عمر :ايناس كنت عايز اخد رايك فى حاجة كده
ايناس وهى بتاكل كاجو :حاجة ايه
عمر :ندى بنت خالتك
ايناس :مالها
عمر :لو اتقدمتلها تفتكرى توافق عليا
ايناس :
عمر :ساكتة ليه هى مش هتوافق
ايناس :هو بصراحة..هى ندى عايزة دكتور او مهندس او ظابط
عمر :يعنى متقدمش
ايناس :مش عارفة..لا متتقدمش..قصدى يعنى ملوش لزوم تتقدملها وهى ترفض مش كده ولا ايه
عمر :معاكى حق هاتى طيب من اللى بتاكليه ده
ايناس :عايز كاجو ولا درة اسبانى ولا مقرمشات
عمر :ايه كل ده انتى مقلة متنقلة يا بنتى
ايناس :بحبهم ومبيعديش يوم غير لما اكلهم استنى حظك حلو معايا سودانى بالشيكولاتة كمان
عمر :انا عايز كاجو
ايناس :تمام خد
عمر :اخد ازاى وانا سايق وماسك الدريكسيون بايديا الاتنين اكلينى انتى
ايناس :لا انت تقلب العربية بينا اسهل بص عايز حاجة مد ايدك خدها انت بتسوق بايد واحدة ويا بتمسك بالتانية الموبايل لو بتتكلم فيه يا بتحطها على شباك العربية للهواء الطلق فمتشتغلنيش
عمر :مشتغلكيش
ايناس وهى بتاكل :ايوه متشتغلنيش المشهد ده انا قرياه فى مية رواية قبل كده
عمر :ويا ترى بقى فى الروايات اللى قريتيها لما البطل بيقول كده للبطلة بتقولو انت تقلب العربية بينا اسهل زى ما قولتليلى كده
ايناس وهى بتاكل :لا طبعا بتاكله بايديها والمشهد يبقى بالتصوير البطئ وتشتغل ربابيه فى الخلفية
عمر :ايه ربابيه دى
ايناس :متاخدش فى بالك قصدى يعنى تشتغل موسيقى تصويرية رومانسية شليلة وخنيقة يعنى
ادينا وصلنا لو عايز حاجة خودها وكلها فى بيتكم
عمر :مش عايز سديتى نفسى
ايناس وهى بتضحك :لا داعى للتصفيق دعونا نعمل فى صمت يلا اشوفك بكرة
عمر :اشوفك بكرة
بعد اربع ساعات
ايناس :وادينى صحيت من النوم وطلعتلك مالك يا سارة فى ايه
سارة :مخنوقة يا ايناس مخنوقة اوى لو كانت الخطوبة كملت كان زمانى بلف على فستان الفرح دلوقتى كان زمانا بنتكلم عن القاعة اللى حجزناها والناس اللى هنعزمهم هو مكملش معايا ليه يا ايناس انا فكرت كتير اوى ملقتش انى غلطت فى حقه معملتش حاجة وحشة فيه سابنى ليه انا مش فاهمة
ايناس :هو مسابكيش علشان انتى غلطتى فى حقه يا سارة هو سابك علشان انتى سارة لانه بيخاف منك
سارة باستغراب :بيخاف منى
ايناس :اه بيخاف منك من عقلك من شخصيتك اللى مش ضعيفة وهو مش هيقدر يسيطر عليها ويتحكم فيها اشرف مكنش عايز واحدة ليها شخصية مستقلة بتفكر ومهم عندها تكون مقتنعة باللى بتعمله هو عايز واحدة قالب طوب يحطه يمين يتحط يشيله ويحطه شمال برضه يتحط مش تقوله بتحطنى يمين ليه
سارة :ده كده مش عايز زوجة وشريكة حياة ده كده عايز بقرة يسحبها وراه
ايناس :بالظبط هو حاول يحولك لبقرة يسحبها مطرح ما يروح وانتى طبعا رفضتى وده كان سبب اغلب خلافاتكم ولانه فهم انه مش هيقدر يغيرك سابك وراح يدور على واحدة قالب طوب يتجوزها تفتكرى هو يستاهل تفكرى فيه يستاهل تلومى نفسك حتى علشانه
سارة :لا ميستاهلش
ايناس :يبقى خلاص متفكريش فيه تانى انا بقى اللى استاهل تعمللنا قهوة زيادة علشان دماغى تقلت
سارة بابتسامة :حاضر يا حبيبتى انا عملت كاسترد شيكولاتة اجبلك منه
ايناس :ده سؤال جيبى طبعا
نادر :هاتيلى معاكم يا سارة واعمليلى نسكافية لو سمحتى
سارة :حاضر
نادر :شوفتها النهاردة روحت لكرم وهى اللى فتحت الباب كانت وحشانى اوى
ايناس :بكرة تتخرج وتتقدملها وتشوفها وتملى عينك منها زى ما انت عايز
نادر :امتى بس يا ايناس
ايناس :قريب اوى فات الكتير ما باقى الا القليل انت جدع يا نادر سنين بتحبها وكاتم حبك فى قلبك علشان هى اخت صاحبك ومستنى اليوم اللى تطلبها من اهلها ده انت فارس احلام على حق يا عم نادر ويا بختها بيك
نادر بابتسامة :والله انا ما مصبرنى الا كلامك
سارة وهى بتدخل البلكونة :مصبرك على ايه كلامها
نادر :على حاجات كتير على الدنيا كلها انتى عارفة ايناس كلامها بيريح ازاى
سارة :فى دى معاك حق
ايناس وهى بتضحك :ربنا ميحرمكوش منى
