عبدالسلام :يعنى انتى موافقة اننا نتخطب
هاجر :موافقة بس بشرط
عبدالسلام :شرط
مش حلوة كلمة شرط دى
هاجر :بس هو شرط يا عبدالسلام
شرط علشان موافقتى تستمر
شرط استمرارنا مرهون بيه
او تقدر تقول انه اساس لو كلمة شرط مش عاجباك
اساس لو هزيته علاقتنا كلها هتقع
وفى حاجة يهمنى اوى انك تعرفها عنى
انا لما حاجة عندى بتتهد مبتعبش نفسى وابنيها من تانى
انا ببنى حاجة جديدة تستاهل تعبى
اللى بيتكسر عندى مبيتصلحش
اللى بيتكسر عندى بفشفشه واكسره اكتر
وبشترى غيره جديد ينفعنى
عبدالسلام :وشرط ايه بقى ده اللى عندك او اساس ايه يعنى اللى مينفعش اهزه
هاجر :كرامتى
لو عملت حاجة تجرح كرامتى وتهينى
تبقى بايدك كتبت شهادة وفاة اللى بينا او يعنى اللى هيكون بينا
عبدالسلام :وانا ايه اللى يخلينى اعمل كده
هاجر :بابا دايما بيقول اللى اوله شرط اخره نور
والعقد شريعة المتعاقدين
وادينى بتفق معاك من الاول علشان نبقى على نور
عبدالسلام :خلاص تمام متفقين
بس فاجأتنينى شكلك اطيب من كده بكتير
هاجر :انا طيبة
وطيبة جدا كمان
بس معنديش اغلى من كرامتى
انا طيبة بس مش ضعيفة
عبدالسلام :كويس انا مبحبش البنات الضعيفة
هاجر :ولا انا
بعد اسبوعين
هاجر :اتفضل
عبدالسلام :ايه دول
هاجر :سندويتشات
عبدالسلام :طيب خليهم معاكى وناكل سوا فى البريك
هاجر :خليهم معاك ولو حبيت ناكل سوا فى البريك تمام
ولو كان عندك شغل او حبيت تاكل فى مكتبك تمام برضه
بعد يومين
عبدالسلام وهو بيضحك :كده هتعود على انك كل يوم تعمليلى سندويتشات
هاجر :طيب وفيها ايه ما تتعود
عبدالسلام :هتعمليلى كل يوم ولا ايه
هاجر بابتسامة :اه هعملك زى ما بعمل لنفسى
بعد اسبوع
هاجر :انت كان نفسك تطلع ايه وانت صغير
عبدالسلام :ظابط
وبعدين كنت عايز ابقى دكتور
وبعدين كنت عايز ابقى مهندس
وفى الاخر بقيت محامى
هاجر :غصب عنك بسبب المجموع
عبدالسلام :لا بالعكس بمزاجى
انا اللى اختارت ادخل حقوق
وانتى
هاجر :وانا صغيرة كان نفسى ابقى مضيفة طيران واسافر كل حتة واشوف العالم كله
ولما كبرت شوية بقى نفسى اكون مدرسة
وفى الاخر دخلت تجارة
بسبب المجموع
بس فى الأخر حبيتها
بعد شهر
هاجر :ابعتلى اسماء الأفلام اللى انت بتحبها
عبدالسلام :ليه
هاجر :هتفرج عليهم
وابعتلى الأغانى اللى بتحب تسمعهم برضه
عبدالسلام :هتسمعيهم برضه
هاجر :اه
عبدالسلام :حاضر بس ليه يعنى
هاجر :علشان لما اعرف الحاجات اللى بتحبها يا سولو كده هعرفك اكتر
عبدالسلام وهو بيضحك :مش سهلة انتى برضه
حاسس انى خاطب مخابرات
هاجر وهى تضحك :لا متفهمنيش صح
انا قصدى اشاركك الحاجات اللى بتحبها
جايز احبهم انا كمان
بعد اسبوعين
عبدالسلام :النهاردة الفلانتين
هاجر :ايه ده بجد
عبدالسلام :مش شايفة ماسورة الأحمر اللى ضاربة فى الشركة
هاجر :تصدق صح
الأحمر النهاردة اوفر فعلا
عبدالسلام :طيب ايه
هاجر وهى بتضحك :عايزنى اقولك happy Valentine to you يا بيبى
انسى مليش فى حوار الفلانتين ده وبحسه تلزيق اوفر
عبدالسلام :لا مش كده
بس ممكن نخرج لو تحبى
هاجر :وانت عايز نخرج علشانى ولا علشان متعود تخرج اليوم ده
عبدالسلام :انا اقترحت فكرة يا توافقى عليها يا ترفضيها وخلاص
من غير كلام بايخ
هاجر :خلاص متقفش
انا موافقة هستأذن بابا ولو وافق نخرج بعد الشغل
عبدالسلام :انا ممكن اكلمه
هاجر :ماشى كلمه انت
