في يوم عادى من ايامى العادية في البنك اللي شغالة فيه حصل حاجة مش عادية خالص الحلم اتحقق وانتظارى بقاله نهاية شفته واقف قدامى وبيكلمني بيكلمني هو بيقول ايه
ادهم :لو سمحتي حضرتك انا كنت عايز افتح حساب باسمى
هو حضرتك سمعانى
رانيا :ها اه سمعاك حضرتك هيبقي باسم مين وهتحط فيه قد ايه
وبعد ما فتحتله الحساب وحط المبلغ اللي هو عايزه وانا مش عارفة بعمل ايه وكل خمس ثواني ابص اتاكد انه قدامى فعلا
ادهم :تمام شكرا بعد اذنك
ومشي ايه ده مشي بجد انا ازاي سبته يمشي
روحت البيت كلمت منى اختي
راينا :مني شفته يا مني شفته انا مش مصدقة نفسي
منى :شفتي مين يبنتي اهدى وفهمينى حصل معاكى ايه
رانيا :فتي احلامى زوج المستقبل شفته يا منى وطلع اسمه ادهم كمان اسمه حلو اوى
منى :شفتيه فين ده
رانيا :في البنك كان جاي يفتح حساب باسمه انا بحب البنك وبحبك وبحب الدنيا كلها
منى :كلمتيه طيب بيشتغل ايه عنده كام سنة
رانيا :اكلم مين يا منى انا مكنتش مصدقة انه قدامى اصلا وخلصتله شغله بالعافية الحمد لله انى عرفت اخلصه
منى :نععععععم رانيا ده ممكن يكون مجوز ومخلف تلاتة
رانيا :لا مش متجوز
منى :وجبتي منين الثقة دي
رانيا :من قلبي طبعا بصي اقفلي يا مني انا غلطانة انى كلمتك
قال متجوز قال مجنونة منى دى
فتي احلامى زوج المستقبل بقالي تسع مستنياه رفضت ناس كتيييييييييييير جدا لاني لما شفتهم محستهمش هو
بابا وماما الله يرحمهم رفضي ده كان متضايقهم خصوصا ماما ايمن اخويا اتجوز وسافر ومني اللي اصغر منى اتجوزت وانا مستنية الوهم ده اللي ماما شايفاه هي خايفة عليا لو جرالهم حاجة هيبقي ماليش حد وعايزة تفرح بيا وتطمن عليا زى اي ام بابا كان متفهمني اكتر من ماما بس برضه مكنش راضيه رفضي منى بقي كانت شايفاه جنان هي اتجوزت صالونات واحد متعرفوش ولا هو كان يعرفها لحد ما شافها في عيد ميلاد صاحبتها واديها مبسوطة في حياتها وعندها كارما دلوقتي بابا مات من اربع سنين سنين وماما بعده بسنة جالها ورم انا اللي كنت معاها دايما في المستشفي وفي البيت تسع شهور كانت بتتعالج اخدتهم اجازة من شغلي علشان ابقي معاها وبعدين ماتت هي كمان وبقيت لوحدى بس مني جوزها بيسافر كتير بتيجي تقضي ايام سفره معايا هي وكارما اخويا كمان لما بينزل اجازة بيجي هو ومراته وولاده يقعدو معايا حاول يقنعني اسافر معاه بس انا رفضت
المهم انى اخيرا شفته بس هو انا هشوفه تاني امتى
عدى تلت شهور وانا مستنياه يجي تاني وفعلا جه كان جاي يسحب مش يودع المهم انه جه المرة دى كنت مركزة اكتر ومش مصدومة زي المرة اللي فاتت خلص وكان ماشي
لقتني بجري وراه
رانيا :لو سمحت
ادهم: ايوه يا
رانيا :رانيا
ادهم :حضرتك ندهتيني فى حاجة
رانيا استجمعت شجاعتها وقالت الكلام مرة واحدة قبل متخاف وترجع في كلامها :ايوه هو حضرتك ممكن تتجوزنى
ادهم بصدمة:نعم
رانيا :حضرتك ممكن تطلب ايدى من اهلي وتتجوزنى
ادهم :انتي بتقولي ايه انتي مجنونة انا معرفكيش حتى
رانيا :ايوه ما احنا هتتخطب فترة تعرفني واعرفك ولو انى مش محتاجة
ادهم :انتي واعية للي بتقوليه انا ممكن اكون متجوز ومخلف او بحب وفي حياتى حد او تاجر اعضاء حتي انتي مجنونة
رانيا :لا انت ولا حاجة في دول انا عارفة
ادهم :وعارفة منين بقي ان شاء الله
راينا :احساسي وانا احساسي بيك ميكدبش
طيب هو انتي رافض ليه شكلي وحش اخلاقي مش عجباك طيب ايه اللي ناقصنى بس
ادهم :يا انسة افهميني انا معرفكيش اصلا علشان يبقي في اللي انتي بتسالى عنه ده
راينا :مانا قلتلك نتخطب وتعرفني
ادهم :وهو انا اي واحدة هتوقفني في الشارع وتقولي اخطبني هخطبها يعني
رانيا :اكيد لا بس هو انت مفكرنى كل يوم بوقف واحد في الشارع اقله تعالي نتخطب
ادهم :امال ايه مانا مش فاهمك بصراحة
رانيا :طيب ممكن نقعد في مكان نتكلم طيب
ادهم :تمام اما اشوف اخرتها
رانيا :يمكن انا بدءت الموضوع بطريقة غلط طيب ايه رايك نبقي اصحاب
ادهم :صحاب خلاص مش عايزاني اجوزك يعني
رانيا :لا طبعا عايزة بس انت مش شايفني زي ما انا شايفاك انا عايزة اديلك فرصة تعرفني وتاخد وقتك وتشوفني زى ما انا شايفاك بالظبط
ادهم :وافرضى محصلش
رانيا :هيحصل ربنا مش هيكسر بخاطرى ولا هيعلقني بيك وانت مش ليا ربنا ارحم من كده بكتير انا بقالي تسع سنين مستنياك ومستعدة يبقو اتناشر وعارفة انك هتشوفني زي ما انا شايفاك بسرعة ومن غير متحس
ادهم :ثقتك بنفسك مخيفة
رانيا :ثقة في ربنا وفيك مش في نفسي
ادهم :وانا موافق
بقا عندي فضول اعرف سر القوة اللي بتتكلمى بيها والثقة اللي في عيونك دى
رانيا وهي بتمدله ايدها :تمام كده احنا اصحاب خد رقمى بقي وهات رقمك
ادهم :تمام
عدى يومين مكلمتوش انا استنيت تكون منه هو اول مكالمة
وكلمني بعد ما اتنطط شوية من الفرحة وانا شايفة اسمه عالتليفون رديت قبل ميقفل خفت ميتصلش تاني
رانيا :الو ادهم اذيك
ادهم :انا تمام الحمد لله انتي اخبارك ايه
رانيا :بخير الحمد لله
كارما :رانى انا جعانة
رانيا :ادهم خليك معايا لحظة لو سمحت
ايه يا كوكى مامى نامت وسابتك تعالي طيب نعمل احلي سندوتشات لاحلي كوكي في الدنيا
ادهم معلش كنت بكلم بنت اختي
ادهم :ولا يهمك انتي عندك اخوات قد ايه
رانيا :اتنين ايمن وده متجوز ومخلف يوسف وسيف بس عايش في امريكا ومني ودى متجوزة وخلفتلنا احلي كارما في الدنيا كلها
ادهم :وانتي ترتيبك الكام وسط اخواتك
رانيا :انا اللي في الوسط ايمن الكبير ومني الصغيرة
وانت عندك اخوات
ادهم :لا انا وحيد كلميني عن نفسك انا معرفش عنك حاجة
رانيا :انا يا سيدى درست بزنس في الجامعة الامريكية عندى تمنية وعشرين سنة بشتغل في البنك اللي شفتك فيه بقالي تلت سنين والدى ووالدتي متوفين
ادهم :ربنا يرحمهم
رانيا :وانت احكيلي عن نفسك
ادهم :انا ادهم اتنين وتلاتين سنة متخرج من كلية تجارة وعندى شركة استيراد وتصدير كانت بتاعت والدي واشتغلت معاه لما اتخرجت ولما مات مسكتها لوحدى
رانيا :ربنا يرحمه
ادهم :امين قوليلي بقي انتي ايه اتجوزتي قبل كده ارملة او مطلقة ولا انسة طول عمرك
رانيا :لا انا انسة مسبقليش الجواز
ادهم :انا بقي مطلق
رانيا : اتجوزتو ازاي
ادهم :كانت معايا في الجامعة وكنت اعرفها بعد ما خلصنا جامعةاتجوزنا سنتين بعدين اتطلقنا
رانيا :كان ايه سبب الطلاق
ادهم :هي طلبت الطلاق لاننا فضلنا سنة ونص مع بعض ومخلفناش ولما رحنا للدكتور وعملنا تحاليل طلعت هي تقدر تخلف بس انا صعب ومحتاج علاج ممكن ياخد سنين بعدها بست شهور هي طلبت الطلاق وانا طلقتها
رانيا :لسه بتحبها
ادهم :لا احنا متجوزناش عن حب ولا حتي بعد الجواز حبينا بعض ولا حتي حب العشرة هي كانت مقضيا وقتها خروجات مع اصحابها وانا كنت مركز في شغلي في الشركة خصوصا بعد ما بابا مات علشان وضعنا في السوق ميتهزش لما طلبت الطلاق انا طلقتها علي طول ومحستش بعدها ان في حاجة ناقصة في حياتى
انتي بقي لسه عند عرضك ولسه مصرة نتجوز حتي بعد ما عرفتي انى كنت متجوز قبل كده وممكن مخلفش او علي الاقل اخلف بعد سنين
رانيا :لو كنت عايزة اخلف كان زمانى اتجوزت وخلفت من زمان وبقيت ام وطمنت اهلي وفرحتهم بيا تفتكر بعد ما استنيتك تسع سنين من ساعة مكبرت وبقي عندى قلب يحب وبقي بيتقدملي عرسان رفضتهم لانى مشفتكش في ولا واحد فيهم هتخلي عنك بعد ما لقيتك حتي لو كنت اتجوزت قبلي مرة حتى لو كنت هستني سنة او اتنين او حتى عشرة علشان نخلف او حتي منخلفش انت نصيبي وقدرى وانا راضية بيك في كل الظروف
ادهم بعد ما سكت شوية:انا لازم اقفل علشان عندى شغل بكرة وهنام ايه رايك نتقابل بكرة
رانيا :طبعا موافقة
ادهم :تمام هكلمك بكرة ونتفق
تصبحي علي خير
رانيا :وانت من اهله
تاني يوم استنيته يكلمني بس مكلمنيش اتصلت بيه
رانيا :ادهم اذيك مكلمتنيش ليه
ادهم :انا تمام اسف يا رانيا بس مش هينفع نتقابل النهاردة
رانيا :ليه لو مش عايز تقول مفيش مشكلة
ادهم :ماما في المستشفي تعبت فجاة وجبتها عالمستشفي والدكاترة لسه بيكشفو عليها وبيعملولها تحاليل وفحوصات ومحدش طمني وقالي هي فيها ايه لسه
رانيا :ادهم انت في مستشفي ايه
ادهم :ملوش لازمة تيجي انا هبقي اطمنك بالتليفون
رانيا باصرار:ادهم انت في مستشفي ايه
ادهم :مستشفي.....
رانيا :تمام مسافة السكة وهكون عندك
وصلت المستشفي ولقيت ادهم واقف مهموم وسرحان قربت منه
رانيا :ادهم ادهم
مسمعنيش حطيت ايدى علي كتفه وندهت عليه تاني بصلي وكان شكله تايه
ادهم :رانيا
رانيا :اخبار والدتك ايه
ادهم :مش عارف لسه مقالوش حاجة
رانيا :متقلقش هتبقي كويسة
ادهم :يا رب يا رانيا يا رب
وبعد ساعة قعدتها جنبه وانا ساكتة احترمت صمته وان واضح انه مش قادر حتي يتكلم الدكتور طلب ادهم في مكتبه كان رايحله قمت اروح معاه
ادهم :خليكي ملوش لزوم تيجي معايا
رانيا :لا انا جاية معاك
ادهم وقف قدام باب الدكتور متردد يدخل مسكت ايده طبطبت عليها وقلتله ان شاء الله خير ومش هيطلع عندها حاجة وحشة
دخلنا للدكتور
الدكتور :استاذ ادهم والدة حضرتك عندها ورم في المخ في مرحلة مش متاخرة اوى في عملية ممكن نعملها ونسبة النجاح عالية نسبيا
ادهم بصوت مخنوق :كام في المية
الدكتور :من تلاتين لاربعين في المية ومحتاجين نعملها في اسرع وقت يا ريت انت اللي تقولها لان حالتها النفسية هتفرق ادهم فضل ساكت قلت انا للدكتور حاضر عن اذنك ومسكت ايد ادهم وخدته وخرجنا روحنا عند اوضة والدته لقيناها نايمة
حاولت اتكلم مع ادهم بس فضل ساكت
رحت صرخت فيه
رانيا:ادهم فوق سكوتك ده مينفعش والدتك محتاجالك انت لازم تبقي قوى علشانها ده مش وقت ينفع تضعف فيه
ادهم بصوت عالي :وانتي تعرفي ايه انتي عن اللي انا فيه انا امي ممكن تموت الشخص الوحيد الى ليا في الدنيا هيروح مني وهبقي لوحدى مليش حد فاهمة يعني ايه لوحدى ومليش حد
رانيا :اه فاهمة انا والدتي كان عندها ورم بس انا معملتش ذيك انا حاربته معاها تسع شهور وفي الاخر ربنا رحمها وماتت سابتني لوحدى بس انت والدتك لسه عايشة حارب علشانها لان هي كمان ملهاش غيرك
ادهم :انا مش هقدر اعيش من غيرها انا خايف اخسرها مش هستحمل والله وبكي ادهم
شكله وهو بيبكي وجع قلبي عليه وفكرنى بامى واللي عشته معاها وقد ايه كنت خايفة عليها سبته يبكي ويطلع كل اللي جواه رجعنا تاني لوالدته لقيناها صحيت ادهم بصلي وهو خايف ابتسمتله وقلتله كل حاجة هتبقي بخير متقلقش ادخل اتكلم مع والدتك وطمنها
ادهم :ماما حبيبتي حمد الله عالسلامة
ليلي :الله يسلمك يا حبيبي الدكتور قالك ايه هيكتبلي علي خروج امتي انت عارف انا مبحبش المستشفيات
ادهم :ماما انا عايز اقولك علي حاجة الدكتور قال ان نتيجة التحاليل ان عندك ورم بس فيه عملية هتعمليها وهتبقي كويسة وانا معاكي متخافيش
ليلي :مش خايفة يا حبيبي طول ما انت بخير طول ما انت جنبي انا مش خايفة انا عايزة بس ربنا يطول في عمرى علشان اطمن عليك
ادهم حضنها :هتبقي بخير وهتطمني عليا ربنا يخليكي ليا
ليلي :ويخليك ليا
خرج ادهم وقالي
ادهم :رانيا انا اسف علي اللي قلته انا مكنت
رانيا قاطعته :مش محتاج تتاسف انا مقدرة اللي انت فيه
ادهم :تعالي اعرفك علي ماما
دخلنا لوالدته
ادهم :ماما دي رانيا جات تطمن عليكي
ليلي :تشرفنا تسلمي يا حبيبتي تعبناكي معانا
رانيا :مفيش تعب ولا حاجة يا طنط الف حمدلله علي سلامة حضرتك
ليلي :الله يسلمك يا رب
رانيا :انا لازم امشى دلوقتي
ليلي :هتيجي تاني
رانيا: طبعا يا طنط
ليلي :ادهم وصل رانيا
ادهم :حاضر يا ماما
وصلني ادهم وقبل ما انزل مسك ايدى ومنعني من النزول و
ادهم :انا متشكر اوى يا رانيا انا مش عارف من غيرك كنت هعمل ايه النهاردة
رانيا :انا معملتش حاجة هجيلك بكرة ان شاء الله
ادهم :ملوش لزوم انا
رانيا باصرار :ادهم اشوفك بكرة مع السلامة
ادهم بابتسامة :مع السلامة
ورحت تاني يوم وفضلت اروح كل يوم وبعد تلت ايام طنط ليلي عملت العملية ادهم كان خايف اوى وهي في العمليات وانا كنت بحاول اطمنه الحمد لله العملية نجحت اول ما الدكتور قال كده ادهم حضني ادهم بفرحة شديدة :العملية نجحت يا رانيا ماما مش هتسبني ماما بقت بخير
رانيا بصدمة :اااا.. ال ... الحمد لله يا ادهم حمدلله علي سلامتها
ادهم :الله يسلمك يا حبيبتي
ودخل ادهم لوالدته بعد ما خرجوها من اوضة العمليات
وسابني متفاجأة من اللي عمله واللي قاله ادهم قالي يا حبيبتي صح قالها والله
دخلت لقيت طنط ليلي فاقت وادهم بيبوس ايديها وراسها وفرحان ومبيقولش غير حمدالله علي سلامتك يا ماما
دخلت سلمت علي طنط ولما جيت امشي طنط طلبت من ادهم يوصلني ويسيبها تنام وترتاح
ادهم وصلني وقبل ما انزل
ادهم :رانيا لو سمحتي هو احنا ممكن نتجوز
رانيا :
ادهم :هو انا ممكن اطلب ايدك من اهلك واتجوزك
رانيا :
ادهم مسك ايدى :رانيا انا بحبك
رانيا :وانا كمان بحبك
ادهم :تقبلي تتجوزينى
رانيا :اقبل جداااا
واتجوزنا وبعد ما اتجوزنا بتلت سنين جبت ليلي حبيبة باباها ودلوعة جدتها وبعدها بسنتين جبت حازم واتحققت احلامى كلها مع ادهم فتي احلامى وفرحة عمرى كله اللي اثبت انه يستاهل كل السنين اللي استنيته فيها ويستاهل اكتر منها كمان💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
