واحدة عاقلة تحب مقلب زبالة وتقول هنضفه والله حتى لو حصلت المعجزة ونضف هتفضل ريحته وحشة
فريدة :خلاص كرهتينى فيه
سحر :وده المطلوب مش عايزاكى تغلطى غلطتى يا فريدة
فريدة :انتى اجدع بنت خالة فى الدنيا
سحر :تسلميلى يا قلبى قومى بقى نخرج نقعد معاهم بره
