اللى يعيش ياما يشوف جملة جميلة جدا وحقيقية اوى من ضمن جمل كتير بحبها ومقتنعة بيها زى ان دوام الحال من المحال ولسه اجمل يوم مجاش ويروح قرد يجى غزال وما لا يدرك كله لا يترك كله والقفة ام ودنين يشيلوها اتنين
و easy come easy go
دى معناها بالعربى ان اللى بيجى سهل سهل بيروح سهل
بس اللى يعيش ياما يشوف هى اكتر جملة بحبها هى المفضلة بالنسبالى لدرجة انى عملت كشكول وسميته كده اللى يعيش ياما يشوف مش علشان اكتب فى مذاكراتى وحاجات بتحصلى لا علشان اكتب فيه حاجات بتحصل لناس غيرى علشان تفهمونى اكتر هقرالكم كشكولى هعرفكم انا شوفت ايه وانا عايشة
دينا :وراح قايلى لو ملبستيش القميص ده حالا انا هتجوز عليكى ولما قولتله عيب احنا كبرنا على الكلام ده
قالى دينا قدامك حل من اتنين يا تسمعى كلامى يا هتجوز عليكى اختارى ولما قولتله على ايه كل ده قالى علشان احنا مبقيناش منتهين الصلاحية لا انتى بقيتى قواعد من النساء ولا انا عجزت وكل سنانى وقعت واختارى هتلبسيه ولا وقبل ما يكمل كلامه طبعا لبستهوله بس سابلى الاوضة وخرج برضه
سلمى :ليه
دينا :لقانى مقريفة وببرطم ومش مقتنعة باللى خلانى اعمله
سلمى :فطبعا اتخنق منك وسابلك الاوضة
دينا :ده سابلى البيت كله وخرج يا سلمى ورجع نام متكلمش معايا كلمة واحدة
سلمى :هو عنده حق
دينا :عنده حق ايه ده انا تلاتة واربعين سنة وهو تسعة واربعين ده احنا ملك بنتنا بقت فى تالت سنة فى الجامعة وخلاص هنبدء نجهزها ما يحترم سنه وسنى
سلمى :يحترم سنكم ايه هو انتو عندكم تسعين سنة
انتى حبيتى سليم لانه كان منطلق وكله حياة
دينا :ده لما كنا صغيرين ولسه بنبدء حياتنا دلوقتى كبرنا وبقينا مسئولين عن بنت وولدين
سلمى :بصى يا دينا الراجل مهما كبر هيفضل راجل محتاج اهتمام ومعاملة حلوة وانك تحسسيه انه شباب لو حتى شكله مش شباب فقلبه شباب
هتقوليله كبرنا وراحت علينا هيبص بره وهيبقى حقه وهتبقى انتى الغلطانة سليم راجل محترم وبيحبك بدليل انه جه اتكلم معاكى ونبهلك لغلطك غيره راحو اتجوزو على مراتاتهم من وراهم وفيهم اللى خانوهم من غير جواز وفيهم اللى اتجوزو عرفى كمان
دينا :ايه قلة العقل والدين دى ربنا يكفينا الشر
بس دول اكيد اصغر من سليم
سلمى :لا اكبر واكبر بكتير كمان قولتلك الراجل بيفضل راجل طول عمره واى واحدة هتبين اهتمام هتخطف عينه وقلبه خصوصا لو انتى قصرتى
انتى مشتغلتيش واكتفيتى بسليم والبيت والولاد انا اللى اشتغلت وشوفت بلاوى فى المحاكم وعلشان كده عايزاكى تسمعى نصيحتى وتهتمى بسليم وبنفسك اكتر من كده
دينا :خلاص هرجع البس لبسى القديم ده على الاقل فى اوضتنا يعنى علشانه
سلمى :مش كفاية هننزل نشتريلك حاجات جديدة كمان هنروح للكوافير
دينا :اروح كوافير ليه اعمل شعرى لمين انا مجحبة ومحدش هيشوفه يعنى
سلمى :سليم هيشوفه ده كفاية نروح نقصه نغير لونه
ولا هتفرحى بنفسك لما يروح يتجوز عليكى ويبقى حقه
دينا :لا يتجوز ايه ده انا كنت اروح فيها انتى مش عارفة انا بحبه قد ايه
سلمى :هو اللى مش عارف لانك بطلتى تقوليله زى ما بطلتى تهتمى بنفسك وبيه كأنكم خلاص مجرد ما خلفتو الولاد بقيتو اب وام والزوج والزوجة انتى دفنتيهم بالحيا
دينا :مكنش قصدى كده بس انا فكرت ان المهم يكون البيت نضيف والولاد كويسين فى دراستهم واخلاقهم
سلمى :ده حلو طبعا بس مش كفاية لوحده زى ما قولتلك انتى لسه زوجة متنسيش انك زوجة
دينا :خلاص حاضر هسمع اللى قولتى عليه هغير فى شكلى ولبسى وهعبرله عن حبى كمان
