عمار :متفكريش فى الموضوع حتى
دي خطوبتى يعنى انتى هتكونى اول الحاضرين ده انتى اهم من العروسة بالنسبالى سارة متستعبطيش
سارة :يبنى قلتلك هحاول هحاووووووووووووووول
انزل من على ودنى بقى وروح شوف وراك ايه
بدل ميتخصملك تانى انت مرتبك خلص عالخصومات والمرحلة الجاية هتبقي انك تدفعلهم من جيبك فلوس
عمار :انتى بتقولى فيها شكلها هترسى علي كده يلا هخلع انا دلوقتى ونكلم بالليل
سارة :سلام
وفضلت ابكى عايزنى احضر خطوبته مفكرنى هقدر
عديم الاحساس اللي معندوش قلب خمس سنين صحاب خمس سنين بحبه وخمس سنين وهو مش حاسس بحبى
عمار كان معايا في الجامعة اكبر منى بسنة عرفته من الاتحاد بقينا اصحاب لما انضميت لاتحاد الطلبة
وحتى بعد ما اتخرج لانه اتخرج قبلى بسنة فضلنا اصحاب ولحد دلوقتى احنا اصحاب حاشرنى في كل تفاصيل يومه اعرف عنه كل حاجة ده انا حتى اعرف بيحب الشاى كام معلقة سكر
انا حبيته ولما اتاكدت انه مستحيل يحبنى
حاولت ابعد او حتى علي الاقل تعاملي معاه يقل
مسبنيش اعمل كده كل ما احاول ابعد يقرب هو ويدخلنى في تفاصيل حياته اكتر
انا اعرف عن عمار اللي اهله ميعرفهوش
هو ميستاهلش ابعد عنه ويتالم بس مانا كمان مستاهلش افضل قريبة كده واتالم وقلبي يوجعنى
بس والله مهقدر اشوفه بيخطب واحدة غيرى قلبي مش هيتحمل هكرهه وهكرها وهكره نفسي في اللحظة دى
انا معنديش صحاب غيره حتي صحابي البنات علاقتى بيهم اضعف بكتير من علاقتى بعمار
هو مش سايبلي فراغ في حياتى املاه بحد غيره
هو كمان يعرف عنى كل حاجة ما عدا حاجة واحدة
وهى انى بحبه ومينفعش اقولها ومينفعش يحبنى لمجرد انى قلتها او لانه خايف يخسرنى كصحاب انا كده ببتزه
ده كده ابتزاز لمشاعره مش حب
اتقدملى ناس كتير ورفضت طبعا لانى متنيلة بحب عمار وحرام اظلم انسان ملوش ذنب معايا
وعمار دايما يقولى برافو عليكى متستعجليش واختارى براحتك اللي يناسبك ويستاهلك
وانا مش شايفه غيره مناسب ولا حسا ان غيره يستاهلنى
المشكلة انى مش عارفة اغير احساسي نحيته وانساه
انساه ازاى واحنا بنتكلم كل يوم عمار بيبدء يومه بيا
وبينهيه بيا حتى وهو فى الشغل بيكلمنى
ده انا بتكلم معاه اكتر مبتكلم مع اهلي في البيت يا عالم
هو صادق فى صداقتنا ومش مقصر الصراحة
وانا صادقة في حبه ومش عارفة اعمل ايه
عمار بيعاملنى علي انى واحد صاحبه
دايما يقولى انتى اجدع من صحابي الرجالة
هو كمان اكتفي بيا ملوش صحاب غيرى
الباقين بالنسباله زملاء وخلاص حاجات طيارى بتروح وتيجى انما انا حجر اساس حياته اللي لو خرج من حياته
حياته تتهد على دماغه
وانا خلاص قلبي بقا قنبلة موقوتة وهينفجر في اي لحظة
مسحت دموعى لان امل اختى جات
امل :سارة انا عايزة اتكلم معاكى
سارة :مالك يا حبيبتى في ايه
امل وهي بتبكى :نور صاحبتى مشيت وسابتنى بعد الدرس ومستنتنيش نروح سوا
سارة وهى بتحضنها :طيب اهدى يمكن مش قصدها
امل ببكاء اكتر :دى مش اول مرة هى بتعمل كده كتير
سارة :ليه بتعمل كده مش المفروض انكم صحاب
امل :انا بس اللي صاحبتها هي مش صاحبتى
نور مبتحبنيش يا سارة انا اللي بحبها وانا اللي متمسكة بصداقتنا لوحدى انا اللي لو غابت حصة مبفهمش حاجة من المستر وبفضل متضايقة طول الحصة
انما هى حتى وانا موجودة بتقعد مع ناس تانية ولا كانى موجودة
سارة :طيب انتى جربتى تفهميها انها المفروض تهتم بيكى اكتر
امل :جربت كتير وهي يأما مبيفرقش معاها ولا كانى بتكلم يأما بتقولي انها مش هتعمل كده تانى وبترجع تعمل
وانا مبقدرش ابعد عنها انا بحبها يا سارة بحبها اوى
سارة :ده مش حب يا امل مينفعش تبقي بتحبيها لوحدك وبتهتمى لوحدك وبتتعبى لوحدك انتى بتدى بس وهي بتاخد بس
نور متستاهلش هي انسانة مؤذية وانانية متستاهلش حبك ولا صداقتك
انتى بنت جميلة وطيبة شاطرة يا حبيبتي وحنينة وتستاهلي صاحبة تحبك وتشوف نفسها محظوظة بصداقتك تقدرك يا امل انتى تستاهلي التقدير
ومتستاهليش معاملة نور دى ليكى
وعلشان كده لازم تبعدى عنها ومتسمحيش ليها تاذيكى اكتر من كده هو انتى معندكيش صحاب تانين
امل :عندى بس علاقتى بيهم مش زى علاقتى بنور
سارة :يبقى تهتمى بيهم وتقربي منهم يا امل وحتى لو صداقتكم مبقتش اقوى ده مش معناه انك تفضلي صاحبة لنور وهي بانانيتها دى
قدرى نفسك يا امل لانك لو مقدرتيش نفسك محدش هيقدرك
امل :معاكى حق
سارة :وانا موجودة اي وقت تحتاجى تتكلمى فيه مع حد تيجي تتكلمى معايا فورا
امل :حاضر انا هقوم علشان اذاكر
سارة :قومى يا حبيبتى ربنا يوفقك
وفضلت افكر يا ترى لازم يكون عمار مؤذى وانسان وحش علشان ابعد عنه
مش كفاية انى اكون بتأذى علشان اخاف علي نفسي وابعد حتى لو هو مش قاصد يأذينى المهم انى بتاذى وانى بخسر
ايامى بتمر وانا واقفة فى مكانى مبتقدمش خطوة
سهام اختى اللي اصغر منى بسنتين اتجوزت وانا لسه متخطبتش حتى لانى رافضة وبابا مش عايز يجبرنى
بس اكيد هو وماما عايزين يفرحو بيا ويطمنو عليا انا كده مش بأذيهم
شغلى مع بابا اللي بطلت انزله بابا عنده معرض ادوات كهربائية وانا كنت بساعده لانى خريجة تجارة وكمان اخواتى منى اتجوزت وسهام بعدها اتجوزت وامل لسه تانية ثانوى وانا كمان مكنتش عايزة اقعد في البيت
وقعدت لان حسن الى فاتح محل موبايلات كبير
قدام محل بابا اتقدملى وانا كالعادة رفضت ومستحملتش اروح المحل مع بابا واشوف نظرات اللوم والعتاب والحزن اللي بيبصلي بيها فبطلت اروح المحل خالص
انا كده ماذيتش حسن ماذيتش نفسي طيب لما مديتش نفسي فرصة اعرفه يمكن يكون انسان مناسب
خدت قرار انا هخرج من حياة عمار والاهم انى مش هفضل موقفه حياتى كده هشتغل وهتجوز مانا مش هعيش لوحدى وفاءا لحبي العظيم اللي من طرف واحد لعمار
قلت لبابا انى من بكرة هرجع تانى انزل معاه المحل
عمار طبعا كالعادة كلمنى قبل ما ينام
سارة :يبنى انت مش خلاص هتخطب مبتتكلمش مع خطيبتك ليه ها مش هي اولى بمكالمة اخر اليوم دى
عمار :محدش اولى منك بالمكالمة دى ده اولا
ثانيا رضوى بتنام بدرى اوى
سارة : وهتتقابلو امتى كده لما تتجوزو ده انت بتروح الشغل نايم اصلا ونشاطك كله بالليل
عمار :مش عارف مش فارق انا اساسا مبعرفش اتكلم معاها دقيقتين علي بعض بمل ومبلاقيش كلام اقوله
سارة :يا فرحة قلبى بيك والله
ولما انت مفيش بينك وبينها حوار مشترك ومختلفين في الطبع اوى كده هتخطبها ليه
عمار :علشان اهلى شايفين انها مناسبة وبعدين عادى يعنى فين المشكلة
سارة :انت اهبل يا عمار هتتجوز واحدة بتمل من الكلام معاها ودماغكم مش واحدة ولا راكبة مع بعض وتقولى فين المشكلة
المشكلة انك مش هتكون سعيد هتفضل عايش لوحدك مع انها عايشة معاك تحت سقف بيت واحد
مش هتفهم انك لما بتكون حزين بتضحك وبتهزر وتبين انك سعيد ولا الي ورث مليون جنيه علشان تدارى حزنك
وانك لما بتكون مبسوط عينك بتلمع وصوتك بيكون بيرقص من الفرحة
ولما بتكون خايف بتحط ايدك في جيبك الناس بتفكر انك واثق في نفسك ولا هامك بس الحقيقة انك بتحطها في جيبك علشان تبان واثق مع انك خايف
عمار :انت مفكرة ان في اي حد غيرك فاهمنى اوى كده
يا سارة هى اصلا ميهمهاش تعرف كل ده عنى
ولا انا مهتم اعرفه عنها
سارة :وهتتجوزو ليه بقي
عمار :علشان المفروض نتجوز ابويا جوز الكل ومفضلش غيرى اصغر ولاده وعايز يفرح بيا ويشيل عيالى وامى كمان عايزة تطمن عليا انى بقالي بيت واسرة
وهي خلصت الكلية وبقي لازم تتجوز
سارة :انتو بتتجوزو ولا بتفتحو شركة سوا
ايه يبنى ده كله بالعقل كده مشاعركم فين يا عمار
عمار :وهو ابويا وابوكى اتجوزو بالمشاعر يا سارة
سارة :حتى لو متجوزوش بالمشاعر علي الاقل كان فيه تفاهم انما انتم لا مشاعر ولا تفاهم ايه الضمان ان علاقتكم تنجح
عمار:ضمان ايه هو انا بشترى غسالة
وعموما يا ستى مفيش ضمان
سارة :انا مش فهماك بجد
وعموما انا هقفل علشان انام
عمار :ليه بدرى كده
سارة :هنزل مع بابا المحل بكرة الصبح
عمار :مش كنتى بطلتى وقولتيلي زهقت
هتنزلي ليه تانى
سارة :كنت غبية وعقلت
يلا تصبح علي خير
عمار :وانتى من اهله
مع انى كنت عايزة اتكلم معاه اكتر ومع انى اصلا مكنش جايلي نوم بس مكالمتى مع عمار لازم تقصر لازم كلامنا يقل لحد ما بالتدريج يختفي
بعد تلت ساعات نمت قمت الصبح شربت قهوة ورحت مع بابا المحل شوفت حسن بصلي بسعادة
فرح انه شافنى نظرة الحزن اللي في عينيه اختفت واللي مكانها دى انا حسيتها نظرة اشتياق
خفت وحسيت انى شكلي غلطت لما رجعت انزل المحل
حسن بقا بيجى المحل كتير وبيحاول يتكلم معايا ويحكى عن نفسه عرفت انه اكبر اخواته وانه جوزهم كلهم حتى اخوه اللي اصغر منه بسنتين ونص جوزه واتطمن عليه
وانهم اصلا من الصعيد وان والده اتوفى بعد ما هو خلص الكلية علي طول وعرفت ان هو كمان كان كلية تجارة زىى
وعرفت ان والدته اتوفت بعد ما جوز اخواته البنات علي طول هو عنده اختين واخ وكلهم اتجوزو ومفضلش غيره
كنت ببقي خايفة وانا بتكلم معاه خايفة اكون بديله امل مزيف ووقت الجد مقدرش انفذ قرارى بانى مش هفضل مستنية عمار علي الفاضي
مكنتش بتكلم عن نفسي كتير وكنت بحاول اقصر في الكلام معاه شوية يمكن ده اللي خلاه فضل شهر يحاول يقرب منى ومتقدمش لبابا لانه مكنش ضامن اوافق المرة دى
عمار كان بيكلمنى يوميا بس انا اوقات كنت مبردش بحجة انى كنت مشغولة مع بابا في المحل وان رديت اقصر في الكلام
عمار كان واحشنى اوى واحشنى واحنا بنتكلم امال لما يختفي خالص من حياتى هعمل ايه
بس مضعفتش وفضلت متمسكة بقرار بعدى عن عمار وانى مش هستناه يحس بيا ولا هوقف حياتى عليه
في مكالمة بينى وبين عمار
عمار :ست المهمة اللي عاملالي فيها سيدة اعمال وهى اخرها تبيع بوتجاز خمسة شعلة ومروحة ودفاية ده لو كتتي بتعرفي تبيعي وعمى سالم مخسرش الي وراه واللي قدامه من وراكى
سارة :اضحك ولا ابين سنانى
كمان انت بتشكك في قدراتى يبنى ده انا هعمل نقلة في عالم
بيع وشراء الاجهزة الكهربائية انتى مستقل بيا ولا ايه
عمار :لا طبعا وانا اقدر معاكى حق
والمية وخمسين مقبول اللي جبتيهم في الكلية يشهدو
سارة :احم احم .. مش مقياس علي فكرة
وبعدين يعنى انت اللي كنت اول دفعتك
انشر غسيلك الوسخ وافكرك بماضيك القذر دلوقتى
ولا تلايمها احسنلك
عمار :احم احم.. لا انا بقول الايمها احسنلي
ده انتى انجب من خرجت كلية التجارة علي مر العصور والله يا سارة بكلمك بامانة يعنى
سارة :الله عليك وانت بتجيب ورا يا عمار
شاطر فخورة بيك وبشجاعتك والله
عمار :سيبك منى ومن شجاعتى انت مالك يا بت بقالي شهر مش عارف اتكلم معاكى كلمتين مع بعض
وبتتحجى بالشغل دايما
انتى في حاجة مضايقاكى منى
سارة :لا خالص علي فكرة هو انت حد يضايق منك برضه يا عمار قول كلام غير ده
عمار :متثبتنيش يا سارة وقولى مالك
سارة :مالي يبنى مانا زى الفل وما احلانى وحتى احتمال اتخطب قريب
عمار :نعم .. تتخطبي .. تتخطبى ازاي يعنى
سارة :اتخطب زى الناس عيب عليك يا عمار ده انت خلاص خطوبتك كمان اسبوع يعنى انت خبرة ومنك نستفيد تقوم تسال سؤال زى ده برضه
عمار :وهتتخطبي لمين ان شاء الله
سارة :انا قلت احتمال متسبقش الاحداث انت
عمار :ايوه يعنى مين اللي احتمال تتخطبيله ده
سارة :حسن زيدان اللي فاتح محل قصاد محل بابا
عمار :اه افتكرته مش ده اتقدملك ورفضتيه من غير متقعدى معاه حتى
متقدملك تانى ليه ايه مفيش دم مفيش كرامة
ثم تعالي هنا ده انتى بطلتى تنزلي المحل من بعدها
ودلوقتى رجعتى تنزلي ولما سالتك ليه هتنزلى قلتيلى كنت غبية وعقلت
ايه استاذ حسن حلي في عيونك وقررتى ترجعى المياه لمجاريها اكتشفتى انك غلطتى لما رفضتى سيادته وبتصلحى غلطك وبتعقلي وبتديله فرصة تانية
والمغفل ده شكله لقط الطعم وهيرجع يتقدملك تانى
سارة :انت ازاى تتكلم معايا بالاسلوب ده
وازاى تتجرا وتفكر فيا كده
وازاى تسمح لنفسك تقول عنه مغفل
عمار :ضايقتك اوى مغفل طيب حسن مغفل مغفل مغفل مغفل مغفل ورئيس المغفلين اللي في الدنيا كلهم كمان
سارة بغضب :عمار انت اتجننت ايه اللى انت بتقوله ده
عمار :ايه زعلانة اوى علشان البيه
هو السبب صح
سارة :سبب ايه
عمار :سبب بعدك عنى طول الشهر اللي فات
كنتى مشغولة بيه ومكنتيش فضيالى مش كده
سارة :لا طبعا مش كده
عمار :امال ايه السبب لو مش هو يبقى ايه السبب
سارة :مفيش سبب اللي فى ماغك ده غلط
عمار :لا صح
سارة :لا غلط
عمار بغضب :ساررررررة متكدبيش قلت صح
انتى بقالك شهر بتبعدى عنك بتقللي تعاملك معايا
وفجاة طلعلي في المقدر سي حسن ده كمان
يبقي ايه
سارة :يبقي انا حرة يا عمار حرة واعمل اللي انا عايزاه
عمار :وانتى عايزة تبعدى عنى
سارة :
عمار :ردى عليا عايزة تبعدي عنى
سارة :
عمار :سارة متبقيش جبانة وردى عايزة تبعدى عنى
سارة :اه يا عمار عايزة ابعد عنك ومش علشان حسن لا علشانى علشان سارة كفاية كده بقى
عمار :كفاية ايه
انا كنت عملتلك ايه يخليكى عايزة تبعدى عنى ومش مستحملة قربى
سارة :
عمار بصوت عالي : ردى عليا عملتلك ايه
سارة ببكاء :انت معملتش انا اللي عملت
انا اللي غلطت وانا اللي بحاول اصلح غلطى
سبنى اصلحه بقا ارحمنى يا عمار ارحمنى وسبنى ابعد
انا تعبت والله العظيم تعبت ومبقتش قادرة استحمل اكتر من كده
عمار بخوف :سارة انتى بتبكى ليه
اهدى بس وفهمينى في ايه
سارة بغضب :انا ببكى من خمس سنين يا عمار
خمس سنين ببكى وانت مش عارف وانت مش حاسس
افهمك ايه ها افهمك ايه معنديش حاجة افهمهالك
سبنى فى حالى يا عمار
روح اخطب واتجوز واتكلم مع خطيبتك بدالى
روح صاحب بدل الواحد اتنين
روح املا فراغ حياتك بحد غيرى يا عمار
لانى مينفعش افضل في حياتك
مينفعش افضل خايفة حياتك تبوظ لما ابعد وسايبة حياتى تبوظ بايدى
مينفعش افضل خايفة علي مشاعرك تتعب او تحزن من غيرى
ومشاعرى انا تدمر كل يوم وقلبى انا يوجعنى كل يوم وروحى انا تتعذب كل يوم
حتى لو هتكرهنى يا عمار اكرهنى احسن مانا اكره نفسي
اكرهنى انا موافقة بس ارجع لنفسي زى زمان
اكرهنى يا عمار اكرهنى
عمار :ايه اللي انتى بتقوليه ده انا مقدرش اكرهك
سارة ببكاء شديد : وانا مش هقدر افضل بحبك
مش هقدر والله ما هقدر
وقفلت السكة في وشه وفضلت ابكى طول الليل وبعدين مسكت موبايلي حطيته عالبلاك ليست وعملته بلوك من عالفيس بوك والواتس ومسحت كل الصور اللي ليه معايا وكل الشات اللي بينا وانا ببكى
بس الهدايا اللي جبهالي في اعياد ميلادى اللي فاتت مقدرتش اعمل فيهم حاجة فضلت مسكاهم وببكى وانا مسكاهم وبس
ارقام كتير غريبة كلمتنى بس مكنتش برد كنت عارفة انه عمار فمكنتش برد
مكنتش هقدر اكلمه بعد اللي قلته حسيت ان خلاص كده انا جبت اخرها
بس كان بيوحشنى اوى فضلت تلت ايام مبخرجش من اوضتى بصلى واشرب مياه وابكى بس مكنتش باكل ومكنتش عارفة انام
بصراحة لما مسحت صور عمار فضل صورة ليا انا وهو مقدرتش امسحها فضلت طول التلت ايام ببصلها وابكى ومش قادرة امسحها
اهلي حاولو يتكلمو معايا كتير بس انا مكنتش برد بحاجة غير انى تعبانة شوية وهبقي تمام باذن الله
هما عارفين انى مش بحكى فمضغطوش عليا
بعد التلت ايام اللي قضتهم في اوضتى خرجت اقعد مع اهلي عالغدا حسيت انى كل دموعى خلصت
وكمان كفاية اخوفهم عليا اكتر من كده
بس منزلتش مع بابا المحل ولا كنت بتكلم كتير
بابا بعد يومين قالى ان في حد متقدملى
خفت يكون حسن وارفضه تانى لانى دلوقتى فعلا مش هقدر اتخطبله ولا اتخطب لاى حد اصلا
بس لما سالت بابا علي اسم العريس
قالى اسمه عمار محمد جاله النهاردة المحل وقاله ان كان معايا في الكلية كان اكبر منى بسنة وان يشرفه يجيب اهله ويجو يطلبو ايدى
انا تنحت وحسيت ان جردل ميا ساقعة وقع فوق راسي
عمار اتقدملى طب وخطوبته اللي كانت المفروض تبقى بكرة دى واتقدملي ليه اساسا ايه الجنان ده
بابا قالي انه هيتصل بيه ويقوله يجى هو واهله بكرة بعد العشا
فضلت طول الليل بفكر ومش مصدقة نفسي
المهم عدى الوقت وجه ميعاد عمار واهله
جم وبابا وماما قعدو معاهم وندهولى
وبعدين بابا خد والد عمار وطلعو البلكونة
وماما خدت والدته تفرجها علي شقتنا المهم سابونا لوحدنا
فضلت ساكتة وباصة فى الارض اصلا مبصتش لعمار
ولا مرة من ساعة مدخلت لقيته بعد دقيقتين قضيناهم ساكتين قالى
عمار :وحشتينى
اتفاجات وبصتله
عمار :ايه متفاجاة ليه كده ما طبيعي توحشينى بقالي اسبوع متكلمتش معاكى
سارة :بس اللي مش طبيعي وجودك هنا انت بتعمل ايه هنا يا عمار مش النهاردة المفروض يوم خطوبتك
عمار :والله لو عايزة نتخطب النهاردة انا موافق جدا ومعنديش اي مانع
سارة :عمار انا بتكلم جد
عمار :ومين قالك انى بهزر والله انا مستعد اخطبك حالا
سارة :عمااااااااااار
عمار :خلاص يا ساتر عليكى
يا ستى لغتها فسخت الخطوبة من قبل منتخطب اصلا
سارة :ليه
عمار :يا مساء الاسئلة الغبية هيكون ليه يا سارة علشانك وعلشانى
سارة :علشانك وعلشانى ازاى يعنى
عمار :يعنى يا ستى انا اكتشفت انى الحوار ده مينفعش يكمل لان رضوى فعلا مكنتش بتمثلى اى شئ
انا كان ممكن اقعد بالايام مكلمهاش ولا فارق معايا ولا فارق معاها
وانتى لمجرد انك قللتي مكالماتنا اتضايقت وبقيت مش طايق نفسي وهموت واعرف فيكى ايه
ولما حسيت انك ممكن تكونى عملتى كده علشان حسن المغف...
سارة :عمار مينفعش كده هو اكبر منى ومنك ولازم تحترمه
عمار :معاكى حق وعموما دى هتكون اخر مرة نتكلم عنه اصلا لأنك مش هتجيبي سيرته تانى ده لو خايفة علي لسانك يعنى بدل ما اقطعه لو اتكلمتى عنه تاني
المهم لما حسيت انك ممكن تكونى بتعملي كده علشانه
حسيت ان دمى بيغلي وقلبي هيطلع من مكانه من الغيظ
ولما اتكلمنا وانهارتى في اخر المكالمة حسيت ان قلبي بيوجعنى علشانك وانى خايف تبعدى عنى وان مش هقدر ولا عايزك تبعدى
بس انتى قفلتى وحطتيني علي القائمة المحظورة وعملتيلي بلوك من كل حاجة
حتى لما كلمتك من ارقام غريبة مردتيش
انا كنت قلقان عليكى اوى
وخايف تبعدى عنى
وخايف كمان تتخطبي لاستاذ حسن ايه رايك حلو كده
ساعتها فكرت هو انا خايف ليه مطبيعى انك هتتخطبى ولو مش ليه يبقي لغيره
لقيت دمى رجع يغلي تانى وقلبي هيطلع من مكانه تانى
لمجرد الفكرة فقلت الحقك بقي قبل متنفذيها
واروح انا فيها
قلت لبابا انى مش هقدر اخطب رضوى ولما قلتلها مفرقش معاها بالنسبالها انا مجرد عريس مناسب من بين ناس كتير ممكن يكونو مناسبين برضه
واهو كويس اننا متخطبناش واتحسبت عليها خطوبة
وبعدين قلت لبابا انى عايز اتقدملك وهو وافق هو اهم حاجة عنده انه يفرح بيا واتجوز
ورحت لوالدك وانا خايف يكون حسن سبقنى بس الحمد لله والدك قالى انه هيسال عليا وهياخد رايك وبعدين هيتصل بيا يحددلي ميعاد اجى فيه لو في نصيب
مشيت وانا بحمد ربنا انه لحقت ومتاخرتش ومفاتش الاوان
طبعا وسط كل ده انا كنت بحاول اكلمك وانتى مبترديش عليا
بس وادينى قاعد قدامك دلوقتى
سارة :تفتكر كفاية انك تكون خايف ابعد عنك لما اتخطب علشان تتقدملى ونتخطب ونتجوز
خايف تخسرنى كصديقة فتخلينى اكتر من صديقة
عمار :انا فعلا خايف اخسرك كصديقة
بس كمان خايف اخسرك كاكتر حد بيفهمنى
واخسرك كصاحبي اللي في ضهرى دايما
واخسرك كاهم حد في حياتى ويومى اللى مبيمشيش غير لما اكلمك وقراراتى كلها بناخدها سوا خفت اخسرك ككل حاجة لانى اكتشفت انك كل حاجة يا سارة وعلي فكرة انا مش جاي اطلب ايدك وتوافقي
انا جاي اعرفك اننا هنتجوز لان رضيتى مرضيتيش
احنا هنتجوز علشان تبقي عارفة يعنى
سارة بابتسامة :بالقوة يعنى غصب واقتدار
عمار :وبالمحايلة كمان اتجوزينى ينوبك فيا ثواب
الهى تنسترى ومتتردلك دعوة ابدا يطعمك ما يحرمك يا سارة يا بنت عم سالم قولى امين
سارة وهى بتضحك :اللهم امين
ايه انتى بتتقدملى ولا بتشحت عليا
خلاص هاخد فيك ثواب واوافق
عمار :طيب حيث كده بقي انا هتفق مع عمى علي كتب كتاب والفرح كمان شهر
سارة :فرح ايه الي كمان شهر مش هلحق طبعا
عمار :تلحقي ايه دى والدتك مخلصة جهازك من زمان والاجهزة الكهربائية عيب عليكى يعنى تقولى كده ووالدك عنده معرض نروحله يوم يظبطنا فى كل حاجة
والشقة بتاعتى خلصانة والعفش واي حاجة نقصاكى هننزل سوا نجبها والشبكة بكرة نجبها
سارة :مش عارفة حاسة اننا بنتسرع
عمار :بنتسرع ... بنتسرع يا سارة بعد خمس سنين بتقوليلي بنتسرع
طيب كلمة كمان وهاكون متجوزك بكرة في شقتي اللي عالبلاط دى ونبقي نجيب العفش وكل حاجة بعدين براحتنا بقي
سارة :خلاص يخربيت جنانك
اتفق انت مع بابا وانا لو سالنى هقول موافقة
عمار :ايوه كده برافو يا سارة
واتفق المجنون ده مع بابا وخلي والده يقنع والدى بكتب الكتاب خصوصا انى خلصت جامعة وهو شقته خلصانة ومش مستهلة عطلة نكتب الكتاب ونتجوز بعد شهر
بابا كان فرحان باصرارهم خصوصا انه لما سال عليهم قبل ما يجو سمع عنهم كل خير
وكمان كان عايز يفرح بيا فوافق وماما كمان بصراحة زنت عليه شوية لانها مصدقت يتقدملى حد واوافق
فبابا قاله انه هو موافق وانه هيسالنى
ساعتها انا قلت لبابا انى هفكر واستخير وارد عليه
انا كنت استخرت ربنا قبل ما يجى وكنت فرحانة ومرتاحة وبعد ما جه استخرت في حكاية كتب الكتاب وبرضه حسيت انى مرتاحة ومبسوطة ومطمنة جدا
واتكتب كتابنا واتجوزنا
بعد جوازنا بتلت شهور عرفت من ماما ان حسن اتجوز بنت عمه فرحتله ودعيت ربنا يجعلها زوجة صالحة ليه ويجعله زوج صالح ليها ويرزقهم بالذرية الصالحة لان حسن فعلا يستاهل كل خير
انا بقي وزوجى المصون وحبيبي المجنون خلفنا نوران ومحمد واحمد
تخيلو مسجلنى علي تليفونه" كل حاجة في الدنيا💖"
انا كمان سجلته بنفس الاسم لان عمار فعلا كل حاجة في دنيتى هو وولادنا انا مقدرش اتخيل حياتى من غيره وبدعى ربنا يحفظنا لبعض ويجعلنا دايما خير لبعض
ويغفرلنا لانى عرفت ان كلامنا مع بعض قبل الجواز كان حرام وحاجة تغضب ربنا ساعتها استغفرت ربنا كتير وطلعت صدقات كتير بنية الاستغفار وتوبت
ونويت انى هعرف ولادى ان مفيش حاجة اسمها صداقة بين ولد وبنت وان التعامل يكون بحدود
الحدود اللي فرضها دينا
الحدود اللي اتعذبت وبكيت كتير لانى اتعدتها وعلقت قلبي بعمار وحبيته وده مش حقي
كنا اصحاب ومكنتش معرفة اهلي واتجوزنا وبابا ميعرفش انى كنت اعرفه قبل كده لانى مقدرتش اقوله وخبيت والاولي بيا انى كنت اخاف من ربنا
دعيت ربنا يسامحنا ويغفرلنا ويقبل توبتنا احنا الاتنين
لانى عرفت عمار وخليته هو كمان يستغفر ويتوب
كنت خايفة ربنا ميباركش في حياتنا لاننا بدءناها غلط
وكنت طمعانة في كرمه ورحمته وغفرانه
والحمد لله ربنا رزقنا بنوران بعد مفضلنا سنة ونص منخلفش وقتها انا حسيت انى دى علامة استجابة ربنا
لتوبتنا ربنا الكريم الرحيم حاشاه يرد تائب اليه
بس احنا نقرب بس احنا نستغفر ونتوب ونصدق التوبة
اللي بيقرب لربنا خطوة ربنا بيقربله خطوتين
بس احنا نقرب💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
