فاطمة :اتذكرك واحن للماضى الجميل حتى لقيت ان اشتياقى ملنى يا سيدى ان كان لوصالك سبيل كيف السبيل الى وصالك دلنى..على ..يا ويكا...عليوة
على :متقوليليش عليوة دى انتى عارفة انى بكرهها
فاطمة :اعمل ايه بس ما انت مبتردش عليا ومش معبرنى بس ايه رايك فى الدخلة جامدة الصح
على :ده على اساس انه كلام انتى اللى مألفاه يعنى
فاطمة :لا بس انا اللى قريته وحفظته مخصوص علشانك يا ويكا مفيش اى تقدير لتعبى كده خالص افضل كده حبط فى مأديفى لحد ما ابص بره
على :طيب اعمليها يا فاطمة وجربى تبصى لجنس راجل خلقه ربنا غيرى علشان اخزألك عينيكى الاتنين
فاطمة :مش مهم يا حبيبى انا كده كده بشوف الدنيا بعينيك فمش محتاجة عيونى فى حاجة
على :احم احم كالعادة بتثبتينى
فاطمة :لا معلش اسمها كالعادة بحبك وباكل عقلك بحبى وكلامى
على :واكلة عقلى وقلبى يا فاطمة ومن بنات الدنيا كلها ميلزمنيش غيرك
فاطمة وهى بتصفر :طيب مدام كده نطلع السطح ولا ننزل الجنينة نتكلم وش لوش بقى انا مبحبش كلام الموبايلات ده انت عارف وعايزة اصالحك يا ويكا
على :هتصالحينى
فاطمة :اه هصالحك جامد اوى
على وهو بيضحك :خلاص ماشى خليها فى السطح علشان محدش يقاطع كلامنا
فاطمة :علشان محدش يقاطعنا ولا عايز تستفرد بيا يا ويكا انا كان قلبى حاسس انك زير نساء وذئب بشرى
على وهو بيضحك :هو فى حاجة مش عارف انتى بتنسيها سهوا ولا عمدا بس انا كاتب كتابى عليكى وفرحنا كمان تلت شهور يعنى مش محتاج اعمل افلام الابيض والاسود دى
فاطمة :تصدق معاك حق خلاص قشطا طلعالك
على السطح
على :حلو الحجاب الخليجى اللى مبين نص شعرك ده فاطمة انتى عايزانى اقتلك صح
فاطمة :يا على مانا طلعالك انت متكبرش الموضوع
على :ولما يشوفك حد فى اخواتى ولا ولاد عمى ضياء اعمل فيكى ايه ساعتها اعلقك من شعرك على باب البيت
فاطمة :خلاص هلفها عدل
على :لا اقعدى فى الارض بحيث محدش يشوفك من الجيران بس متعدليش حجابك شكلك كده حلو بس مش من حق حد غيرى يشوفك كده
فاطمة وهى بتقعد :طيب اقعد انت كمان
على وهو بيقعد :ادينى قعدت
فاطمة :خد جبتلك نوجا علشان اصالحك
على وهو بياخدها وبياكلها :لو مفكرة انك هتأثرى عليا بالنوجة تبقى غلطانة
فاطمة وهى بتضحك :مصدقاك طبعا والنوجة اللى فى بؤقك تشهد
على :بجد يا فاطمة انتى..
فاطمة :بجد انا غلطانة واسفة متزعلش منى انا حتى مش فاهمة انا بعمل كده ليه
على :بس انا فاهم فاطمة انا عارف انك موهوبالى من يوم ما اتولدتى يعنى مفكرة ان جوازنا تحصيل حاصل زى جواز اخواتى واخواتك وولاد عمى ضياء وعمتى فايزة
بس انا عايزك تعرفى انى بحبك احنا طول عمرنا سوا الكل بيتعامل معانا على اساس اننا مخطوبين من صغرنا وعلشان كده مكنش فى حدود طبعا ده حرام وانا استغفرت عنه وتوبت وخليتك تستغفرى وتتوبى انتى كمان وطلبت نكتب الكتاب قبل جوازنا بسنة مش يوم الفرح زى اللى اتجوزو قبلنا
بس مش هنكر ان بسبب ده انا حبيتك وعمرى ما شوفت فى حياتى بنت غيرك ولا عايز اشوف البنات يعنى فاطمة وبس والحب برضه يعنى فاطمة وبس متفكريش انى بتجوزك علشان اتفاق ابويا وعمى ووصية جدى انا بتجوزك علشان انا بحبك ولو مكنتيش موهوبالى كنت هحبك واتجوزك برضه انتى اختيارى يا فاطمة والله العظيم انتى اختيارى انا بس انا حظى حلو ان اختيارى يكون موافق عليه وفرحان بيه اهلنا بس والله بيهم من غيرهم انا كنت هحبك واتجوزك
فاطمة وهى بتمسك ايده :مصدقاك يا على بس اوقات بحس انه يمكن لو كنت موهوبة لحد غيرك كان زمانهم مجوزنى ليه
على :ولا كنت هسمح مش احمد وقف قصاد العيلة ومتجوزش سمية واتجوز واحدة اخت صاحبه وعلشان كده عمى ضياء مساعدوش فى جوازه خالص لانه مكنش راضى عن الجوازة دى انا بقى كنت هقف قصادهم علشان اتجوزك وكنت هعمل زى احمد واكتر ومش عايزهم يساعدونى ولا عايز عمى يجهزك وهعمل انا كل حاجة بس تبقى ليا
فاطمة بابتسامة :مانا ليك يا على ومش ممكن اكون غير ليك انا مكنتش هقبل ولو علشان خاطر ابويا سكت كنت هعيش طول عمرى شايفاك الحلم اللى متحققش
انا بس اوقات الشيطان بعيد عنك بيسيطر عليا ويفضل يوسوس هو على بيحبك ولا متعود عليكى طيب انتى اختياره ولا اختيارهم فلاقينى بعمل تصرفات تضايقك وانت تخاصمنى ومتكلمنيش بس والله بعدها ببقى عايزة اعض فى الارض من ندمى اقولك حاجة يا على
على :قولى يا قلب على
فاطمة :انا مش بس شايفاك راجلى وكبيرى انا شايفاك الراجل الوحيد فى الدنيا وحياة ربنا
على بابتسامة :هو انا كنت زعلان منك ليه نستينى بكلامك
فاطمة بابتسامة :مش مهم تفتكر لانك مش زعلان على مش ممكن يزعل من فاطمة صح
على بابتسامة :على روحه فى فاطمة ويا ريت فاطمة تستعيذ من شيطانها ومتسيبهوش يسيطر عليها ويخليها تعمل حركات نص كم تحرق دم على فيضطر انه يزعل وميكلمهاش ويبقى بيعاقبها وبيعاقب نفسه لان اليوم من غير فاطمة صعب وطويل اوى
فاطمة :لا خلاص انا مش هسمح للشيطان يعتبرنى صيدة سهلة ويوسوسلى بكلام فارغ فاطمة وعلى بيحبو بعض واختارو بعض وهيتجوزو علشان كده مش علشان موهوبين لبعض
بس تفتكر كده جدى واهالينا مظلموناش يعنى كمال يتجوز صفية مع انه اكبر منها بتلتاشر سنة بس لمجرد انها موهوباله بحكم انها اول بنت تتولد بعده ومتكونش اخته
واحمد لما يقول مش عايز العيلة كلها متبقاش راضية عن جوازه من ضحى وجيهان لولا انها امتنعت عن الاكل والكلام لما كانت هتروح من بابا مكنش سابها تتجوز جمال جارنا ولحد دلوقتى بيعاملو جمال وضحى على اساس انهم مش من العيلة واغراب واللى بيتعاملو احسن شوية سامح اللى اتجوز سمية لان احمد اللى سابها ومنى اللى اتجوزت نادر اللى متجوزتوش جيهان وده لان العيلة شايفة ان مش ذنبهم ومع ذلك معاملتهم ليهم مش احسن حاجة فى الدنيا بس اهى احسن من المعاملة اللى بيعاملوها لجمال وضحى
والباقين رضيو بكلام العيلة واتجوزو علشان ميتغضبش عليهم وميتعاملوش على اساس انهم منفيين برانا
مفيش حد فيهم بقى قصة حب غير انا وانت بس يا على اخر السلسلة بس هما اللى حبو بعض انما بقية السلسلة لا
بقية السلسلة يا رضيو بالامر الواقع وعايشين والسلام يا مرضيوش واتمردو واتعاقبو ولسه بيتعاقبو على تمردهم
هو من حق جدى وبابا واعمامى وعمتى يحددو مصيرنا ويرسمولنا مستقبلنا هو احنا مش من حقنا نختار
على :من حقنا طبعا واللى هما عملوه ده مش صح وانهم يربطو رضاهم عننا باننا نقبل بكل ده فده برضه مش صح
بس لو كان جدك الله يرحمه وصى بكدا لان اخته لما اتجوزت من بره العيلة اتهانت وشافت المر فهو قرر ان ولاده واحفاده هيتجوزو من بعض علشان ميحصلش معانا اللى حصلها ففى ناس تانية بتبقى الفكرة فى ان الواد احق ببنت عمه او علشان ارضهم او املاكهم متطلعش براهم
فاطمة :اسبابهم غلط كلها يعنى جدك ميعرفش ان فى ناس شافت الويل من جواز القرايب مش فى ناس خلفت اطفال باعاقات او حتى ماتو بسبب جواز القرايب كمان يعنى هما علشان يحافظو على اراضى واملاك يتعسو ولادهم علشان يتمسكو بعادات غلط يدمرو ولادهم
احنا مش هنعمل كده مع ولادنا مش هنوهبهم لحد فى ولاد اخواتى ولا اخواتك ولا ولاد عمى وعمتى
ولادنا قرارهم بايديهم يتجوزو اللى هما عايزينهم دى حياتهم وهما اللى يختاروها مش احنا اللى نختارهالهم
على :من غير ما تقولى انا قررت كده انا شايف التجارب اللى قدامنا عاملة ازاى واكيد مش هكررها ولو حد فى ولادنا عاز يتجوز من العيلة انا مش هعترض بس يبقى اختياره هو اللى اختاره بكامل ارادته لفى حجابك عدل طيب علشان ننزل طولنا وعمى بيضايق كل ما فرحنا بيقرب كل ما معاملته ليا بتسوء غيران منى على اخر العنقود ودلوعة بيته اللى هاخدها
فاطمة وهى بتعدل حجابها :واهى دلوعة بيته هتبقى دلوعة بيتك انت يا ويكا قدر غيرته ومتزعلش انت عارف ان بابا بيحبك هو بس متعلق بيا جامد وهيعز عليه فراقى
على :مقدر يا حبيبتى والله هو اينعم ساعات بيزود العيار جامد وبيخنقها عليا اوى بس برضه انا مقدر وبعدين عمى سالم مش بس عمى ولا حمايا ده ابويا التانى وربنا يعلم غلاوته فى قلبى
فاطمة بابتسامة :يسلملى قلبك الحلو يا حلو
على بابتسامة :وتسلميلى كلك على بعضك يا فاطمة يا كل الحلو اللى فى حياتى
جدى وبابا واعمامى وعمتى غلطو مش من حق وصية تقرر مصير او تحدد مستقبل هما ايه عرفهم اننا مناسبين لبعض واننا خير لبعض ما يمكن نكون شر
الغيب ميعلموش غير ربنا ربنا وبس والخير لينا برضه ميعلموش غير ربنا وبس
مش من حقهم يعيشونا حياة مرسومة بكل تفاصيلها ويبقى كل دورنا اننا نقول حاضر ونعم وبس
يمكن انا وعلى حبينا بعض ووصية جدى متعستناش بس هى تعست ناس تانية وصية جدى مش صح وانا وعلى حبينا بعض واختارنا بعض لان ده نصيبنا وقدرنا مش بسبب وصية جدى
من حق كل واحد يختار يكمل حياته ازاى ومع مين مدام مبيعملش حاجة حرام من حق كل واحد يعيش الحياة اللى هو حاببها ومختارها مش ينجبر على حياة مرسومة يعيشها تعيس الاختيار حق والحرية حق ورفض الانجبار على حياة مرسومة اكبر حق💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
