ناجى بابتسامة :انتى بتعملى ايه فى مطبخنا الطاهر
لمار بخضة :يا نهار ابيض انت هنا من امتى
ناجى :من بدرى تقريبا من اول الاستعراض
لمار :محستش بيك
ناجى :ما انتى اصلك كنتى مندمجة فى الاتنين الطبخ والرقص اول مرة اشوفك بترقصى حتى معملتيهاش فى خطوبتنا ولا فرحنا
لمار :اتكسفت
ناجى :ولما تيجى تعمليها تعمليها فى المطبخ
لمار :اه
ناجى :ليه
لمار :علشان بكون فيه لوحدى كمان انت ايه اللى مدخلك المطبخ
ناجى :رجعت ملقتكيش فى اوضتنا فقولت اكيد فى المطبخ
لمار :ومندهتش عليا ليه ها تتعب نفسك وتيجى المطبخ لييييييه
ناجى وهو بيضحك :علشان حظى حلو خلانى اتفرج على الاستعراض ده كمان اول مرة اشوفك فاردة شعرك دايما بتكونى لماه
لمار وهى بتحط ايدها على شعرها :ها شعرى..لا ده علشان ميكمكمش
ناجى :ميكمكمش ازاى يعنى
لمار :زى الهدوم مش الهدوم لما بتتبل ومتتنشرش بتكمكم وتعمل ريحة مش حلوة اهو الشعر كمان كده لو متفردش وهو مبلول هيكمكم وتبقي ريحته مش حلوة كمان
ناجى :وليه دى اول مرة اشوفك فرداه مكنتيش بتخافى عليه يكمكم قبل كده
لمار :كنت بفرده وانت مش هنا
ناجى :ليه حرام اشوفه مفرود
لمار :لا طبعا مش حرام بس انا اصلي بتحرج حد يشوفنى بشعرى مفرود بتكسف مش عارفة ليه حتى لما كنت فى بيت اهلى كنت بفرده قبل ما انام فى اوضتى بس هنا انا وانت فى اوضة واحدة علشان كده بفرده وانت فى الشغل
ناجى :بعد كده يتفرد وانا فى البيت لانه شكلك حلو وانتى فرداه ولانى جوزك يعنى مش المفروض تكونى بتتكسفى منى فى اى حاجة حتى لو كانت حاجة بسيطة
لمار :طيب..هحاول
ناجى :مش هتحاولى انتى هتعملى كده فعلا والا انا لو لقيتك لماه هفردهولك بنفسي
لمار :حاضر خلاص
ناجى :بالنسبة بقى للاستعراض..
لمار قاطعته بسرعة :لا ده مش هعرف احاول حتى متفكرش فى الموضوع وربنا ما هقدر
ناجى:بس
لمار وهى بتخرجه من المطبخ :مبسش ناجى روح غير هدومك وصلى على ما احط الاكل على السفرة
ناجى وهو بيضحك :خلاص متزقيش
انا لمار عندى اتنين وعشرين سنة متجوزة بقالى شهرين جواز تقليدى انا وناجى مكناش نعرف بعض قبل الجواز وحتى خطوبتنا مطولتش كانت خمس شهور بس
لما بزهق او لما بكون مضايقة اوى برقص بحس انى بقيت احسن بعد ما اعمل كده بس عمرى معملتها قدام حد فى بيتنا قبل ما اتجوز كنت بعملها فى اوضتى وانا قفلاها عليا ولما اتجوزت ناجى بعملها وهو مش فى البيت وفى الغالب بكون بطبخ مش فاهمة ايه علاقة الاتنين ببعض بس بقيت احس بسعادة وانا بعمل كده وانا بطبخ
مكنتش اتخيل انى ناجى يشوفنى انا مجرد مبسمع الباب بيتفتح بعرف انه جه فبثبت واطبخ بس ولا من شاف ولا من درى بس المرة دى واضح انى كنت مندمجة ومسمعتش واساسا متخيلتش انه يدخل المطبخ انا بابا واخواتى عمرهم مدخلو المطبخ يجيبو لنفسهم مياه حتى وناجى بيدخل المطبخ عادى كده ايه يا اخواتى الرجالة اللى بتدخل المطبخ دى
حطيت الغدا واكلنا وانا مش قادرة ابصله مكسوفة منه اوى بجد
بس من يومها وانا بفرد شعرى لانى لما بلمه ناجى بيفردهولى مع الوقت كسوفى قل لحد ما بقيت مبتكسفش منه
بعد شهر كانت خطوبة ايمن اخويا روحنا طبعا وواحنا راجعين كنا بنتكلم انا وناجى
ناجى :ايمن شكله كان مبسوط بخطيبته اوى هما واخدين بعض عن حب
لمار :اه هى كانت معاه فى الجامعة اصغر منه بسنتين وهو بقاله اربع سنين بيحبها
ناجى :علشان كده فرحان اوى حقه بقاله كتير مستنى اليوم ده
لمار :هو انت عمرك حبيت
ناجى:نعم
لمار :وانت فى الجامعة او بعدها عمرك حبيت
ناجى :لا انا فاهم السؤال انا مستغرب انك تساليهولى
لمار :ليه يعنى
ناجى :انتى مش هتضايقي يعنى
لمار :واضايق ليه الكلام ده حصل وانت متعرفنيش اصلا هلومك يعنى علشان حبيت قبل ما تتجوزنى مانا مكنتش فى حياتك وقتها المهم جاوب سؤالى
ناجى :حبيت اه
لمار :وايه اللى حصل
ناجى :اتجوزت ابن خالتها
لمار :وانت عملت ايه
ناجى :معملتش حاجة اتضايقت شويتين بس مع الوقت خلاص بقت قصة وراحت لحالها
لمار :واحدة تروح تيجى واحدة مش مستاهلة تضايق نفسك
ناجى وهو بيضحك :واحدة تروح تيجى واحدة انتى بتقوليلي كده ناسية انك مراتى يعنى
لمار وهى بتضحك :مانا اللى جيت بقي ولا انت مضايق انى جيت ولا ايه
ناجى :لا مش مضايق انتى نصيبى وهى نصيب ابن خالتها
لمار :بس هى بسهولة كده اتخلت عنك
ناجى :هى متخلتش عنى
لمار باستغراب :متخلتش عنك ازاى يعنى
ناجى :علشان انا عمرى مقولتلها انى بحبها كنت بحبها مع نفسى وبطلت احبها برضه مع نفسي هى مكنلهاش اى علاقة بالموضوع
لمار :حلو السلام النفسي اللى بتتكلم بيه ده وانك مش لايم عليها لانها اساسا مكنتش تعرف بمشاعرك
ناجى :مش من حقى الومها سؤال انا بقى انتى سبتى خطيبك الاولانى ليه
لمار :مانا جاوبتك قبل كده على السؤال ده مكناش مرتاحين سوا هو طلب نفسخ الخطوبة وانا وافقت
ناجى :مقولتيش تفاصيل ايه اللى حصل بالظبط خلاكم مش مرتاحين
لمار :لا ولا اى حاجة هو واعز اصحابى حبو بعض
ناجى :لا بسيطة ..ثانية واحدة انتى قولتى ايه
لمار وهى بتضحك :مالك اتاخدت كده ليه
بقولك هو واللى كانت اعز اصحابى حبو بعض هو فسخ الخطوبة علشان يخطبها وانا طبعا وافقت انا هو بقا ميلزمنيش وهى كمان
زبالة ولقت بعضها يتجوزو بقى هما لايقين على بعض جدا يعنى
ناجى :وانتى مزعلتيش
لمار :المشكلة مكنتش فيه انا مكنتش اعرفه بقالى كتير المشكلة بالنسبالى ووجعى كان من صحبتى احنا كان بنا سنين عشرة سنين هى داست عليها برجلها وراحت لفت على اللى كان خطيبي وعلقته بيها وهو طلع مهزق وتافه واتعلق بيها جوز مقالب زبالة ولقو بعض وطلعو من حياتى الحمد لله ربنا خلصنى منهم
ناجى :انتى مبسوطة من اللى حصل
لمار :انا مبسوطة ان ربنا كشفهملى على حقيقتهم واحدة خاينة وغدارة ومتستاهلش تكون صاحبتى وواحد خفيف ملوش شخصية اى واحدة تقرب منه وتقوله كلمتين حلوين تجيبه على بوزه بذمتك ده واحد اتجوزه وابنى معاه بيت واكون اسرة
ناجى :بصراحة لا
لمار :يبقي حقى احمد ربنا انهم خرجو من حياتى ولا لا
ناجى :حقك طبعا
