على الماسينجر
نورا :على فكرة ده طبيعى
اللى بيكون يمين اوى لما بيتغير بيبقى شمال اوى
عمرو بصدمة :شمال اوى..انا شمال اوى يا نورا اعمل فيكى ايه انتى ولسانك اللى عايز يطهر بديتول ده
نورا وهى بتضحك :يا سيدى مش قصدى شمال شمال يعنى
قصدى ان اللى بيكون على حال ويتعب منه لما بيتغير بيبقى نقيض الحال ده
مش هقولك ابيض بيبقى اسود علشان متقوليش اسود انا اسود يا نورا
بس خليها انك اتحولت من اقصى الشرق لاقصى الغرب
عمرو :هو انتى علشان خريجة اداب قسم جغرافيا هيبقى كلامك كله اتجاهات وتضاريس كده
نورا وهى بتضحك :ورياح عكسية وتجارية كمان هو علشانى ده علشان اثبتلكم انى مجتهدة
عمرو :طيب من رايك انا المفروض اعمل ايه
انتى عارفة ان رايك ملوش لازمة بالنسبالى بس برضه عايز اعرف رايك
نورا :رايى ملوش لازمة تسلم يا برو
رغم دبشك ده بس انا هبقى جدعة وهقولك رايى
عمرو :ايوه اللى هو ايه بقى رايك
نورا :متعملش كده يا عمرو متتحولش لظالم بعد ما كنت مظلوم
المظلوم بيستنى ربنا يعوضه
انما الظالم بيبقى خايف من عقاب ربنا
خليك مظلوم متبقاش ظالم
انت حبيتها وهى طلعت متستاهلش باعتك وغدرت بيك
تفتكر الحل هو انك تكفر بالحب وتتحول لبتاع بنات
عمرو :اومال ايه الحل
نورا :انساها وانشغل بحياتك واستنى عوض ربنا ليك
خليك مظلوم علشان تستنى العوض متبقاش ظالم علشان متستناش العقاب
عمرو :وعوض ربنا هيكون واحدة احسن منها
نورا :ممكن وممكن يبقى رزق كبير فى شغلك او فلوس هتجيلك او ان ربنا يكفيك شر او ينجيك من حاجة وحشة
العوض ليه اشكال كتير
انت مش مرتاح يا عمرو لان ده مش انت
ارجع لقديمك علشان ترتاح
عمرو :ارجع ضعيف
نورا :لا ارجع راجل
راجل بجد راجل كلمته عهد راجل مبيلعبش بمشاعر بنات الناس
الحب بيكون ضعف لما تحب الشخص الغلط انما لما تحب الشخص الصح الحب بيكون قوة
عمرو :كرهتنى فى الحب
نورا :هى غلطت فى حقك متغلطش فى حق بنت انت وتكرهها فى الحب وفى حياتها كلها
عمرو :انا مش وحش اوى كده
نورا :انت مش وحش اصلا يا عمرو
اللى بتعمله ده رد فعل طبيعى بعد اللى هى عملته فيك
بس كفاية كده والله لا كرامتك ولا جرح قلبك هيتداوو باللى انت بتعمله ده
انت انسان كويس وروحك حلوة وقلبك ابيض متخليش اللى هى عملته يخسرك نفسك ويغيرك للاسوء
عمرو :هى متستاهلش صح
نورا :صح هى متستاهلش وانت كمان متستاهلش تتغير للاوحش بسببها انت احسن من كده بكتير
عمرو :تمام انا هقفل علشان عندى شغل بكرة تصبحى على خير
نورا :وانت من اهل الخير
بعد شهرين
نورا :عمرو انا سيبت زياد
عمرو :ايه ليه استنى هرن عليكى..سيبتيه ليه
نورا :انت اتصلت ليه
عمرو :الموضوع مهم مينفعش نتكلم عنه ماسينجر
نورا :اه مواضيعى انا تتصل بيا ونتكلم عنها صوت انما مواضيعك نتكلم عنها كتابة
عمرو :نورا انجزى سيبتى زياد ليه
نورا :طلب يجى لاهلى علشان يتقدملى
عمرو :سيبتيه علشان طلب يتقدملك انتى مجنونة يا نورا
نورا :لا سيبته علشان بيحبنى..
عمرو قاطعها :لا انا كده اتاكدت انك مجنونة
نورا :متقاطعنيش وادينى فرصة اكمل كلامى
انا سيبته علشان هو بيحبنى بس انا مبحبوش ومش معقول نتخطب ونتجوز وهو بيحبنى وانا مبحبوش
عمرو :وارتبطى بيه ليه لما انتى مبتحبيهوش
نورا :علشان زن عليا كتير علشان نرتبط قالى هخليكى تحبينى وقولت اديله فرصة يمكن احبه بس محبتوش
حتى لما قولتله انه مينفعش يتقدملى علشان انا مببادلوش نفس مشاعره قالى حبى ليكى هيكفينا احنا الاتنين بس انا اتمسكت برفضى واصريت اننا نسيب بعض وكفاية اوى على علاقتنا لحد كده
عمرو :هو مش المثل بيقول خد اللى بيحبك مش اللى انت بتحبه
نورا :ده مثل انانى واللى بيحبنى ده مش من حقه انى احبه زى ما بيحبنى وابادله مشاعره
عمرو :ما انتى ممكن تحبيه
نورا :لو كان ممكن احب زياد كنت حبيته
عارف فكرة انه بيحبنى وانا مبحبوش دى كانت محسسانى بالذنب جدا ومضايقانى اقوم اتخطبله ونتجوز علشان ازود واكبر احساسى بالذنب
لا انا عملت الصح برغم انى مضايقة علشان اكيد كده انا جرحته ووجعته بس برضه انا حاسة انى عملت الصح
استنى انا اللى احبه ويدور هو على اللى تستاهل حبه اللى تحبه هى كمان من كل قلبها
وجع قلبه دلوقتى اهون من وجع قلبه وكرامته لما نتجوز وانا مبحبوش ولا تحصل المصيبة الاكبر واحب حد تانى وانا معاه
عمرو :مش عارف اقولك ايه بس كلامك بالعقل صح
نورا :وبالقلب كمان صح انا بديله فرصة يلاقى اللى تحبه وبدى نفسى فرصة الاقى اللى احبه برفض نخوض سوا تجربة جواز هتفشل
