ليلى :اهى ملاك الرحمة بتاعتنا شرفت اهيه ايه يا رحمة كل ده تأخير
رحمة :كان فى اتوبيس عمل حادثة وجم على المستشفى حالات كتير كانت مصابة وكان فيه ضغط علينا جامد
ليلى :ضغط عليكم على اساس انك دكتورة ده انتى ممرضة يا رحمة واخرك تدى حقن بلاش مبالغة
رحمة :تعرفى ايه انتى عن شغلى ها جربتى تشوفى حد بيموت قدامك قبل كده وانتى مش عارفة تعمليله حاجة جربتى ام تعيط فى حضنك على ابنها اللى ملهاش غيره جربتى تخرجى تقولى لابن ان امه ماتت جربتى تقعدى عشرة اتناشر ساعة من غير اكل لانك مش فاضية لان وقتك مش ملكك جربتى تنامى وانتى قاعدة على كرسى لانك برضه معندكيش وقت تروحى تنامى فيه فى بيتك وعلى سريرك جربتى انك بعد كل ده تيجى واحدة فى كلية اعلام واخر مشاكلها فى الدنيا درجة روج ملقتهاش واقصى وجع جربته هو انها تجيب طقم وتلاقى واحدة فى اصحابها جايباه زيها تيجى تحكم عليكى وعلى شغلك وتعبك انا يا ستى مبعملش حاجة بروح المستشفى اعمل مساج هناك وانتى اللى هتصلحى الكون وهتبقى اوبرا وينيفرى المصرية ممكن بقى متتكلميش تانى عنى او عن شغلى قسما بالله يا ليلى لو قولتيلى ملاك الرحمة دى تانى لكون جيباكى من شعرك اللى انتى لسه عملاله كيراتين ده واخليكى قارعة اتقى شرى احسنلك
نسمة :مش هتاكلى معانا
رحمة :لا هنام
نسمة :ايه اللى خلاكى تنفجرى فى ليلى كده مش انتى دايما كنتى بتقوليلى اعدلها مهما كان دى بنت عمنا وقاعدة معانا علشان كليتها ومينفعش نضايقها دى مهما كان ضيفتنا
جرى ايه خلاكى تقوليلها كل اللى قولتيه ده
رحمة وهى بتعيط :اسر مات النهاردة مات فى نباطشيتى يا نسمة امه عياطها عليه وجع قلبى دى كانت بتبوس ايده ورجله وبتترجاه يقوم بالعافية بعدتها عنه علشان ياخدوه يغسلوه حتى باباه اللى كان دايما بيهزر ويهون عليها وعلى اسر عيط لحد ما اغمى عليه قلبى وجعنى عليهم اوى حسيت بالعجز اللى بحس بيه فى كل مرة بيموت قدامى مريض وانا مش قادرة اعمله حاجة وبعينيا شايفة اهله هيموتو وراه من الوجع عليه وعلى فراقه والله العظيم اوقات بفكر اسيب التمريض واشتغل اى حاجة تانية انا قلبى وجعنى ونفسيتى بقت تحت الصفر خلاص
نسمة وهى بتمسح دموعها :ولما كل الدكاترة والممرضين يعملو زيك مين يعالج الناس مينفعش يا رحمة انتى شاطرة فى شغلك مش بس شاطرة كممرضة لا شاطرة كانسانة بتحسى باللى حواليكى وبتهونى عليهم مبتتعامليش معاهم على اساس انهم مجرد حالات لا بتعامليهم على انهم بنى ادمين وليهم ناس بيحبوهم ونفسك يخفو ويرجعو للناس دى
رحمة :قلبى وجعنى يا نسمة انا اوقات لا بعرف اكل ولا انام من اللى بشوفه هناك من يومين واحدة كانت جايلنا وشها اتحرق عارفة جوزها عمل ايه طلقها ومشى مدافعش حساب المستشفى حتى انا كنت واقفة معاها لما عمل كده
مراعاش اللى هى فيه مبقتش تلزمه خلاص
نسمة :والشهر اللى فات مش الراجل اللى مراته ولدت وانتى اللى خرجتى تقوليله انها جابتله تؤام ولد وبنت سماهم رحيم ورحمة على اسمك مش ليليان قبل ما تمشى من المستشفى خلت مامتها تجبلك عروسة هدية شبه بتاعتها وجابتلك شيكولاتة كمان مش كتير ناس بتدعيلك لما بيسمعو منك اخبار حلوة
رحمة :مش دايما بيسمعو منى اخبار حلوة اوقات بتكون الاخبار اللى بيسمعوها منى هى اسوء حاجة سمعوها فى حياتهم
نسمة :دى ارادة ربنا يا رحمة انتى والدكاترة متقدروش تمنعو حاجة ربنا كاتبها انتو بتعملو اللى عليكو واللى ربنا كاتبه هو اللى هيكون انتو اسباب لازم ناخد بيها لازم نتعالج ويا ربنا يأذن ونخف يا ربنا يأذن ويسترد امانته
اللى انتى بتعمليه صعب ومهم مينفعش تبطلى تعمليه بس لو نفسيتك تعبانة اوى كده خدى اجازة
رحمة :مقدرش الحالات اليومين دول زايدة احنا عندنا عجز ممرضين ودكاترة
نسمة وهى بتحضنها :انا فخورة بيكى يا رحمة وباللى انتى بتعمليه فخورة انى اختى ممرضة ملاك رحمة بجد ملاك بيساعد الناس وبيشيل معاهم وجعهم انا حتى معرفش اذا كنت اقدر اتحمل اللى انتى بتشوفيه فى المستشفى ده ولا لا انا دخلت هندسة وبعدت عن الطب والتمريض لانى بخاف من الدم ومش هتحمل اشوف حد بيتوجع قدامى ومش المفروض انى بس اشوفه لا المفروض اتعامل معاه واعالجه واشوفه بيتألم وبيعيط من الوجع ده انا ممكن اعيط معاه والله
رحمة وهى بتحضنها هى كمان :فى الاول كنت بعيط ومع الوقت بطلت اعيط اصلى هعيط على مين ولا مين كمان لو عيطت اساعدهم ازاى
نسمة :انتى مش بس اختى الكبيرة بالنسبالى انتى بطلة انا بحبك اوى يا رحمة
رحمة :وانا بحبك اكتر يا قلب رحمة
راضية :قاعدين تحبو انتو فى بعض هنا وسايبين بنت عمك مفلوقة من العياط بره رحمة قومى اعتذرى لبنت عمك
رحمة :انا اللى اعتذرلها يا ماما هو مين اللى غلط فى مين
راضية :مش عايزة ابوكى يجى يلاقيها بتعيط
رحمة :البرينسس ليلى هتحكيله يا ماما حتى لو اتاسفتلها
انا مش هعتذر بقالى كتير متحملاها وبعدلها وبقول اختك الصغيرة ومدلعة عدى خليكى انتى الكبيرة
ده انا اللى اقنعت نسمة تسبلها اوضتها وتيجى تقعد معايا فى اوضتى علشان تبقي هى فى اوضة لوحدها براحتها وقولت انا واختى اولى ببعض
مستحملة دلعها ولسانها اللى بينقط زفت ده وجاية بعد ده كله عايزانى اتأسف لا مش هتأسف يا ماما انا مش غلطانة ولو بابا هيقف فى صف بنت اخوه الغلطانة وهيساعدها فى غلطها وهيجى على بنته اللى مش غلطانة تمام بس انا مش هعتذر مهما حصل
على :وانا مش هسيبك تعتذرى يا رحمة انتى بنتى وانا عارفك وعارف انك عديتى لليلى كتير ولولا انى لو خلتها تيجى تعتذرلك فهمى اخويا هيضايق ويقول بنيجى على بنته كنت خليتها تيجى تعتذرلك لانها حكتلى اللى حصل وانتى مش غلطانة يا بنتى ولو هى مش هتحترم انك اكبر منها وتحترم شغلك يبقي انتى اجبريها تحترمك ومتسكتيش انا اللى بقولك اهو انا معنديش اغلى منك انتى واختك
رحمة وهى بتحضنه :متحرمش منك ابدا يا بابا يا رب
انا مش عايزاها تتأسف ولا حاجة مش هيفرق معايا اعتذارها خصوصا لو هى مش حاسة بيه وحاسة انها فعلا غلطت
راضية :يعنى ايه يا على هتسيبها تعيط كده
على :اومال هاجى على كرامة بنتى اللى مغلطتش
راضية :افرض كلمت فهمى اخوك وحكتله ده هيزعل مننا وممكن حتى ميخليهاش تقعد معانا
على :والله لو اخويا مش هيغلط بنته هو حر انا مغلطش لا انا ولا بنتى
