انا ابويا بيكرهنى مش عارف ليه من يوم ما وعيت عالدنيا وابويا تعامله معايا قاسي بيتهيالي انه حتي وانا في اللفة كان برضه بيكرهني خمسة وعشرين سنة عمرى وعمر كرهه ليا انا مكنتش فاشل في دراستي ولا صايع وبتاع بنات ولا قليل الادب وعامله مشاكل وسط الناس بالعكس انا كنت شاطر ومؤدب وده بفضل ماما بصراحة لان بابا مكنش بيوجه ليا غير التهذئ والتقليل مني اللي هو بابا انا هدخل علمي رياضة علشان ابقي مهندس انت يا فاشل انت هتبقي مهندس طب يا رب تجيب معهد بس حتي انا راضي متجبش من عند خالك كده واعرف حجمك بابا انا جبت مجموع يدخلني اي قسم انا عايزه في هندسة وعايز ادخل هندسة بترول انت مفكر زي ما بالحظ كده دخلت هندسة هتعملها وهتمشي كويس في هندسة بترول مش كل مرة حظك هيبقي حلو احلم علي قدك يبني وهكذا في اي قرار بحاول اخده
انا بحب علم النفس والفلسفة جدا وبقرء فيهم كتير كنت بقرء كتاب في علم النفس ولقيت في نظرية في علم النفس اسمها "نظرية الاسقاط" يعني انك تشوف حد في حد تاني مثلا واحدة كانت بتحب واحد وسابها تقوم لما تتخطب لحد بعده تحاول تخليه شبه حبيبها القديم بقي في استايل لبسه او كلامه وتصرفاته هي كده بتسقط شخصية حبيبها القديم علي خطيبها ومش شايفة خطيبها اصلا قريت الجزء ده من الكتاب خمس مرات علشان افهمه كويس وفجاة جه في دماغي المليون مرة اللي بابا قالي فيهم متجبش من عند خالك ايوه ما انت زي خالك بابا شايف فيا خالي مع التفكير اكتشفت ان بابا مش شايفني اصلا
خالي وبابا اصحاب من وهما صغيرين وكان حلمهم يدخلو هندسة سوا بس بابا مجبش مجموع هندسة بس فضلو اصحاب حتي في الشغل شغل خالى احسن من شغل بابا ومستوى خالى المادى اعلي من مستوى بابا
بابا بيغير من خالي ولان انا شبه خالي في حاجات كتير في الشخصية بابا شايف فيا خالي
خالي كمان بيحبني وبيقول دايما انى شبهه واني بالنسباله ابنه
اكيد ده اكد الاحساس ده عند بابا
قررت اشوف بقي ايه الحل جبت كتب وبحثت عالنت لقيت ان الحل هو البعد انك تطلع الشخص ده من حياتك لانه عمره مهيبطل يشوف فيك الشخص التاني اللي هو بيسقطه عليك
طبعا ده مكنش حل مناسب خالص بالنسبالي
لقيت بقي ان الحل التاني والاصعب انك تحاول تخليه يشوفك انت ويبطل يشوف حد تاني فيك بس ده ممكن ياخد وقت طويل ومش مضمون نجاحه
مكنش عندى اختيار طبعا هحاول انا استاهل ان يكونلي اب بيحبني وبابا كمان يستاهل اني احاول علشانه
بابا شخص حنين جدا مع ماما واخواتي حتي خالي علاقته بيه كويسة جدا جدي وجدتي دايما كانو يجو يقضو معانا اسبوع في رمضان وفي العيد كنا بنروحلهم يومين وجدى وجدتي لبابا يومين ولما جدى وجدتي لبابا ماتو بقينا نقضى معاهم العيد كله جدى والد امي تعب قبل ما يموت ودخلناه المستشفي بابا كان يوميا بيزوره ويتكلم معاه ويسليه ويطمن عليه بنفسه من الدكاترة ولما جدى مات بابا خلي ماما تفضل مع جدتي في البيت شهر وحاول بعدها يخلي جدتي تيجي تقعد معانا رفضت بابا خدنا وخد شنط فيها هدوم لينا وراح لجدتي وقالها لو مش هتيجي تقعدى معانا هنيجي احنا نقعد معاكي جدتي مع اصرار بابا ده وافقت خالي قال لبابا ان ده مينفعش وجدتي تروح عنده احسن بابا قاله ان مرات خالي مهما كان مش بنتها وجدتي هتكون تقيلة عليها انما ماما بنتها وان انا واخواتي فرحانين بيها جدا وان بابا بيعتبر جدتي والدته
خالي اقتنع ووافق خصوصا ان اصلا مراته مكنتش موافقة وكان خالي هيجيب خدامة علشان تاخد بالها من جدتي ومهما كان الخدامة مش هتعاملها بحب زي ماما خالي حظه طلع وحش اوى في الجواز مراته انانية ومبيهمهاش غير نفسها اهلها كمان زيها بس خالي كان بيحبها واتجوزها وقال هتتغير ومتغيرتش مش عارف اذا كان لسه بيحبها بعد اللي بتعمله ده ولا لا بابا كان بيخلينا نروح نقضي الاجازة في بيت جدتي علشان عارف انها هتبقي عايزة تحس ان جدى حواليها وان بيتهم متقفلش بعد تلت سنين جدتي تعبت وقبل ما تموت قالت لبابا انها راضية عنه وانها مهما كانت اتمنت لبنتها مكتتش هتتمني احسن منه وان زيه زي امى وخالي بالنسبالها ويمكن اعز منهم كمان
بابا زعل عليها لما ماتت كانه خسر امه للمرة التانية
انا بقى قررت اني هخلي بابا يشوفني انا ابنه وميشفش فيا حد تاني
جبت شطرنج بابا بيحب الشطرنج اوى ورحت بيه البيت
عمر :بابا انا اشتريت شطرنج بس مبعرفش العبه ممكن تعلمني
احمد :وهو الباشمهندس عمر في حاجة مبيعرفهاش برضه
عمر :ايوه يا بابا معلش علمني وانا هركز مع حضرتك وهتعلم بسرعة
احمد :ماشي هاته طيب
وجبته وبدانا نلعب وبدء بابا يعلمني
انا بعرف العب شطرنج بس عارف قد ايه بابا بيحبه ومبيلاقيش حد يلعبه معاه فقلت استغل انه مش عارف انى بعرف العب وادخله من نقطة ضعفه حاجة بيحبها
فضلنا اسبوع بابا بيعلمني وانا عامل فيها مش فاهم اللعبة
كنت بتكلم معاه واحنا بنلعب في الاول كان بيرد ناشف بس
مع الوقت بقت ردوده احسن وبعدين بقي الكلام رايح جاي بينا مرة واحنا بنلعب قلتله عمر :عارف يا بابا انا نفسي لما اتجوز ابقي زي حضرتك مع ولادى ومراتي واهلها
احمد :زيى ازاي يعني
عمر :يعني اكون حنين علي مراتي وتشوفني حاجة كبيرة زي ما ماما شايفاك اربي ولادى كويس زي ما حضرتك ربتنا اهل مراتي يبقو بيحبونى زي ما جدى وجدتي كانو بيحبوك وبيدعولك لحد ما ماتو
احمد :ياه انت شايفني كل ده
عمر :واكتر كمان يا بابا والله انتي قدوتي انا بحاول ابقي زيك ونفسي ابقي قدوة لولادى انا كمان
احمد :هتبقي يا حبيبي وهتبقي احسن كمان
عمر :بجد يا بابا انت شايف كده
احمد :انا متاكد من كده
بعد عشر سنين
الباب بيخبط
احمد :ايه يا عمر ده
عمر :انا لقيتك مش راضي تيجي تقعد معايا ومصر تقعد لوحدك بعد ما خلاص جوزنا اخواتي حتي رانيا الصغيرة جوزناها قلت اجيب مراتي وعيالي والهدمتين اللي حلتنا ونيجي احنا نقعد معاك
احمد :يا عمر مين قال اني لوحدى ما الجيران حواليا وانت تعالي زورني انت واخواتك
عمر :لا هو انت كنت مخلفنا ومربينا ومضيع عمرك علينا علشان في الاخر تعيش لوحدك بابا لو سمحت يا تيجي تعيش معايا يعيش انا معاك وهنقل شغلي ومدارس الولاد هنا
احمد :خلاص يخربيت دماغك الناشفة انا هاجي معاك
وفي بيت عمر وهما بيلعبو شطرنج
احمد :عارف يا عمر لو مكنتش عملت اللي عملته ده وكنت طاوعتني كنت هزعل منك اوى بس انت راجل بجد ابن ابوك بصحيح
عمر وهو بيبوس ايده :انا مليش غيرك يا بابا ربنا يباركلنا في عمرك وميحرمناش منك ابدا يا رب💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
