حمزة :برضه عملت اللي فى دماغك وبعت الشقة
نادر :مكنش ينفع مبعهاش يا حمزة مكنتش هقدر أعيش فيها مع غيرها ولا كنت هقدر تعيش فيها غيرها ومفتكرش انها كانت المفروض تبقي هى اللي عايشة معايا فيها
كان لازم ابيع الشقة زى ما هى باعتنى
بس انا بعت الشقة بالغالي وكسبت فيها
انما هى باعتنى بالرخيص
ليه يا حمزة ليه بقالي تمن شهور بفكر هى عملت كده ليه
حمزة :مش عارف بس الاكيد انها متستاهلكش يا نادر
نادر :عارف قالتلي ايه وهى بترجعلى الشبكة
حمزة :قالتلك ايه
نادر :قعدت تسمعنى كل غلطة غلطتها من يوم ما اتخطبنا
كل كلمة وكل فعل وقالتلي انها تستاهل حد احسن منى
قالت انى مرتاح معاها بس هى مش مرتاحة معايا
انا كنت حاسس انى عايز اضحك
بجد ده السبب انى كنت بعدلها ومبقفلهاش عالواحدة بقت حاجة ضدى خليتها تشوف انها احسن منى
انت عارف كتير كنت ببقي عايز الومها واعاتبها علي غلطات ليها واوقات كنت ببقي عايز اكسر دماغها علشان بتعمل حاجات متتعملش ومبتقدرش ولا بتخاف عليا ولا بتفكر فيا قبل متعملها
بس كنت بقول لنفسي بلاش هى اكيد مش قصدها بلاش اخنقها بكتر الانتقاد لانها مش هتفهم انها نصايح
بكرة تفهم بكرة تعقل بكرة تقدر
ولما جه بكرة ده لقيتها بتسبنى وعايزة حد احسن منى
حمزة :علشان غبية يا صاحبي حست بقيمتها ومفهمتش ان انت اللي اديتها قيمتها دى بكرة تعرف قيمتك وانها خسرت كتير لما ضيعتك من ايدها
لما تقابل اللي زيى هتعرف قيمتك يا نادر
ولما تقابل الاسوء منى هتعرف قيمتك اكتر وهتندم ندم عمرها
انت مفيش زيك بس هى واللي زيها كتير صدقنى
وانا كمان في منى كتير عارف انا متمسك بصداقتنا ليه
نادر :علشان جيران من زمان
حمزة :مش بس كده كمان علشان عارف ان مفيش زيك كتير يا نادر واحد مستعد يدى للي بيحبهم عينه ويجى علي نفسه علشانهم انا معرفش حد غيرك كده انا نفسي مش كده انا لو كان عندى اخت صغيرة عنى كنت جوزتهالك غصب عنك
لانى عارف انى مش هلاقى احسن منك أامنه عليها بس اعمل ايه اخواتى البنات اكبر منى واتجوزو خلاص
نادر :تسلم يا حمزة انت كمان اخويا اللي امى مجابتوش والله
بس انا مش فاهم برضه هى ليه عملت كده ليه كان سهل عليها تعمل كده مع انه كان صعب عليا انا غلطت في ايه
حمزة :انت مغلطتش يا نادر هى اللي غلطت غلط عمرها وبكرة تندم مش هيبقي عندها حاجة تعملها غير الندم
وانت ربنا هيعوضك يا صاحبي لانك تستاهل
نادر :يا رب يا حمزة يا رب
انا نادر تمنية وعشرين سنة دكتور صيدلى
واللي كنت بكلمه ده حمزة صاحب عمرى وجارى
واللي كنت بتكلم عنها دى ملك اللي كانت خطيبتى هى كانت بتدرب في الصيدلية بتاعتى وكان فاضلها سنتين وتتخرج بعد ما بدأت تدرب بشهر انا اتقدمتلها حسيت انها مناسبة
كان نفسي يكونلها حظ من اسمها وتبقي ملك فعلا
ملك يملا حياتى سعادة وحب بس الملك طلع شيطان
او يمكن طلعت بشر مجرد بشر وانا اللي كنت مفكرها ملك
هى اصلها شكلهم من بره شكلهم جميلة ورقيقة كنت مفكر انها مستحيل تقدر توجع عصفورة حتى واديها كسرت قلبي ووجعتنى اتخطبنا ست شهور وبعدها هى سابتنى
وانا بقالى تمن شهور بسال نفسي ومش لاقي اجابة ليه
عملت كده ليه عرفتها ليه طيب مدام هى مش نصيبي
انا عندى تلت اخوات بنات ووالدى متوفى
امى ربتنى انى اتحمل المسئولية بس فهمتنى ان المسئولية مش بس فلوس وصوت عالي وتحكم في اخواتى لا
فهمتنى انها كمان مراعاة لمشاعرهم فهمتنى انى مسئول اكون سندهم وصاحبهم انى اكونلهم اب كمان بعد بابا
قالتلي انهم لو حبونى هيخافو يزعلونى ومش هيغلطو ولا يخبو عنى حاجة حتى لو انا مش شايفهم
انما لو خافو منى هيكرهونى وهيغلطو لما اكون مش شايفهم
قالتلي انى مسئول عنهم افرحهم واسمعهم كلام حلو عن نفسهم واحتويهم بدل ميسمعو من بره بدل ما يدورو علي حد بره يحتويهم
قالتلي ان اللي بيزرع خير وحب بيحصدهم واللي بيزرع شر وكره بيحصدهم وعلشان كده دايما بحاول ازرع خير وحب بس انا رزعت خير وحب مع ملك ليه الطرح كان شر ووجع ليه
اخواتى واحدة فيهم اصغر منى باربع سنين اسمها سلمى ودى اتجوزت
دايما كانت بتقولى انها عايزة تتجوز واحد زيى يكونلها سند بجد اخ وصاحب واب كمان اتجوزت ابن عمنا
والاتنين التانين نوران ونور تؤام فى اولي كلية تجارة
امى علمتنى اعمل لاخواتى اللي كان نفسها اخواتها الرجالة يعملوه ليها هى وخالتى سمية بس اخوالي قاسين اوى
انا مبشفهمش كتير مبيسئلوش علينا موقفوش جنبنا بعد موت بابا موقفوش جنبنا عمرهم في اي حاجة
خالتى سمية عندها بنتين واحدة اسمها اسماء ودى اتجوزت والتانية اسمها رضوى ودى لسه
من تلت سنين وامى بتكلمنى انى اخطبها بس انا مكنتش بوافق هى اصلها مشدتنيش ليها بصراحة
شكلها عادى وانا مليش كلام معاها كتير
اتخطبت من ست شهور واتفسخت خطوبتها بعد تلت شهور
وامى رجعت تزن عليا تانى
رجعت البيت اتعشيت مع امى ونور ونوران
وبعدين فتحت فيس لقيت ملك رافعة تانى صورة ليها مع خطيبها وتانى كتبا عنه انه كل حياتها وانها مكنتش عايشة قبله وانه حب عمرها مخطوباله من شهر ومن اول يوم بقي حب عمرها
انا مش عارف انا بدخل صفحتها ليه يمكن علشان الاقي الاجابة لسؤالي هى عملت كده ليه بس ملقتهاش
هى سعيدة وعايشة حياتها واتخطبت ومبتفكرش فيا اصلا وانا اللي لسه بفكر وبسال نفسي ليه
لما شفت تعليقات صحابها وتعليق حب عمرها أسر خطيبها
وشفت قد ايه هى سعيدة ومبسوطة لقتنى بسال نفسي انا عامل في نفسي كده ليه وعلشان ايه
ورحت لامى قلتلها انى عايز اخطب رضوى
مش تسرع لا انا مش شخص متسرع ولا هلعب ببنت خالتى واجرب انسي بيها واحدة
انا بس فكرت انى لازم حياتى تمشي هفضل موقفها لحد امتى واخترت رضوى لانى رفضت الفكرة قبل كده كتير وملك كانت النتيجة نشوف اختيار امى يمكن يطلع مناسب واحسن من اختيارى
واتقدمت لرضوى وهى وافقت واتخطبنا
فضلنا شهر مخطوبين وانا مش عارف اقرب منها وهى واضح انها مستنية انا اللي افتح بنا مجال للكلام
كنا بنتكلم مرة في الموبايل وكنت عايز المكالمة بنا تطول عن الدقيقة ونص بتوع كل مرة
كمان لقيت صورة لملك وسي اسر حب عمرها قدامى عالفيس لقتنى بمنتهى الغباء بسأل رضوى أغرب سؤال ممكن واحد يساله لخطيبته فى اول مرة بيحاول يفتح معاها كلام
