انا هبة ستة وعشرين سنة مهندسة غزل ونسيج
مش متجوزة ودى بالنسبة لاهلي ولاصجابى ولجيرانى ولكوكب الارض كله مشكلة كبيرة جدا
انا بالنسبالى نصيبى لسه مجاش ووقت ما ربنا يأذن هيحصل وهتجوز بس هما شايفين انى لازم اعمل حاجة لنفسي ومسكتش عالحال ده
ولما سالت طب اعمل ايه
لقيت ان لبسي واسع والمفروض اضيقه شوية
حطا حدود فى تعاملى مع الرجالة والمفروض اقلل حدودى شوية
ذكية وعندى فكر وراي مستقل والمفروض استغبى اعمل فيها غبية لان الرجالة مبتتجوزش ستات ذكية
قوية وبعتمد علي نفسي والمفروض اكون ضعيفة ومكسورة الجناح علشان سيد الرجالة اللي هيتجوزنى يحس برجولته وقوته
مفيش مشكلة اتجوز واحد اكبر منى بخمستاشر وعشرين سنة هيجرا ايه يعنى لو كان متجوز وانا زوجة تانية او مطلق او ارمل وانا هربيله الولاد مش كفاية انه هيخلصنى من لقب عانس وهيطمن اهلي عليا
وانى مخليش سقف احلامى عالى واستنى واحد من سنى او مش اكبر منى بكتير ومتجوزش زيى
لا ده انا منفعلوش وهيشوف واحدة عشرين ولا اتنين وعشرين سنة يتجوزها
طبعا انا مفهمتش وعلي ايه كل التنازلات دى هو مش المفروض اننا بنتجوز علشان نرتاح علشان السكن والمودة والرحمة مش علشان تنازل وذل وهوان
فمعملتش حاجة لنفسي وقصرت فى حق نفسي زى ما هما شايفين
دلوقتى انا فى اول يوم شغل ليا فى قسم الادارة و التخطيط
انا كنت فى قسم تصميم وسبته وطلبت نقلى
ليه لان بشمهندس عمرو زميلى الغير محترم بعد ما فضل شهرين بيحاول يقرب منى عامل فيها عاشق ولهان دايب فى دباديبي وانا بالنسبالى ايوه يعنى انت عايز ايه
متتقدم لاهلي يا بشمهندس فمديتلوش وش
فهو بقى اتقدم لبشمهندسة رانيا الي اصغر منى بتلت سنين اللي قالها ان انا اللي كنت بجرى وراه وبقا هو وهى وقسم التصميم كله بيتكلم عن بشمهندسة هبة اللي خلاص وضعها بقي صعب لدرجة انها بتوقع زميلها اللي يعينى متمسك بحبه لرانيا ملكة روحه والمتوجة علي عرش قلبه
فانا بعد ما هزقت عمرو قلتله كنت رميت نفسي عليه امتى وايه دليله وسالت بقية الزملا اللي بينمو عليا لحد ما تقريبا ذنوبى خلصت من كتر اللي خدوه منى وهما بيتكلمو عنى بالباطل كده سألتهم كانو أمتى شافونى بحاول اوقع ديك البرابر ده ولا حتى معبراه
سكتو وانا طلبت اتنقل فرع تانى للمصنع وطلبت كمان اروح قسم تانى علشان ميبقاش في اي احتمالية
اقابل عمرو او اي حد من زمايلي لاى سبب
رحت مكتب مدير الانتاج علشان ابدء شغل
بس تقريبا انا جيت بدرى لان هو مكنش فى مكتبه
اختى منة اتصلت عليا ورديت عليها
وانا بتمشي في المكتب كانى فى صالة بيتنا
بس انا متعودة اتكلم فى الموبايل وانا بتحرك
هبة :صباح الفل يا ست الكل اخبارك ايه
منة :انا تمام انتى عاملة ايه
هبة :اول يوم ليا في المصنع اهوه ادعيلي لحسن خايفة وركبى بتخبط في بعض
منة :ليه حد عاملك حاجة هناك
هبة :وهو انا لحقت يبنتى
وبعدين اصلا لسه مشفتش حد حتى مدير الانتاج معرفش انا اللي جاية بدرى ولا هو اللي متاخر وشكله كدا بيجى هنا فى وقت فراغه يتسلى انا سمعت انه سنه مش كبير فشكل الموضوع في واسطة وكوسة وبامية كمان
منة وهى بتضحك :يبنتى انتى لسه مقابلتيش الراجل حتى
اتقى الله فى نفسك
هبة :الله مش بقلك توقعاتى انا غلطانة انى بضيع وقتى الثمين على امثالك
منة بحزن :هو مفيش حد انا استاهل وقته فى الدنيا دى
هبة :انتى قلبتيها دراما يبقى كمال عملك حاجة
بصى انا هعدى عليكى بعد الشغل
انا هقفل دلوقتى علشان مدير الانتاج ميجيش يلاقينى بتكلم فى الموبايل شكلى هيبقي مش لطيف
منة :ماشى سلام
وبعد دقيقة مدير الانتاج جه
وليد :صباح الخير حضرتك بشمهندسة هبة
هبة :صباح النور ايوه حضرتك
وليد :انا بشمهندس وليد مدير الانتاج
انا دلوقتى هاخدك اوديكى قسم التخطيط انتى طلبتى تشتغلى فيه وهما هناك محتاجين حد لان بشمهندسة منهم قدمت استقالتها من يومين حظك حلو
المصنع التانى مدير الانتاج شكرلى فيكى كتير وقالى انك بتاعة شغل اتمنى يكون كلامه حقيقي لان هنا مفيش مكان غير للي بيشتغل بجد الواسطة والكوسة والبامية ملهمش مكان هنا
هبة بحرج :ان شاء الله اثبت لحضرتك ان كلام بشمهندس سامح عنى كان صح
وليد :تمام اتفضلي معايا
وخدنى ودانى لقسم التخطيط وانا فى نص هدومى ده شكله سمع هرتلتى مع منة ما شاء الله عكيت الدنيا من اول يوم ليا في المصنع يا ربى اعمل ايه فى لسانى اللي جايبلى الكافية ده
خلصت اليوم وطبعا مشتغلتش بس خدت فكرة عن نظام الشغل
ورحت لمنة البيت
هبة :مالك بقي في ايه
منة :كمال اتغير اوى يا هبة معاملته ليا كل يوم بتسوء عن اليوم اللي قبله واهماله ليا وللبيت بتزيد
هبة :كمال متغيرش يا منة ودى المشكلة كمال كده طول عمره انانى ومبيفكرش غير فى نفسه وتربية عمتو سحر ليه هى اللي طلعته كده
وانا نصحتك وقلتلك بلاش
انتى اللي قلتيلي كمال هيتغير علشانى
قلتلك صعب خصوصا انه اصلا مش مقتنع ان فيه حاجة غلط شايف انه صح وباقي الناس كلهم غلط
قلتيلي لا حبى هيغيره وكمان ماهو كل الرجالة كده
قلتلك ان لا مش كلهم كده ولو كلهم كده انتى مش مجبورة تستحملي وتقدرى ترفضي وتفضلى في بيت اهلك معززة مكرمة
قلتيلي مش هقدر اعيش من غيره وهكون تعيسة
دلوقتى انتى عايشة دلوقتى انتى مبسوطة
منة وهى بتبكى :لا مش مبسوطة ولا حسا انى عايشة انا بموت بالبطئ كل يوم انا تعبت يا هبة والله تعبت
هبة وهي بتحضنها :خلاص اهدى يا حبيبتى
انتى دلوقتى خلاص اتجوزتى كمال وبقا فى بينكم آسر ومريم استحملي علشانهم وركزى معاهم يا منة متفضليش طول الوقت بتفكرى في كمال وناسية ولادك
ربيهم كويس علميهم الصح ازرعى فيهم اللي عمتو سحر مزرعتهوش في كمال متخليش آسر يطلع انانى ولا مريم تطلع ضعيفة علميهم ان زى ما ليهم حقوق فهما كمان عليهم واجبات ربنا يفرح قلبك يا حبيبتى ويعوضك بيهم
منة :معاكى حق بلاش اخسر ولادى كمان انا هعيش علشانهم ومش هدفعهم تمن اختيارى الغلط لابوهم
هبة :بالظبط كده يا حبيبتى
انا همشى بقا يدوب اتعشى مع بابا وماما وانام علشان اروح الشغل بكرة
فضلت اسبوع بفهم نظام الشغل وطبيعته ومكنش ليا تعامل اوى مع بشمهندس وليد واصلا كنت بتحرج اوى لما اقابله مثلا فى الأسانسير وافتكر ان سمع كلامى مع منة
بعد اسبوع كنت فهمت الليلة ماشية ازاى وبدءت اشتغل بجد بقي
كان فيه حاجات لازم اتناقش فيها مع باشمهندس وليد وحاجات يوضحهالي وحاجات يمضي عليها
انا كنت خلاص نسيت اول موقف بينا
بس هو اللي تقريبا منسهوش كنت بحس انه مش طايقنى
بيتعامل معايا عادى بس انا كان عندى احساس انه مبيقبلنيش
مرة جه المكتب وساعتها كنت بتكلم مع زمايلي وبهزر وكنت بحكيلهم عن دكاترتى في الجامعة ومغامراتى معاهم هي كانت مغامرات بصراحة انا شفت ايام بيضا في الجامعة وهما كمان كانو بيحكو
كنا بنهزر كلنا غيرى فيه تلت بنات واتنين رجالة
بس انا هزارى مع الكل وكلامى للكل
المهم معرفش باشمهندس وليد طلع منين بوشه اللي بيخاف يضحك ليشقق ده
زعق وقال ان ده وقت شغل ومحناش قاعدين على قهوة
وخرج مفرق الجماعات هادم اللذات ده
طبعا الكل خرس وقعد يشتغل من سكات
احنا مكناش معطلين شغل يعنى ومش هيجرا حاجة لو فصلنا شوية ملوش لازمة اسلوب ناظر المدرسة اللي بيعاملنا بيه ده
مرة تانية كنت بخلص معاه ورق
هبة :تمام كده حضرتك ولا في حاجة ناقصة او غلط اعدله
وليد :لا بالعكس انتى واضح انك بتتعلمى بسرعة الشغل تمام ومفيهوش اي غلط
هبة بابتسامة :متشكرة اتمنى دايما اكون عند حسن ظن حضرتك
وليد :العفو اتفضلى على مكتبك
هبة :مش ممكن البنى ادم ده اكيد بيكرهنى
سلمى :مالك يبنتى بتكلمى نفسك ليه
هبة :بشمهندس وليد خلصت ورق مهم وخدته يشوفه وبساله لو في غلطات قال لا وقال انى بتعلم بسرعة
فرحت اول مرة يقول عنى كلام كويس
رديت عليه وانا فرحانة ومش مصدقة نفسي وقلتله انى متشكرة واتمنى اكون عند حسن ظنه دايما
وهو بدل ميقول حاجة يشجعنى بيها او يقدر مجهودى
لا الرجل الالى ده بمنتهى العملية قالى العفو اتفضلى على مكتبك كان ناقص يقولى ارفعى ايدك عالحيطة ويذنبنى
انا مش فاهمة هو مش طايقنى ليه كده
سلمى :اهدى بس على فكرة انتى فاهمة بشمهندس وليد غلط هو انسان زوق جدا علي فكرة وبيحب شغله اوى وشاطر فيه مبيغبش خالص واترقي ووصل للمكان اللي هو فيه ده بسبب اجتهاده وشغله الجبار زى ما يكون مبيعملش حاجة في حياته غير الشغل
وعلشان كده بيقدر الشغل واللي بيشتغلو وبيشجع اى حد فينا بيشتغل كويس
هبة :وبيجى عندى ويبقي جلنف وقليل الزوق زى ما اكون وقفاله فى زوره بالعرض معرفش قارش ملحتى ليه
سلمى وهي بتضحك :دى الفاظ بشمهندسة محترمة شاطرة في شغلها تقولها
هبة :يا ستى انا اصلا سواقة توكتوك وشغل ايه بقي اللي شاطرة فيه بمعاملة بشمهندس وليد ليا دى
ده تقريبا بيعطف عليا وسايبنى اشتغل معاكم شفقة
سلمى :لا من الناحية دى اتطمنى انتى اكيد شاطرة بشمهندس وليد ميعرفش ابوه فى الشغل
هبة :ولا يعرفو بره الشغل وحياتك
يلا حسبي الله هعمل ايه انا يعنى مضطرة استحمله
وبعد اربع شهور من معاملة بشمهندس وليد الغير مبررة ليا قررت انقل من القسم واشتغل في قسم تانى علشان يكون التعامل بينا اقل
كتبت طلب النقل ورحت اقدمهوله
وليد :ايه ده يا بشمهندسة
هبة :زى ما حضرتك شايف طلب نقل
وليد :هو حضرتك تخصص نقل مبتثبتيش في مكان
هبة :والله حضرتك الظروف بتضطرنى
وليد :ويا ترى بقي ايه الظروف اللي اتضطرتك للنقل
هبة :اسباب شخصية
وليد :نعم
هبة :اسباب شخصية حضرتك
وليد :اسباب شخصية حضرتى اااه طب انتى مش كاتبة عايزة تتنقلي قسم ايه
هبة :اي قسم يكون في مكان فاضي ومحتاجين حد
وليد :ده انتى عايزة تسيبى قسم التخطيط بالذات وتروحى اى حتة غيره وخلاص
هبة :اه..لا... ييييي عليا انا بنيل ايه
حضرتك انا عايزة اتنقل قسم تانى ومش مهم ليه
وليد :هو في حد من الباشمهندسين اللي معاكى ضايقك او حاول يتعدى حدوده
هبة :لا خالص والله هما قمة فى الادب
وليد :الباشمهندسات اللي معاكى عملولك حاجة
هبة :لا بالعكس احنا بقينا اصحاب
وليد :الشغل مش عاجبك بس انتى فهمتيه بسرعة وبقيتى شاطرة فيه
مش مرتاحة في الشغل طيب
هبة :لا الشغل تمام
وليد : ولما الشغل تمام واللي شغالين معاكى زى الفل عايزة تتنقلي ليه جنان
هبة بصدمة :جنان ... اه هو جنان حضرتك انا مجنونة وعايزة اتنقل كده من غير سبب
وليد :طب جنان بجنان بقي مفيش نقل
هبة :نعم علي فكرة انا ممكن اروح لاى حد حتى لو صاحب المصنع علشان اتنقل
ولا علي ايه انا باين كده مليش في شغل المصانع
انا اقدم استقالتى واخلص
وليد :هتهربي تانى
هبة :اهرب تانى وهو انا كنت هربت اولانى
وليد :لما سبتى المصنع الاولانى
مش كنتي بتهربي من كان اسمه ايه عمر .. عمرو باين
هبة :هو واضح ان اللي حكالك حكالك غلط
انا مهربتش من عمرو انا غورت من وشه لانى مكنتش طايقة اشوفه لا هو ولا اي حد من اللي هناك
ومدياهم من المنقي خيار قبل مسيبهلهم مخضرة
وليد بابتسامة :الفاظك ملهاش حل
وبتغورى من وش مين دلوقتى من وشي
هبة يتسرع :ما انت طلعت عندك سنان اهو امال كنت بتخاف تضحك ليه متردش انا اسفة دى حاجة متخصنيش
انا عايزة اتنقل عادى مش علشان حد هو لازم يكون في حد بمشي بسببه
وليد :يعنى مش بسببي مثلا
هبة :
وليد :ايه يا باشمهندسة مش سامعلك صوت ايه بسببي ولا لا
هبة :اقول لحضرتك ايه
لا بسببي انا
انا اللي واضح ان وجودى مش مريح حضرتك ومش طايقنى فانا بشيل عن حضرتك الحرج وبطلب اتنقل
علشان حضرتك ترتاح وانا كمان ارتاح
وليد : مين قالك انك لو اتنقلتى هرتاح
هبة :حضرتك مش محتاجة حد يقولى
حضرتك بتتعامل مع الكل بطريقة وبتعاملنى بطريقة
وليد :طريقة ايه بقي
هبة :طريقة مرات الاب اااا... قصدى يعنى بتتعامل معايا ناشف عنهم غلطتى مهما كانت صغيرة بالنسبالك كبيرة وغلطاتهم بتاخد حجمها الطبيعى بتشجهعم وانا لا
وانا لما لقيت ان حضرتك كده مع الكل ما عدا انا قلت ان اكيد المشكلة فيا فعلي ايه احنا نشيل ده من ده يرتاح ده عن ده وكفانا الله شر القتال
وليد :قتال انتى شايفة وجودك هنا قتال
هبة بحرج : هو مش قتال اوى يعنى
وليد وهو بيضحك جامد :لا كده طمنتينى مدام مش قتال اوى يعنى
بشمهندسة هبة يا ريت تتفضلي على شغلك انتى مش محتاجة تتنقلي ولا انا وجودك مش مريحنى
والقسم محتاج كفائتك في الشغل اتفضلي
هبة بقلة حيلة :بعد اذنك
وعدى اسبوع كان فيه بشمهندس وليد تقريبا بيتجنبنى وفى الاخر يقولى ان وجودى عادى ومش مضايقه
انا عملت اللي عليا وهو اللي مرضيش ينقلنى مليش فيه بقي هو حر
في يوم كان بشمهندس وليد في مكتبه هو مكتبه ازاز فانا شايفاه عمال يكلم نفسه رايح جاي في المكتب يكلم ويبص ناحيتى ويرجع يكلم نفسه وانا هموت واعرف بيقول ايه ده
وليد :سهلة هبة انا بحبك .. لا.. لا...هبة تتجوزينى
لا ..هبة انا بحبك تتجوزينى ...
مسك التليفون كلم سكرتيترته :مروة ابعتيلي بشمهندسة هبة علي مكتبي
مروة :حاضر يا فندم
وليد :اول مهتدخل هقولها هبة انا بحبك ..يالله الموضوع صعب ليه كده .. بسيطة هبة انا اتنيلت وحبيتك تقبلى تتجوزينى ...هبة انا عايز اتجوزك
الباب خبط
وليد :اتفضل
هبة :حضرتك عاوزنى
وليد :اه كنت عايز اقولك انى اتنيلت
هبة باستغراب :افندم
وليد :قصدى .. انا عايز رقم والدك
هبة :رقم والدى
وليد :اه رقم والدك ولا تحبي تاخديلي انتى منه ميعاد
هبة باستغراب :ميعاد تتقدملي فيه
وليد :لا ميعاد اجى اتفرج فيه علي بيتكم ايه يا هبة انتى غريبة ليه النهاردة اه ميعاد اتقدملك فيه
هبة :لا واضح ان انا اللي غريبة النهاردة
حضرتك اتفضل رقم والدى .......01
بعد يومين في بيت اهل هبة
سميرة :منورانا يا حاجة هناء تعالي بقى افرجك علي بلكونة الصالة حلوة والهوا فيها يرد الروح
هناء :منور بيكم اه طبعا هاجى اشوفها
وبصت ناحية علي سميرة فهمت قصدها
سميرة :يا علي تعالى معانا البلكونة
علي :حاضر
وسابو هبة ووليد لوحدهم
هبة :واديهم فضولك الجو وسابونا لوحدنا ها بقي ايه الحكاية
وليد :فضولى الجو ده علي اساس انى بعلقك مش بتقدملك هبة الله يكرمك مش وقت روحك المرحة دى انا متوتر لوحدى
هبة :هو انت دى اول مرة تتقدم فيها لواحدة وتقعد معاها
وليد :لا طبعا مش اول مرة
بس اول مرة تكون مش مكسوفة وبصا في الارض تعد الورد اللي في السجادة
فين حياء الانثى يا هبة
هبة :لا ما انا اتعودت وبطلت اعد ورد السجادة من زمان
وبعدين انا بشتغل معاك بقالي اربع شهور ونص يعنى اعرفك وواخدة عالكلام معاك
وليد :انا مش اول حد تقعدى معاه
هبة :انا ستة وعشرين سنة هتبقى اول حد اقعد معاه ازاي يعنى
وليد :عندك حق ومقبلتيش بحد من اللي قعدتى معاهم قبل كده ليه
هبة :لانهم مكانوش مناسبين وكمان لما كنت بستخير مكنتش بحس براحة
وليد :ومتخطبتيش حتى
هبة :لا الموضوع ده ضايق اهلي جدا بس انا فعلا محستش حد فيهم مناسب خالص الحاجات دى بتكون قسمة نصيب وانا نصيبي لسه مجاش
وانت خطبت قبل كده
وليد :لا
انا والدى مات وانا عندى عشر سنين
ووالداتى مرضيتش تتجوز بعده وعاشت علشان تربينى
وانا كنت مركز في دراستى وبعدها في شغلي وموضوع الجواز ده مكنش في دماغى
بس والداتى لما لقت ان سنى بقا تلاتين سنة ولسه متقدمتش لواحدة حتى بقت تكلمنى كتير في الموضوع
وانا علشان ارضيها كنت بروح اشوفهم
بس محستش ان ولا واحدة فيهم مناسبة
فضلنا عالحال ده سنتين لحد ما انا زهقت وقلت لماما تسبنى وانا لما الاقي واحدة مناسبة هاخدها ونروح نتقدملها وبقالي سنة مش لاقيها في اى واحدة بشوفها او اتعامل معاها
لحد ما شفتك
هبة :متقلش حسيت انها انا انت مكنتش طايقنى
وليد وهو بيضحك :لا معاكى حق
انا اول مشوفتك مكنتش طايقك بسبب الكلام اللي سمعتك بتقوليه في التليفون
انا دخلت مكنتش اعرف انك وصلتى مكتبي
دخلت وانتى كنتى مديانى ضهرك وبتتمشي في مكتبي كانه مكتبك فضلت واقف اتفرج عليكى واسمعك ولما لقيتك بتنهي المكالمة طلعت بره ودخلت تانى كانها اول مرة
هبة بحرج :انا اسفة علي اللي قلته
وليد :ولا يهمك المهم كنت شايف انك اكيد لعبية ومش بتاعت شغل بس مدير الانتاج في الفرع التانى لما سالته عنك قالي بالعكس وانك شاطرة في شغلك وان لولا اصرارك عالنقل مكنش سابك تمشي وسالته ايه سبب طلبك للنقل
قال ان في واحد من اللي معاكى في قسم التصميم اسمه عمرو حصل بينكم مشكلة وان عمرو ده غلط فى حقك وانتى ادبتيه ومقاليش اكتر من كده
انتي بقي اثبتى بشغلك انك شاطرة في الشغل
بس انا مكنتش ناسيلك اللي قلتيه في مكتبي
بس كنت بضايق لو شفتك بتتكلمى مع حد او بتضحكى حتى لو مع الكل ومش مع حد معين
وكنت بطلع ضيقي في انى اعاملك وحش لما اشوفك
مكنتش فاهم بعمل كده ليه
بس لما جيتى تطلبي تتنقلي بقيت مش عايزك تنقلي ولما لقيت انى مش قابل فكرة انك تروحى قسم تانى ورافض رفض تام قعدت افكر مع نفسي ليه
ليه مش عايزك تتنقلي وساعتها قللت تعامل معاكى لمدة اسبوع بس كان اسبوع رخم من غير كلامك وتعبيراتك اللي مبسمعهاش من حد غيرك دى فواجهت نفسي بالحقيقة
هبة :حقيقة ايه
وليد بابتسامة :حقيقة انى بحبك وبحب وجودك وكلامك وهزارك وبغير لما بشوفك بتتكلمى مع اي حد تانى
هبة بخجل بتحاول تداريه :ايه الصراحة المفرطة اللي انت فيها دى هو انا علشان غلطت وسالت تجاوب وتقولى كل حاجة كده مش اسلوب ده
وبعدين كفاية عليهم قعاد لحد كده في البلكونة هيجلهم برد انا هروح اندهلهم
وليد :استنى بس طيب انتى رايك ايه في اللي قلته
هبة :رايى تعرفه من بابا
بعد اذنك
بعد ست سنين فى شقة وليد وهبة
وليد :نيمتى الولاد
هبة : اه كالعادة احمد بينام اول ميحط راسه عالمخدة
وسارة بتسالنى كل الاسئلة الوجودية اللي في الدنيا الاول وبعدين تنام والله بيقي هاين عليا اصحى ابوجهل يؤدها ويخلصنى
وليد :حلو تطلع عليكى شوية من اللي كنتى بتعمليه فيا
هبة :وانا كنت عملت ايه بقي ان شاء الله
وليد :جننتيني معاكى نشفتى ريقي علي ما قلتيلي انك بتحبينى
اتخطبنا اربع شهور مقلتيهاش فيهم ولا كنتي سايبانى اقولها وبعد كتب الكتاب مقلتيهاش غير بعد شهر لما كنت خلاص هبوس ايدك علشان تقوليها
هبة :الله ما هو حرام تقولها واحنا مخطوبين يا وليد نغضب ربنا من الاول ليه بس
وليد :وبعد كتب الكتاب
هبة :كنت مكسوفة
وليد :نعم ياختى كنتى ايه ده انتى لسانك اطول من المحور
هبة وهي بتضحك :ملهاش علاقة علي فكرة انا بقول كل حاجة واجى عند الكلام الحلو واقلب بطة بلدى
و يا سيدى ادينى هعوضك انا بحبك وبموت فيك وانت نصيبي وحقي اللي متنازلتش عنه ولا قبلت باقل منه
وقدرى الحلو وسكنى وقرة عينى وعوض ربنا ليا عن كل حاجة اتحملتها من اهلي وصحابي وكل الي يعرفونى لحد ما ربنا رزقنى بيك الحمد لله
وليد :اللهم صلي عالنبي جرعة كلام حلو مركزة حاسس انى هموت من الفرحة والله
هبة :عليه افضل الصلاة والسلام
بعد الشر عليك ربنا يبارك في عمرك ويخليك ليا انا واحمد واينشتاين بنتك اللي هتجننى دى وميحرمناش منك ابدا
وليد :ولا يحرمنى منكم يا رب يا هبة يا فرحة عمرى كله يا هدية ربنا ليا انا بشكر ربنا علي نعمة وجودك في حياتى انتى وولادنا كل يوم الحمد لله حتى يبلغ الحمد منتهاه💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
