منى :ها يا ستى ادينى جتلك لحد عندك اهو علشان تحكيلي
تحكيلي بجد مش تقوليلي كلام من نوعية كل شئ قسمة ونصيب اللي مبتقوليش غيرها لاى حد يكلمك في الموضوع ايه اللي حصل يا افنان
افنان :زى ما قلتلك قسمة ونصيب واحنا ملناش نصيب في بعض
منى :ايوه ليه حصل ايه علشان تحسي انكم ملكمش نصيب في بعض افنان انتى عقلك يوزن بلد ومنتيش متهورة علشان تعملي كده من غير سبب
وقلبك اطيب بكتير من انه يجرح ويبعد بسهولة كده من غير ميكون حاسس بحاجة قوية تخليه مش قادر يتحمل ومفيش حل غير البعد
افنان :انا مش عارفة اذا كنتى هتفهمى اللي هقوله ده ولا لا
بس مراد مكنش سايبلي فرصة اغلط كان محسسنى انه كتير عليا انى اغلط
منى :وضحي قصدك اكتر
افنان :انا ومراد كنا شغالين في نفس الشركة هو مدير الشركة وانا ماسكة قسم التسويق هو كان مبهور بيا وبذكائى وسرعة بديهتى وشطارتى في الشغل اللي حققتلنا مكاسب مكناش نحلم بيها في وقت قليل
غير شكلي اللي خلانى بالنسباله بجمع بين الذكاء والجمال
المرأة المثالية زى ما كان بيقول عليا
علشان كده اتقدملي واتخطبنا حسبها بالعقل ولقى انه مهما دور مش هيلقى واحدة احسن منى اختارنى وهو واثق من اختياره المرأة المثالية اللي مش ممكن يندم علي اختياره ليها في يوم
وانا كنت شايفة انه انبهاره بيا ده كفاية يخلينا نرتبط ببعض
بس مع الوقت انبهاره والكتير اللي هو مستنيه منى خنقنى بقيت حاسة انه عبء عليا
منى :عبء عليكى
افنان :ايوه عبء عليا مبقتش بعرف اكون علي طبيعتى قدامه
لو هزرت وقلت حاجة عادية يعنى يستغرب انى قلتها وازاي واحدة في مكانتى الاجتماعية تقول كده
لو خرجنا مينفعش ناكل غير في مطعم فاخر وغالي لما قلتله علي كافيه جميل وبسيط بحب اقعد فيه والاكل عندهم تحفة قالي ازاي انزل بمستوايا لمكان كده وانى واجهة للشركة ومينفعش حد يشوفنى في مكان زى ده
لو لبست كاجوال ومش فورمال يبصلي كانى كائن فضائي
لو غلطت وجيت اعتزر بحس انه متفاجئ انى غلطت اصلا مش متخيل انى انسانة وممكن عادى اغلط
مبتكلمش معاه غير لما احسب كويس اوى كل كلمة هقولها
ومبعملش حاجة قدامه غير لما افكر فيها مية مرة قبل معملها
مراد ميعرفش غير جزء منى ومبهور بيه ومعتبره كلي كانى مفياش غير الجزء ده ومبيتحملش ومش عايز يعرف غيره مش مصدق ان في حاجات تانية جوايا
الوضع ينفع يبقي كده بينى وبين مديرى في الشغل لانه اصلا ميهمهوش غير الجزء ده انما خطيبي اللي هيبقى جوزى مينفعش يبقي الوضع بنا كده
احنا فضلنا مخطوبين تسع شهور انا بفكر اسيبه من تالت شهر بس كنت مترددة ومش عارفة اذا كانت اسبابي كفاية ولا لا وقلت اديله فرصة
واحاول افهمه ان لازم التعامل بينا يكون في اريحية اكتر من كده وبلاش التكلف ده بس مفهمنيش
ولما كررت محاولاتى اتهمنى بانى بهتم بحاجات تافهة
انى اتعامل بالشوكة والسكينة مع الشخص اللي هيشاركنى حياتى كلها وهيشوفنى بكل حالاتى حاجة تافهة لحد ما تعبت وياست وقررت انى مش هحاول اكتر من كده طلبت اقابله وقلتله اننا مش هينفع نكمل مع بعض
عارفة عمل ايه
منى :عمل ايه
افنان :قالي اننا متكافئين من الناحية الاجتماعية والثقافية والمادية وده مش سهل يتحقق مع اي حد ففكر تانى وبلاش اتسرع
كانه بحاول افض شراكة في مصنع ولا شركة معاه مش بفسخ خطوبة
ساعتها اتاكدت انى بعمل الصح
ده جهاز كمبيوتر مش انسان عملى بدرجة تخوف
تعرفي انه عمره ما قالي انه بيحبني وبيتهيالي مكنش هيقولها حتى لو اتجوزنا اي كلام فيه مشاعر مبيفهموش ولا بيحس بيه
اي حاجة مفيهاش ارقام وفلوس ومكانة اجتماعية وبرستيج خارج نطاق استيعابه وبره دايرة اهتماماته
كان هيتجوزنى يكمل بيا الصورة الاجتماعية بتاعته مدير شركة ناجح في شغله ومراته ذكية وجميلة ومن الطبقة الراقيه زيه
كانى عربيته اللي بيغيرها كل سنة ويجيب الاحدث منها
انا مش صفقة ومش هعمل مزاد او مناقصة علي شريك حياتى اختار فيها الاغنى ومش مهم اي حاجة تانية
منى :وسبتى الشغل ليه
افنان :لانى مش هينفع افضل اشوفه كل يوم في الشركة واتصرف انه عادى مفيش حاجة حصلت
هو مش فارق معاه ده قالي وانا بقدم استقالتى انى مش لازم اعمل كده وان الشركة هتخسر كتير لما واحدة بكفائتى تسيبها
بس انا مش هعرف وبصراحة مش حسا انى عايزة اشوفه اصلا
منى :تمام يا حبيبتى ربنا يقربلك الخير اهم حاجة انك مقتنعة باللي عملتيه ومش متضايقة
افنان بابتسامة:انا مقتنعة جدا انى عملت الصح ومش مضايقة خالص بالعكس
انا حسا انى رجعت حرة وخفيفة من تانى
منى :اهم حاجة انك مرتاحة انا همشي دلوقتى علشان ميعاد رجوع مايا وسيف من المدرسة سلميلي علي بابي ومامى كتير لحد منجيلهم في الويك اند
افنان :حاضر بوسيلي سيف ومايا لحد ما تيجو
مشيت منى اختي اكبر منى بتمن سنين متجوزة عن قصة حب كبيرة بينها وبين مازن ابن عمى وجوازهم كان حاجة متوقعة العيلة كلها كانت عارفة انهم لبعض من وهما صغيرين مازن مكنش بيخلي منى تلعب مع اى حد غيره حتى البنات اللي في العيلة ومنى طول عمرها بتحبه وبتسمع كلامه ولما كبرت كبر معاها حبها ليه وهو كمان حبه ليها بيزيد مع الوقت مبيقلش اول ما اتجوزو فضلو تلت سنين مبيخلفوش منى كان عندها مشاكل في الحمل بس مازن صبر وعمره ما اشتكى ولا حسيها انه حياته معاها ناقصها حاجة لحد ما ربنا رزقهم بالتوام مايا وسيف
انا بقي فضلت افكر بقالي اسبوعين قاعدة في البيت لا انا لازم ادور على شغل انا زهقت من قعدة البيت دى
سالت صحابي ومعارفى قالولي ان السوق نايم ومفيش شركة محتاجة حد في التسويق دلوقتي ما عدا شركة جديدة لسه فاتحة بس صاحبها فاتحها بقرض ووضعهم المادى لسه مش مستقر
فكرت لقيت ان ليه لأ شركة جديدة ولسه بتعمل لنفسها اسم في السوق
تحدى جديد ليا اثبت بيه جدارتى في الشغل واكيد هيبقي احسن من انى قاعدة في البيت مبعملش اي حاجة
رحت وقدمت السي في بتاعي وعملت انترفيو مع مدير الشركة
اللي هو هو نفسه صاحبها
يحيى :السي في بتاعك مبهر وقدراتك تستحق مقابل مادى اكتر بكتير من اللي الشركة بتاعتى تقدر تقدمهولك الي مش هيجى حتى نص اللي كنتي بتاخديه في الشركة اللي انتى كنتي بتشتغلي فيها قبل كده
انتى ليه عايزة تشتغلي معانا مع ان من السي في بتاعك واضح جدا انك تقدرى تشتغلي في مكان احسن
افنان :الشركة بتاعتك تحدى ليا شركة صغيرة لسه بتبنى لنفسها اسم في السوق لما تنجح وتكبر ابقي انا كمان نجحت وعملت حاجة كبيرة ومهمة
انما لما اشتغل في شركة اصلا كبيرة وليها اسمها التحدى هنا اقل وبيا من غيرى الشركة كده كده ناجحة
انا عايزة احقق نجاح محدش غيرى يقدر يعمله وده اللي ان شاء الله هعمله لما اشتغل معاكم هنا
يحيى :تمام جدا اتمنالك النجاح ويسعدنى انك تبقي جزء من الشركة تحبي نبدء شغل من امتى
افنان :من دلوقتى
يحيى :شكلك متحمسة جدا بس احنا النهاردة نخلص ورق توظيفك في الشركة ومن بكرة نبدء شغل علشان كمان نكون جهزنا مكتبك
افنان :تمام بعد اذنك
يحيى :اتفضلي
وخرجت وانا مبسوطة ومتحمسة جدا للشغل
تانى يوم رحت وبدءت اشوف الصفقات اللي الشركة متعاقدة عليها مكنتش كتير بس كبداية كانت كويسة وكمان شوفت الدعاية والاعلان اللي معمولين للشركة بدءت اهتم بالدعاية الالكترونية لانها مش مكلفة وليها تاثير قوى
كمان اتناقشت مع مستر يحيى في فكرة ان الشركة تشارك في مزادات خيرية وان مش شرط نشغل موظفين عندهم خبرة الشباب اللي لسه متخرج بيكون عندهم حماس اكتر وطاقة اكبر لانهم يثبتو نفسهم ومرتباتهم مش هتكون عالية زى مرتبات الموظفين اللي عندهم خبرة كبيرة
كمان الشباب دول هيكون عندهم ولاء وامتنان للشركة اللي دربتهم وصبرت عليهم وامنت بيهم وهما في بداية مشوارهم
هو وافقنى علي افكارى وعدل فيها شوية حاجات بس اغلبها عجبه من غير ميحتاج يعدل فيه
الشركة اسمها سمع في السوق وفي ظرف سنة وشهرين كنا مسددين القرض اللي مستر يحيى كان واخده قيمة القرض مكنتش كبيرة لانه كان باع ارض سابهاله والده الله يرحمه واخد قرض بضمان الفيلا اللي عايش فيها هو ووالدته علشان يقدر ياسس الشركة
وبعد ما سددنا القرض بقى صافي الربح اللي بنحققه لينا من غير ميتاخد منه جزء كبير لتسديد القرض لان مستر يحيى كان حابب يسدده في اسرع وقت
فكان بيخلى جزء كبير من ارباح الشركة لتسديد ديون الشركة ده طبعا بعد ما يدى للموظفين مرتباتهم
هو كان بيجى علي نفسه يعنى مثلا مجددش عربيته غير بعد ما سددنا القرض بتلت شهور
مستر يحيى انسان مبهر عقلية تجارية مبهرة شاطر جدا في عقد الصفقات وكسب ثقة العميل والحفاظ عليها
عرفت انه درس في امريكا ادارة اعمال وحضر ماجستير ودكتوراة فيها كمان
ولما رجع شركات كتير هى اللي عرضت عليه يشتغل معاهم اشتغل في شركة لمدة سنتين فهم السوق فيهم وبعدين ساب الشركة مع انه كان وصل لمكانة عالية فيها وصاحب الشركة مكنش راضي يقبل استقالته وحاول يقنعه يفضل معاهم حتى اغراه بترقية وزيادة في المرتب بس هو مرضيش
واصر انه ياسس شركة خاصة بيه
بمناسبة المرتب مستر يحيى بعد ما سددنا القرص بشهر طلبنى في مكتبه
افنان :قالولي ان حضرتك عايزنى
يحيى :ايوه انا كنت عايز اقولك ان مرتبك زاد الضعف طبعا هو كان المفروض يبقي كده من الاول وقدراتك في الشغل اصلا تستحق اكتر من كده
بس انتى عارفة الوضع اللي كنا فيه
الشركة بجد ممتنالك علي مجهوداتك فيها
وعندك حق اللي عملتيه في الشركة مكنش ممكن يعمله حد غيرك انا كنت حاسس انك بتبالغى بثقتك بنفسك بس طلع معاكى حق ومن غير مبالغة انتى قد اللي قلتيه واكتر كمان
وان شاء الله كل ما اوضاع الشركة المادية تتحسن مرتبك اكيد هيزيد
افنان :كلام حضرتك بالنسبالى اهم وافضل من اي تقدير مادى
انا مبقسش نجاحى بالفلوس المهم انى اكون فعلا شاطرة في شغلي والمكان اللي بشتغل فيه يكون مقدر مجهودى
يحيى :انا متاكد من ده وعلشان كده انا يسعدنى انك جزء من الشركة وجزء مهم كمان
افنان :متشكرة جدا لزوق حضرتك بعد اذنك
يحيى :اتفضلى
بقالي سنة ونص شغالة في الشركة وحسا انها بقت جزء لا يتجزء من حياتى نجاحها فعلا نجاح ليا بيسعدنى وبيزود ثقتي بنفسي وثقتى بان الاحلام بتتحقق الشركة دى كانت حلم مستر يحيى من وهو بيدرس
والحلم اتحقق اهو ونجح نجاح عظيم
كتير بشوفه بيتمشي في الشركة وكانه بيتاكد انه في حقيقة ومش بيحلم
اول واحد بيجى واخر واحد بيمشي عمره ما غاب عن الشركة غير اسبوع واحد
من شهرين لان والدته كانت بتعمل عملية وهو كان معاها في المستشفي بشكل مستمر والحمد لله قامت بالسلامة
مستر يحيى انسان بجد مش بس شاطر جدا في شغله لا كمان كل الموظفين بيحبوه من اول اكبر موظف في الشركة لحد الامن بتاع الشركة
مستر يحيى بعد اسبوع طلبنى في مكتبه
افنان :قالولى ان حضرتك عايزنى
يحيى :
افنان :مستر يحيى قالولى ان حضرتك عايزنى
يحيى : ها.. اه يا افنان اتفضلي اقعدى
اخبارك ايه
افنان باستغراب :انا بخير
يحيى :انا كنت عايزك... اااااه... عايزك تحدديلى ميعاد مع اهلك
افنان :ليه حضرتك
يحيى :لا متصعبيهاش عليا اكتر ما هي افنان ركزى معايا هكون عايز ميعاد مع اهلك ليه هشتكيكى ليهم هو انااااا بصراحة عايز اتقدملك
افنان :
يحيى :افنان انتى سامعانى
افنان :ايوه يا مستر سامعة حضرتك
يحيى :مستر وحضرتك بعد اللي سمعتيه ماشي
المهم طيب ايه رايك
افنان :فى ايه حضرتك
يحيى :في اللى قلته موافقة تاخديلى ميعاد من اهلك اجيب والدتى وعمى واجى اطلب ايدك
افنان :هو حضرتك فجاتنى طيب ممكن تدينى وقت افكر
يحيى :ماشي بس يا ريت تردى عليا بسرعة
افنان :ان شاء الله
ومشيت يومها وانا طول الطريق للبيت بفكر مستر يحيى عايز يتجوزنى
حسيت انى مش رافضة الفكرة انا من بعد مفسخت خطوبتى من مراد وانا مش حاسة انى هقدر اكرر التجربة تانى علشان كده مكنتش بوافق علي اي عريس يجيلي من وقتها بس مستر يحيى مختلف كتير عن مراد
فضلت يومين في البيت بفكر ومرحتش الشركة ودى كانت اول مرة اغيب عن الشركة من يوم ما اشتغلت فيها
خدت قرار انا هدى مستر يحيى فرصة انا كمان اكيد مش هفضل لوحدى طول عمرى
عرفت اهلى وحددت معاهم ميعاد يجى يتقدم فيه
ورحت الشركة بعد غياب تلت ايام عنها
ورحت لمستر يحيى مكتبه
افنان :صباح الخير انا اسفة علي غيابي الايام الي فاتت
يحيى :صباح النور مش محتاجة تتاسفي انتى اكيد كنتى محتاجة تفكرى من غير ضغوط المهم فكرتي
افنان :ايوه بابا بيبلغك تقدر تشرفنا بكرة الساعة تمنية
يحيى بابتسامة :تمام تمام جدا
افنان : انا هروح علي مكتبي بعد اذنك
وجه ميعاد مستر يحيى وجه هو ووالدته وعمه واتفقو مع بابا واخويا الكبير فريد علي التفاصيل وحددنا ميعاد الخطوبة
بالمناسبة انا اصغر واحدة في اخواتى عندى تمنية وعشرين سنة واخواتى فريد ومنى
مستر يحيى اكبر منى بسبع سنين عنده خمسة وتلاتين سنة والده متوفي وملوش غير اخت وحيدة عايشة فى امريكا مع جوزها وولادها
اتخطبنا انا ومستر يحيى وخلانى ابطل اقله يا مستر وبقيت اقول يحيى وبس انا ويحيى مختلفين فى الشخصيات شوية بس هو بيجرب معايا الحاجات اللي بحبها وانا بجرب معاه الحاجات اللي بيحبها
بقي شبهى شوية وبقيت شبهه شوية
انا فرحانة بالاختلاف اللي حصلي بسببه وبالتاثير اللي انا سبته في حياته
واهم حاجة ان انا وهو بنتصرف علي طبيعتنا قدام بعض من غير تجميل ولا تزييف
واتجوزنا بعد خطوبة اربع شهور وخلفنا حلا ورامى
اوقات بتبقي محتاج تصدق احساسك وتثق في قرارك حتى لو اللي حواليك قالولك انك غلط
انا اهلي مكانوش عايزنى اسيب مراد بس لما سبته قابلت يحيى واتجوزته وحياتى معاه احلي واحسن مليون مرة من الحياة اللي كان ممكن اعيشها مع مراد
اهلي كانو معترضين انى بعد ما كنت شغالة في شركة كبيرة اروح اشتغل في شركة جديدة لسه بتعمل لنفسها اسم في السوق بس انا اصريت علي رايي والحمد لله اتحديت نفسى ونجحت نجاح كبير مكنش ممكن انجحه في الشركه الاولانية
يحيى صحابه كانو ضد فكرة انه يسيب الشركة الكبيرة اللي شغال فيها ومنصبه الكويس المضمون ويروح ياسس شركة وياخد علشانها قرض
بس هو اتمسك بحلمه لحد ما خلاه حقيقة
صدقو احلامكم واتمسكو بيها واتعبو علشان تحققوها
واكيد ربنا هيقدر تعبكم وهيكرمكم وتشوفها قدام عنيكم حقيقة💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
