امل :ايه يا ابرار ده كل واحدة فينا جايبالها سندويتش ولا اتنين وانتى جايبة خمسة فى عين العدو
ولاء وهى بتضحك :اوعى تفهميها صح مش فجع لا دى هى بس خايفة من الحسد
اسيل وهى بتضحك :لا والبيبسي عادى مش دايت كمان لا يا ابرار كده هبت منك على الاخر
امل وهى بتضحك :يا بنتى انتى طويلة وجسمك زايد بقيتى هجمة فاضلك ستة سبعة كيلو وتبقى مربعة
ابرار وهى بتضحك :مربعة بقى ولا مدورة مش فارقة انا هروح الحمام اغسل ايدى ماشى
وسيبتهم ودخلت الحمام فضلت اعيط زى كل مرة يهزرو ويغرزو فى قلبى سكاكين بكلامهم ويمسحو بكرامتى الارض وانا اسكت ولا مش بس كده المفروض اضحك ما هما بيهزرو بقى والا ابقى قفل واوفر ومليش فى الهزار
هزار ايه ده اللى يخلينى اعيط العياط ده تقريبا كل مرة اشوفهم فيها ده مش هزار ده وجع قلب
بس بقول يمكن مش قصدهم يمكن يزعلو لو رديت خايفة اخسرهم علشان مبقاش لوحدى بس هو علشان مخسرهمش اخسر نفسى
مسحت دموعى وغسلت وشى ورجعتلهم خلصنا اكل وروحنا الدرس وكأن مجراش حاجة وكأنى معيطش لحد ما كنت حاسة انى هموت من كتر العياط لوحدى فى الحمام
بعد شهر
ولاء :الواد وائل كمال اللى فى تالتة ارتبط بالبت نيرمين اللى فى دفعتنا
امل :نيرمين المسلوعة المقشفة دى اخسى زوقه وحش اوى
اسيل :عرفتى منين يا ولاء
ولاء :منزلة صور ليهم حالات على الواتس الجاحدة عايزة تغيظ بنات الدفعة بقى
امل :وهو وائل ده يتزعل عليه بعد ما ارتبط بنيرمين دى خلاص نزل من نظرى
ولاء بخبث :ساكتة ليه يا ابرار ليكون قلبك اتكسر ولا حاجة مش ده حبيب القلب برضه
امل وهى بتضحك :حبيب قلب مين اكيد لا مش ابرار يعنى هو اه زوقه طلع معفن بس مش لدرجة ابرار برضه اعقلو الكلمة
ابرار :وانا منفعش ليه بقى يا امل
امل وهى بتضحك :فين السؤال معلش انا احط ايدى على السؤال اجاوب على طول
ولاء وهى بتضحك :انتى بتسألى اسئلة مش منطقية يا ابرار
ابرار :طيب من غير تقل دمكم اللى يلطش وهزاركم السخيف ده اتكلمو عدل وجاوبو سؤالى منفعش ليه ناقصنى ايه
امل وهى بتضحك :لا مش ناقص هو زايد اوى الصراحة
ابرار :حتى لو
ده معناه انى متحبش مستاهلش انه يبصلى
امل :يبصلك على ايه ان شاء الله
ولاء :انتى محدش ممكن يبصلك لا دلوقتى ولا بعدين
ابرار :انتو مش ممكن تكونو صحاب ازاى تقولولى كده
امل :هو علشان بنقولك حقايق نبقى مش صحاب
ولاء :ولا هى كلمة الحق بتوجع
ابرار :مش كلمة الحق اللى بتوجع قسوة قلوبكم ياللى معندكيش دم منك ليها هى اللى بتوجع
انتو مش شايفين حد حلو غيركم انا مربعة ونيرمين مسلوعة ومقشفة ومنة نخلة وجيهان بضب خلاص انتو يعنى اللى ملكات جمال ما انتو كمان فيكم عيوب
سنانك محتاجة تقويم يا امل اعمليه بدل ما انتى مبتضحكيش فى الصور كده علشان خايفة يبانو مش علشان شكلك بيبقي احلى وانتى ضامة شفايفك زى ما بتقولى وشعرك الخشن اللى شبه سلك المواعين يا ولاء انتو مليانين عيوب واسوء عيب فيكم انكم لا عندكم دم ولا قلب وانا مش عايزة اعرفكم تانى خلاص
امل :احنا اللى ميشرفناش نصاحب واحدة زيك
ولاء :يلا غورى من هنا ومتفكريش تيجى تتكلمى معانا تانى
