فى الاسانسير
مراد باحباط :اوووف انت مبتطلعش ليه وزنى الزيادة مضايقك ومش متحمله انت كمان زيها
مرام :لا هو انت بس مضغطش رقم الدور اللى هتطلعه هى دى كل الحكاية
مراد بخضة :بسم الله الرحمن الرحيم انتى انس ولا جن
مرام وهى بتضحك :نعم
مراد بخوف :انصرفى انصرفى بسم الله الحافظ
مرام وهى بتضحك :انت مفكرنى جنية بجد..بص فى المرايا طيب
مراد :ابص ليه
مرام بضحك :اكيد مش علشان اسخطك قرد شوف ليا انعكاس فى المرايا ازاى العفاريت مبيكونلهمش انعكاس فى المرايا ولو كانو ظاهرين فى المرايا مبيكونوش ظاهرين قدامك كده بيكونو في المرايا بس لزوم الرعب بقى
كمان عمرك شوفت عفريتة محجبة مش منطقى تفكيرك خالص اكيد يعنى انا مش عفريتة
مراد :اومال انتى ايه
مرام :انا مرام
مراد :مرام ازاى يعنى
مرام وهى بتضحك :لا ده انت حالتك صعبة اسمى مرام حضرتك اضغط رقم خمستاشر بقى انا كده بتأخر على شغلى
مراد :ومضغطيهوش ليه انتى
مرام :هو انا كنت ناوية والله بس انت دخلت الاسانسير فانا ملحقتش اضغط الرقم
مراد وهو بيضغط الرقم وبيصغط رقم تسعة كمان:انا اسف مخدتش بالى وانا داخل ان فى حد غيرى فى الاسانسير
مرام :ولا يهمك انا كمان اسفة لو اتكلمت فجأة كده وخضيتك
مراد وهو بينزل فى الدور التاسع :محصلش حاجة بعد اذنك
مرام :اتفضل
بعد شهر قدام العمارة
مرام وهى بتكلم نفسها :طب اعمل ايه طيب ده وقته دورى بقي متفضحيناش
مراد وهو واقف عند شباك العربية :حضرتك محتاجة مساعدة..ايه ده انتى..اااا..
مرام بضحك :الجنية بتاعت الاسانسير مرام اسمى مرام
مراد :فى مشكلة ولا حاجة
مرام :اه العربية مش راضية تدور محتاجة زقة
مراد :طيب دورى انتى وانا هزق
مرام :بجد
مراد :اه طبعا بجد دورى يلا وانا هزقك
بعد دقيقة فى مدخل العمارة
مرام :يا استاذ..يا حضرة ..
مراد :ايوه فى مشكلة العربية وقفت تانى
مرام :لا دارت الحمد لله انا بس راجعة اشكرك
مراد :مش مستاهلة شكر هو انا عارف انى تخين اه بس زق العربية مش حاجة كبيرة يعنى
مرام وهى بتطلع من شنطتها شيكولاتة :انت ساعدتنى ودى حاجة كبيرة بالنسبالى شكرا اتفضل
مراد :ايه دى
مرام :شيكولاتة
مراد :مانا شايف انها شيكولاتة ايوه بتديهالى ليه علشان تخين يعنى ابقي بحبها
مرام بحرج :انا اسفة ده مش قصدى والله انا لما بعمل حاجة صح بكافئ نفسي بشيكولاتة وكنت بس عايزة اشكرك بطريقتى انا اسفة انى ضايقتك
مراد :انا اللى اسف معلش متضايقيش من كلامى
مرام :مجراش حاجة بعد اذنك
مراد :مش هتدينى الشيكولاتة
مرام :مش قولت مش عايزها
مراد :انا مقولتش مش عايزها
مرام :خلاص اتفضل بجد شكرا
مراد :العفو انا مراد
مرام :نعم
مراد :اسمى مراد
مرام :تشرفنا يا مراد بعد اذنك
مراد :اتفضلى
بعد اسبوعين فى الاسانسير
مرام بابتسامة :مراد صباح الخير
مراد :صباح النور افتكرتى اسمى
مرام :انا مبنساش حاجة ابدا
مراد :انتى بتشتغلى هنا
مرام :اه انا بشتغل فى مكتب الدعاية والاعلان اللى فى الدور الخمستاشر
مراد :وانا ساكن هنا فى الدور التاسع بعد اذنك
مرام :اتفضل
