بابا قالي اوعي تحبى حد كداب الكداب ملوش امان واوعي في يوم تكدبى علي حد حتي لو الحقيقة هتجرحه وجعها هيكون اهون الف مرة من وجع انه يكتشف انه كان موهوم
انا عهد تمنية وعشرين سنة طول عمرى وبابا بالنسبالى هو كتالوجى للحياة بشوف الدنيا بعينيه هو كمان كان عايش ليا وبس ماما او اللي المفروض انها كانت تكون ماما سابتنا وانا عندى تسع سنين كانت بتحب واحد قبل بابا وجدى لما عرف جوزها بابا تعاملها معاه كان بالورقة والقلم عملي ومفيهوش حياة كانها مفيهاش روح ولا قلب تقريبا سابتهم للي بتحبه ومبقاش عندها حاجة تديها لبابا ولا ليا بابا كتير سالها هي فيها ايه كتير حاول يفهم ودايما كانت تقول مفيش حداشر سنة بتقول مفيش لحد ما رجع الشخص اللي كانت بتحبه تاني في حياتها واختارته فضلته على بابا اللي اتحمل بعدها عنه وعني وعليا انا بنتها طلبت الطلاق وبابا طلقها وبعد العدة مخلصت بساعة كانت متجوزة حبيبها بابا لما لقى الجيران بتتكلم قدامي واللي يلقح واللي يتكلم بشفقة اشترا شقة في مكان تاني محدش يعرفنا فيه علشانى علشان محدش يضايقني وعاش علشانى حياته مكنش فيها غير انا وشغله خصوصا لما جدى وجدتي ماتو واخوه الوحيد خد عيلته وسافر يشتغل بره بابا علمني كل حاجة انا اعرفها اي حاجة وصلتلها فبفضله اي حاجة حلوة جوايا هو مصدرها لما كنت بسمع البنات بتقول انها عايزة حبيبها يبقى ابوها او الاقيها بتقوله يا بابا كنت بحس انى انا مش محتاجة حد يبقالي بابا لان عندى احسن اب في الدنيا ومحدش غيره يستاهل اقولهاله ولو طلبت من حد يكونلي زي بابا هبقي بظلمه لان مش هيقدر
بابا محدش زيه في الدنيا ماما ماتت بعد ما اتطلقت من بابا بسنتين احنا عرفنا بعد ما ماتت جالها سرطان واكتشفو في مرحلة متاخرة بابا قالي لو كانت عرفتني وطلبت تشوفك كنت هقبل بس هي واضح انها خافت ارفض او يمكن احساسها بالذنب منعها تعمل كده حست انه مبقاش من حقها
بس انا مكنتش هحاسبها علي اللي عملته واحرمها منك انا مش ربنا علشان اعمل كده مش بقولكم مفيش زيه في الدنيا بعد ما اتخرجت من الكلية بابا مات فجاة مكنش عيان ولا حاجة حياتى وقفت مقدرتش اصدق انه خلاص مش في حياتى فضلت سنة بتعالج في مصحة نفسية ولما خرجت منها عمى طلب مني اعيش معاه وان مش هيقبل رفضي وان بابا الله يرحمه مكنش هيبقي عايزني اعيش لوحدى وانه هيطمن عليا وانا عايشة مع عمى وولاده ووافقت وحاولت ارجع اعيش حياتى تاني عمى ساعدني اشتغل في شركة كويسة
بعد شهرين في الشغل لاحظت ان في واحد زميلي مركز معايا وبيحاول يفتح معايا كلام بس انا مديتوش فرصة وكنت بقصر في الكلام هو اتقدم لعمي وطلبني منه وانا قعدت معاه وفكرت ووافقت واتخطبنا وهو دخل نفسه فى كل تفاصيل حياتى اهتم بيا وعمل علشانى كتير كان بيقولي انه بيحبني وان محدش غيرى ملا عينه وقلبه واحساسي بالوحدة بعد بابا قل كتير وحبيته
بس بعدين اكتشف انه بيخوني وواجهته
عهد :خلاص خلصت كده انت نهيت اللي بينا بايدك
اكرم :لا اللي بينا منتهاش وعمره مهينتهي عهد انا بحبك وانتي بتحبيني
عهد :انا مش هعرف اكمل معاك وانا مبثقش فيك وشاكة في كل بحبك بتقولهالي يا ترى من قلبك ولا لا يا ترى قلتها لكام واحدة غيرى لما تتاخر في الشغل اسال نفسي يا ترى كنت في الشغل فعلا ولا ولأ لما تقولي انا مليش غيرك مش هعرف افرح بيها زى الاول وهفضل مش متاكدة
مش هينفع اعيش معاك وانا حطا ايدى علي قلبي خايفة تخونى تاني واسال نفسي ليه انا مش كفاية بالنسبالك
انا مش هعرف اعيش مع واحد كداب مش هعرف اخطط لحياتى مع واحد انا مبثقش فيه مش هختار بايدى تعاستي
اكرم :تعاستك يا عهد
عهد :ايوه تعاستي كدبك هيبقي سبب تعاستي ثقتي فيك اللي انت كسرتها هتبقي سبب تعاستي وانا مش هعمل في نفسي كده
اكرم :مش هعمل كده تاني هتغير والله
انا بحبك وعارف انك بتحبيني
عهد :الحب مبيعمرش بيوت يا اكرم ياما بيوت خربت مع ان كان فيها حب اللي بيعمر البيوت الثقة وانا مبقتش بثق فيك
اكرم :مش هتعرفي حياتك مش هتمشي من غيرى متعمليش فيا وفي نفسك كده
عهد :حياتي اللي مشيت حتي بعد ما خسرت بابا اكيد مش هتقف بعد ما اخسر واحد زيك انت متعرفنيش يا اكرم لو كنت تعرفني بجد كنت فهمت انك كل مرة كدبت عليا فيها كنت بتقرب خطوة من نهاية اللي بينا وكنت فهمت انى محتاجة للامان في حياتى اكتر من احتياجي للحب وانت مش هتقدر تدينى اللي انا محتاجاه وانا استاهل حد اصدقه واثق فيه ويكون قد الثقة مش هسمحلك تخليني اقبل باقل من الى استحقه ومش هسمحلك تهد اللي بابا بناه فيا وضيع عمره هو بيعلمهولي هنساك يا اكرم هفتكر انك كداب فهنسي حبك
اكرم :يا عهد اسمعيني انا
عهد قاطعته :اسمعني انت مفيش حاجة ممكن تقولها او تعملها هتخليني اغير كلامى انا كلمتي واحدة يا اكرم ومبكدبش ومبقلش حاجة انا مش قدها واستاهل حد زيي
ومشيت سبتله شبكته وهداياه والذكريات اللي بينا لانى هنساه وهنساها ومشيت خرجته من حياتي لانه ميستاهلش يفضل فيها وبعد سنتين الحمد لله لقيت الراجل اللي يستاهل ثقتي
لقيت الراجل اللي كلمته واحدة وقد كل حرف بيقوله
وحبيته لان اللي يستاهل ثقتي هو اكتر حد يستاهل حبى وحبيت حياتى معاه والامان اللي معيشني فيه
وبكتبلكم دلوقتي علشان اقولكم لو اتحطيتم في اختيار بين الحب والثقة اختارو الثقة لان اللي ميستحقش ثقتكم ميستاهلش حبكم ولان زي ما بابا علمني الكداب ملوش امان وانتو تستاهلو الامان💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
